कोविड टीका
केन्द्र सरकार कोविड रोधी टीकाकरण अभियान म गंभीर बीमारी मन ले ग्रस्त लइका मन ल प्राथमिकता दीही। राष्ट्रीय टीकाकरण तकनीकी सलाहकार के अध्यक्ष डॉक्टर एम.के. अरोड़ा ह ए जानकारी देवत किहीन कि स्वस्थ लइका मनके टीकाकरण पाछु करे जाही। श्री अरोड़ा ह कहिन कि देस के आने-आने जिला मन म टीकाकरण के ऐसे प्रबंधन करे जात हे, जेखर ले लइका मन ल जिला ले बाहिर जाके जरूरत झन पड़य।
कोरोना-समाचार
प्रदेस म कोविड-नाइंटीन के सक्रिय मामला मनके संख्या लगातार घटत हे। वर्तमान म राज्य म दू सौ चौव्वन मरीज मनके आने-आने अस्पताल या होम आइसोलेशन म इलाज चलत हे। राज्य के पांच जिला कबीरधाम, गौरेला-पेण्ड्रा-मरवाही, सरगुजा, बलरामपुर-रामानुजगंज अउ नारायणपुर म कोरोना के एको झन सक्रिय मरीज नइ हे। ए बेरा प्रदेस के औसत पॉजिटीविटी दर शून्य दशमलव एक प्रतिसत हे। काली प्रदेस के उन्नीस जिला मन म कोरोना संक्रमण के एको ठन नवा मामला आगू नइ आय हे।
नवरात्र-गाइडलाइन
कोरोना संक्रमण ल देखत अवइया सात अक्टूबर ले सुरू होवइया नवरात्र परब ल लेके प्रदेस म आने-आने जिला प्रसासन डहार ले दिसा-निरदेस जारी करे जात हे। इही कड़ी म दुरूग जिला प्रसासन डहार ले आज जारी करे गे दिसा-निरदेस के अनुसार पंडाल म अधिकतम आठ फीट ऊंचा प्रतिमा ही स्थापित करे जाही। पंडाल म एक समय म पचास ले जादा लोगन उपस्थित नइ हो सकय। पंडाल के लंबाई-चौड़ाई पन्द्रह बाई पन्द्रह फीट ले जादा होना चाही।
कोरोना संक्रमण के तीसरा लहर के आसंका ल देखत रास गरबा डांडिया के आयोजन बड़का रूप म नइ करे जा सकही। आयोजन म अधिकतम सौ मनखे ही सामिल हो सकही। एखर अलावा पंडाल स्थल म प्रसाद बांटे के अनुमति नइ होही। संगेसंग विसर्जन के बेरा या विजर्सन के बाद घलो कोन्हों भी प्रकार के भोग भंडारा के आयोजन नइ करे जा सकही।
केन्द्रीय वित्तमंत्री-रायपुर दौरा
केन्द्रीय वित्तमंत्री निर्मला सीतारमण काली पांच अक्टूबर के एक दिन के रईपुर दौरा म आवत हे। खबर के मुताबिक केन्द्रीय वित्तमंत्री काली बिहनिया विमान ले राजधानी रईपुर पहुंचही। विमानतल ले ओमन ह प्रदेस भाजपा कार्यालय जाही। ए दउरान भारतीय जनता युवा मोर्चा के कार्यकर्ता मन ह मोटर साइकिल रैली निकालही।
कुशाभाऊ ठाकरे परिसर स्थित प्रदेस भाजपा कार्यालय म श्रीमती सीतारमण ह पार्टी के नेता अउ पदाधिकारी मन ले भेंट करही। एखर बाद ओमन भाटागांव टीकाकरण केन्द्र जाही अउ उहां कोविड टीकाकरण कारीकरम के क्रियान्वयन के बारे म जानकारी लीहीं। श्रीमती सीतारमण ह तेलीबांधी तालाब के तीर मरीन ड्राईव पहुंच जल संरक्षण पहल के जायजा घलो लीही। एखर बाद ओमन ह टाउनहॉल जाही अउ उहां रक्तदान सिविर के अवलोकन करही।
केन्द्रीय वित्तमंत्री रईपुर म कुछेक आने स्थानीय कारीकरम म सामिल होय के बाद संझा के विमान ले दिल्ली लहुट जही।
अमृत महोत्सव-प्रश्नोत्तरी
‘‘आजादी के अमृत महोत्सव‘‘ म आकाशवाणी समाचार स्वाधीनता संग्राम अउ उंखर गौरवसाली इतिहास म बिसेस अमृत महोत्सव प्रश्नोत्तरी आयोजित करत हे। ए प्रश्न राष्ट्रीय स्तर म आयोजित प्रश्नोत्तरी स्पर्धा के तहत पूछे जाही, जेखर सेती एखर जवाब प्रादेशिक बुलेटिन के क्विज बर निर्धारित ई-मेल या फेर मोबाइल नंबर के बजाय आज के प्रश्न के बाद बतइया वाट्सऐप नंबर अउ ई-मेल भेजना हे। अमृत महोत्सव क्विज के पन्द्रहवां प्रश्न हरय।
‘‘कोन प्रख्यात स्वतंत्रता सेनानी ल सीमांत गांधी के नाव ले जाने जाथे ?‘‘
सुनइया मन अपन उत्तर वाट्सऐप नंबर 8 8 2 6 5 4 6 2 6 2 म या फेर ई-मेल आईडी अमृत महोत्सव क्विज एट द रेट प्रसार भारती डॉट जीओवी डॉट इन म भेज सकत हे। ए प्रतियोगिता बर एक झिन भाग्यसाली प्रतिभागी ल विजेता चुने जाही अउ काली के समाचार प्रभात म उंखर नाव के घोसना करे जाही। विजेता ल ई-प्रमाण पत्र अउ सांकेतिक पुरस्कार दे जाही।
पीएम योजना-भाजपा आरोप
भारतीय जनता पार्टी ह छत्तीसगढ़ सरकार उपर केन्द्र ले प्रधानमंत्री गरीब कल्याण योजना के अंतर्गत मिले डेढ़ हजार करोड़ के चाउर घोटाला के आरोप लगाय हे। भाजपा के प्रदेस अध्यक्ष विष्णुदेव साय अउ नेता प्रतिपक्ष धरमलाल कौशिक ह आज रईपुर म पत्रकार मन ले चरचा करत ए कथित घोटाला के उच्च स्तरीय जांच कराय के मांग करीन। ओमन कहिन कि भारतीय जनता पार्टी ए मामला ल लेके अवइया सात अउ आठ अक्टूबर के रासन दुकान मनके आगू धरना दीही।
गोधन न्याय योजना
छत्तीसगढ़ म गोधन न्याय मिशन के गठन करे जाही। कृषि मंत्री रविन्द्र चौबे एखर अध्यक्ष अउ मुख्यमंत्री के सलाहकार प्रदीप शर्मा उपाध्यक्ष होही। राज्य म पशुपालन अउ जैविक खेती ल बढ़ावा दे बर बछर दू हजार बीस ले गोधन न्याय योजना के संचालन करे जात हे। एखर तहत पशुपालक अउ किसान मन ले दू रूपिया प्रतिकिलो के दर ले गोबर के खरीदी करे जाथे। ए गोबर ले महिला स्व-सहायता समूह डहार ले सुराजी गांव योजना के तहत स्थापित गौठान मन म जैविक खाद के निर्माण करे जात हे।
बस्तर दशहरा
कोरोना संक्रमण के सेती ए बछर घलो बस्तर दशहरा सादगी के संग मना जाही। विकास प्रदर्सनी अउ सांस्कृतिक कारीकरम नइ होवय। आज दशहरा कमेटी के अध्यक्ष अउ सांसद दीपक बैज ह जगदलपुर म पत्रकार मन ले गोठबात करत बतईन कि कोरोना संक्रमण के प्रसार ल रोके खातिर बस्तर दशहरा के संबंधित कारीकरम मन म आम लोगन अउ पर्यटक मन सामिल नइ हो पाही। सत्रह अक्टूबर के मुरिया दरबार के कारीकरम होही। एमा मुख्यमंत्री सामिल होही।
अउ अब थोरकुन समाचार सार म-
– राज्यपाल अनुसुईया उइके ह आज राजभवन म पितर पक्ष के मउका म पौधारोपण करीन। ओमन ह सबो मनखे मन ले अपील करीन कि अपन पूर्वज मनके सुरता म पौधा जरूर लगावय।
– आज विश्व आर्किटेक्चर डे हरय। ए मउका म मुख्यमंत्री भूपेश बघेल सबो वास्तुविद मन ल बधाई दीन हे।
– मुख्यमंत्री ह काली मुंगेली म दू सौ पन्द्रह करोड़ रूपिया के आने-आने विकास कार्य के लोकार्पण अउ भूमिपूजन करीन। ए मउका म ओमन ह डिंडौरी म सहकारी बैंक खोले, जरहा गांव ल तहसील बनाय अउ मुंगेली म कन्या महाविद्यालय के स्थापना करे के घोसना करीन।
– बस्तर के जिला रोजगार अउ स्व-रोजगार मार्गदर्शन केन्द्र डहार ले छह अक्टूबर के प्लेसमेंट के आयोजन करे जाही।
– बीजापुर जिला म सीआरपीएफ अउ डिस्ट्रिक्ट रिजर्व गार्ड-डीआरजी के संयुक्त दल ह जांगला थाना क्षेत्र म स्थित बड़े तुंगाली के जंगल ले एक झिन माओवादी ल गिरफ्तार करीन। गिरफ्तार माओवादी मड़वी बुधराम जनताना सरकार के अध्यक्ष बताय जात हे।
– रईपुर रेलमंडल के अंतर्गत हथबंद अउ तिल्दा-नेवरा स्टेसन के बीच समपार फाटक रिंगनी गेट मरम्मत कार्य के सेती काली रतिहा आठ बजे ले चार दिन तक गाड़ी मनके अवई-जवई म रोक रइही।
अउ
– गरियाबंद जिला म पुलिस ह छुरा थाना क्षेत्र म स्थित कोसमी गांव ले तिहत्तर किलो गांजा जब्त करीन हे। गांजा तस्कर भाग गीस। जब्त गांजा के कीमत करीबन सात लाख रूपिया बताय जात हे।