धन्वंतरी दवा योजना
लोगन मन ल सस्ता दवई देवाय के उद्देश्य ले प्रदेस म आज ले श्री धन्वंतरी दवा योजना सुरू होगे हे। मुख्यमंत्री भूपेश बघेल ह अपन निवास कार्यालय ले वीडियो कान्फ्रेंसिंग के माध्यम ले ए योजना के सुभारंभ करीन। एखर तहत आज ले राज्य म चौरासी दुकान मनके सेवा सुरू होगे हे। श्री धन्वंतरी जेनरिक मेडिकल स्टोर्स ले उपभोक्ता मन ल सस्ता कीमत म बने दवई मिलही। उपभोक्ता मन ल दवई चिल्हर मूल्य म कम ले कम पचास प्रतिसत अउ जादा ले जादा इकहत्तर प्रतिसत तक छूट के फायदा मिलही। ए योजना म दुरूग अउ जांजगीर-चांपा जिला म पन्द्रह-पन्द्रह दुकान सुरू करे गेहे। उहें, धमतरी, कोरबा अउ रायगढ़ जिला म छह-छह, राजनांदगांव म पांच अउ रईपुर के संगेसंग गौरेला-पेंड्रा-मरवाही, सूरजपुर अउ जशपुर जिला म दो-दो दुकान संचालित करे जावत हे। प्रदेस के आने जिला मन म घलो दू ले तीन दुकान सुरू करे गेहे।
ए मउका म मुख्यमंत्री ह किहीन कि पूरा दुनिया म महंगी होवत स्वास्थ्य सेवा चिंता के कारण हरय। ओमन किहीन कि ए परेसानी ल ध्यान म राखत राज्य सरकार ह स्वास्थ्य सेवा मनके क्षेत्र म आने-आने योजना सुरू करे हे।
मुख्यमंत्री ह ए मउका म दवई के होम किट अउ ट्रेवल किट के लोकार्पण घलो करीन। ए दूनों किट श्री धन्वंतरी जेनेरिक मेडिकल स्टोर म मिलही।
माओवादी-समर्पण
सुकमा जिला म माओवादी मनके घर वापसी बर पुना नर्कोम अभियान चलाय जावत हे। ए अभियान के तहत जिला म सक्रिय एक लाख रूपिया के इनामी समेत तिरालीस झिन माओवादी मन ह आत्मसमर्पण कर देहे। जिला पुलिस के अधिकारी मनके आगू ए माओवादी मन ह हथियार छोड़े के फइसला करे हे। समर्पण करइया बयालीस आने माओवादी मन उपर दस-दस हजार रूपिया के इनाम घोसित रिहीस। ए जम्मों माओवादी, कुकानार, गादीरास, फूलबगड़ी अउ चिंतागुफा इलाका म सक्रिय रिहीस। जिला पुलिस के मुताबिक पुना नर्कोम अभियान के तहत पाछु दिन म एक सौ सत्तर ले जादा माओवादी मन ह आत्मसमर्पण करे हे।
नैनीताल-भूस्खलन
उत्तराखंड के आने-आने इलाका म भारी बरसा के सेती नैनीताल म फंसे छत्तीसगढ़ के नागरिक मन ल जिला प्रसासन डहार ले सुरक्षित निकाल के एक प्राईवेट होटल म ठहरा दे गेहे। नैनीताल के जिला कलेक्टर धीराज सिंह गरबियाल ह आकाशवाणी समाचार ल बतईन कि भिलाई के जम्मों पचपन लोगन मन ल छोटे गाड़ी के मदद ले सुरक्षित स्थान तक पहुंचाय गीस। ए दउरान उंखर खाय-पीये के संग उंखर रूके के बेवस्था घलो कर दे गेहे।
इही बीच, नैनीताल म फंसे भिलाई के पचपन लोगन मनके सकुसल वापसी बर राज्य सरकार डहार ले सरलग परयास करे जावत हे। मुख्यमंत्री भूपेश बघेल ह एखर बर मुख्य सचिव अउ दुरूग के कलेक्टर ल उत्तराखंड प्रसासन ले संपर्क करके जरूरी पहल करे के निरदेस दीन हे।
उहें, दुरूग के सांसद विजय बघेल ह ए घटना के संबंध म केन्द्रीय रक्षा अउ पर्यटन राज्यमंत्री अजय भट्ट ले फोन म गोठबात करीन। एमा केन्द्रीय मंत्री ह नैनीताल म फंसे भिलाई के पचपन यात्री मनके सुरक्षा बर हर किसम ले मदद के आश्वासन दीन। सांसद ह बतईन कि केन्द्रीय मंत्री के निरदेस म भू-स्खलन वाले रद्दा म तुरते मरम्मत अउ राहत के काम सुरू करे गीस। संगेसंग ए रद्दा म फंसे जम्मों यात्री मन ल खाय-पीये के सामान समेत जरूरी सामान घलो देवाय गीस।
खबर के मुताबिक उत्तराखंड के नैनीताल म होय भूस्खलन म भिलाई के करीबन पचपन झिन सदस्य फंसे रिहीन। एमा चवालीस माईलोगिन घलो सामिल हवय। भिलाई इस्पात संयंत्र के एरोबिक क्लब के जम्मों सदस्य पाछु सोलह अक्टूबर के नैनीताल गे रिहीन। इही दउरान ओमन गरम पानी नामक जघा म पहुंचीन त उहां भूस्खलन होगे अउ ए जम्मों लोगन उहां फंस गे रिहीन।
सी.आई.एस.सी.ई.-परीक्षा स्थगित
भारतीय विद्यालय प्रमाण पत्र परीक्षा परिषद-सी.आई.एस.सी.ई. बोर्ड के दसवीं अउ बारहवीं कक्षा के पहिली सेमेस्टर के परीक्षा रद्द कर दे गेहे। परीक्षा के नवा तारीख के बारे म जम्मों संबंधित पक्ष मन ल उचित बेरा म सूचना दे जाही।
आयोडीन अल्पता विकार निवारण दिवस
लोगन मन म आयोडीन के कमी ल दूरिहा करे बर प्रदेसभर म काली ले जागरूकता अभियान चलाय जाही। सत्ताईस अक्टूबर तक चलइया ए अभियान के दउरान गर्भवती माईलोगिन अउ नान्हें लइका मनके सुघ्घर स्वास्थ्य बर ओमन ल आंगनबाड़ी केन्द्र अउ प्राथमिक स्वास्थ्य केन्द्र मनके माध्यम ले जानकारी दे जाही।
इही कड़ी म राजनांदगांव जिला के मुख्य चिकित्सा अधिकारी डॉक्टर मिथलेश चौधरी ह बतईन कि आयोडीन अल्पता विकार अउ आयोडीनयुक्त नमक के सेवन के संबंध म जागरूकता लाने बर आने-आने स्तर म कोसिस करे जावत हे। ए बछर घलो जिला के कतकोन सामुदायिक स्वास्थ्य केन्द्र मन म आयोडीन अल्पता विकास संबंधी जागरूकता कारीकरम आयोजित करे जाही।
पुलिस स्मृति दिवस
छत्तीसगढ़ सशस्त्र बल के चौथा बटालियन के रईपुर के तीर स्थित माना सिविर म काली पुलिस स्मृति दिवस मनाय जाही। ए मउका म राज्य स्तरीय परेड के आयोजन करे जाही। कारीकरम म राज्यपाल अनुसुईया उइके अउ मुख्यमंत्री भूपेश बघेल मौजूद रइही।
कारीकरम के दउरान राज्यपाल ह पाछु बछर सितंबर ले ए बछर इकतीस अगस्त तक राज्य म सहीद होय बत्तीस पुलिसकर्मी मनके परिवार वाले मन ले भेंट करही। संगेसंग देसभर म सहीद होय पुलिस जवान मन ल श्रद्धांजलि घलो दे जाही।
राजनांदगांव-कम्युनिटी पुलिसिंग
राजनांदगांव जिला म लोगन मन ल धोखाधड़ी अउ ठगी ले बचाय बर जिला पुलिस डहार ले ए बेरा बिसेस अभियान चलाय जावत हे। जिला के गांव मन म लोगन मनके बीच संगवारी बनके पुलिस के जवान मन पहुंचत हे अउ ओमन ल धोखाधड़ी या ठगी ले बचे के उपाय बतावत हे। इही कड़ी म खैरागढ़ क्षेत्र के एसडीओ-पुलिस जीसी पति अउ खैरागढ़ थाना प्रभारी राजेश साहू ह पुलिस जवान मन संग संडी गांव म लोगन मनके बइठका लीन। एमा गांव के सरपंच, कोतवाल अउ स्थानीय जनप्रतिनिधि के संगेसंग बड़ संख्या म माईलोगिन मन घलो सामिल होईन।
क्रिकेट-खिलाड़ी चयन
बिलासपुर क्रिकेट संघ के छह खिलाड़ी मन ल अंडर-नाइंटीन कूच बिहार ट्रॉॅफी बर छत्तीसगढ़ के टीम म चुने गेहे। एमा मयंक यादव, अनुज कुमान सिंह, अनुराग मिश्रा, दीपक सिंग बघेल, वासुदेव बरेठ अउ विकेटकीपर प्रथम सिंह सामिल हवय। मयंक यादव ल छत्तीसगढ़ के टीम के कप्तान बनाय गेहे। कूच बिहार ट्राफी प्रतियोगिता अवइया अट्ठाईस नवंबर ले सुरू होही।
अउ अब थोरकुन समाचार सार म –
– राजनांदगांव जिला के रानीतराई इलाका म हाईवा के टक्कर ले फटफटी म बइठे दू झिन मनखे के मउत होगे।
– कोरबा जिला म कुसमुंडा थाना क्षेत्र के बरमपुर मोड़ के तीर रेलवे लाइन पार करत बेरा लोकल ट्रेन के चपेट म आय ले फटफटी म बइठे दू झिन लोगन के मउत होगे।
अउ
– कोरिया पुलिस ह मध्यप्रदेश ले गांजा के तस्करी करइया एक झिन आरोपी ल गिरफ्तार करे हे।