मुख्यमंत्री-खेल अकादमी
मुख्यमंत्री भूपेश बघेल ह आज फुटबॉल, कबड्डी, तीरंदाजी अउ एथलेटिक्स अकादमी के सुभारंभ करीन। संगेसंग ओमन बिलासपुर अउ रईपुर म 42 करोड़ रूपिया ले जादा के लागत के बहुत अकन खेल अधोसंरचना मनके लोकार्पण अउ भूमिपूजन घलो करीन। एमा मुख्य रूप ले फुटबॉल, कबड्डी, तीरंदाजी, एथलेटिक्स अकादमी, दू ठिन खेल छात्रावास, एक ठिन तीरंदाजी प्रशिक्षण उप केन्द्र अउ एथलेटिक्स खातिर सिंथेटिक ट्रैक अउ फील्ड सामिल हवय।
मुख्यमंत्री ह खेल सुविधा के वर्चुअल लोकार्पण करत उम्मीद जताईन कि खेल सुविधा मनके विकास ले राज्य के खिलाड़ी देस अउ दुनिया म छत्तीसगढ़ के नाम ल रोसन करही। मुख्यमंत्री ह बतईन कि बिलासपुर म एथलेटिक्स, तीरंदाजी अउ हॉकी अकादमी खातिर खिलाड़ी मनके राज्य स्तरीय चयन अवइया 11, 12 अउ 13 अक्टूबर के होही।
फिट इंडिया फ्रीडम रन
आजादी के अमृत महोत्सव म ए बेरा प्रदेस म आने-आने आयोजन करे जावत हे। इही कड़ी म आज मुंगेली, गरियाबंद अउ महासमुंद जिला म ‘‘फिट इंडिया फ्रीडम रन‘‘ के आयोजन करे गे हवय।
नेहरू युवा केन्द्र, राष्ट्रीय सेवा योजना अउ यूनिसेफ डहार ले आयोजित ए दउड़ म स्कूल अउ कॉलेज के पढ़ईया लइका मनके अलावा एन.एस.एस. के लइका अउ युवा मन ह बड़ संख्या म सामिल होईन। कारीकरम म जनप्रतिनिधि मन ह लइका अउ युवा मन ल ‘‘फिटनेस का डोज आधा घंटा रोज‘‘ के सपथ दिलईन।
अमृत महोत्सव-क्विज विजेता
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता‘‘ म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी के सातवां अंक म छत्तीसगढ़ी बुलेटिन म प्रश्न रिहीस- ‘‘बछर 1857 म सरगुजा क्षेत्र के उदयपुर रियासत म अंग्रेज मनके खिलाफ विद्रोह के नेतृत्व कोन राजा ह करे रिहीन।‘‘ एखर सही जवाब हे- कल्याण सिंह।
सवाल के जवाब म बड़ संख्या म श्रोता मन ह अपन जवाब भेजीन। फेर, सबले पहिली जवाब भेजइया विजेता हवय – महासमुंद जिला के ग्राम- रामसागर पटेवा निवासी नागेन्द्र नरताप ठाकुर। आकाशवाणी परिवार डहार ले श्री ठाकुर ल हमन बधाई अउ सुभाकामना देवत हन। श्री ठाकुर ह आकाशवाणी समाचार के नियमित श्रोता हरय।
मन की बात
प्रधानमंत्री नरेन्द्र मोदी ह काली बिहनिया ग्यारह बजे आकाशवाणी ले ‘‘मन की बात‘‘ कारीकरम म अपन विचार साझा करही। ए ह, मासिक रेडियो कारीकरम के 81वां कड़ी होही। आकाशवाणी अउ दूरदर्शन के जम्मों नेटवर्क मन म एखर प्रसारण होही। आकाशवाणी समाचार के वेबसाइट अउ न्यूज ऑन ए.आई.आर. मोबाइल ऐप म घलो उपलब्ध रइही। आकाशवाणी, दूरदर्शन समाचार, प्रधानमंत्री कार्यालय, सूचना अउ प्रसारण मंत्रालय के यू-ट्यूब चैनल मन म घलो सीधा प्रसारण होही।
आकाशवाणी ले ‘‘मन की बात‘‘ कारीकरम के हिन्दी प्रसारण के तुरते बाद क्षेत्रीय भासा मन म एखर प्रसारण होही। क्षेत्रीय भासा मन म कारीकरम रतिहा 8 बजे फेर सुने जा सकही।
निःशक्त बालिका-दुर्व्यवहार
जशपुर के दिव्यांग केन्द्र म निःशक्त बालिका मन ले दुर्व्यवहार के मामला आगू आय हे। अतिरिक्त पुलिस अधीक्षक प्रतिभा पांडे ह बतईन कि जांच के बाद आरोपी केयर टेकर अउ चौकीदार के खिलाफ दुष्कर्म अउ छेड़छाड़ के अपराध दर्ज कर ले गे हवय।
पूर्व मुख्यमंत्री डॉक्टर रमन सिंह ह ए घटना ल दुर्भाग्यपूर्ण बतावत ओमन एक ठिन बयान जारी करके आरोप लगईन कि प्रदेस म सासन तंत्र नाव के कोनों चीज नइ हे अउ बेटी मन ह सुरक्षित नइ हवय।
उहें, भाजपा के प्रदेश अध्यक्ष विष्णुदेव साय ह पीड़ित दिव्यांग मन के संग घटित होय ए अमानवीय घटना के न्यायिक जांच अउ दोषी मन उपर कड़ा ले कड़ा कार्रवाई करे के मांग करीन हे।
दीनदयाल उपाध्याय-जयंती
एकात्म मानववाद के पुरोधा पंडित दीनदयाल उपाध्याय के आज जयंती हवय। प्रधानमंत्री नरेन्द्र मोदी, केन्द्रीय गृह मंत्री अमित शाह अउ सूचना प्रसारण मंत्री अनुराग ठाकुर ह पंडित दीनदयाल उपाध्याय के जयंती म ओमन ल श्रद्धांजलि अर्पित करीन। नई दिल्ली म भारतीय जनता पार्टी के अध्यक्ष जगत प्रकाश नड्डा ह बतईन कि पंडित दीनदयाल उपाध्याय के जयंती म भाजपा ह देसभर म 10 लाख 40 हजार ले जादा बूथ मन म कारीकरम के आयोजन करत हवय।
ए मउका म भाजपा के प्रदेस इकाई डहार ले संभाग अउ जिला स्तर म कतकोन कारीकरम आयोजित करके पंडित दीनदयाल उपाध्याय ल श्रद्धांजलि दे जावत हे।
यूपीएससी-परिणाम
संघ लोक सेवा आयोग-यूपीएससी ह सिविल परीक्षा 2020 के परिणाम घोसित कर दे हवय। 761 उम्मीदवार मनके नियुक्ति खातिर अनुसंसा करे गे हवय। परीक्षा परिणाम म शुभम कुमार ह टॉप करे हे। उहें, जागृति अवस्थी ल दूसर अउ अंकिता जैन ल तीसर स्थान मिले हे।
प्रधानमंत्री नरेन्द्र मोदी ह सिविल सेवा परीक्षा म सफल होय उम्मीदवार मन ल बधाई दीन हे।
छत्तीसगढ़ के मुख्यमंत्री भूपेश बघेल ह घलो यूपीएससी म सफल होय उम्मीदवार मन ल बधाई देवत किहीन कि छत्तीसगढ़ के कुछु प्रतिभागी मन ह घलो ए परीक्षा म बने रैंक पा के राज्य के गौरव बढ़ाय हे।
मुख्यमंत्री-कुंभकार प्रतिनिधिमंडल
मुख्यमंत्री भूपेश बघेल ह किहीन हे कि कुंभकार मन ल माटी के बर्तन अउ कलाकृति मनके निर्माण खातिर बढ़िया माटी उपलब्ध हो सकय, एखर सेती जिहां ए समाज के जादा आबादी हे, उहां कुंभकार मन खातिर जमीन ल चिन्हित कर उंखर मन बर जमीन आरक्षित करे जाही। ओमन किहीन कि कुंभकार समाज के युवा मन ल अपन परंपरागत व्यवसाय के प्रसिक्षण दे खातिर बस्तर संभाग के मुख्यालय जगदलपुर म ट्रेनिंग सेंटर प्रारंभ करे जाही। बस्तर संभाग ले आए, अन्य पिछड़ा वर्ग समाज के प्रतिनिधिमंडल ल संबोधित करत मुख्यमंत्री ह ए बात ल किहीन।
टेकाम-वयावसायिक पाठ्यक्रम
स्कूल शिक्षा मंत्री डॉक्टर प्रेमसाय सिंह टेकाम ह जम्मों जिला के एक-एक ठिन हायर सेकेंडरी स्कूल मन म 15 अक्टूबर तक व्यावसायिक शिक्षा पाठ्यक्रम चालू करे के निरदेस दीन। काली विभागीय बैठक म ओमन साला भवन मनके निर्माण अउ मरम्मत के कार्य के मॉनिटरिंग करे खातिर घलो किहीन। संगेसंग ड्यूटी म लापरवाही बरतइय्या मनखे मनके खिलाफ कड़ा कार्रवाई करे के निरदेस घलो अधिकारी मन ल दीन। शिक्षा मंत्री ह सब्बो जिला म ‘‘स्वामी आत्मानंद हिन्दी माध्यम स्कूल‘‘ सुरू करे जाय के संबंध म चरचा घलो करीन।
उहें, स्कूल शिक्षा के प्रमुख सचिव डॉक्टर आलोक शुक्ला ह ‘‘स्वामी आत्मानंद शासकीय उत्कृष्ट अंग्रेजी माध्यम स्कूल मन म रिक्त पद मनके पूर्ति 30 सितंबर तक जरूरी रूप ले करे बर किहीन।
स्वास्थ्य मंत्री-आयुष्मान भारत
आयुष्मान भारत दिवस के मउका म केन्द्रीय स्वास्थ्य मंत्री मनसुख मंडाविया ह आयुष्मान भारत योजना के लाभान्वित हितग्राही मन ले बात करीन। इही कड़ी म ओमन बलरामपुर जिला के ग्राम महावीरगंज निवासी सजीना खातून ले बात कर ओखर हालचाल ल जानीन। सजीना खातून ह ए योजना के तारीफ करत बतईन कि एखर मदद ले ही उंखर ह्दय के इलाज संभव हो पाय हे। ए मउका म केन्द्रीय मंत्री ह लोगन मन ले किहीन कि योजना के लाभ ले खातिर ओमन आयुष्मान कार्ड जरूर बनवावंय।
जानबा के मुताबिक आयुष्मान भारत योजना के तीन बछर पूरा होय के मउका म जिला चिकित्सालय बलरामपुर म आयुष्मान भारत दिवस मनाय गीस।
ट्रेन-परिचालन
रेलवे डहार ले यात्री मनके सुविधा ल ध्यान म राखत कुछु ट्रेन मनके परिचालन अवइया 28 सितंबर ले सुरू करे जावत हे। एमा बिलासपुर-कटनी मेमू स्पेशल ट्रेन, गोंदिया-बल्हारशाह मेमू स्पेशल ट्रेन, गोंदिया-कटंगी स्पेशल ट्रेन, तुमसर रोड-तिरोड़ी स्पेशल ट्रेन, इतवारी-रामटेक नागपुर के बीच चलइया ट्रेन मन ह सामिल हवय।
मिलेट मिशन
राज्य म मिलेट मिशन के सुरूवात करे जाय के संगेसंग कोदो-कुटकी अउ रागी के समर्थन मूल्य म घलो खरीदी के घोसना के चलत वनांचल के किसान मन म ए खेती ल लेके बड़ उछाह हवय। चालू खरीफ सीजन म अब तक 87 हजार ले जादा हेक्टेयर म कोदो-कुटकी अउ रागी के बोआई पूरा कर ले गे हवय। ए बछर राज्य म 1 लाख 1 हजार 8 सौ ले जादा हेक्टेयर म एखर बुआई के लक्ष्य राखे गे हवय।
पुरूष नसबंदी पखवाड़ा
पुरूष नसबंदी पखवाड़ा के दउरान नसबंदी म छत्तीसगढ़ पाछु पांच बछर ले देस म प्रथम स्थान म हवय। ए दउरान प्रदेस म तकरीबन 5 हजार पुरूष मन ह परिवार नियोजन खातिर नसबंदी कराय हे।
परिवार नियोजन कारीकरम के उप संचालक डॉक्टर सत्यार्थी ह बतईन कि नसबंदी पखवाड़ा के दउरान ग्राम स्तर ले जिला स्तर तक बिसेस अभियान चला के लोगन मन म पुरूष नसबंदी खातिर फैले भ्रांति अउ मिथक मन ल विभाग डहार ले दूरिहा करे जाथे। ग्राम स्तर म ‘‘मोर मितान-मोर संगवारी‘‘ चौपाल के आयोजन कर पुरूष मन ल नसबंदी कराय खातिर प्रेरित करे जावत हे।
आवव अब सुनथन मौसम के हाल..
प्रदेस म एक घांव फेर भारी बरसा होय के आसार बन गे हवय। मौसम विभाग ह बतईन हे कि अवइया दू दिन म बंगाल के खाड़ी म चक्रवाती तूफान के चलत बस्तर संभाग अउ उंखर आसपास के जिला के कुछु जगह मन म भारी बारिस हो सकत हे।
रईपुर स्थित मौसम विज्ञान केन्द्र डहार ले मिले जानबा के मुताबिक ए बेरा एक ठिन चक्रवाती तूफान सक्रिय होय हवय, जेखर काली तक उत्तर तटीय आंध्रप्रदेश अउ दक्षिण ओड़िसा तट के उपर पहुंचे के आसार हवय। एखर असर ले छत्तीसगढ़ के दक्षिणी भाग म, बिसेसकर बस्तर संभाग म कुछु-कुछु जगह मन म भारी ले अति भारी बरसा के होय के आसार दिखत हवय। एखरे संगेसंग प्रदेस के आने-आने जगह मन म हल्का ले मध्यम बरसा होय के या गरज-चमक के संग छींटा पड़े के संभावना हवय।
इही बीच, आज मंझनिया बाद राजनांदगांव अउ कवर्धा म गरज-चमक के संग बड़ तेज बरसा होईस।