मांडविया-राज्य
केन्द्रीय स्वास्थ्य मंत्री मनसुख मांडविया ह आज उन्नीस राज्य के प्रधान सचिव अउ राष्ट्रीय स्वास्थ्य मिशन के निदेशक मनके संग कोविड स्थिति के समीक्षा करीन। ओमन ह सब्बो राज्य ले अवइया कुछेक दिन म टीकाकरण म तेजी लाय बर किहीन, जेखर ले सौ करोड़ टीकाकरण के लक्ष्य ल प्राप्त करे जा सकय। केन्द्रीय मंत्री ह लोगन ले तिहार के बेरा कोविड निरदेस के पालन करे बर किहीन।
कोरोना समाचार/टीका
प्रदेस म कोविड संक्रमण के दर म सरलग सुधार आवत हे अउ औसत पॉजिटीविटी दर ह शून्य दशमलव एक-शून्य प्रतिसत म आ गे हवय। प्रदेस म काली कोरोना संक्रमण के इक्कीस ठन नवा मामला आगू आय हे। वर्तमान म दू सौ ग्यारह मरीज मनके इलाज आने-आने अस्पताल या होम आइसोलेशन म चलत हे।
उहें, राजनांदगांव कलेक्टर तारण प्रकाश सिन्हा ह कोरोना संक्रमण ल देखत नवरात्र के दउरान डोंगरगढ़ म बम्लेश्वरी मइया के दर्सन बर अवइया पदयात्री मनके यात्रा ल सुरूच म रोके बर दुरूग, बेमेतरा, कबीरधाम अउ बालोद जिला कलेक्टर मन ल चिट्ठी लिखीन हे, जेमा केहे गेहे हवय कि डोंगरगढ़ म नवरात्र के मउका म राखे गे पदयात्रा मेला अउ मीना बाजार म सावधानी के सेती रोक लगाय गेहे।
इही बीच, राज्य म कोरोना ले बांचे बर अभी तक एक करोड़ अंठानवे लाख तिहत्तर हजार ले जादा कोविड टीका लगाय गे हवय।
कवर्धा-कर्फ्यू
कवर्धा शहर म प्रसासन डहार ले आज बिहनिया दस बजे ले मंझनिया दू बजे तक कर्फ्यू म ढील दे गीस। फेर, ए दउरान सहर के सीमा बंद रिहीस।
मुख्यमंत्री भूपेश बघेल ह काली रईपुर के अपन निवास कार्यालय म राखे गे बइठका म कानून अउ बेवस्था के स्थिति के समीक्षा करीन। ओमन ह अधिकारी मन ल कवर्धा घटना के मामला म दोषी लोगन बर कड़ा कार्रवाई करे के निरदेस घलोक दीन। ओमन किहीन कि सांति बेवस्था ल बिगाड़े के परयास ल बर्दास्त नइ करे जाही। मुख्यमंत्री ह पुलिस महानिरीक्षक ले किहीन कि ओमन ह प्रेस कान्फ्रेंस करके वीडियो म दिखत उपद्रवी मनके पहिचान करा के उंखर मन उपर कड़ा कार्रवाई करय।
उहें, कबीरधाम कलेक्टर रमेश कुमार शर्मा ह बतईन कि कवर्धा सहर म स्थिति नियंत्रण म हवय। सर्वसमाज प्रमुख, चेम्बर ऑफ कॉमर्स अउ व्यापारिक संगठन संघरा दूसर लोगन मन ह पांच अक्टूबर के घटना के निंदा करीन हे।
इही बीच, कवर्धा के घटना ल लेके भारतीय जनता पार्टी डहार ले राजधानी रईपुर संघरा प्रदेस के सबो जिला मुख्यालय म आज धरना-प्रदर्शन करे गीस। भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह आरोप लगाईन हे कि कवर्धा मामला म जउन तरीका ले प्रसासन के उपयोग राजनीतिक काम बर करे जात हे, ओखर ले स्थिति बिगड़त हे, ओमन ह मामला के न्यायिक जांच कराय के मांग करीन।
लोकवाणी
मुख्यमंत्री भूपेश बघेल के मासिक रेडियोवार्ता लोकवाणी के बाईसवां कड़ी के प्रसारण काली दस अक्टूबर रविवार के होही। मुख्यमंत्री ह लोकवाणी म ए बखत ‘‘जिला स्तर पर विशेष रणनीति से विकास की नई राह भाग – दो‘‘ बिसय म लोगन ले गोठबात करही। लोकवाणी के प्रसारण छत्तीसगढ़ के आकाशवाणी के सब्बो केन्द्र, एफ.एम. रेडियो अउ क्षेत्रीय समाचार चैनल ले बिहनिया साढ़े दस बजे ले होही।
बस्तर दशहरा
पचहत्तर दिन तक चलइया विश्व प्रसिद्ध बस्तर दशहरा म काली जगदलपुर म फूलरथ के पहिली परिक्रमा होईस। ए दउरान मां दंतेश्वरी के छत्र ल पुजारी डहार ले मंदिर ले बाहिर निकाल गे ओला मौली मंदिर लाके पूजापाठ करे गीस। ए फूल रथ परिक्रमा ह पांच दिन तक चलही। परंपरा के अनुसार जोगी बिठाई के बाद दूसर दिन ले फूलरथ चालू होथे, जउन ह सप्तमी तिथि तक चलथे। एमा पूजापाठ करके बस्तर के आराध्य देवी मां दंतेश्वरी के छत्र ल रथ म राख के एखर परिक्रमा कराय जाथे।
नवोदय विद्यालय-आवेदन
रईपुर जिला के माना कैम्प के जवाहर नवोदय विद्यालय म कक्षा छठवीं म प्रवेस बर ग्यारह नवंबर अउ कक्षा नौवीं म प्रवेस बर इकतीस अक्टूबर तक ऑनलाइन आवेदन मंगाय गे हवय।
उहें, महासमुंद जिला के जवाहर नवोदय विद्यालय म कक्षा छठवीं म प्रवेस बर ऑनलाइन आवेदन के आखिरी तारीख तीस नवंबर राखे गे हवय।
अमृत महोत्सव-क्विज विजेता
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता‘‘ म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी के नौवां अंक म छत्तीसगढ़ी बुलेटिन म प्रश्न रिहीस- ‘‘बछर 1876 के आदिवासी विद्रोह के बेरा बस्तर रियासत के राजा कौन रीहिन ?‘‘ एखर सही जवाब हे- राजा भैरमदेव ।
सवाल के जवाब म बड़ संख्या म श्रोता मन ह अपन जवाब भेजीन। फेर, सबले पहिली जवाब भेजइया विजेता हवय – राजनांदगांव जिला के ग्राम- ढोढरी निवासी महेश कुमार निषाद। आकाशवाणी परिवार डहार ले हमन ह श्री निषाद ल अब्बड़ अकन बधाई अउ सुभाकामना देवत हन। श्री निषाद ह आकाशवाणी समाचार के नियमित श्रोता हरय।
होल्ड बाईट – महेश कुमार निषाद ( 15 सेकेंड)
स्पोर्ट्स कॉम्प्लेक्स/खेल
कोरिया के जिला मुख्यालय बैकुंठपुर म विश्व स्तरीय अधोसंरचना के संग स्पोर्र्ट्स कॉम्प्लेक्स तैयार करे जाही। करीबन तीन एकड़ क्षेत्र म बनने वाला ए स्पोर्ट्स कॉम्प्लेक्स बर कलेक्टर ह डीएमएफ ले तीन करोड़ साठ लाख रूपिया के रासि मंजूर करीन हे।
ऐति, रईपुर के माना के छत्तीसगढ़ सशस्त्र बल के चौथा बटालियन के फायरिंग रेंज म राज्य स्तरीय निशानेबाजी प्रतियोगिता आयोजित करे गीस। राष्ट्रीय स्तर के चैंपियनशिप काली ले अहमदाबाद म सुरू होही।
इही बीच, प्रदेस म संचालित स्वामी आत्मानंद शासकीय अंग्रेजी माध्यम स्कूल के राज्य स्तरीय खेल प्रतियोगिता के आयोजन अट्ठाईस अउ उनतीस अक्टूबर के रईपुर म करे जाही।
मौसम
दक्षिण-पश्चिम मानसून के बिदाई छत्तीसगढ़ के अंबिकापुर संघरा देस के अउ कोनों-कोनों जगह म घलो होगे हवय। एखर बर छत्तीसगढ़ के कुछेक भाग म परिस्थिति अनुकूल बन गे हवय।
मौसम विभाग के अनुसार उत्तर अण्डमान समुद्र अउ ओखर तीर-तखार म उपरी हवा के एक ठन चक्रवाती घेरा बने हवय, जेखर परभाव ले अवइया अड़तालीस घंटा म एक ठिन कम दबाव के क्षेत्र बने के संभावना हे, जेखर परभाव ले अवइया चौबीस घंटा म प्रदेस के एक-दू जगह म हल्का ले मध्यम बरसा होय के संभावना हे।
अउ अब थोरकुन समाचार सार म –
– एक भारत-श्रेष्ठ भारत के तहत जांजगीर-चांपा जिला के ग्राम पंचायत कटघरी के शासकीय प्राथमिक साला म आज स्कूली लइका मन डहार ले झांकी संघरा कतकोन कारीकरम के प्रस्तुति दे गीस।
– बलरामपुर जिला के वाड्रफनगर के पण्डो अउ पहाड़ी कोरवा बिसेस पिछड़ा जनजाति बाहुल्य गांव म मनरेगा के तहत मिलइया फायदा के जानकारी दे बर रोजगार दिवस के आयोजन करे गीस।
– यात्री मनके सुविधा ल देखत रेलवे ह तिरूनेल्वेली ले बिलासपुर के बीच चलत सुपरफास्ट, साप्ताहिक पूजा स्पेशल ट्रेन के अवई-जवई ल एक फरवरी तक बढ़ा दे हवय।
– वन्यजीव संरक्षण सप्ताह म महासमुंद जिला म गज यात्रा वाहन ल झंडा दिखाके रवाना करे गीस। एखर माध्यम ले ग्रामीण मन ल हाथी के व्यवहार अउ उंखर ले बांचे के बारे म जागरूक करे जाही।
– राजनांदगांव जिला के सबो विकासखंड म आपराधिक घटना ल रोके बर अउ सांति व्यवस्था बनाय बर थाना प्रभारी मनके संग पुलिस के टीम फ्लैग अउ पैदल मार्च करत हे।
– कोंडागांव जिला म मर्दापाल चउक के तीर तलाशी के दउरान पुलिस ह एक ठिन वाहन ले पैंसठ किलो गांजा जब्त करके दू झिन आरोपी मन ल गिरफ्तार करीन हे।
अउ
– रायपुर पुलिस ह गुढ़ियारी के एक ठन सोना-चांदी दुकान म पाछु दिन होय करोड़ों रूपिया के चोरी के मामला म झारखंड ले दू झिन आरोपी मन ल गिरफ्तार करे हे। उंखर मन तीर ले अड़तीस किलो चांदी बरामद करे गे हवय।