आज दिनभर के खबर ल अपन गुरतुर छत्तीसगढ़ी भाखा म पढ़व

मन की बात

प्रधानमंत्री नरेंद्र मोदी ह कीहिन कि कोविड टीकाकरण के सफलता भारत के मजबूती ल बताथे। ओमन कीहिन कि सौ करोड़ कोविड टीका लगाये के उपलब्धि के बाद देश ह आज नवा उत्साह अउ नवा उर्जा ले आगू बाढ़त हवय। आकाशवाणी ले मन की बात कारिक्रम म श्री मोदी ह कीहिन कि सौ करोड़ के टीकाकरण अभियान म हमर स्वास्थ्यकर्मी मन ह बड़ मेहनत अउ संकल्प ले एक ठिन नवा मिसाल पेश करीन हे।
प्रधानमंत्री ह अवइया इतवार के सरदार पटेल के जयंती ल धियान म राखत स्वतंत्र भारत के पहिली गृह मंत्री, लौह पुरूष सरदार वल्लभभाई पटेल ल नमन करीन। ओमन ए मउका म लोगन मनले कीहिन कि ए जयंती ल राष्ट्रीय एकता दिवस के रूप म मनावय अउ एकता के संदेश देवइया गतिविधि ले जरूर जुड़य। श्री मोदी ह बताइन कि संस्कृति मंत्रालय ह देशभक्ति के गीत, रंगोली अउ लोरी के तीन ठिन प्रतियोगिता शुरू करे के फैसला लेहे। ये प्रतियोगिता इकतीस अक्टूबर के सरदार पटेल के जयंती ले शुरू होही।
स्वच्छ भारत मिशन उपर गोठबात करत श्री मोदी ह लोगन मनले अपील करीन कि ओमन प्लास्टिक के उपयोग के खिलाफ संकल्प लेंवय। ओमन लोगन मन ल तिहार के मउका म खरीदारी के बेरा म वोकल फॅार लोकल के घलो सुरता दिलाईन। उंहें प्रधानमंत्री ह मन की बात कारिक्रम म आज छत्तीसगढ़ के दउरगांव के जय गोंडवाना महिला स्व-सहायता समूह के काम के सराहना करत कीहिन कि स्वच्छ भारत मिशन म ये समूह ह बड़ सुघ्घर काम करत हे।

ई-मेगा लीगल सर्विस कैम्प

आजादी के अमृत महोत्सव म आज छत्तीसगढ़ उच्च न्यायालय डहार ले प्रदेश के 23 ठिन जिला अउ सत्र न्यायालय मन म ई-मेगा लीगल सर्विस कैम्प के आयोजन करे गीस। एखर शुभारंभ मुख्य न्यायाधीश अरूप कुमार गोस्वामी  ह करीन ।
एखर तहत पैरा लीगल वालिंटियर अउ पैनल लॉयर के टीम बनाये गीस हे, जउन ह जम्मों गांव के घर-घर म जाके लोगन मन ल कानूनी जानकारी देवत हे। मुख्य न्यायाधीश ह नालसा के हेल्पलाइन नंबर – एक पांच एक शून्य शून्य ले कानूनी मदद लेके लोगन मनले अपील करीन हे।
ए कैम्प म बिलासपुर के 1295, कोरिया जिला के 188 अउ धमतरी जिला के 4240 लोगन मन लाभ लीन।

केंद्र कोविड टीकाकरण/नियंत्रण

केंद्र सरकार ह राज्य अउ केंद्रशासित प्रदेश मनले कोविड टीकाकरण के काम ल तेज करे बर कीहिन हे। जानबा के मुताबिक केंद्र ह ए बछर के आखरी तक जम्मों पात्र लोगन मन ल कोविड टीका लगाये के लक्ष्य राखे हे। केंद्रीय स्वास्थ्य सचिव राजेश भूषण ह राज्य मनके स्वास्थ्य सचिव अउ राष्ट्रीय स्वास्थ्य मिशन के निदेशक मन संग काली वीडियो कॅान्फ्रेंस म टीकाकरण के प्रगति के समीक्षा करीन।
बइठका म कोविड के दूसरा डोज देके गति बढ़ाय खातिर जोर दे गीस। ए महीना के इक्कीस तारीख तक देश म सौ करोड़ लोगन मन ल कोविड टीका लगाये जा चुके हे।
इही बीच केंद्र ह राज्य अउ केंद्रशासित प्रदेश मनले कीहिन हे कि अवइया तिहार ल ध्यान म राखत कोरोना नियंत्रण म ढील झन देवय । तिहार ल सुरक्षित तरीका ले मनाये बर कोविड दिशा-निर्देश के कड़ाई ले पालन करय।
केंद्रीय स्वास्थ्य मंत्री ह कीहिन हे कि सार्वजनिक जगा मन म लोगन मनके बीच सुरक्षित दूरी राखे अउ एखरे संग कोरोना प्रबंधन खातिर संक्रमण के पता लगाये, इलाज के बेवस्था करय। श्री भूषण ह कीहिन कि जिला स्वास्थ्य अधिकारी मन ल केंद्र ले जारी परामर्श के मुताबिक तुरते कार्रवाई करना चाही।

कोविड टीका

राष्ट्रव्यापी टीकाकरण अभियान के तहत देश म अब तक 102
करोड़ 10 लाख ले जादा कोविड टीका लगाये जा चुके हे। पाछू चौबीस घंटा म 77 लाख 40 हजार ले जादा टीका लगाये गीस हे।
एति कोरोना वैक्सीनेशन काम म छत्त्ीसगढ़ के रायगढ़ जिला देश म सबले उंचा स्थान म हवय। एक सर्वे म ये जानकारी मिले हे कि रायगढ़ जिला के वैक्सीनेशन रेट 79.66 प्रतिशत हवय। एखर बर मुख्यमंत्री भूपेश बघेल ह रायगढ़ जिला प्रशासन समेत जिला म रहइया अउ टीकाकरण काम म जुटे टीम ल बधाई अउ शुभकामना दीन हे।
इही बीच प्रदेश म कोरोना संक्रमण के दर म सरलग सुधार होवत हे। जेखर ले औसत पॉजीटिविटी दर 0.13 प्रतिशत म आगे हवय। प्रदेश म काली 28 मनखे मन कोरोना संक्रमित पाय गीस। अभी के बेरा म 230 मरीज मनके आने आने अस्पताल अउ होम आइसोलेशन म इलाज चलत हवय।

राज्यपाल-आरोग्य भारती

राज्यपाल अनुसूईया उइके ह कीहिन हे कि लोगन मन ल अपन रोग  प्रतिरोधक क्षमता बढ़ाये खातिर खान-पान अउ रहन-सहन म विशेष धियान रखना चाही। सुश्री उइके ह ए बात आरोग्य भारती छत्तीसगढ़ प्रांत के अखिल भारतीय प्रतिनिधि मंडल के बइठका म कीहिन। ओमन कीहिन कि आरोग्य भारती प्रिवेंशन इज बैटर देन क्योर के अवधारणा म काम करत आम लोगन मन ल स्वास्थ्य के प्रति जागरूक करत हवय।
कोरोना के प्रति जागरूक करत राज्यपाल ह कीहिन कि लोगन मन खातिर ऑक्सीजन अउ शुद्ध हवा बहुत जरूरी हवय। एखर सेती ओमन ल पेड़ पौधा के संरक्षण करना चाही। संगेसंग राज्यपाल ह जड़ी-बूटी म आधारित पारंपरिक चिकित्सा पद्धति ल घलो संरक्षित करे बर जरूरी बताइन ।
सुश्री उइके ह आरोग्य भारती डहार ले कोरोना काल म करे गे काम बुता के सराहना करत कीहिन कि ग्रामीण क्षेत्र मन म आरोग्य मित्र बनाए जावय, जेखर ले स्वास्थ्य के क्षेत्र म उंखर मनके सहयोग ले जा सकही। ए मउका म राज्यपाल ह आरोग्य भारती के स्मारिका अउ संस्था के वेबसाइट के उद्घाटन घलो करीन।

सहायक प्राध्यापक परीक्षा

मुख्यमंत्री भूपेश बघेल ह सहायक प्राध्यापक परीक्षा म चयनित उम्मीदवार मनके नियुक्ति के संबंध म पुलिस सत्यापन के प्रक्रिया ल जल्द पूरा करे के निर्देश विभागीय अधिकारी मन ल देहे। मुख्यमंत्री ह ट्वीट म कीहिन कि ओमन ल सोशल मीडिया के माध्यम ले सहायक प्राध्यापक परीक्षा म चयन करे गे उम्मीदवार मन ल पुलिस सत्यापन पूरा न हो पाय ले कुछ मनखे मन ल नियुक्ति न मिल पाये के जानकारी मिले हे।

जवान डिस्चार्ज

राजनांदगांव जिला के मलैदा बेस कैम्प म तैनात आईटीबीपी के जम्मों छब्बीस झिन जवान मन के हालत म सुधार के बाद ओमन ल डिस्चार्ज कर दे गेहे।
विकासखंड चिकित्सा अधिकारी डॅाक्टर विवेक बिसेन ह बताइन कि बुधवार के रतिहा ये जम्मों जवान मन ल फूड प्वाईजनिंग होगे रीहिस। जेखर बाद ओमन ल निगरानी म राखे गे रीहिस। ए दउरान कैम्प म तैनात दूसर जवान मनके घलो स्वास्थ्य परीक्षण करे गीस, जेमा जम्मों झिन स्वस्थ पाये गीन।

आदिवासी नृत्य महोत्सव

राजधानी रायपुर के सांईस कालेज मैदान म ए बेरा राष्ट्रीय आदिवासी नृत्य महोत्सव अउ राज्योत्सव के तियारी जोरदरहा चलत हे। मुख्यमंत्री ह आज रायपुर म राखे गे एक बइठका म तियारी के समीक्षा करीन। जेमा बताय गीस कि 28 अक्टूबर के राष्ट्रीय आदिवासी नृत्य महोत्सव के शुभारंभ के मउका म प्रतिभागी देश के कलाकार मन परंपरागत परिधान म अपन प्रस्तुति दीही।
उंहें राज्य स्थापना दिवस एक नवंबर के मनाये जाही। ए मउका म आयोजित राज्य अलंकरण समारोह म आने आने क्षेत्र मन म सुघ्घर काम करइया 33 मनखे मन ल अलंकृत करे जाही।