कवर्धा-कर्फ्यू ढील
कवर्धा सहर म स्थिति अब धीरे-धीरे सामान्य होवत जात हे। जिला प्रसासन ह स्थिति ल देखत काली ले अवइया आदेस तक बिहनिया नौ बजे ले मंझनिया तीन बजे तक जम्मों दुकान मन ल खोले के छूट दे देहे।
जिला कलेक्टर रमेश कुमार शर्मा ह आज पत्रकारवार्ता म बतईन कि व्यावसायिक संस्थान मनके अलावा काली ले सहर के सब्बो सरकारी कार्यालय, बैंक अउ ऑफिस खुलही। संगेसंग स्कूल-कॉलेज अउ कोचिंग सेंटर घलो खोले के आदेस दे गेहे। ओमन बतईन कि सहर के लोगन संझा पांच बजे ले सात बजे तक अपन जरूरी कामबूता बर बाहिर निकल सकथे। ए बेरा ओमन अपन पहिचान पत्र संग म रखना जरूरी होही। ए दउरान सहर के जम्मों सीमा बंद रइही।
इही बीच, भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह आज कवर्धा पहुंचीन। ए दउरान ओमन बीते तीन अक्टूबर के दू समुदाय के बीच होय टकराव के पीड़ित परिवार ले भेंट करीन। ए मउका म डॉक्टर सिंह ह किहीन कि जल्दी ही पीड़ित परिवार के समस्या के निराकरण करे जाही।
लोकवाणी
मुख्यमंत्री भूपेश बघेल ह किहीन कि स्थानीय प्रतिभा, स्थानीय युवा अउ स्थानीय संसाधन के बउरे ले हमन विकास के छत्तीसगढ़ मॉडल ल अउ विस्तार देबो। एखर ले छत्तीसगढ़ के हर क्षेत्र खुसहाल अउ समृद्ध बनही। मुख्यमंत्री आज प्रसारित मासिक रेडियो वार्ता ‘‘लोकवाणी‘‘ के बाईसवीं कड़ी म जनता ले ‘‘जिला स्तर पर विशेष रणनीति से विकास की नई राह‘‘ विषय म गोठबात करत रिहीन।
श्री बघेल ह किहीन कि स्थानीय स्तर म रोजगार के अवसर पैदा करय म जिला प्रसासन के बड़का भूमिका होथे। डीएमएफ अउ मनरेगा ले एमा बहुत मदद करे जा सकथे। ओमन किहीन कि स्थानीय मौसम, मिट्टी अउ ओखर विशेषता ल देखत जे ढंग ले बीजापुर म मिर्ची के खेती के सपना साकार होवत हे। उही ढंग ले जिला प्रसासन के पहल म अब जशपुर जिला म घलो असम जइसन चाय के बगान दिखत हे। अबूझमाड़ म लोगन मन ल सासन के योजना के लाभ मिल सकय। एखर बर गांव मन म सर्वे कराय जात हे।
राम वनगमन पर्यटन परिपथ
रईपुर के तीर चंदखुरी म राम वनगमन पर्यटन परिपथ के सुभारंभ के बेरा म आयोजित तीन दिवसीय सांस्कृतिक संझा के काली समापन होगे। ए बेरा म मुख्यमंत्री भूपेश बघेल ह किहीन कि राम वनगमन पर्यटन परिपथ राज्य के संस्कृति अउ धरोहर ल बचाय राखे के परियोजना हरय। ओमन किहीन कि छत्तीसगढ़ हर क्षेत्र म समृद्ध हे। समारोह म ओमन सरकार के जन कल्याणकारी योजना के उल्लेख करत किहीन कि सरकार राज्य के प्रत्येक व्यक्ति ल खुसहाल बनाय के प्रयास करत हे।
कोरोना समाचार/टीका
प्रदेस म कोविड संक्रमण के दर म सरलग सुधार होवत हे अउ औसत पॉजिटीविटी दर ह शून्य दशमलव एक-शून्य प्रतिसत म आ गेहे। राज्य के पांच जिला – बालोद, कबीरधाम, गौरेला-पेण्ड्रा-मरवाही, नारायणपुर अउ बीजापुर म वर्तमान म कोरोना के एक भी सक्रिय मामला नइ हे। प्रदेस म काली कोरोना संक्रमण के छब्बीस नवा मामला आगू आय हे। वर्तमान म दू सौ पन्द्रह मरीज मनके इलाज आने-आने अस्पताल या होम आइसोलेशन म चलत हे।
इही बीच, प्रदेस म कोरोना ले बचाव बर अब तक दो करोड़ एक लाख बयासी हजार ले जादा कोविड रोधी टीका लगाय जा चुके हे।
क्रेडिट कार्ड-धोखाधड़ी खुलासा
राजाधानी रईपुर म तीन करोड़ रूपिया ले जादा के क्रेडिट कार्ड लोन घोटाला के मामला आगू आय हे। राजधानी पुलिस ह सौ ले जादा लोगन मनके क्रेडिट कार्ड बनाके अउ ओखर ले पइसा निकाल के धोखाधड़ी करइया पांच झिन लोगन ल गिरफ्तार करे हे। एमा दू झिन बैंककर्मी घलो सामिल हे।
मिले जानकारी के मुताबिक सौ ले जादा पीड़ित मन ह ए मामला के सिकायत पुलिस म करे रिहीन। पुलिस ह आरोपी के तीर ले सत्तर ले जादा एक्सिस बैंक के क्रेडिट कार्ड, एक सौ पचास ब्लैंक चेक, एक चारपहिया गाड़ी, एक कार अउ पांच मोटरसाइकिल जब्त करे हे।
प्रधानमंत्री भारतीय अंतरिक्ष संघ
प्रधानमंत्री नरेन्द्र मोदी ह काली बिहनिया ग्यारह बजे वीडियो कान्फ्रेंसिंग के माध्यम ले भारतीय अंतरिक्ष संघ के सुरूवात करही। ए मउका म श्री मोदी ह अंतरिक्ष उद्योग के प्रतिनिधि मन ले गोठबात करही।
भारतीय अंतरिक्ष संघ अंतरिक्ष अउ उपग्रह कंपनी के प्रमुख उद्योग संगठन हे, जउन ह भारतीय अंतरिक्ष उद्योग के सामूहिक प्रतिनिधि होही। भारतीय अंतरिक्ष संघ ह प्रधानमंत्री नरेन्द्र मोदी के आत्मनिर्भर भारत के परिकल्पना के अनुरूप देस ल स्वालम्बी अउ सक्षम बनाय म सहयोग दीही।
माओवादी समाचार
राजनांदगांव जिला के मानपुर ब्लॉक के कोहका थाना क्षेत्र अंतर्गत कोराचा जंगल के पहाड़ी म तलाशी अभियान के दउरान सुरक्षा बल ह माओवादी डम्प बरामद करीन। ए डम्प ले एक किलो गन पाउडर के संग ढाई किलो अमोनियम नाइट्रेड समेत अन्य माओवादी सामग्री बरामद करे गेहे।
मानपुर थाना प्रभारी के नेतृत्व म जिला पुलिस बल अउ डिस्ट्रिक्ट रिजर्व गार्ड-डीआरजी के संयुक्त टीम तलाशी अभियान म निकले रिहीस। इही दउरान कोराचा के जंगल म सक के आधार म जमीन के खुदाई करे गीस, जेमा डम्प के जानकारी मिलीस।
दुर्घटना
प्रदेस म पाछु चौबीस घंटा के दउरान होय अलग-अलग सड़क दुर्घटना म सात लोगन के मउत होगे। उहें, सात आने लोगन घायल होगे हे।
हमर दुरूग संवाददाता ले मिले जानबा के मुताबिक आज बिहनिया एक परिवार डोंगरगढ़ ले मां बम्लेश्वरी के दर्सन करके चारपहिया गाड़ी ले रईपुर लहुटत रिहीन। इही बेरा उंखर गाड़ी अनियंत्रित होके दुरूग के तीर उरला-बोगदा ब्रिज ले नीचे गिर गे। ए हादसा म गाड़ी ड्राईवर समेत तीन झिन के मउत होगे। मउत होय दू झिन मनखे ब्रिज के नीचे म काम करत मजदूर रिहीन, जिखर मउत गाड़ी म दबे ले होईस। उहें, सात झन घायल होगे हे। गाड़ी म आठ लोगन सवार रिहीन। ए जम्मों अश्विनी नगर रईपुर के रहवइया हरय।
ए घटना म होय मउत म मुख्यमंत्री भूपेश बघेल ह दुख प्रकट करीन अउ घायल लोगन मनके जल्दी स्वस्थ होय के कामना करीन।
ऐति, दंतेवाड़ा जिला म आज बस अउ मोटर साइकिल के बीच होय टक्कर म मोटरसायकल सवार दू झिन लोगन के मउका म मउत होगे।
उहें, धमतरी जिला के ग्राम कोडापार-खुसरेंगा के तीर पाछु रतिहा हाईवा ह मोटर साइकिल सवार दू लोगन ल अपन चपेट म ले गीस। ए हादसा म मोटर सायकल सवार दू चचेरा भाई के मउका म मउत होगे।
नवरात्र-पंचमी
आज शारदेय नवरात्र के पंचमी हरय। ए दिन देवी स्कंदमाता के स्वरूप के पूजापाठ करे जाथे। ए मउका म राजधानी रईपुर समेत प्रदेस के आने-आने देवी मंदिर मन म बिसेस सजावट करे गेहे। श्रद्धालु कोरोना प्रोटोकाल के पालन करत मंदिर मन म दर्सन बर जावत हे।
विश्व मानसिक स्वास्थ्य दिवस
आज विश्व मानसिक स्वास्थ्य दिवस हरय। विश्वभर के मानसिक स्वास्थ्य के प्रति जागरूकता लाने के उद्देश्य ले हर साल दस अक्टूबर के ए दिवस मनाय जाथे। ऐति, छत्तीसगढ़ म घलो विश्व मानसिक स्वास्थ्य दिवस के मउका म आने-आने जागरूकता कारीकरम आयोजित करे जात हे।
विशेष रेलगाड़ी
भारतीय रेल तिहार के दउरान यात्री मनके भीड़-भाड़ ल ध्यान म राखत आज बिसेस रेलगाड़ी चलात हे। आकाशवाणी ले बिसेस बातचीत म मध्य पूर्व रेलवे के मुख्य जनसंपर्क अधिकारी राजेश कुमार ह बतईन कि रेलवे ह आज ले इक्कीस नवंबर के बीच पन्द्रह सौ बिसेस रेलगाड़ी चलाय के योजना बनाय हे।