सीबीएसई-परीक्षा कार्यक्रम
केन्द्रीय माध्यमिक शिक्षा बोर्ड-सीबीएसई ह मौजूदा सिक्षा सत्र बर पहिली घांव के दसवीं अउ बारहवीं कक्षा के बोर्ड परीक्षा बर परमुख बिसय मनके टाईम-टेबल जारी कर देहे। एखर मुताबिक दसवीं के परमुख बिसय मनके परीक्षा तीस नवंबर ले अउ बारहवीं के एक दिसंबर ले सुरू होही।
स्वर्णिम विजय मशाल
बछर उन्नीस सौ इकहत्तर के युद्ध म भारतीय सेना डहार ले पाकिस्तान उपर हासिल करे गे ऐतिहासिक जीत के सुरता म ए बछर स्वर्णिम विजय वर्ष मनाय जावत हे। ए मउका म देस के आने-आने भाग म निकाले जावत चार विजय मशाल, ले एक ठिन विजय मशाल ह ए दिन छत्तीसगढ़ प्रवास म हवय।
ए स्वर्णिम विजय मशाल आज कांकेर पहुंचीस। विजय मशाल के नगर प्रवेस करे म एखर स्थानीय गांव वाले मन ह स्वागत करीन। मशाल के स्वागत बर गार्ड ऑफ ऑनर दे गीस। संगेसंग राष्ट्रगान के धुन घलो बजाय गीस। बछर उन्नीस सौ इकहत्तर के युद्ध म अपन परान देवइया सहीद जवान मनके सम्मान म एक मिनट के मौन घलो राखे गीस। ए मउका म सांसद मोहन मंडावी, विधानसभा उपाध्यक्ष मनोज मंडावी, संसदीय सचिव अउ विधायक शिशुपाल सोरी ह उन्नीस सौ इकहत्तर के युद्धवीर मन ल साल अउ स्मृति चिन्ह देके सम्मानित करीन।
एखर पहिली, विजय मशाल के काली बिलासपुर म पहुंचे म उहां उन्नीस सौ इकहत्तर के युद्ध म भाग लेवइया पूर्व सैनिक अउ उंखर परिवार वाले मन ल सम्मानित करे गीस।
कोविड टीका-समीक्षा
केन्द्र ह राज्य अउ केन्द्रसासित प्रदेस मन ले कोविड टीकाकरण के न्यूनतम दर वाले जिला मनके चिन्हारी करे बर केहे हे, जेखर ले ए जिला मन म प्राथमिकता के आधार म टीकाकरण म तेजी लाय जा सकय। राज्य अउ केन्द्रसासित प्रदेस मन ले दूसरइया खुराक दे बर अपनावत रणनीति ल घलो साझा करे बर केहे गेहे।
कोरोना टीका-समाचार
देस म अब तक निन्यानवे करोड़ ले जादा कोविड रोधी टीका लगाय गेहे। एक ट्वीट म केन्द्रीय स्वास्थ्य मंत्री मनसुख मांडविया ह किहीन कि जल्दीच सौ करोड़ कोविड टीकाकरण के लक्ष्य ल पूरा कर ले जाही। स्वास्थ्य मंत्रालय ह बतईन कि काली सत्यासी लाख इकचालीस हजार टीका लगाय गीस।
ऐति, छत्तीसगढ़ म कोरोना ले बचाव बर अब तक दू करोड़ नौ लाख सत्तर हजार ले जादा लोगन मन ल कोविड रोधी टीका लगाय गेहे।
मन की बात
प्रधानमंत्री नरेन्द्र मोदी ह ए महीना के चौबीस तारीख के आकाशवाणी ले ‘‘मन की बात‘‘ करीकरम म अपन विचार साझा करही। ए ह मासिक रेडियो कारीकरम के बयासी कड़ी होही। प्रधानमंत्री ह लोगन मन ले ए कारीकरम बर सुझाव दे बर केहे हे। नमो ऐप या माई जीओवी ओपन फोरम म घलो सुझाव भेजे जा सकत हे।
मुख्यमंत्री-गौठान निरीक्षण
छत्तीसगढ़ के ग्रामीण अर्थव्यवस्था ल मजबूती दे बर चलाय जावत सुराजी गांव योजना म नवा रईपुर के पारागांव म बनाय गे गौठान के मुख्यमंत्री भूपेश बघेल ह आज कांग्रेस के पूर्व अध्यक्ष राहुल गांधी के सलाहकार सचिन राव के संग निरीक्षण करीन। ए दउरान ओमन स्व-सहायता समूह डहार ले गौठान म स्थापित करे गे रूरल इंडस्ट्रीयल पार्क म करे जावत आर्थिक गतिविधि के जायजा लीन।
पारागांव के गौठान म जांच के दउरान मुख्यमंत्री श्री बघेल अउ श्री राव ह महिला समूह डहार ले करे जावत मुर्गी पालन, बकरी पालन, सब्जी उत्पादन, चारागाह विकास, साबुन अउ फिनाइल निर्माण, मिट्टी के सजावटी समान अउ दीया बनाय के काम के घलो जानकारी लीन।
सेवा ग्राम
आजादी के पचहत्तरवां बछर म आजादी के लड़ाई के मूल्य, सिद्धांत, आदर्स अउ महत्मा गांधी के ग्राम-स्वराज के संकल्पना ल अक्षुण्य बनाय राखे बर वर्धा जइसन नवा-रईपुर म घलो सेवा-ग्राम के स्थापना करे जाही। मुख्यमंत्री भूपेश बघेल ह आज कांग्रेस के पूर्व अध्यक्ष राहुल गांधी के सलाहकार सचिन राव के संग नवा रईपुर म प्रस्तावित सेवा-ग्राम बर चुने गे जघा के निरीक्षण करीन। निरीक्षण के दउरान अधिकारी मन ह बतईन कि सेवा-ग्राम बर नवा रईपुर म करीबन ससत्तर एकड़ जमीन के पहिचान करे गेहे।
तबादला
राज्य सरकार ह नारायणपुर के पुलिस अधीक्षक उदय किरण के तबादला करत ओमन ल सहायक पुलिस महानिरीक्षक के रूप म पुलिस मुख्यालय म अटैच कर देहे। उहें, मुख्यमंत्री के सुरक्षा के जिम्मेदारी संभालत गिरजाशंकर जायसवाल ल नारायणपुर के नवा एसपी बनाय गेहे। गृह विभाग डहार ले जारी आदेस के मुताबिक आईपीएस अधिकारी विवेक शुक्ला ल अब मुख्यमंत्री के सुरक्षा के जिम्मेदारी दे गेहे।
अमृत महोत्सव-प्रश्नोत्तरी
‘‘आजादी के अमृत महोत्सव‘‘ म आकाशवाणी समाचार स्वाधीनता संग्राम अउ उंखर गौरवसाली इतिहास म बिसेस अमृत महोत्सव प्रश्नोत्तरी आयोजित करत हे। ए प्रश्न राष्ट्रीय स्तर म आयोजित प्रश्नोत्तरी स्पर्धा के तहत पूछे जाही, जेखर सेती एखर जवाब प्रादेशिक समाचार बुलेटिन के क्विज बर निर्धारित ई-मेल या फेर मोबाइल नंबर के बजाय आज के प्रश्न के बाद बतइया वाट्सऐप नंबर अउ ई-मेल म भेजना हे। अमृत महोत्सव क्विज आज के प्रश्न हरय।
‘‘तमिलनाडु म पंचलानकुरिची किला कोन महान योद्धा के स्मारक के रूप म जाने जाथे ? ‘‘
सुनइया मन अपन उत्तर वाट्सऐप नंबर 8 8 2 6 5 4 6 2 6 2 म या फेर ई-मेल आईडी अमृत महोत्सव क्विज एट द रेट प्रसार भारती डॉट जीओवी डॉट इन म भेज सकत हे। ए प्रतियोगिता बर एक झिन भाग्यसाली प्रतिभागी ल विजेता चुने जाही अउ काली के समाचार प्रभात म उंखर नाव के घोसना करे जाही।
मिलाद-उन-नबी
पैगम्बर हजरत मोहम्मद के जनम दिन ईद-मिलाद-उन-नबी आज छत्तीसगढ़ समेत देस के आने-आने भाग म मनाय जावत हे।
राष्ट्रपति रामनाथ कोविंद, उप राष्ट्रपति वेंकैया नायडु अउ प्रधानमंत्री नरेन्द्र मोदी ह ए मउका म मुस्लिम समुदाय के लोगन मन ल बधाई दीन हे। प्रधानमंत्री ह अपन संदेस म आसा व्यक्त करीन कि ए दिन पूरा दुनिया म करूणा अउ भाईचारा ल बढ़ावा दीही।
इही बीच, राजधानी रईपुर समेत प्रदेसभर म आज मिलाद-उन-नबी के मउका म जम्मों मस्जिद अउ ईदगाह म मुस्लिम समुदाय के लोगन मन ह नमाज अदा करीन। खबर के मुताबिक कोरोना ले बचाव बर प्रसासन ह कोनों किसम के जुलूस अउ रैली के मंजूरी नइ देहे।
बस्तर दशहरा-संपन्न
पचहत्तर दिन तक चलइया विश्व प्रसिद्ध बस्तर दशहरा आज सिरा गे। ए परब के आखिरी दिन मावली माता के डोली अउ मां दंतेश्वरी के छत्र के बिदाई के रस्म अदा करे गीस। बस्तर दशहरा परब सावन महीना के अमावस्या तिथि के पाट जात्रा विधान के संग सुरू होय रिहीस। ए दउरान पचहत्तर से जादा विधान करे गीस।
बस्तर दशहरा के आखिरी रस्म के विधान म परंपरा के मुताबिक राज परिवार के सदस्य कमलचंद्र भंजेदेव के संगेसंग राजगुरू, पुजारी अउ सेवादार मन डहार ले माता मावली के डोली ल कंधा म राखके दंतेश्वरी मंदिर परिसर ले बाहिर लाय गीस। ए दउरान महिला पुलिस मनके जवान मन ह परंपरा के मुताबिक बंदूक चलाके सलामी दीन। एखर बाद मावली माता के डोली अउ मां दंतेश्वरी के छत्र ल सवार करके शक्तिपीठ दंतेवाड़ा बर रवाना करे गीस। ए दउरान भक्त मन ह जघा-जघा पूजापाठ करीन।
अउ अब थोरकुन समाचार सार म –
– भिलाई के मैत्रीबाग म आज बिहनिया सिरिफ छह बछर के उम्र म सफेद टाईगर के मउत होगे। ए टाईगर कैंसर के सेती ले पाछु कई दिन ले बीमार चलत रिहीस।
– राजनांदगांव जिला म नंदई-मोहारा रद्दा म टरक के टक्कर ले फटफटी सवार दू झिन लोगन के मउत होगे।
– जांजगीर-चांपा जिला के पकरिया गांव म गाज गिरे ले दू झिन गांव वाले मन झुलस गे।
अउ
– जशपुर पुलिस ह ओड़िसा सीमा के तीर लवाकेरा चेकपोस्ट म तलाशी अभियान के दउरान गांजा तस्करी के मामला म एक झिन माईलोगिन समेत दू झिन आरोपी ल गिरफ्तार करे हे। बरामद करे गे तेईस किलो गांजा के कीमत करीबन ढाई लाख रूपिया बताय जावत हे।