प्रधानमंत्री-मानवाधिकार आयोग
प्रधानमंत्री नरेन्द्र मोदी ह किहीन हे कि भारत ह मानवाधिकार के संरक्षण बर अउ कल्याणकारी योजना मनके फायदा हरेक व्यक्ति तक पहुंचाय बर संकल्पबद्ध हे। श्री मोदी ह वीडियो कान्फ्रेंसिंग के माध्यम ले नई दिल्ली म राखे गे राष्ट्रीय मानव अधिकार आयोग के अट्ठाईसवां स्थापना दिवस कारीकरम म बोलत रिहीन। ए मउका म ओमन ह देस के लोगन ल सत-प्रतिसत बुनियादी सुविधा पहुंचाय के आह्वान करीन।
प्रधानमंत्री ह मानवाधिकार के मनमाना रूप ले व्याख्या करे म अउ देस के छबि ल बिगाड़े बर एखर इस्तेमाल के खिलाफ चेतईन हे। ओमन किहीन कि मानव अधिकार के सबले बड़े उल्लंघन तब होथे, जब ओला राजनीतिक फायदा-नुकसान के रूप म देखे जाथे।
कोरोना टीका-समाचार
भारत ह कोविड टीकाकरण अभियान म सौ करोड़ के आंकड़ा पार करइया हे। इही बीच, राष्ट्रव्यापी टीकाकरण अभियान म देस म अभी तक पंचानवे करोड़ नवासी लाख ले जादा कोविड रोधी टीका लगाय गे हवय। केन्द्रीय स्वास्थ्य मंत्रालय ह केहे हे कि काली पैंसठ लाख छियासी हजार ले जादा टीका लगाय गीस।
इही बीच, छत्तीसगढ़ म कोविड संक्रमण के दर म सरलग सुधार होवत हे। अउ औसत पॉजिटीविटी दर ह शून्य दशमलव एक-दू प्रतिशत म आ गे हवय। राज्य के पांच जिला बालोद, कबीरधाम, महासमुंद, गौरेला-पेण्ड्रा-मरवाही अउ नारायणपुर म वर्तमान म कोरोना के एको ठन सक्रिय मामला नइ हे। प्रदेस म काली कोरोना संक्रमण के चौबीस ठन नवा मामला आगू आईस। अभी एक सौ छियानवे झन मरीज मनके इलाज आने-आने अस्पताल या होम आइसोलेशन म चलत हे।
मुख्य न्यायाधीश-शपथ
राज्यपाल अनुसुईया उइके ह छत्तीसगढ़ उच्च न्यायालय के मुख्य न्यायाधीश अरूप कुमार गोस्वामी ल आज राजभवन के दरबार हॉल म पद अउ गोपनीयता के सपथ देवईन। ए मउका म राज्यपाल ह मुख्य न्यायाधीश ल सॉल अउ स्मृति चिन्ह देके सम्मानित करीन। कारीकरम म राज्यपाल अउ मुख्यमंत्री भूपेश बघेल ह न्यायाधीश अरूप कुमार गोस्वामी ल पुष्पगुच्छ देके अपन सुभकामना दीन। मुख्य न्यायाधीश श्री गोस्वामी एखर पहिली आंध्रप्रदेश उच्च न्यायालय के मुख्य न्यायाधीश के पद म रिहीन।
ए समारोह म गृह मंत्री ताम्रध्वज साहू, स्कूल शिक्षा मंत्री डॉक्टर प्रेमसाय सिंह टेकाम, खाद्य मंत्री अमरजीत भगत अउ पूर्व मुख्यमंत्री डॉक्टर रमन सिंह मौजूद रिहीन।
अमृत महोत्सव-प्रश्नोत्तरी
‘‘आजादी के अमृत महोत्सव‘‘ म आकाशवाणी समाचार ह स्वाधीनता संग्राम अउ ओखर गौरवसाली इतिहास बर बिसेस अमृत महोत्सव प्रश्नोत्तरी आयोजित करत हे। ए प्रश्न राष्ट्रीय स्तर म आयोजित प्रश्नोत्तरी स्पर्धा के तहत पूछे जाही, जेखर सेती एखर जवाब प्रादेशिक बुलेटिन के क्विज बर निर्धारित ई-मेल या फेर मोबाइल नंबर के बजाय आज के प्रश्न के बाद बतइया वाट्सऐप नंबर अउ ई-मेल म भेजना हे। अमृत महोत्सव क्विज के आज के प्रश्न हरय।
‘‘भारतीय संविधान के प्रारूप समिति के अध्यक्ष कोन रिहीन ?‘‘
सुनइया मन अपन उत्तर वाट्सऐप नंबर 8 8 2 6 5 4 6 2 6 2 म या फेर ई-मेल आईडी अमृत महोत्सव क्विज एट द रेट प्रसार भारती डॉट जीओवी डॉट इन म भेज सकत हे। ए प्रतियोगिता बर एक झिन भाग्यसाली प्रतिभागी ल विजेता चुने जाही अउ काली के समाचार प्रभात म उंखर नाव के घोसना करे जाही।
स्वर्णिम विजय मशाल
बछर उन्नीस सौ इकहत्तर के युद्ध म पाकिस्तान म भारतीय सेना के ऐतिहासिक जीत के सुरता म निकाले गे स्वर्णिम विजय मशाल ह आज छत्तीसगढ़ पहुंचीस। कबीरधाम जिला के चिल्फी थाना परिसर म होय एक ठिन गरिमामय आयोजन म ए मशाल के स्वागत करे गीस। ए मउका म पूर्व सैनिक अउ जिला के अधिकारी मन ह विजय मशाल म पुष्पचक्र चघा के सहीद मन ल नमन करीन। एखर बाद ए मशाल बेमेतरा पहुंचीस, जिहां सबले पहिली बेमेतरा के पुराना बस स्टैंड म विधायक आशीष छाबड़ा अउ कलेक्टर संघरा पुलिस अधीक्षक अउ भूतपूर्व सैनिक मन ह विजय मसाल के स्वागत करीन। एखर बाद एला बेमेतरा के टाउनहॉल म ले जाय गीस।
खबर के मुताबिक बछर उन्नीस सौ इकहत्तर के युद्ध म पाकिस्तान उपर भारतीय सेना के ऐतिहासिक जीत के पचास बछर पूरा होय के मउका म ए बछर स्वर्णिम विजय वर्ष के रूप म मनाय जावत हे। ए मउका म चार ठन स्वर्णिम विजय मशाल मन देस के आने-आने जगह म यात्रा करत हे। ए मसाल मन ल पाछु बछर सोलह दिसंबर के प्रधानमंत्री नरेन्द्र मोदी ह नई दिल्ली के राष्ट्रीय युद्ध स्मारक म अमर जवान ज्योति ले जलाके रवाना करे रिहीन। जेमा के एक ठन मशाल ह आज छत्तीसगढ़ पहूंचे, जउन ह उन्नीस अक्टूबर तक छत्तीसगढ़ म रइही। ए दउरान भारतीय सेना डहार ले प्रदेस म कतकोन कारीकरम कराय जाही। मिलिट्री बैंड के प्रस्तुति होही, मोटर साइकिल रैली निकाले जाही अउ रक्षा उपकरण के प्रदर्सनी घलो लगाय जाही।
काली तेरह अक्टूबर के छत्तीसगढ़ के राज्यपाल अनुसुईया उइके ह राजभवन म विजय मशाल के स्वागत करही अउ बछर उन्नीस सौ इकहत्तर के युद्ध नायक मन ल सम्मानित करही।
बस्तर दशहरा
पचहत्तर दिन तक चलइया विश्व प्रसिद्ध बस्तर दशहरा के तहत आज बेल पूजा रस्म अदा करे गीस। परंपरानुसार ए रस्म म बेल फल के एक ठिन जोड़ा ल तोड़के दंतेश्वरी मंदिर लाके एला स्थापित करे गीस।
उहें, बस्तर दसहरा के तहत काली फूल रथ के आखिरी परिक्रमा होईस। पन्द्रह अउ सोलह अक्टूबर के बस्तर दसहरा म भीतर रैनी अउ बाहर रैनी के रस्म अदा करे जाही।
माओवादी मुठभेड़
छत्तीसगढ़ अउ ओड़िशा के सीमा म पुलिस अउ माओवादी मनके बीच होय मुठभेड़ म तीन झन माओवादी मन ह मारे गेहे। उहें, एक झिन जवान ह घायल होगे हवय।
मिले जानकारी के अनुसार ओड़िसा के मल्कानगिरी पुलिस ल छत्तीसगढ़ ओड़िसा के सीमा ले लगे तुलसी डोंगरी इलाका म माओवादी मनके सकलाय के सूचना मिले रिहीन। एखर बाद पुलिस के टीम ल इलाका म सर्चिंग म भेजे गीस। इही दउरान इलाका म पहिली ले घात लगाके बइठे माओवादी मन ह जवान मन उपर फायरिंग सुरू कर दीन। पुलिस के जवाबी कार्रवाई म दू झिन महिला संघरा तीन माओवादी मन मारे गीन, जिखर सव ल बरामद कर ले गेहे। ए घटना म पुलिस के एक झिन जवान ह घलो गोली लगे ले घायल होगे हवय, जेला हेलीकॉप्टर ले विशाखापट्टनम भेजे गे हवय। बाद म मउका ले एक ठन इंसास राइफल अउ एक ठन एस.एल.आर. राइफल बरामद करे गेहे।
स्कूल-अवकाश
राज्य सरकार ह बछर दू हजार इक्कीस-बाईस सैक्षणिक सत्र बर साठ दिन के छुट्टी के घोसना कर दे हवय। एमा दसहरा, दीवाली, सीतकालीन अउ ग्रीष्मकालीन छुट्टी सामिल हे। ए संबंध म मंत्रालय ले आदेस जारी कर दे गेहे।
जारी आदेस के अनुसार काली तेरह ले सोलह अक्टूबर तक दसहरा के छुट्टी रइही। उहें, देवारी बर दू ले छह नवंबर तक छुट्टी घोषित करे गेहे। एखर अलावा सीताकालीन अवकाश चौबीस ले अट्ठाईस दिसंबर अउ ग्रीष्मकालीन अवकाश अवइया बछर एक मई ले पन्द्रह जून तक रइही।
जनसंपर्क कार्यालय-कामकाज ठप्प
छत्तीसगढ़ जनसंपर्क अधिकारी संघ के आह्वान म आज प्रदेसभर के जनसंपर्क अधिकारी अउ कमरचारी मन ह एक दिन के कलमबंद हड़ताल करीन। जेखर सेती आज राजधानी रईपुर संघरा प्रदेसभर के जनसंपर्क कार्यालय मन म कामकाज ठप्प रिहीस।
उहें, जनसंपर्क अधिकारी मनके मांग के समर्थन म आज राजपत्रित अधिकारी संघ ह घलो काला पट्टी लगाके काम करीन।
खबर के मुताबिक संचालक जनसंपर्क के पद म राज्य प्रशासनिक सेवा के अधिकारी ल नियुक्त करे गेहे, जेखर विरोध करत जनसंपर्क अधिकारी संघ ह ए मांग करे हे कि ए पद म भारतीय प्रशासनिक सेवा के अधिकारी ल नियुक्त करे जाय।