राम वनगमन पर्यटन परिपथ
मुख्यमंत्री भूपेश बघेल ह आज रायपुर तीर चंदखुरी म राम वनगमन पर्यटन परिपथ के शुभारंभ करे के संगेसंग चंदखुरी स्थित माता कौशल्या के प्राचीन मंदिर परिसर के विकास अउ सौंदर्यीकरण काम के लोकार्पण घलो करीन। ए मउका म चंदखुरी मंदिर परिसर म तीन दिन तक कार्यक्रम आयोजित करे जात हे। जेमा राष्ट्रीय अउ अंतर्राष्ट्रीय स्तर के कलाकार अउ मानस मंडली मन ह अपन प्रस्तुती दीही। संगेसंग लाइट एंड साउंड शो के माध्यम ले भगवान राम के वनवास अउ राम वनगमन पथ के कहानी उपर आधारित कार्यक्रम पेश करे जाही।
सरकार कोविड चाइल्ड केयर
केंद्र सरकार ह आज पीएम केयर्स फंड के चलत लईका मनके योजना बर दिशा निर्देश जारी करीन।
ए योजना के उद्देश्य कोरोना महामारी के सेती अनाथ होय लईका मनके देखभार अउ सुरक्षा ल सुनिश्चित करना हे। एखर चलत अइसन लईका मन ल तेईस बछर के उम्र होय तक स्वास्थ्य बीमा ले सरलग सुविधा उपलब्ध कराय जाही। संगेसंग शिक्षा अउ आने जरूरत बर आर्थिक सहायता घलो दे जाही। अठारा बछर के उम्र तक अइसन लईका मन ल शिक्षा अउ स्वास्थ्य जइसे जरूरत ल पूरा करे खातिर मासिक राशि दे जाही, अउ तेइस बछर के उम्र पूरा होय म एक संगरा दस लाख रूपिया दे जाही।
योजना के लाभ लेबर पात्र लइका मन ल ए बछर उनतीस मई ले इकतीस दिसंबर तक नामांकन कराना होही। एमा वो सबो लइका मन योजना के लाभ ले सकही जउन मन कोरोना महामारी म माता-पिता दूनो या फेर कोनो एक ल खो देहे, या फेर ओखर मनके कानूनी अभिभावक मन जउन मन अइसने लइका मन ल गोद ले होही, जेखर कोरोना के सेती मउत होगे।
रेणुका सिंह बस्तर
केंद्रीय राज्यमंत्री रेणुका सिंह ह बस्तर के बाबू सेममरा म बनत ट्राईफूड पार्क ल पूरा देश म अनूठा बतात कीहिन कि ए पार्क ह क्षेत्र के आदिवासी मन ल समृद्ध बनाही।
श्रीमती सिंह ह आज ए पार्क के निरीक्षण करे बर जगदलपुर पहुंचीन । ए बेरा म ओमन ह पत्रकार मनले गोठबात करत कीहिन कि पूरा देश म दू ठिन ट्राइफूड पार्क हे जेमा ले एक ठिन छत्तीसगढ़ के जगदलपुर म बनही।
सरोज पांडेय
राज्यसभा सांसद सरोज पांडेय ह आज दुर्ग के मैत्री नगर स्थ्ति अपन घर म पैर फिसले ले गिरके घायल होगे। जेखर बाद म मुख्यमंत्री भूपेश बघेल के निर्देश के अनुसार सरोज पांडेय ल बने इलाज बर ग्रीन कारिडोर के माध्यम से भिलाई ले रायपुर लाये जात हे। अब के बेरा म सुश्री पांडेय ल भिलाई के सेक्टर नौ के अस्पताल म दाखिल करे गेहे। जिहां डॅाक्टर मन ह ओमन ल रायपुर ले जाय के सलाह दीन हे ।
भाजपा कार्यकारिणी घोषित
भारतीय जनता पार्टी के राष्ट्रीय कार्यकारिणी ल घोषित कर दे गेहे। छत्तीसगढ़ के पूर्व मुख्यमंत्री डॅाक्टर रमनसिंह ल एक घांव फेर राष्ट्रीय उपाध्यक्ष बनाय गेहे। उंहें राष्ट्रीय कार्यकारिणी म सांसद सरोज पांडेय, अरूण साव, पूर्व मंत्री अजय चंद्राकर, अउ लता उसेण्डी ल शामिल करे गेहे ।
भाजपा सेवा और समर्पण
भारतीय जनता पार्टी डहार ले प्रधानमंत्री नरेंद्र मोदी के जनमदिन म चलाये जात सेवा और समर्पण अभियान के आज समापन होइस। जेखर चलत प्रदेश भर म पार्टी के कार्यकर्ता मन डहार ले केंद्र सरकार के योजना अउ संगठनात्मक निर्णय के अनुसार आने-आने कार्यक्रम के आयोजन करे गीस।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी के बाइसवां कड़ी के प्रसारण दस अक्टूबर इतवार के होही। मुख्यमंत्री लोकवाणी म ए दारी – जिला स्तर पर विशेष रणनीति से विकास की नइ राह भाग-2 विषय उपर प्रदेशवासी मनले गोठबात करही।
एखर प्रसारण छत्तीसगढ़ स्थित आकाशवाणी के सबो केंद्र एफ.एम. रेडियो अउ क्षेत्रीय समाचार चैनल मनले बीहनिया साढ़े दस बजे ले होही।
शारदेय नवरात्रि
शक्ति के आराधना के परब शारदेय नवरात्रि आज ले शुरू होगे हे। ए मउका म प्रदेश के जम्मों देवी मंदिर मन म नौ दिन तक विशेष पूजा-पाठ करे जात हे। देवी मंदिर के संगेसंग शक्तिपीठ मन म मनोकामना ज्योति कलश के स्थापना घलो करे गेहे। उंहें चौक-चौराहा म घलो पंडाल लगाके देवी मां के मूर्ति स्थापित करे जात हे।
प्रदेश के प्रमुख शक्तिपीठ दंतेवाड़ा म मां दंतेश्वरी, रतनपुर अउ रायपुर स्थित महामाया मंदिर अउ डोंगरगढ़ के मां बम्लेश्वरी के मंदिर म नवरात्रि के बेरा आने आने धार्मिक आयोजन होही। फेर एसो घलो कोरोना संक्रमण के तीसर लहर ल देखत प्रदेश के सबो मंदिर अउ पंडाल म संक्रमण ले बचे खातिर बनाये गे नियम के पालन करना जरूरी होही।
इही बीच रायपुर कलेक्टर सौरभ कुमार ह नवरात्र म होवइया रासगरबा, डांडिया अउ भजन के आयोजन के संबंध म दिशा-निर्देश जारी करीन हे। जेखर चलत कार्यक्रम के जगा म जादा ले जादा दू सौ मनखे मन शामिल हो सकही। संगेसंग कार्यक्रम के जगा म आये-जाये बर आने-आने दरवाजा बनाये जाही। उंहें रतिहा दस बजे तक चलइया कार्यक्रम म कोरोना टीका के दूनो डोज लगइया मन ल अंदर जाय के अनुमति होही।
ओति पचहत्तर दिन तक चलइया विश्व प्रसिद्ध बस्तर दशहरा के आज जोगी बिठाई के रसम करे गीस। एखर चलत सिरहासार भवन म एक झिन जवान लइका ल जोगी बनाके गड्ढा म विधि-विधान से बैठाय गीस। संगेसंग बस्तर दशहरा ल बिना बाधा के संपन्न कराये बर आदिशक्ति मां दंतेश्वरी के आराधना शुरू होइस।
पिछड़ा वर्ग आयोग-पदभार
राज्य पिछड़ा वर्ग आयोग के अध्यक्ष के रूप म थानेश्वर साहू ह आज अपन पदभार संभालीन । ए बेरा म ओमन ह कीहिन कि राष्ट्रीय स्तर म पिछड़ा वर्ग के जनगणना होना चाही। काबर कि सरकार तीर पिछड़ा वर्ग के लोगन मन बर योजना त हवय, फेर जनगणना के अभाव म जनसंख्या के सही जानकारी नइ हे। कार्यक्रम म गृहमंत्री ताम्रध्वज साहू ह मुख्य रूप ले उपस्थित रीहिन।
अउ अब थोरकुन समाचार सार म-
– भारतीय पुलिस सेवा के अधिकारी दीपांशु काबरा ह आज जनसंपर्क आयुक्त के पदभार लीन। श्री काबरा छत्तीसगढ़ के पहिली आईपीएस अधिकारी हे, जउन ल जनसंपर्क के दायित्व सौंपे गेहे।
– नगरीय प्रशासन मंत्री डॅाक्टर शिवकुमार डहरिया ह आज दुर्ग जिला म चौबीसवां थाना के रूप म जामगांव-आर थाना के लोकार्पण करीन। जेखर ले जिला के करीबन सत्ताईस ठिन गांव के लोगन मन ल फायदा होही।
– रायपुर के इंदिरा गांधी राष्ट्रीय मुक्त विश्वविद्यालय इग्नू म स्नातक, स्नातकोत्तर, पीजी डिप्लोमा अउ डिप्लोमा पाठ्यक्रम म प्रवेश बर ऑनलाईन पंजीयन के प्रक्रिया ल ग्यारा अक्टूबर तक बढ़ा दे गेहे ।
– जिला रोजगार अउ स्व रोजगार मार्गदर्शन केंद्र रायपुर डहार ले ग्यारा अक्टूबर के बीहनिया ग्यारा बजे ले प्लेसमेंट कैंप के आयोजन करे जाही।
– दुर्ग जिला म पाछू रतिहा होय रद्दा दुर्घटना म एक झिन आरक्षक के मउत होगे, जउन ह भिलाई नगर थाना म पदस्थ रीहिन।
अउ
– महासमुंद जिला के अंशुला गांव म दशगात्र कार्यक्रम म खाना खाये के बाद कुछु लोगन मनके तबियत बिगड़ गे। जेखर बाद ओमन ल अस्पताल म भर्ती कराय गीस। सबो के हालत खतरा ले बाहिर बताये जात हे।