प्रधानमंत्री-खादी
प्रधानमंत्री नरेन्द्र मोदी ह लोगन मन ले खादी कपड़ा अउ हाथे ले बने जिनीस ल अपन जीवन म सामिल करके ए तिहार-बार के मउका म आत्मनिर्भर भारत बनाय के संकल्प ल मजबूती देके आग्रह करीन। एक ठिन ट्वीट संदेस म श्री मोदी ह किहीन कि लद्दाख के लेह म खादी ले बने विश्व के सबले बड़का भारत के राष्ट्रीय ध्वज ल प्रदर्सित करना महात्मा गांधी ल बिसेस श्रद्धांजलि हवय, काबर कि ओमन ल खादी ले बहुते लगाव रिहीस।
मुख्यमंत्री-ऑक्सीजन प्लांट
मुख्यमंत्री भूपेश बघेल ह बेमेतरा दौरा के दूसर दिन आज जिला अस्पताल जगह म एक करोड़ एक लाख रूपिया के लागत ले बने पांच सौ एल.पी.एस. क्षमता वाले ऑक्सीजन प्लांट के लोकार्पण के संगे डायलिसिस सुविधा के सुभारंभ घलो करीन। उहें, मुख्यमंत्री ह जिला अस्पताल म सिटी स्कैन मसीन लगाय बर घोसना करीन।
ए मउका म राखे गे कारीकरम म बोलत मुख्यमंत्री ह किहीन कि ऑक्सीजन प्लांट डायलिसिस मसीन अउ सीटी स्कैन के सुविधा ले अस्पताल मन म इलाज अउ बने ढंग ले होही।
राज्यपाल-बहुरानी सम्मेलन
राज्यपाल अनुसुईया उइके ह किहीन कि हरेक परिवार के सदस्य ल अपन सियनहा महतारी-बाप उपर बिसेस ध्यान देके संगे उंखर मान-सम्मान बनाय रखना चाही। आज राजधानी रईपुर म राखे गे बहुरानी सम्मेलन कारीकरम म बोलत राज्यपाल ह किहीन कि सियनहा मनके ध्यान राखे ले वृद्धाश्रम जइसन जघा बनाय के जरूरत नइ पड़ही। संगे ओमन किहीन कि महतारी-बाप ल घलो अपन लोग-लइका ल सुघ्घर संस्कार देना चाही। राज्यपाल ह किहीन कि बाबू लइका म अइसन संस्कार डाले कि ओ ह हरेक नारी-परानी ल मान देवय। सुश्री उइके ह माईलोगिन मनके पढ़ई-लिखई बर घलो जोर दीन, जेखर ले समाज अउ देस ल आगू बढ़ाय म ओमन भागीदार बनय।
अमृत महोत्सव-महिला उद्यमी
स्वतंत्रता के पचहत्तरवां बछर मउका म होवत आजादी के अमृत महोत्सव आयोजन के दउरान नीति आयोग ह देस के पचहत्तर झिन सफल महिला उद्यमी मन ल सम्मानित करही। नीति आयोग ह वूमन ट्रांस्फॉर्मिंग इंडिया पुरस्कार के सुरूवात पांच बछर पहिली करे रिहीन।
ऐति, छत्तीसगढ़ के बालोद म काली राष्ट्रपिता महात्मा गांधी के जयंती मउका म स्वच्छ भारत दिवस राखे गे रिहीस। एमा साफ-सफई म योगदान देवइया जिला के सत्रह ठिन महिला समूह मन म सम्मानित करे गीस। ए मउका म गंवई जघा ले आय माईलोगिन मन बतईन कि ओमन अपन गांव ल साफ-सुफा राखे बर हफ्ता म दू दिन दुवारी-दुवाही जाके कचरा सकलथे, तहां बाद म ए कचरा ल अपशिष्ट प्रबंधन ले खातू बनाय जाथे।
उहें, आजादी के अमृत महोत्सव के चलत दुरूग जिला के भिलाई म सामाजिक संगठन अउ अर्द्धसैनिक बल, ए दूनों के संघरइति म रक्तदान सिविर राखे गीस। जेखर उद्देश्य लोगन मन ल देस के प्रति एकजुट रेहे के आरो देना रिहीस।
मुख्यमंत्री-वर्चुअल संबोधन
मुख्यमंत्री भूपेश बघेल ह किहीन हे कि माओवाद परभावित जघा म राज्य सरकार ह विकास, विश्वास अउ सुरक्षा के नीति अपना के ए क्षेत्र म काम करत हे अउ ए जघा मन म सिक्षा, स्वास्थ्य अउ रोजगार के संगे कई ठिन जन कल्याणकारी कारीकरम ल परभावी रूप ले लागू करे जात हे। एखर ले माओवादी मन ले लोगन के मोह भंग होवत हे अउ ए बेरा माओवादी हलचल ह कमती होय हे।
ए बात ल श्री बघेल ह आज एक ठिन निजी समाचार चैनल के कारीकरम म बेमेतरा जिला मुख्यालय ले वर्चुअल माध्यम ले बोलत बेरा किहीन। मुख्यमंत्री ह अभिनेता अमिताभ बच्चन के एक ठिन सवाल के जवाब म बतईन कि माओवाद परभावित क्षेत्र म स्वास्थ्य सुविधा मजबूत करे बर डॉक्टर अउ स्टाफ के नियुक्ति करे गेहे। मुख्यमंत्री ह किहीन कि राज्य सरकार के नीति अउ कारीकरम ले माओवाद प्रभावित क्षेत्र के रहवइया मनके जीवन म बड़का बदलाव आवत हे।
कोरोना-टीका
देश म अब तक नब्बे करोड़ इंकावन लाख ले जादा कोविड रोधी टीका लगाय जा चुके हे। केन्द्रीय स्वास्थ्य मंत्रालय के मुताबिक पाछु चौबीस घंटा के दउरान देसभर म तिहत्तर लाख छिहत्तर हजार ले जादा टीका लगाय गीस।
इही बीच, छत्तीसगढ़ म कोरोना संक्रमण के दर ह सरलग कमती होवत हे अउ पॉजिटीविटी रेट ह गिरके सून्य दशमलव सून्य-पांच प्रतिशत (0.05) म पहुंच गेहे। उहें, राज्य म काली कोरोना संक्रमण के आठ ठिन नवा मामला आय हे, जेमा ले दू ठिन राजधानी रईपुर के हरय। फेर, प्रदेस के तेईस ठिन जिला म काली कोरोना संक्रमण के एको ठिन मामला नइ मिले हे। ए बेरा दू सौ पैंसठ झिन कोरोना संक्रमित मरीज मनके इलाज प्रदेस के अस्पताल या फेर होम आइसोलेशन ले घरे म चलत हे।
नवरात्र-गाइडलाइन
अवइया सात अक्टूबर ले शारदेय नवरात्र चालू होही। कोरोना महामारी के सेती नवरात्र बर प्रसासन ह दिसा-निरदेस जारी करे हे, जेमा ए बछर बीते साल ले जादा छूट दे गेहे। निरदेस मुताबिक पंडाल म मूर्ति बइठाय बर आठ फीट के ऊंचई राखे गेहे। उहें, पंडाल म एके बेरा पचास ले जादा मनखे नइ रइही अउ एखर लम्बाई-चौड़ाई पन्द्रह बाई पन्द्रह के रइही। पंडाल के आगू पांच सौ वर्गफीट के खुल्ला जगह रहना जरूरी हे। फेर, मूर्ति बिराजे अउ विसर्जन बेरा प्रसाद नइ बांटे जाय।
इही बीच, डोंगरगढ़ म मां बम्लई के दर्सन बर श्रद्धालु मन ल ऐप के माध्यम ले रजिस्ट्रेशन कराय ल पड़ही। फेर मंदिर पहुंचे बाद ओमन बहत्तर घंटा आगू के कोविड-नाइंटीन जांच के निगेटिव रिपोर्ट उहां दिखाय के संगे वैक्सीनेशन सर्टिफिकेट घलो देखाय ल पड़ही। एखर बादे ओमन ल दर्सन के परमिसन दे जाही। उहां पदयात्रा, मेला, मीना बाजार अउ झूला उपर प्रतिबंध रइही। संगे ए बछर घलो डोंगरगढ़ बर स्पेशल ट्रेन नइ चलही।
खेल-प्रवेश
राज्य खेल अकादमी बहतराई बिलासपुर अउ स्वर्गीय कोदूराम वर्मा स्मृति धनुर्विघा अकादमी रईपुर म प्रवेस बर खिलाड़ी मन ल राज्य स्तरीय चयन ट्रायल के आयोजन अवइया सात ले तेरह अक्टूबर तक बिलासपुर म करे जाही। एमा जिला स्तर म आयोजित चयन ट्रायल प्रतियोगिता म चयनित खिलाड़ी ही भाग ले सकही। ए चयन ट्रायल दू चरण म आयोजित करे जाही। पहिली चरण म हॉकी अउ एथलेटिक्स, उहें, दूसर चरण म तीरंदाजी के ट्रायल करे जाही।
अउ अब थोरकुन समाचार सार म-
– राज्य डहार ले आई.टी.आई पास लइका मनके ट्रेनिंग ल अउ जादा बढ़ावा दे बर काली चार अक्टूबर के आई.टी.आई. माना, भिलाई अउ बिलासपुर म अप्रेंटिस शिप मेला के आयोजन करे जाही।
– रिटायर उप पुलिस अधीक्षक प्रवीर चंद्र तिवारी के काली उपचार बेरा रईपुर म निधन होगे। दुरूग म पदस्थ रेहे श्री तिवारी ह बीते तीस जून के उप पुलिस अधीक्षक क्राइम के पद ले रिटायर होय रिहीन।
अउ
– रायगढ़ जिला के खरसिया पुलिस ह सोनाचांदी के बेपारी ले होय लूट के मामला म तीन झिन आरोपी ल गिरफ्तार करे हे, जेखर मन तीर ले गहना-गूठा अउ घटना म बउरे एक ठिन फटफटी बरामद करे हे।