राज्यपाल लोकार्पण
राज्यपाल अनुसूइया उइके ह छत्तीसगढ़ निजी विश्वविद्यालय विनियामक आयोग के नवा बने भवन ‘‘विद्यानिलयम्‘‘ के लोकार्पण करीन।
राज्यपाल ह विश्वविद्यालय मनले आग्रह करीन कि नवा शिक्षा नीति के अनुरूप पाठ्यक्रम तियार करंय। आयोग नवा शिक्षा नीति के खाका तियार करे म विश्वविद्यालय के मदद करही।
ई-मेगा लीगल सर्विस कैम्प
राष्ट्रीय विधिक सेवा प्राधिकरण अउ आउटरीच प्रोग्राम डहार ले प्रदेश म काली चौबीस अक्टूबर के ई-मेगा लीगल सर्विस कैम्प के आयोजन करे जाही।
छत्तीसगढ़ उच्च न्यायालय बिलासपुर के मुख्य न्यायाधीश अउ छत्तीसगढ़ राज्य विधिक सेवा प्राधिकरण के प्रमुख संरक्षक न्यायमूर्ति अरूप कुमार गोस्वामी बीहनिया साढ़े दस बजे राज्य के सबो तेईस सिविल डिस्ट्रिक्ट म होवइया ई-मेगा लीगल सर्विस कैम्प के वीडियो कॉन्फ्रेसिंग के माध्यम ले शुभारंभ करही।
कार्यक्रम के अध्यक्षता छत्तीसगढ़ उच्च न्यायालय के न्यायाधीश न्यायमूर्ति गौतम भंडारे करहीं। रायपुर न्यायालय परिसर म आयोजित कार्यक्रम म रायपुर जिला अउ सत्र न्यायाधीश अरविंद कुमार वर्मा, कलेक्टर सौरभ कुमार अउ वरिष्ठ पुलिस अधीक्षक प्रशांत अग्रवाल घलो शामिल होही। ए बेरा म आने आने विभाग के प्रदर्शनी घलो लगाये जाही।
कोविड टीका
राष्ट्रव्यापी टीकाकरण अभियान के तहत देश म अब तक एक सौ एक करोड़ तीस लाख ले जादा कोविड टीका लगाये जा चुके हे।
एति प्रदेश म कोरोना रोधी टीकाकरण अभियान तेजी ले चलत हे। प्रदेश म अब तक दू करोड़ बाईस लाख तिरानबे हजार ले जादा कोरोना रोधी टीका लगाये जा चुके हे। एमा एक करोड़ छप्पन लाख अठारा हजार ले जादा लोगन मन ल पहिली अउ छियांसठ लाख पचहत्तर हजार ले जादा लोगन मन ल दूसरइया टीका लगाये गेहे।
इही बीच छत्तीसगढ़ के बीस ठिन जिला म काली कोरोना संक्रमण के कोनो नवा मामला आगू नइ आय हे। प्रदेश भर म काली छब्बीस मनखे मन कोरोना संक्रमित पाय गेहे। वर्तमान म प्रदेश के औसत पॉजीटीविटी दर शून्य दशमलव एक दू प्रतिशत हे। उंहें देश म स्वस्थ होय के दर अंठानबे दशमलव एक छै प्रतिशत होगे हे।
भूलन द मेज पुरस्कार
सड़सठवां राष्ट्रीय फिल्म पुरस्कार वितरण समारोह पच्चीस अक्टूबर के दिल्ली के विज्ञान हॉल म आयोजित करे जाही। ए मउका म उप राष्ट्रपति एम. वेकैंया नायडू, छत्तीसगढ़ी फिल्म ‘‘भूलन द मेज‘‘ के निर्देशक मनोज वर्मा ल पुरस्कृत करही।
भूलन द मेज राष्ट्रीय पुरस्कार प्राप्त करने वाला पहिली छत्तीसगढ़ी फिल्म हे। ए फिल्म के प्रदर्शन आने आने फिल्म महोत्सव म हो चुके हे। ए फिल्म संजीव बख्शी के उपन्यास ‘‘भूलन कांदा‘‘ उपर आधारित हरय।
ओबीसी सर्वे
छत्तीसगढ़ म अन्य पिछड़ा वर्ग अउ आर्थिक रूप ले कमजोर वर्ग के सर्वेक्षण करके क्वांटीफायबल डाटा एकत्रित करे बर बनाये गे क्वांटीफायबल डाटा आयोग ल अब तक ओबीसी वर्ग के लोगन ले सड़सठ लाख तिरसठ हजार ले जादा आवेदन मिले हे।
जबकि राज्य के जनसंख्या म राशन कार्ड के अनुसार ओबीस के जनसंख्या एक करोड़ चार लाख इकहत्तर हजार ले जादा हे। आयोग ल मिले आवेदन म प्रदेश के ग्रामीण क्षेत्र म ओबीसी वर्ग के लोगन ले चौरासी लाख बीस हजार ले जादा अउ शहरी क्षेत्र म दस लाख चार हजार ले जादा आवेदन मिले हे।
मन की बात
प्रधानमंत्री नरेन्द्र मोदी काली बीहनिया ग्यारा बजे आकाशवाणी ले ‘‘मन की बात‘‘ करीकरम म अपन विचार साझा करही। ए ह मासिक रेडियो कारीकरम के बियासी कड़ी हरय।
मन की बात कार्यक्रम आकाशवाणी अउ दूरदर्शन के जम्मों नेटवर्क म प्रसारित होही। ये आकाशवाणी समाचार के वेबसाईट अउ न्यूज ऑन एआईआर मोबाइल ऐप म घलो उपलब्ध रीही। आकाशवाणी समाचार, डीडी न्यूज, प्रधानमंत्री कार्यालय, सूचना अउ प्रसारण मंत्रालय के यू-ट्यूब चैनल म एखर सीधा प्रसारण होही।
आकाशवाणी ले हिंदी प्रसारण के तुरंत बाद मन की बात कार्यक्रम ल प्रादेशिक भाषा म प्रसारित करे जाही। प्रादेशिक भाषा म एला रात आठ बजे फेर सुने जा सकत हे।
बातो-बातों में
देशभर म मनाये जात आजादी के अमृत महोत्सव के तहत केंद्र अउ राज्य सरकार के आने आने विभाग डहार ले कतकोन कार्यक्रम के आयोजन कराये जात हे।
इही कड़ी म लोगन ल मौसम अउ जलवायु के आने आने पहलु के बारे म जागरूक करे बर रायपुर के मौसम विज्ञान केंद्र डहार ले घलो कतकोन प्रयास करे जात हे। ए बारे म अउ जादा जानकारी बर आकाशवाणी समाचार ह मौसम विज्ञान डॅाक्टर एच.पी. चंद्रा ले गोठबात करीन।
ए कार्यक्रम के प्रसारण समसामयिक विषय म आधारित हमर साप्ताहिक कार्यक्रम बातों-बातों मे के अंतर्गत काली चौबीस अक्टूबर, रविवार के बीहनिया साढ़े नौ बजे आकाशवाणी केंद्र रायपुर ले करे जाही। एला छत्तीसगढ़ स्थित आकाशवाणी के सबो केंद्र एके संगरा रिले करही।
अमृत महोत्सव-क्विज विजेता-जवाब
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता‘‘ म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी के दसवां अंक म छत्तीसगढ़ी बुलेटिन म प्रश्न रिहीस- ‘‘असहयोग आंदोलन के बेरा वामनराव लाखे जी ह कौन से उपाधि के त्याग करे रीहिन। – एखर सही जवाब हे-राय साहब
सवाल के जवाब म बड़ संख्या म श्रोता मन ह अपन जवाब भेजीन। फेर, सबले पहिली जवाब भेजइया विजेता हवय -धमतरी जिला के ग्राम- रानीगांव खिलेश कुमार साहू। आकाशवाणी परिवार डहार ले हमन ह श्री साहू ल अब्बड़ अकन बधाई अउ सुभाकामना देवत हन। श्री साहू ह आकाशवाणी समाचार के नियमित श्रोता हरय।
नैनीताल यात्री वापसी
उत्तराखंड के नैनीताल म फंसे भिलाई के सबो यात्री आज सुरक्षित लहुटे े हे। भिलाई सेक्टर आठ स्थित एरोबेटिक क्ल्ब ले नैनीताल गे पर्यटन दल के सबो सदस्य दिल्ली ले समता एक्सप्रेस ले आज बीहनिया सकुशल लौटीन। दुर्ग स्टेशन म जिला अउ पुलिस प्रशासन डहार ले ए यात्री मन के फूल देके स्वागत करे गीस।
ए यात्री मन नैनीताल पहुंचे के बाद भू-स्खलन होय के सेती उंहा फंस गे रीहिन।
चैलेंजर ट्रॅाफी
बीसीसीआई के जूनियर इंडिया अंडर – नाइंटिन चैलेंजर ट्रॅाफी स्पर्धा बर भिलाई नगर के क्रिकेट खिलाड़ी विजय यादव के चयन होइस हे। राजेंद्र क्रिकेट एकेडमी के संचालक अउ बीसीसीआई के लेवल-दू कोच राजेन्द्र सिंह ह बताइन कि बीसीसीआई के ए राष्ट्रीय स्पर्धा बर चयनित खिलाड़ी विजय यादव एकेडमी बर पाछू छै बछर ले खेलत हे।
अउ अब थोरकुन समाचार सार म –
– जवाहर नवोदय विद्यालय माना कैम्प रायपुर म कक्षा नवमीं म प्रवेश बर इकतीस अक्टूबर अउ कक्षा छठवीं बर अवइया तीस नवंबर तक ऑनलाइन आवेदन मंगाय गेहे।
– रायपुर के पचपेड़ी नाका स्थित एक कोचिंग सेंटर के प्रबंध संचालक के शिकायत म कोतवाली पुलिस ह कोचिंग सेंटर के एजेंट के खिलाफ एक करोउ़ तिरानबे लाख रूपिया ले जादा के ठगी के मामला दर्ज करे हे।
अउ
– दुर्ग जिला म कलेक्टर जनदर्शन हर सप्ताह सोमवार अउ मंगलवार के दिन आयोजित करे जाही। जिला के नागरिक मन अपन समस्या के संबंध म आवेदन कलेक्टर ल दे सकत हे।