गृह मंत्रालय-कोविड नियम
केन्द्रीय गृह मंत्रालय ह जम्मों राज्य अउ केन्द्रसासित प्रदेस मन ले केहे हे कि तिहार के दउरान कोविड नियम के कड़ई ले पालन होना चाही। केन्द्रीय गृह सचिव अजय भल्ला ह राज्य अउ केन्द्रसासित प्रदेस मन ल भेजे गे चिट्ठी म केहे हे कि कोरोना संक्रमण म कमी ल देखत ए आसंका हे कि लोगन नियम के पालन करे म लापरवाही कर सकत हे। ओमन राज्य मन ले किहीन कि ओमन कोरोना संक्रमण के फैलाव ले बाचे बर बड़ संख्या म लोगन मनके इकट्टा होय म कड़ा नजर राखय। चिट्ठी म आसंका जताय गेहे कि मेला, उत्सव, धार्मिक कारीकरम अउ समारोह के मउका म भीड़ जुटे ले कोविड के नवा मरीज के संख्या बाढ़ सकत हे। एखर सेती तिहार के दउरान कोरोना ले बाचे बर दिसा-निरदेस मनके पालन कराय उपर जोर दे जाय।
कोविड टीका-उपलब्धि
भारत ह कोविड टीकाकरण अभियान म एक अउ महत्वपूर्ण उपलब्धि हासिल कर लेहे। करीबन पच्चीस प्रतिसत लोगन मन ल कोविड के दूनों टीका लगाय जा चुके हे। कुल पात्र आबादी म ले करीबन चवालीस प्रतिसत लोगन मन ह पहिली टीका लगवा लेहे। अब तक सत्यासी करोड़ छियासठ लाख ले जादा टीका लगाय गेहे।
ऐति, छत्तीसगढ़ म अब तक करीबन एक करोड़ सत्यासी लाख टीका लगाय गेहे। एमा ले एक करोड़ पैंतीस लाख ले जादा लोगन मन ल पहिली टीका अउ इंक्यावन लाख ले जादा लोगन मन ल दूनों डोज लग हे।
इही बीच, प्रदेस के पन्द्रह जिला मन म काली कोरोना संक्रमण के एको नवा मरीज नइ मिलीस। पूरा प्रदेस म काली होय तेईस हजार ले जादा सैंपल मनके जांच म सिरिफ छब्बीस मनखे संक्रतिम पाय गीस। प्रदेस म अभी सक्रिय मरीज के संख्या दू सौ तिरासी हवय।
स्वामित्व योजना
ग्रामीण क्षेत्र मन म आबादी भूईंया म रहवइया सम्पत्ति मालिक मनके ड्रोन के माध्यम ले सर्वेक्षण करके ओला अधिकार अभिलेख दे बर स्वामित्व योजना सुरू करे गेहे। ए योजना ल लागू करे बर राज्य सरकार के राजस्व विभाग ल नोडल विभाग बनाय गेहे। योजना के पायलट चरण म छत्तीसगढ़ के दुरूग, कबीरधाम अउ कोरबा जिला मन ल सामिल करे गेहे। छत्तीसगढ़ भू-अभिलेख आयुक्त ह बतईन कि छत्तीसगढ़ म ए योजना ल बछर दू हजार चौबीस-पच्चीस तक पूरा करे के लक्ष्य राखे गेहे।
मुख्यमंत्री-आदिवासी
प्रदेस म आदिवासी मनके आस्था के केन्द्र बड़ेडोंगर अउ अमर सहीद गैंदसिंह के कर्मस्थली परलकोट ल पर्यटन स्थल के रूप म विकसित करे जाही। मुख्यमंत्री भूपेश बघेल ह हल्बा आदिवासी समाज के प्रतिनिधि मन ले गोठबात के दउरान ए घोसना करीन। ओमन किहीन कि सहीद गैंदसिंह के जीवनी ल पाठ्यक्रम म सामिल करे जाही। मुख्यमंत्री ह किहीन कि आदिवासी अंचल म सिंचाई सुविधा बढ़ाय बर सरपंच के माध्मय ले उंखर क्षेत्र के नंदियां-नरवा म पानी रिचार्जिंग बर नरवा योजना म प्रस्ताव तैयार करे जाय।
कृषि मजदूर न्याय योजना
प्रदेस के राजीव गांधी ग्रामीण भूमिहीन कृषि मजदूर न्याय योजना के तहत प्रदेस के आने-आने जिला मन म अब तक ढाई लाख ले जादा आवेदक मन ह पंजीयन कराय बर अरजी जमा कर देहे। योजना के तहत पंजीयन बर अवइया तीस नवंबर तक अरजी मंगाय गेहे।
योजना म ग्रामीण भूमिहीन कृषि मजदूर परिवार के चरवाहा, बढ़ई, लोहार, मोची, नाऊ, धोबी, पंडित जइसन पौनी पसारी बेवस्था ले जुड़े परिवार ए योजना के तहत लाभ लेके पात्र होही, जिखर तीर कृषि भूमि नइ हे। योजना के तहत हितग्राही परिवार ल हर बछर छह हजार रूपिया के अनुदान रासि सोझे उंखर बैंक खाता म जमा कराय जाही।
गांधी-बुनियादी शिक्षा
छत्तीसगढ़ म अब नवा पीढ़ी ल महात्मा गांधी के बुनियादी सिक्षा ले जोड़े जाही। गांधीजी के आदर्स अउ सिद्धांत ले लइका मन ल जानकारी दे बर एला एक बिसय के रूप म पांचवीं ले बारहवीं कक्षा के पाठ्यक्रम म सामिल करे जाही। एमा सहरी के संगेसंग ग्रामीण क्षेत्र के लइका मन ल गांधीजी के मंशा के अनुरूप सिक्षा दे जाही।
मुख्यमंत्री भूपेश बघेल ह एखर बर मुख्य सचिव ल निरदेस देहे कि लइका मनके सर्वांगीण विकास के संगेसंग आत्मनिर्भर बनाय वाला सिक्षा के प्रबंध राज्य सासन डहार ले करे जाय।
ग्राम सभा
प्रदेस के ग्राम पंचायत मन म दू अक्टूबर ले ग्राम सभा मनके आयोजन करे जाही। ए ग्राम सभा म गांव के विकास अउ रोजगार समेत आने-आने महत्वपूर्ण बिसय उपर गांव वाले मनके संग गोठबात करे जाही।
इही कड़ी म रईपुर जिला के कलेक्टर सौरभ कुमार ह जम्मों अनुविभागीय अधिकारी अउ जम्मों जनपद के मुख्य कार्यपालन अधिकारी मन ल दू अक्टूबर के ग्राम सभा के तैयारी करे के निरदेस दीन हे। कलेक्टर ह जम्मों जनपद के तहत हरेक ग्राम पंचायत म ग्राम सभा के आयोजन करे बर एक समय-सारिणी तैयार करे बर किहीन हे, जेखर ले एकं तारीख म कोनों भी ग्राम पंचायत के एके गांव म ग्रामसभा के आयोजन हो सके।
भाजपा-घेराव
राज्य के प्रमुख विपक्षी दल भारतीय जनता पार्टी ह धर्मांतरण के मुद्दा ल लेके काली संझा रईपुर म मुख्यमंत्री निवास के घेराव करे के कोसिस करीन। ए दउरान बड़ संख्या म पार्टी कार्यकर्ता अउ पदाधिकारी मन ह गिरफ्तारी दीन। ए संबंध म पत्रकार मन ल जानकारी देवत रईपुर के भाजपा जिला अध्यक्ष श्रीचंद सुंदरानी ह बतईन कि रईपुर जिला के जम्मों सोलह मंडल मनके करीबन आठ हजार कार्यकर्ता मन ह पार्टी के सोलह प्रमुख नेता अगुवई म गिफ्तारी दीन।
इही कड़ी म आज भिलाई म घलो भाजपा कार्यकर्ता मन ह पुलिस थाना के घेराव करे के प्रयास करीन।
इही बीच, पार्टी के मीडिया प्रभारी ह बतईन कि भाजपा के राष्ट्रीय महामंत्री सी.टी. रवि काली भिलाई म ‘‘सेवा और समर्पण‘‘ कारीकरम के तहत संगोष्ठी म सामिल होही। ओमन पार्टी के आने-आने मोर्चा के पदाधिकारी मनके बइठका लीहीं।
हाथी-आतंक
सूरजपुर अउ मनेन्द्रगढ़ के जंगल म हाथी मनके जांच दल ह तीर-तखार के गांव मन म अब्बड अकन कच्चा मकान मन ल गिरा देहे। उहें, सूरजपुर जिला के सरहदी गांव म हाथी मनके कुचले ले एक झिन मनखे के मउत होगे।
ओति, मनेन्द्रगढ़ क्षेत्र के फुलवारीटोला गांव म घलो करीबन चालीस हाथी मनके घुमे के सेती गांव वाले मन म डर अमा गेहे।
उहें, राजनांदगांव जिला के राजाडेरा गांव म हाथी मनके पहुंचे के सेती गांव मन ल खाली कराय जावत हे। काली ए हाथी मन ह राजाडेरा के स्कूल के दरवाजा ल तोड़ दीस। उहें, हाथी मनके दल ह फसल ल घलो नुकसान पहुंचाय हे।
इही बीच, बालोद जिला के मोहला क्षेत्र म घलो करीबन पच्चीस हाथी मनके दल घुमत हे। ए हाथी मन ले बाचे बर गांव वाले मन ल सचेत कर दे गेहे।
पोषण माह
लइका अउ माईलोगिन मन ल कुपोषण ले बचाव बर ए बेरा प्रदेसभर म पोषण माह के तहत आने-आने कारीकरम राखे जावत हे। इही कड़ी म आज बिलासपुर के क्षेत्रीय लोकसंपर्क कार्यालय डहार ले राष्ट्रीय पोषण माह के आयोजन मुंगेली जिला के कंतेली गांव म करे गीस। एखर तहत पोषण ले जुड़े चित्रकला, रंगोली, निबंध अउ मटका फोड़ प्रतियोगिता के आयोजन करे गीस। कारीकरम के माध्यम ले ‘‘सही पोषण-देश रोशन‘‘ के थीम के संग माईलोगिन, लइका अउ सियान मन ल प्रेरित करे गीस। उहें, आजेच कंतेली गांव के सरकारी आयुर्वेदिक अस्पताल म निःशुल्क स्वास्थ्य सिविर के आयोजन करे गीस। पोषण माह के दउरान छत्तीसगढ़ी सांस्कृतिक कारीकरम घलो प्रस्तुत करे गीस।
हिन्दी पखवाड़ा
रईपुर स्थित पत्र सूचना कार्यालय अउ प्रादेशिक लोकसंपर्क ब्यूरो डहार ले पन्द्रह ले उनतीस सितंबर तक हिन्दी पखवाड़ा के आयोजन करे गीस। ए दउरान कार्यालय के अधिकारी अउ करमचारी मन ल राजभाषा हिन्दी म जादा ले जादा काम करे बर प्रोत्साहित करे गीस।