स्वर्णिम विजय मशाल
स्वर्णिम विजय बछर के मउका म निकाले जावत विजय मशाल ह आज दुरूग पहुंचीस। ए मउका म एक ठिन मोटर साइकिल रैली निकाले गीस। एमा सेना के जवान, एनसीसी कैडेट्स अउ भूतपूर्व सैनिक मन सामिल होईन। ए रैली नवा रईपुर के सुरू होईस, जउन ह कुम्हारी, चरौदा, भिलाई-तीन अउ पावर हाउस होवत सेक्टर नौ पहुंचीस, जिहां सहीद कैप्टर सुभाष व्यास के घर विजय मशाल ल ले जाय गीस। इही दउरान बछर उन्नीस सौ इकहत्तर के युद्ध म सहीद सैनिक मन ल श्रद्धांजलि दे गीस। उहें, युद्ध म भाग लेवइया अट्ठारह झन सैनिक मनके सम्मान घलो करे गीस।
ए मोटर साइकिल रैली के अगुवई मेजर विपिन कौशिक ह करीन। ओमन बतईन कि कैप्टन व्यास ह बछर उन्नीस सौ इकहत्तर के युद्ध म भाग ले रिहीन।
एखर पहिली, काली राजधानी रईपुर के दीनदयाल उपाध्याय ऑडिटोरियम म मिलिट्री बैंड ह अपन प्रस्तुति दीस। एमा सेना के जवान अउ सिक्षाविद मन ह भाग लीन। ए दउरान स्कूली लइका अउ एनसीसी कैडेट मन ह देशभक्ति ले जुड़े कारीकरम के प्रस्तुति दीन। उहें, मलखंभ के प्रदर्सन घलो करे गीस अउ लोगन ल सैंड आर्ट फिल्म देखाय गीस।
धनवंतरी दवा योजना
लोगन ल सस्ता दवई देवाय के उद्देश्य ले प्रदेस म जल्दीच श्री धनवंतरी दवा योजना सुरू करे जाही। मुख्यमंत्री भूपेश बघेल बीस अक्टूबर के ए योजना के सुरूवात करही। एमा एक सौ उनहत्तर ठन सहर म एक सौ अट्ठायसी अइसन मेडिकल दुकान खोले जाही, जेमा मरीज मन ल एमआरपी म पचास प्रतिसत ले जादा छूट दे जाही। सुरूवात म पच्यासी ठन दवई दुकान खोले जाही अउ बाकी दुकान मन घलो ए महीना के आखिरी म सुरू हो जही।
दुर्घटना
जशपुर जिला म आज होय एक ठिन सड़क हादसा म 4 झिन मनखे के मउत होय के खबर हे। उहें, पन्द्रह ले जादा लोगन घायल होगे हवय। जेमा पांच के हालत गंभीर हवय।
बताय जात हे कि पत्थलगांव म आज बिहनिया श्रद्धालु मन दुर्गा विसर्जन बर जावत रिहीन। इही दउरान तेज रफ्तार कार ह एमन ल अपन चपेट म ले लीस, जेखर ले एक मनखे के मउकाच म मउत होगे। हादसा के बाद गुस्साय लोगन मन रद्दा म चक्काजाम करीन अउ कार म आगी लगा दीन। जिला कलेक्टर अउ पुलिस अधीक्षक ह मउका म पहुंच के स्थिति के जायजा लीन।
इही बीच, पुलिस अधीक्षक ह ए मामला म एक झिन सहायक पुलिस उप निरीक्षक ल निलंबित कर देहे। उहें, पुलिस ह आरोपी कार चालक ल गिरफ्तार कर लेहे। ए दूनों मध्यप्रदेश के रहइया हे।
मुख्यमंत्री भूपेश बघेल, गृह मंत्री ताम्रध्वज साहू, स्वास्थ्य मंत्री टी.एस. सिंहदेव अउ पूर्व मुख्यमंत्री डॉक्टर रमन सिंह ह ए हादसा म होय मनखे के मउत म दुख जताईन हे अउ मुख्यमंत्री ह घटना के जांच के आदेस दीन हे।
लेमरू एलीफेंट रिजर्व
मुख्यमंत्री भूपेश बघेल ह किहीन हे कि सरगुजा म बनइया लेमरू एलीफेंट रिजर्व के क्षेत्र उन्नीस सौ पंचानवे वर्गकिलोमीटर ले कम नइ होही। संगेसंग तीर-तखार के क्षेत्र म रहइया आदिवासी मनके सिकायत के घलो जल्दी निपटारा करे जाही।
मुख्यमंत्री ले काली उंखर निवास म सरगुजा जिला के हसदेव अरण्य क्षेत्र ले पदयात्रा करके रईपुर आय आदिवासी मन ह भेंट करीन अउ ओमन ल अपन समस्या बतईन। ए मउका म श्री बघेल ह बतईन कि केन्द्र सरकार ह लेमरू एलीफेंट रिजर्व बर चार सौ बावन वर्ग किलोमीटर क्षेत्र बर अधिसूचना जारी करीन हे। फेर राज्य सरकार ह एला उन्नीस सौ पंचानवे वर्ग किलोमीटर करे के पहल करे हे।
विजयादशमी
बुराई म अच्छाई, अधर्म म धर्म अउ असत्य म सत्य के जीत के प्रतीक दसहरा परब आज छत्तीसगढ़ संघरा जम्मों देस म श्रद्धा अउ उछाह के संग मनाय जावत हे।
राष्ट्रपति रामनाथ कोविंद, उप राष्ट्रपति एम. वेकैंया नायडू अउ प्रधानमंत्री नरेन्द्र मोदी ह लोगन ल दसहरा के बधाई दीन हे। उहें, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह घलो प्रदेसवासी मन ल दसहरा परब के बधाई दीन हे। संगेसंग राज्यपाल ह आज राजभवन म अउ मुख्यमंत्री ह निवास म शस्त्र पूजा कारीकरम म सामिल होईन अउ प्रदेसवासी मनके खुसहाली के कामना करीन। अइसने, आज प्रदेश म पुलिस अउ अर्द्धसैनिक बल डहार ले घलो शस्त्र पूजा करे गीस।
बस्तर दशहरा
पचहतर दिन तक चलइया विश्व प्रसिद्ध बस्तर दशहरा म आज रतिहा भीतर रैनी के रस्म अदा करे जाही। ए रसम म आठ पहिया वाले दू मंजिला विसालकाय रथ म मां दंतेश्वरी के छत्र ल राख के विधिविधान ले परिक्रमा कराय जाथे। परंपरा के अनुसार ए रथ ल चोरी करके आदिवासी मन ह कुम्हड़ाकोट के जंगल लेगहीं। एखर पहिली बस्तर दशहरा म काली रतिहा मावली परघाव के रसम अदा करे गीस।
उहें, कोंडागांव जिला म काली बस्तर दसहरा म सामिल होय बर जिला भर ले आय ग्राम देवी-देवता के छत्र डोली मन ल बिदाई दे गीस। ए कारीकरम म नारायणपुर के विधायक चंदन कश्यप, प्रशासनिक अधिकारी अउ आदिवासी समाज के प्रतिनिधि मन सामिल होईन।
इही बीच, राज्यपाल अनुसुईया उइके आज ले तीन दिन के बस्तर दउरा म हवय। आज बिहनिया ले ओमन ह जगदलपुर पहुंचीन अउ मां दंतेश्वरी के दर्सन करीन। ओमन ह काली सोलह अक्टूबर के जगदलपुर के कुम्हड़ाकोट म होवइया नुआखाई कारीकरम म सामिल होही अउ इतवार के दिन विमान ले रईपुर लहुट जही।
अमृत महोत्सव-क्विज प्रतियोगिता-छ.ग.
देश के आजादी के पचहत्तर बछर पूरा होय के मउका म आजादी के अमृत महोत्सव के तहत प्रादेशिक समाचार एकांश, आकाशवाणी रायपुर डहार ले प्रश्नोत्तरी कार्यक्रम शुरू करे गेहे।
एमा छत्तीसगढ़ी बुलेटिन सुनइया मन बर आज के सवाल हे-
असहयोग आंदोलन के दउरान पंडित सुंदरलाल शर्मा ह छत्तीसगढ़ के कोन नगर म सत्याग्रह आश्रम के स्थापना करे रिहीन ?
श्रोता मन ह अपन जवाब ई-मेल आईडी – आर.ए.आई.पी.यू.आर.एस.ए. डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस के माध्यम ले भेज सकत हे। जउन श्रोता के सही जवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग ओला प्रादेशिक समाचार एकांश डहार ले ई-प्रमाण पत्र घलो जारी करे जाही।
राजकीय गमछा-लोकार्पण
मुख्यमंत्री भूपेश बघेल ह काली रईपुर म छत्तीसगढ़ के राजकीय गमछा के लोकार्पण करीन। टसर सिल्क अउ कॉटन ले बने ए गमछा म राज्य के पारंपरिक अउ सांस्कृतिक धरोहर ल देखाय गे हवय। गमछा म छत्तीसगढ़ के राजकीय पक्षी पहाड़ी मैना, राजकीय पशु वन भैंसा, मांदर, बस्तर के प्रसिद्ध गौर मुकुट अउ लोकनृत्य करत कलाकार मनके चित्र ल गोदना चित्रकारी के माध्यम ले बनाय गेहे। गमछा के डिजाईन म धान के कटोरा के रूप म प्रसिद्ध छत्तीसगढ़ राज्य ल देखाय बर धान के बाली अउ हल जोतइया किसान ल घलो देखाय गे हवय। सरगुजा के पारंपरिक भित्ती चित्रकला के छाप घलो गमछा के बार्डर म बनाय गे हवय। सासकीय आयोजन म ए गमछा पहुना मन ल भेंट करे जाही। गमछा तैयार करे के पारिश्रमिक के अलावा गमछा ले होवइया आमदनी के पंचानवे प्रतिसत हिस्सा बुनकर अउ गोदना शिल्पकार मन ल दे जाही।
कलाम-जयंती
राष्ट्र आज पूर्व राष्ट्रपति भारतरत्न डॉक्टर ए.पी.जे. अब्दुल कलाम ल उंखर जयंती म श्रद्धांजलि देवत हे। डॉक्टर कलाम भारत के मिसाइल मैन के नाव ले घलो प्रसिद्ध हे। प्रधानमंत्री नरेन्द्र मोदी ह डॉक्टर कलाम ल उंखर जयंती म श्रद्धांजलि दीन हे। एक ठिन ट्वीट म श्री मोदी ह किहीन कि डॉक्टर कलाम ह अपन जीवन ल भारत ल सक्षम बनाय म अर्पित कर दीन। ओमन ह देसवासी मन बर सदा प्रेरणा के स्त्रोत रइही।