मुख्यमंत्री-बस्तर
मुख्यमंत्री भूपेश बघेल दू दिन के दउरा म बस्तर पहुंचीन। आज ओमन बस्तर दसहरा के तहत सिरहासार म आयोजित मुरिया दरबार म सामिल होईन। ए मउका म मुख्यमंत्री ह मंदिर समिति बर एक झिन लिपिक अउ भृत्य के भर्ती के घोसना करीन। संगेसंग सरकारी इंजीनियरिंग महाविद्यालय के नामकरण वीर झाड़ा सिरहा के नांव म करे के घोसना करीन। एखर अलावा ओमन दंतेश्वरी मंदिर म आधुनिक ज्योति कक्ष निर्माण के घलो घोसना करीन।
मुख्यमंत्री ह कहिन कि विश्व म सबले जादा दिन चलइया बस्तर दसहरा के कतकोन बिसेसता हे, जेमा सामिल होय बर हर बछर देस-बिदेस के लोगन आथें। मुरिया दरबार म मुख्यमंत्री ह बतईन कि राजीव गांधी किसान न्याय योजना के तहत तीसरइया किश्त के रासि के भुगतान 1 नवंबर के राज्य स्थापना दिवस के मउका म करे जाही।
मुख्यमंत्री ह जगदलपुर के मां दंतेश्वरी हवाईअड्डा म यात्री मनके सुविधा के विस्तार के तहत लगेज कन्वेयर बेल्ट के सुरूआत करीन। एखर बाद ग्राम आसना म बस्तर एकेडमी ऑफ डांस, आर्ट एंड लैंग्वेज-‘‘बादल‘‘ के नवनिर्मित परिसर के लोकार्पण करीन। ए मउका म बादल एकेडमी अउ इंदिरा कला संगीत विश्वविद्यालय के बीच एक ठन समझौता ज्ञापन उपर दस्तखत करीन। उहें, कारीकरम म मुख्यमंत्री ह 232 करोड़ रूपिया ले जादा के 47 ठन बिकास कार्य के लोकार्पण अउ भूमिपूजन घलो करीन।
टी कॉफी-बोर्ड
छत्तीसगढ़ सरकार ह प्रदेस म चाय अउ कॉफी के खेती ल बढ़ावा दे खातिर टी-कॉफी बोर्ड के गठन करे के निर्णय ले हे। टी-कॉफी बोर्ड के अध्यक्ष कृषि मंत्री अउ उपाध्यक्ष उद्योग मंत्री होहीं। बोर्ड म अतिरिक्त मुख्य सचिव, मुख्यमंत्री सचिवालय, कृषि उत्पादन आयुक्त, प्रबंध संचालक सी.एस.आई.डी.सी, कृषि-उद्यानिकी अउ वन विभाग के एक-एक झन अधिकारी समेत दू बिसेस सदस्य सामिल करे जाहीं।
मुख्यमंत्री भूपेश बघेल ह किहीन कि राज्य म स्थानीय किसान मन ल जादा ले जादा लाभ देवाय के उद्देश्य ले टी-कॉफी बोर्ड के गठन करे जावत हे। मुख्यमंत्री ह किहीन कि चाय अउ कॉफी के खेती करइया किसान मन ल राजीव गांधी किसान न्याय योजना अउ कृषि विभाग के आने सुविधा घलो दे जाही।
राज्यपाल-बस्तर प्रवास
राज्यपाल अनुसुईया उइके ह अपन बस्तर दउरा म आज लोहंडीगुड़ा क्षेत्र के ग्रामीण, जनप्रतिनिधि अउ स्व-सहायता समूह के महिला मन ले भेंट करीन। ए दउरान ग्रामीण अपन मांग ल लेके राज्यपाल ल आवेदन दीन। उहें, सर्व आदिवासी समाज के प्रतिनिधि मन घलो राज्यपाल के आघू मांग अउ समस्या राखीन। ए मउका म राज्यपाल ह लोगन अउ प्रतिनिधि मन ले उंखर मांग अउ समस्या के झटकुन निराकरण करे के भरोसा देवइन। ए मउका म राज्यपाल ह सामाजिक प्रतिनिधि मन ले आदिवासी संस्कृति ल संजोय राखे के अपील करीन।
स्वर्णिम विजय मशाल
भारतीय सेना के संग जम्मो देस ह बछर 1971 के युद्ध म भारत के जीत के स्वर्णिम 50वां वर्षगांठ मनावत हे। ए मउका म एक ठिन विजय मशाल छत्तीसगढ़ पहुंचे हे। पाकिस्तान के खिलाफ ए युद्ध म छत्तीसगढ़ के घलो 100 ले जादा सैनिक मन हिस्सा ले रिहीन।
ए विजय मशाल के काली रइपुर पहुंचे म गृहमंत्री ताम्रध्वज साहू ह साईंस कालेज के ऑडिटोरियम म सम्मान करीन। ए मउका म ओमन किहीन कि भारत अउ पाकिस्तान के युद्ध म भाग लेवइया सैनिक सम्मान के सेती, विजय मशाल यात्रा के छत्तीसगढ़ पहुंचना गरब के बात हे। एखर ले अवइया पीढ़ी ल प्रेरणा मिलही। संगे देस के रक्षा म जुटे सैनिक मनके प्रति सम्मान के भावना बाढ़ही। ए विजय मशाल यात्रा काली बिलासपुर पहुंचही।
हाईकोर्ट-रोस्टर
छत्तीसगढ़ उच्च न्यायालय म रोस्टर प्रणाली म बदलाव करे गेहे। काली ले हाईकोर्ट म नवा रोस्टर के संग सरलग सुनवाई होही। रोस्टर के तहत तीन डबल बेंच अउ दस सिंगल बेंच म सुनवाई करे जाही। एमा मुख्य न्यायाधीश न्यायमूर्ति ए.के. गोस्वामी अउ न्यायमूर्ति गौतम भादुड़ी के आने-आने दू बिसेस बेंच घलो सामिल हे।
कोविड टीका
देसव्यापी कोरोना टीकाकरण अभियान म देसभर म अब तक 97 करोड़ 65 लाख ले जादा कोविड टीका लगाय गिस हे। केन्द्रीय स्वास्थ्य मंत्रालय के अनुसार 24 घंटा म 41 लाख 20 हजार ले जादा टीका लगाय गिस।
ऐति, छत्तीसगढ़ म कोरोना ले बचाव बर अब तक 2 करोड़ 7 लाख 55 हजार ले जादा लोगन ल कोरोना टीका लगाय गिस।
इही बीच, कोरोना संक्रमण के दर म सरलग सुधार होवत हे अउ औसत संक्रमण दर 0.09 प्रतिशत म आ गेहे। छत्तीसगढ़ के चार जिला – कबीरधाम, गौरेला-पेंड्रा-मरवाही, कोरिया अउ नारायणपुर म हाल बेरा एको ठन सक्रिय मामला नइ हे।
बच्चे-मौत
अंबिकापुर मेडिकल कालेज अस्पताल के शिशु वार्ड म बीते रतिहा चार झिन लइका मनके मउत हो गिस। अभी मउत के कारण के पता नइ चल पाय हे।
इही बीच, स्वास्थ्य मंत्री टी.एस. सिंहदेव ह घटना के सूचना मिलतेच अपन दिल्ली दउरा ल बीच म ही छोड़के अंबिकापुर लहुट गे हें।
ओति, अस्पताल के डॉक्टर मनके कहिना हे कि मृत सबो लइका बेरा ले पहिली पैदा होय रिहीन हे अउ अइसने लइका मन म ऑक्सीजन के कमी हो जथे। एखरे सेती ए चारों लइका के मउत होय हे। जम्मों लइका मन ह अलग-अलग जघा के रिहीन। इंखर उमर दू ले छत्तीस दिन के रिहीस।
प्रयास विद्यालय-सफलता
आई.आई.टी., एन.आई.टी. अउ सरकारी इंजीनियरिंग संस्था मन म प्रवेस बर जेईई एडवांस परीक्षा म प्रयास आवासीय विद्यालय के लइका मन ह सुघ्घर सफलता पाय हें। ए बछर जेईई-एडवांस के परीक्षा म प्रयास आवासीय विद्यालय के 173 विद्यार्थी सामिल होय रिहीन, जेमा 53 विद्यार्थी सफल होईन।
ए मउका म मुख्यमंत्री भूपेश बघेल अउ आदिम जाति-जनजाति विकास मंत्री डॉक्टर प्रेमसाय सिंह टेकाम ह खुसी जतईन अउ सफलता पाय विद्यार्थी मन ल सुभकामना देवत उंखर उज्ज्वल भविष्य के कामना करीन।
हाथी-लोकेशन
सरगुजा संभाग म विचरण करइया हाथी मनके लोकेशन जाने बर अफ्रीका ले कॉलर आईडी मंगाय गेहे। कॉलर आईडी मादा हाथी मन ल लगाय जाही।
वाइल्ड लाइफ के सीएफ डॉक्टर किनी मॉचियो ह बतईन कि एखर बर बिसेसज्ञ अउ ट्रेकर तमिलनाडु अउ उत्तराखंड ले आइन हें। 20 अक्टूबर के बाद ले हाथी मन ल कॉलर आईडी लगही। एखर बर सूरजपुर जिला के बंशीपुर म कैम्प लगाय जाही। एखर अलावा मैनपाट अउ उदयपुर क्षेत्र के हाथी मन ल घलो चिन्हारी करे गेहे।
मौसम
अवइया 24 घंटा म प्रदेस के कुछेक जघा म हल्का ले मध्यम बरसा अउ गरज-चमक के संग छींटा पड़े के संभावना हे।
मौसम विभाग ले मिले जानकारी ले एक ठन निम्नदाब के क्षेत्र तेलंगाना अउ ओखर तिर-तखार म बने हे। संगे उपरी हवा म चक्रवाती घेरा बने हे। एखर असर ले प्रदेस के कुछेक जघा म बदली छाय रइही अउ बरसा के स्थिति बन सकथे।