प्रधानमंत्री संबोधन
प्रधानमंत्री नरेंद्र मोदी ह कीहिन हे कि सौ करोड़ कोविड टीका लगाये के आंकड़ा पार करे के बाद घलो महामारी के खिलाफ देश के लड़ाई अभी नइ सिराय हे। ओमन कीहिन कि सबो झिन ल कोविड दिशा-निर्देश के पालन सुनिश्चित करना चाही। आज बीहनिया राष्ट्र ल संबोधित करत प्रधानमंत्री ह तिहार के दउरान लोगन मनले पूरा सतर्कता अउ सावधानी बरते के अपील करे हे।
प्रधानमंत्री ह कीहिन कि भारत के टीकाकरण अभियान म- सबका साथ सबका विकास, सबका विश्वास और सबका प्रयास – ए नारा ह सुघ्घर उदाहरण हरय। ओमन कीहिन कि भारत ह एक मुश्किल अउ असाधारण लक्ष्य ल सफलता पूर्वक हासिल करे हे। ओमन ए उपलब्धि के श्रेय एक सौ तीस करोड़ देशवासी मनके प्रयास ल दीन ।
श्री मोदी ह कीहिन कि सौ करोड़ वैक्सिन सिरिफ एक संख्या नइ हे, फेर ए ह एक राष्ट्र के रूप म देश के क्षमता ल बताथे। ओमन कीहिन कि दुनियाभर म सौ बछर म पहिली घांव फैले ए महामारी ले भारत जउन तरीका ले निपटे हे, वो ह प्रशंसनीय हरय। ए महामारी के दउरान भारत हे साबित करे हे कि वो ह टीका के विकास अउ अनुसंधान बर कोनो भी तरीका ले विकसित देश मनले पाछू नइ हे।
कोविड टीका
देशभर म टीकाकरण अभियान म अब तक सौ करोड़ उनसठ लाख ले जादा कोविड टीका लगाये जा चुके हे। केंद्रीय स्वास्थ्य मंत्रालय ह बताइन कि काली इकसठ लाख सत्ताईस हजार ले जादा के टीका लगाये गीस।
इही बीच छत्तीसगढ़ म कोरोना वैक्सीन के पहिला डोज लेवइया मनके संख्या डेढ़ करोढ़ ल पार कर देहे। उंहें प्रदेश म छैंसठ लाख ले जादा लोगन मन दूसरा डोज घलो लगवा डारे हे।
स्वास्थ्य विभाग के अनुसार पहिली अउ दूसर खुराक मिलाके प्रदेश म अब तक दू करोड़ बाईस लाख ले जादा टीका लगाये जा चुके हे।
एसपी कॉन्फ्रेंस
मुख्यमंत्री भूपेश बघेल ह कीहिन हे कि प्रदेश म हुक्काबार पूरा तरीका ले रोक लगाये जाही। ओमन प्रदेश म नशा के कारोबार ल रोके बर कड़ा कार्रवाई करे के निर्देश दीन हे।
आज राजधानी रायपुर म पुलिस महानिरीक्षक अउ पुलिस अधीक्षक मनके कॉन्फ्रेंस ल संबोधित करत मुख्यमंत्री ह कीहिन कि छत्तीसगढ़ म दूसर राज्य मनले नशीला पदार्थ के अवैध बिक्री अउ तस्करी ल रोके बर कड़ा कार्रवाई करे जाय। ओमन नशीला पदार्थ के कारोबार उपर प्रभावी रोकथाम बर ओड़िशा, मध्यप्रदेश अउ राजस्थान जइसे सीमा ले लगे राज्य मनके मन संग आईजी अउ एसपी ल बइठका करे के निर्देश दीन हे।
सांप्रदायिक घटना ल रोके अउ शांति बेवस्था बनाये खातिर मुख्यमंत्री ह जम्मों पुलिस अधीक्षक मन ल अपन जिला म गुप्तचर सूचना तंत्र ल अउ बने ढंग ले विकसित करे के सुझाव दीन। संगेसंग पुलिस अधीक्षक मन ल हर जिला म सोशल मीडिया के निगरानी बर विशेष दल बनाए बर कीहिन। सोशल मीडिया म अफवाह फैलाय वाले मन ल चिन्ह के ओमन के खिलाफ कड़ा कार्रवाई करंय।
मुख्यमंत्री ह जम्मों एसपी अउ आईजी ल अपन क्षेत्र म धोखाधड़ी करइया चिटफंड कंपनी मनके पदाधिकारी मन ल तुरते गिरप्तार करे अउ कानूनी कार्रवाई करे के निर्देश दीन। ओमन कीहिन कि कलेक्टर अउ एसपी आपसी तालमेल के संग दोषी चिटफंड कंपनी मनके संपत्ति ल पहिचान के ओला तुरते कुर्क करे के कार्रवाई करंय।
कॅान्फ्रेंस म गृहमंत्री ताम्रध्वज साहू, कृषि मंत्री रविंद्र चौबे, मुख्य सचिव अमिताभ जैन, गृह विभाग के अपर मुख्य सचिव सुब्रत साहू अउ पुलिस महानिदेशक डी.एम. अवस्थी समेत संबंधित विभाग मनके वरिष्ठ अधिकारी घलो मौजूद रीहिन।
विमान सेवा
रायपुर ले भोपाल बर सीधा विमान सेवा अइवया दू नवंबर ले चालू होवत हे। ए संबंध म दुर्ग के सांसद विजय बघेल ह अपन दिल्ली प्रवास के दउरान केंद्रीय नागरिक उड्डयन मंत्री ज्योतिरादित्य सिंधिया ले भेंट करके रायपुर एयरपोर्ट म सुविधा बढ़ाय समेत छत्तीसगढ़ म हवाई सेवा के विस्तार ले जुड़े आने-आने विषय उपर चर्चा करके अपन मांग राखे रीहिन।
अमृत महोत्सव-क्विज प्रतियोगिता-छ.ग.
देश के आजादी के पचहत्तर बछर पूरा होय के मउका म आजादी के अमृत महोत्सव के तहत प्रादेशिक समाचार एकांश, आकाशवाणी रायपुर डहार ले प्रश्नोत्तरी कार्यक्रम शुरू करे गेहे।
एमा छत्तीसगढ़ी बुलेटिन सुनइया मन बर आज के सवाल हे-
असहयोग आंदोलन के बेरा वामनराव लाखे जी ह कौन से उपाधि के त्याग करे रीहिन।
श्रोता मन ह अपन जवाब ई-मेल आईडी – आर.ए.आई.पी.यू.आर.एस.ए. डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस के माध्यम ले भेज सकत हे। जउन श्रोता के सही जवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग ओला प्रादेशिक समाचार एकांश डहार ले प्रमाण पत्र घलो जारी करे जाही।
तबादला
राज्य सरकार ह राज्य प्रशासनिक सेवा के आठ झिन अधिकारी मनके तबादला करत उंखर नवा पदस्थापना के आदेश जारी करे हे। आदेश के अनुसार सरगुजा के अपर कलेक्टर संतन देवी जागड़े ल सरगुजा म विशेष कनिष्ठ कर्मचारी बोर्ड के परीक्षा नियंत्रक अउ उप आयुक्त बनाये गेहे।
उंहें रायपुर के अपर कलेक्टर पदमनी भोई साहू ल इही पद म दुर्ग भेजे गेहे। अइसने दूसर अधिकारी मनके प्रभार म घलो फेरबदल करे गेहे।
माओवादी विस्फोटक बरामद
सुकमा जिला म सुरक्षा बल ह माओवादी मन डहार ले पचास ठिन गड्ढा म लगाये गे एक हजार स्पाईक बम बरामद करीन हे। मिले जानकारी के अनुसार केंद्रीय रिजर्व पुलिस बल सीआरपीएफ अउ जिला पुलिस बलके संयुक्त दल अरलपल्ली इलाका म तलाशी अभियान बर निकले रीहिस, इही दउरान माओवादी मन डहार ले छिपाए गे बम ल बरामद करे गीस।
विषाक्त भोजन
राजनांदगांव जिला के मलैदा कैम्प म तैनात भारत-तिब्बत सीमा पुलिस आईटीबीपी अउ छत्तीसगढ़ सशस्त्र बल सीएएफ के इक्कीस झिन जवान जहरीला भोजन खाये ले बीमार होगिन। ए जम्मों जवान मन ल खैरागढ़ के सामुदायिक स्वास्थ्य केंद्र म भर्ती कराय गेहे। सबो जवान मनके हालत खतरा ले बाहिर बताय गेहे।
घटना के सूचना मिले के बाद मुख्यमंत्री भूपेश बघेल ह राजनांदगांव के कलेक्टर अउ पुलिस अधीक्षक ल जम्मों पीड़ित जवान मनके सुघ्घर इलाज करे के बेवस्था करे के निर्देश दीन।
आदिवासी नृत्य महोत्सव
राजधानी रायपुर के साइंस कॉलेज म अठाईस अक्टूबर ले तीस अक्टूबर तक आयोजित होवइया राष्ट्रीय अदिवासी नृत्य महोत्सव म हिस्सा लेबर अभी तक आठ ठिन देश मनके सैद्धांतिक सहमति मिल गेहे। एमा युगांडा, नाइजीरिया अउ उज्बेकिस्तान समेत दूसर देश शामिल हरय। ए नृत्य महोत्सव म भारत के उनतीस राज्य के कलाकार मन घलो अपन प्रस्तुति दीहीं।
इही बीच दुर्ग के संभाग स्तर के आदिवासी नृत्य महोत्सव काली भिलाई म संपन्न होइस। ए मउका म गृहमंत्री ताम्रध्वज साहू अउ आदिमजाति विकासमंत्री प्रेमसाय सिंह टेकाम ह विजेता दल मन ल पुरस्कृत करीन।