आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री-आवास योजना

प्रधानमंत्री नरेन्द्र मोदी ह किहीन हे कि प्रधानमंत्री आवास योजना ले देस म तीन करोड़ ले जादा गरीब परिवार लखपति बन गेहे अउ केन्द्र सरकार ह योजना के हितग्राही मनके खाता म सोझे एक लाख करोड़ रूपिया भेजे गेहे।
प्रधानमंत्री ह आजादी के अमृत महोत्सव समारोह म लखनऊ के इंदिरा गां प्रतिष्ठान म राखे गे तीन दिन के नवा सहरी भारत -‘‘शहरी परिदृश्य में बदलाव‘‘ बिसय म राखे गे सम्मेलन अउ प्रदर्सनी के उद्घाटन करीन।

केन्द्रीय वित्तमंत्री-रायपुर

केन्द्रीय वित्तमंत्री निर्मला सीतारमण ह किहीन हे कि केन्द्र सरकार कोति ले छत्तीसगढ़ के आने-आने योजना म भरपूर रासि जारी करे गेहे। आज अपन रईपुर दउरा के बेरा पत्रकार मन ले गोठबात करत ओमन बतईन कि बछर दू हजार नौ ले दू हजार चौदह के बीच छत्तीसगढ़ ल कर हस्तांतरण के रूप म करीबन इकतीस हजार करोड़ रूपिया के रकम मिले रिहीस। उहें, चौदहवां वित्त आयोग आये के बाद बछर दू हजार चौदह ले दू हजार उन्नीस के बीच इही मद म सत्यासी हजार करोड़ रूपिया ले जादा रकम मिले हे, जउन पहिली के तुलना म मोदी सरकार के कार्यकाल म छत्तीसगढ़ ल कर हस्तांतरण के रूप म मिलइया रकम म एक सौ अठहत्तर प्रतिसत के बढ़वार होय हे। अइसने सहायता अनुदान के रूप म केन्द्र ले छत्तीसगढ़ ल मिलइया रकम म घलो करीबन एक सौ पैंतीस प्रतिसत के बढ़वार होय हे।
श्रीमती सीतारमण ह किहीन कि केन्द्र सरकार गरीब मनके कल्याण खातिर लागू आने-आने योजना बर छत्तीसगढ़ ल बने रकम देवत हे। फेर राज्य सरकार अपन हिस्सा के रकम नइ देके ए योजना ल चला नइ पावत हे, जउन गरीब मन संग अन्याय हवय।
केन्द्रीय वित्तमंत्री ह आज अपन रईपुर दउरा के दउरान ‘‘सेवा अउ समर्पण‘‘ कारीकरम म सामिल होईन। रईपुर के भाटागांव टीकाकरण केन्द्र गीन अउ उहां टीकाकरण कक्ष अउ प्रतीक्षा कक्ष ल देखीन। संगेसंग अस्पताल परिसर म वृक्षारोपण करीन। उहें, वित्तमंत्री ह राजधानी रईपुर म राखे गे एक ठिन संगोष्ठी म घलो संघरीन।

मुख्यमंत्री-निर्देश

राज्य सरकार ह जम्मों जिला के सैक्षणिक संस्थान, अस्पताल, आंगनबाड़ समेत अइसन जम्मों सरकारी भवन म जिहां तड़ित चालक नइ लगे हे। उहां जल्दीच लगवाय के निरर्देस दीन हे। मुख्यमंत्री भूपेश बघेल ह जिला कलेक्टर मन ल ए काम ल पहिली पूरा कराय बर किहीन।
जइसन कि जानकारी दे जा चुके हे कि काली बिलासपुर जिला के मस्तुरी ब्लॉक मचखंडा गांव के प्राईवेट स्कूल म गाज गिरे ले एक लइका के मउत होगे अउ कुछेक आने लइका घायल होय हे।

राम वनगमन पर्यटन-परिपथ

रईपुर तीर चंदखुरी के माता कौशिल्या मंदिर म राम वनगमन पर्यटन परिपथ परियोजना के सुभारंभ मउका म तीन दिन के समारोह राखे जाही। ए परियोजना म नवा पर्यटन सुभीता के लोकार्पण के संगेसंग राम वनगमन पर्यटन परिपथ के सुभारंभ सात अक्टूबर के होही। सुभारंभ के बेरा म राष्ट्रीय अउ अंतर्राष्ट्रीय स्तर के कलाकार मनके संगेसंग स्थानीय लोक कलाकार अउ मानस मंडली कारीकरम प्रस्तुत करही। संगेसंग लाइट ऑफ साउंड शो ले भगवान राम के वनवास अउ राम वनगमन पथ के कहनी-किस्सा म आधारित कारीकरम देखाय जाही। भगवान राम वनवास के बेरा छत्तीसगढ़ के जउन नौ जघा ले होके निकले ओला पर्यटन बर तियार करे जात हे।

तबादला

राज्य सरकार ह भारतीय प्रशासनिक सेवा के तीन झिन अधिकारी मनके आज नवा पदस्थापना देहे। एखर मुताबिक सिद्धार्थ कोमल परदेशी ल जनसंपर्क विभाग के सचिव बनाय गेहे। उंखर तीर मुख्यमंत्री सचिवालय के सचिव के संग पीडब्ल्यूडी अउ खनिज विभाग के जिम्मेवारी पहिलीच ले हवय। उहें, एस. भारतीदासन ल आयुक्त सह-संचालक जनसंपर्क के जिम्मेवारी ले मुक्त कर दे गेहे। उहें, मंत्रालय म उप सचिव रेहे तुलिका प्रजापति ल कृषि विभाग म उप सचिव बनाय गेहे।

कोरोना समाचार

प्रदेस म कोरोना के सक्रिय मामला म सरलग कमी आवत हे। अभी राज्य म दू सौ बत्तीस मरीज के आने-आने अस्पताल या होम आइसोलेशन म इलाज होवत हे। अभी प्रदेस के औसत पॉजिटीविटी दर शून्य दशमलव शून्य पांच प्रतिसत हवय। काली प्रदेस के बाईस ठन जिला म कोरोना संक्रमण के एको  झिन मरीज नइ पाय गेहे।
इही बीच, प्रदेस म अब तक एक करोड़ चौरानवे लाख छियालीस हजार ले जादा झन ल कोविड टीका लगाय गेहे।

कवर्धा-विवाद

कवर्धा म परन दिन दू समुदाय के बीच होय विवाद के बाद अब तनाव के स्थिति म सुधार आय हे। जिला प्रसासन ह ऐतिहात के तौर म चौबीस घंटा बर सहर म कर्फ्यू लगा देहे। जिला कलेक्टर रमेश कुमार शर्मा अउ पुलिस अधीक्षक मोहित गर्ग के अगुवई म सीटी कोतवाली थाना ले फ्लैग मार्च निकाले गीस अउ लोगन ले सांति बनाय राखे के अपील करे गीस।
अतिरिक्त पुलिस अधीक्षक मनीषा सिंह ह बतईन कि कवर्धा, सहसपुर लोहारा, पंडरिया, पोड़ी अउ पिपरिया म स्थिति ल देखत कफ्यू लगाय गेहे। सिरिफ दवई दुकान खोले के छूट दे गेहे। उहें, चउक-चउराहा म पुलिस बल तैनात हवय।
इही बीच, विश्व हिन्दू परिषद ह आज कबीरधाम जिला म बंद के आह्वान करीन हे।

अमृत महोत्सव-प्रश्नोत्तरी

‘‘आजादी के अमृत महोत्सव‘‘ म आकाशवाणी समाचार स्वाधीनता संग्राम अउ उंखर गौरवसाली इतिहास म बिसेस अमृत महोत्सव प्रश्नोत्तरी आयोजित करत हे। ए प्रश्न राष्ट्रीय स्तर म आयोजित प्रश्नोत्तरी स्पर्धा के तहत पूछे जाही, जेखर सेती एखर जवाब प्रादेशिक बुलेटिन के क्विज बर निर्धारित ई-मेल या फेर मोबाइल नंबर के बजाय आज के प्रश्न के बाद बतइया वाट्सऐप नंबर अउ ई-मेल भेजना हे। अमृत महोत्सव क्विज आज के प्रश्न हरय।
‘‘भारत के कोन से सहर ब्रिटिश राज म ग्रीष्मकालीन राजधानी के रूप म काम करय अउ ओला पहाड़ के रानी केहे जात रिहीस हे ?‘‘
सुनइया मन अपन उत्तर वाट्सऐप नंबर 8 8 2 6 5 4 6 2 6 2 म या फेर ई-मेल आईडी अमृत महोत्सव क्विज एट द रेट प्रसार भारती डॉट जीओवी डॉट इन म भेज सकत हे। ए प्रतियोगिता बर एक झिन भाग्यसाली प्रतिभागी ल विजेता चुने जाही अउ काली के समाचार प्रभात म उंखर नाव के घोसना करे जाही।

आईईडी-बरामद

सुकमा जिला के माओवाद परभावित क्षेत्र म चलाय जात सर्चिंग ऑपरेशन के बेरा माओवादी मन कोति ले तीन ठिन बम बरामद करे गेहे। एला माओवादी मन ह गोरगुंडा के रेंगापारा अउ बंजारापारा के बीच सुरक्षा बल ल नकसान पहुंचाय बर लगाय रिहीन। फेर सुरक्षा बल के मुश्तैदी ले ए विस्फोटक ल बरामद करके मउका म नष्ट कर देहे। संगेसंग ओ क्षेत्र म सर्चिंग घलो बढ़ाय गेहे।

बिलासपुर-बार मामला

बिलासपुर म पाछु इतवार के रतिहा एक बार म पार्टी के बेरा होय हंगामा के मामला ल मुख्यमंत्री भूपेश बघेल गंभीरता ले लीन हे। मुख्यमंत्री ह पुलिस महानिदेशक डी.एम. अवस्थी ले ए घटना के संबंध म रिपोर्ट दे बर किहीन हे। उहें, ए मामला म पुलिस विभाग ह तत्काल परभाव ले घटना म सामिल दू झिन अतिरिक्त पुलिस अधीक्षक के तबादला कर देहे। कोटा डीएसपी रश्मि कौर चावला ल गौरेला-पेण्ड्रा-मरवाही अउ सृष्टि चंद्राकर ल कोंडागांव म बालक विरूद्ध अपराध अन्वेषण शाखा भेजे गेहे।

लघु वनोपज संग्रहण

छत्तीसगढ़ राज्य लघु वनोपज संघ कोति ले प्रदेस म लघु वनोपज सकेले के काम ल अउ बने बनाय बर भारतीय कृषि अनुसंधान परिषद के संग अनुबंध करे गेहे। अनुबंध म प्रदेस म लघु वनोपज के संग्रहण, भंडारण अउ प्रसंस्करण बर आधुनिक उपकरण देवाय जाही, जेखर ले महिला स्व-सहायता समूह अउ आदिवासी परिवार ल बने आमदनी मिल सकय।

मौसम

दक्षिण-पश्चिम बंगाल के खाड़ी अउ ओखर-तीखार म बने चक्रवाती घेरा के परभाव ले छत्तीसगढ़ म नमी आवत हे, जेखर असर ले आज राजधानी रईपुर समेत प्रदेस के कुछेक जघा म बरसा होवत हे। रईपुर मौसम विज्ञान केन्द्र के मुताबिक काली घलो प्रदेस के कुछेक जघा म हल्का ले मध्यम बरसा हो सकत हे। उहें, एक-दू जघा म गरज-चमक संग गाज गिरे के चेतावनी दे गेहे।