राज्यपाल-आदिवासी समाज
राज्यपाल अनुसुईया उइके ह आदिवासी समाज के आह्वान करे हे कि नवा तकनीक, शिक्षा अउ व्यवसाय अपना के समाज के मुख्यधारा ले जुड़त हरय। राज्यपाल ह आज महासमुंद जिला के अरण्ड गांव म सर्व आदिवासी समाज डहार ले राखे गे कारीकरम म सामिल होईन। सुश्री उइके ह किहीन कि प्रधानमंत्री नरेन्द्र मोदी ह ओमन ल आदिवासी मनके विकास, अधिकार अउ संरक्षण बर छत्तीसगढ़ के राज्यपाल बनाके भेजे हे। राज्यपाल ह माईलोगिन मन ले अपील करीन कि ओमन धर्म के नाव म कोनों भी प्रकार के बहकावा म झन आय अउ सामाजिक एकता ल बनाय राखय। कारीकरम म राज्यपाल ह स्वतंत्रता संग्राम सेनानी के परिवार अउ सासकीय पद म चयनित युवा प्रतिभा के सम्मान करीन।
मुख्यमंत्री-बस्तर प्रवास
मुख्यमंत्री भूपेश बघेल ह किहीन हे कि बस्तर के विकास बर रासि के कमी नइ होन दे जाही। श्री बघेल ह आज बस्तर प्रवास के दूसरइया दिन बकावंड विकासखंड के गिरोला म पुजारी, सिरहा, गुनिया अउ आने-आने समाज प्रमुख मन ले भेंट करके गोठबात करीन।
मुख्य न्यायाधीश-पदभार
छत्तीसगढ़ उच्च न्यायालय के नवा मुख्य न्यायाधीश अरूप कुमार गोस्वामी ह आज अपन पदभार संभाल लीन। उंखर सुवागत म चीफ जस्टिस कोर्ट म एक ठिन कारीकरम राखे गीस। कारीकरम म उच्च न्यायालय के जम्मों न्यायाधीश अउ न्यायाधिकारी मौजूद रिहीन। कारीकरम म नवा नियुक्त मुख्य न्याधीश ह किहीन कि कोरोना समेत जम्मों विपरीत परिस्थिति म सबो झन ल मिलके काम करना होही, तभे उद्देश्य ल पूरा करे जा सकही।
कोविड टीका
देसव्यापी कोरोना टीकाकरण अभियान म अब तक संतानवे करोड़ उनयासी लाख ले जादा कोविड रोधी टीका लगाय गेहे। केन्द्रीय स्वास्थ्य मंत्रालय ह केहे हे कि काली बारह लाख पांच हजार ले जादा टीका लगाय गीस।
स्वर्णिम विजय मशाल
भारतीय सेना के संग पूरा देस, बछर उन्नीस सौ इकहत्तर के युद्ध म भारत के विजय के स्वर्णिम पचासवां वर्षगांठ मनावत हे। ए मउका म निकाले जावत चार ठिन विजय मशाल म ले एक ठिन मशाल पाछु बारह अक्टूबर ले छत्तीसगढ़ पहुंचे हे।
स्वर्णिम विजय मशाल यात्रा आज बिलासपुर पहुंचीस, जिहां भोजपुरी टोल प्लाजा के तीर स्वागत करे गीस। एखर बाद बिलासपुर के युद्ध स्मारक अमर जवान चउक म मशाल जुलूस ल सलामी दे गीस। ए मउका म नेता प्रतिपक्ष धरमलाल कौशिक अउ सांसद अरूण साव समेत बड़का जनप्रतिनिधि अउ अधिकारी मन मौजूद रिहीन। ए मउका म गणमान्य नागरिक अउ सैन्य संगठन के प्रमुख ह मशाल म पुष्प चक्र अर्पित करीन। उहें, कारीकरम म मौजूद लोगन मन संविधान के अक्षुण्णता के सपथ घलो लीन। ए दउरान विजय मशाल ल भारतीय सेना, आरपीएफ, सीआरपीएफ, पुलिस अउ एनसीसी डहार ले सलामी दे गीस।
उहें, ए मशाल यात्रा के काली रईपुर पहुंचे म घलो स्वागत होईस। कारीकरम म सहीद मन ल श्रद्धांजलि दे गीस। ए विजय मशाल अब तक एक हजार किलोमीटर तक के सफर तय कर डरे हे।
अमृत महोत्सव-स्वच्छता अभियान
आजादी के अमृत महोत्सव के तहत ए बेरा ‘‘क्लीन इंडिया स्वच्छ भारत अभियान‘‘ चलाय जावत हे। नेहरू युवा केन्द्र संगठन पश्चिम क्षेत्र के क्षेत्रीय निदेशक डॉक्टर भुवनेश जैन ह बतईन कि ए अभियान के मुख्य उद्देश्य देसभर म जनभगीदारी ले जनआंदोलन करके प्लास्टिक के बउरे म रोक लगाना अउ पर्यावरण ल सुघ्घर बनाना हे।
कारीकरम के तहत नेहरू युवा केन्द्र संगठन डहार ले आज राजधानी रईपुर के महादेवघाट म स्वच्छता कारीकरम के आयोजन करे गीस। संगठन म छत्तीसगढ़ के राज्य निदेशक श्रीकांत पांडेय ह बतईन कि ए कारीकरम म युवा मन बढ़-चढ़के अपन भागीदारी निभावत हे। नेहरू युवा केन्द्र रईपुर के जिला युवा अधिकारी अर्पित तिवारी ह बतईन कि स्वच्छता कारीकरम जिला अउ ग्राम स्तर म चलाय जावत हे। ए कारीकरम म जम्मों जिला ले ग्यारह हजार पांच सौ किलो ठोस अउ प्लास्टिक कचरा इकट्ठा करे के लक्ष्य राखे गेहे। ए कारीकरम म जिला प्रसासन अउ एनएसएस घलो मदद करत हे।
अमृत महोत्सव-प्रश्नोत्तरी
‘‘आजादी के अमृत महोत्सव‘‘ म आकाशवाणी समाचार स्वाधीनता संग्राम अउ उंखर गौरवसाली इतिहास म बिसेस अमृत महोत्सव प्रश्नोत्तरी आयोजित करत हे। ए प्रश्न राष्ट्रीय स्तर म आयोजित प्रश्नोत्तरी स्पर्धा के तहत पूछे जाही, जेखर सेती एखर जवाब प्रादेशिक समाचार बुलेटिन के क्विज बर निर्धारित ई-मेल या फेर मोबाइल नंबर के बजाय आज के प्रश्न के बाद बतइया वाट्सऐप नंबर अउ ई-मेल म भेजना हे। अमृत महोत्सव क्विज आज के प्रश्न हरय।
‘‘भारतीय विद्यार्थी मन ल भारतीय सभ्यता के मूल्य के सिक्षा दे बर सेंट्रल हिन्दू कालेज के स्थापना कोन करे रिहीन ? ‘‘
सुनइया मन अपन उत्तर वाट्सऐप नंबर 8 8 2 6 5 4 6 2 6 2 म या फेर ई-मेल आईडी अमृत महोत्सव क्विज एट द रेट प्रसार भारती डॉट जीओवी डॉट इन म भेज सकत हे। ए प्रतियोगिता बर एक झिन भाग्यसाली प्रतिभागी ल विजेता चुने जाही अउ काली के समाचार प्रभात म उंखर नाव के घोसना करे जाही।
ईद मिलाद-उन-नबी
काली ईद मिलाद-उन-नबी हरय। कोरोना संक्रमण ल देखत प्रदेस के आने-आने जिला म प्रसासन डहार ले ए तिहार के आयोजन बर दिसा-निरदेस जारी करे गेहे। एखर तहत रैली, सभा अउ प्रभातफेरी के आयोजन म रोक लगाय गेहे। संगेसंग काली मस्जिद म तकरीर अउ परचम कुशाई नइ करे जा सकय। उहें, प्रसासन कोति ले घलो ईद मिलाद-उन-नबी के मउका म सार्वजनिक कारीकरम के आयोजन के मंजूरी नइ दे गेहे। ए दउरान कोनों भी प्रकार के सांस्कृतिक कारीकरम के आयोजन नइ होही।
सरगुजा-बच्चे मौत
नगरीय प्रसासन अउ सरगुजा जिला के प्रभारी मंत्री डॉक्टर शिवकुमार डहरिया ह कहिन हे कि अंबिकापुर के मेडिकल कालेज अस्पताल म नवजात सिसु मनके मउत के घटना फेर मत होय अउ इलाज म थोरको लापरवाही होही त एला बर्दास्त नइ करे जाही। ओमन काली अंबिकापुर पहुंच के अंबिकापुर मेडिकल अस्पताल के जांच करीन। श्री डहरिया ह मेडिकल कालेज के बड़का अधिकारी मनके संग ए घटना ल लेके गोठबात करीन। ओमन अधिकारी मन ल निरदेस दीन कि अस्पताल म कहूं डॉक्टर मनके कमी हवय, त संविदा भर्ती ले खाली पद मन ल भरे जाय।
खबर के मुताबिक अंबिकापुर मेडिकल कालेज अस्पताल के सिसु वार्ड म पाछु सोलह अक्टूबर के चार झिन लइका मनके मउत होगे रिहीस।
चरस-बरामद
रईपुर पुलिस ह चरस तस्करी के मामला म एक झिन आरोपी ल गिरफ्तार करे हे। एखर तीर ले करीबन डेढ़ लाख रूपिया के चरस बरामद करे गेहे। पुलिस के मुताबिक ए आरोपी उत्तराखंड के रहवइया हरय अउ रईपुर के गॉस मेमोरियल मैदान के तीर चरस बेचे बर ग्राहक खोचत रिहीस।
उहें, राजनांदगांव के बसंतपुर पुलिस ह घलो नसीली दवा बेचे के आरोप म एक झिन मनखे ल गिरफ्तार करे हे। एखर तीर ले तीन सौ नग नसीला दवा बरामद करे गेहे।
इही बीच, भिलाई के चरोदा स्थित यूको बैंक म डकैती करे के साजिस रचे के आरोप म पुलिस ह अपचारी बालक समेत पांच झिन आरोपी मन ल गिरफ्तार करे हे। इंखर तीर ले पिस्टल, जिंदा कारतूस, चाकू अउ कटर के संगेसंग डकैती म बउरइया आने-आने जिनीस बरामद करे गेहे।