कोविड मौत-अनुदान सहायता
प्रदेस म कोविड-नाइंटीन ले मृत व्यक्ति मनके परिजन मन ल पचास हजार रूपिया अनुदान सहायता रासि दे जाही। ए संबंध म राज्य सासन के राजस्व अउ आपदा प्रबंधन विभाग के सचिव रीता शांडिल्य ह जम्मों जिला कलेक्टर अउ जिला आपदा प्रबंधन प्राधिकरण मन ल पत्र भेज देहे। ए पत्र म केहे गेहे कि उच्चतम न्यायालय के निर्णय के आधार म राष्ट्रीय आपदा प्रबंधन प्राधिकरण डहार ले जारी दिसा-निरदेस के अनुसार कोविड-नाइंटीन ले मउत होय मनखे के परिजन या आश्रित मन ल अनुदान सहायता रासि दे बर जल्दी जरूरी कार्रवाई करे जाय। कलेक्टर मन ल निरदेस दे गेहे कि आवेदक डहार ले जरूरी दस्तावेज के संग आवेदन जमा करे के तीस दिन के भीतर अनुदान सहायता भुगतान के प्रक्रिया पूरा करे जाना चाही।
स्वास्थ्य विभाग ले मिले जानकारी अनुसार बाईस सितंबर तक प्रदेस म कुल तेरह हजार पांच सौ इकसठ लोगन मनके मउत कोरोना संक्रमण ले होय हे। विभाग अनुसार संबंधित परिवार डहार ले निर्धारित आवेदन पत्र के माध्यम ले दावा प्रस्तुत करे जा सकत हे। आवेदन के पास कोविड-नाइंटीन ले मृत्यु ले संबंधित सी.डी.ए.सी. डहार ले जारी आधिकारिक प्रमाण पत्र जरूरी हवय। अनुदान रासि के भुगतान आधार लिंक प्रत्यक्ष लाभ अंतरण प्रक्रिया के तहत करे जाही।
दिव्यांगजन/वरिष्ठ नागरिक-टीका
केन्द्र सरकार ह केहे हे कि दिव्यांगजन अउ वरिष्ठ नागरिक मन अगर टीकाकरण केन्द्र मन म जाय म परेसानी महसूस करत हे, त ओमन ल घरे म कोविड रोधी टीका लगाय जाही। मीडिया ले गोठबात म काली नीति आयोग के सदस्य वी.के. पॉल ह बतईन कि सरकार ह प्रशिक्षित स्वास्थ्य कर्मी मनके देखरेख म जरूरतमंद लोगन मन ल घरे म टीका लगाय के प्रावधान करे हे।
ऐति, छत्तीसगढ़ म कोरोना ले बचाव बर अब तक एक करोड़ उनयासी लाख नवासी हजार ले जादा टीका लगाय जा चुके हे।
इही बीच, प्रदेस म कोरोना संक्रमण के दर म सरलग कमी आवत हे अउ औसत पॉजिटीविटी दर शून्य दशमलव एक-एक प्रतिशत म आगे हे। प्रदेस म काली कोरोना संक्रमण के तीस ठन नवा मामला आगू आय हे। वर्तमान म कुल तीन सौ सात मरीज मनके इलाज आने-आने अस्पताल या होम आइसोलेशन म चलत हे।
आयुष्मान भारत-अवॉर्ड
आयुष्मान भारत प्रधानमंत्री जन आरोग्य योजना डॉक्टर खूबचंद बघेल स्वास्थ्य सहायता योजना म छत्तीसगढ़ ल श्रेष्ठ प्रदर्सन बर चार ठिन राष्ट्रीय पुरस्कार मिले हे। केन्द्रीय स्वास्थ्य मंत्री मनसुख मांडविया ह काली नई दिल्ली म राखे गे एक वर्चुअल कारीकरम म प्रदेस ल ए पुरस्कार प्रदान करीन। राष्ट्रीय स्वास्थ्य प्राधिकरण डहार ले छह श्रेणी मन म पुरस्कार दे गीस, जेमा चार श्रेणी मन म छत्तीसगढ़ ल पुरस्कृत करे गीस।
मुख्यमंत्री भूपेश बघेल अउ स्वास्थ्य मंत्री टी.एस. सिंहदेव ह ए उत्कृष्ट काम बर स्वास्थ्य विभाग ल बधाई दीन हे।
अमृत महोत्सव-क्विज प्रतियोगिता
देश के आजादी के पचहत्तर बछर पूरा होय के मउका म आजादी के अमृत महोत्सव म प्रादेशिक समाचार एकांश, आकाशवाणी रायपुर डहार ले आयोजित करे जावत प्रश्नोत्तरी कार्यक्रम के श्रृंखला के तहत आज के कड़ी के प्रश्न पूछे ले पहिली ए बताना चाहबो कि श्रोता मन ल एस.एम.एस. या ई-मेल के माध्यम ले अपन जवाब के संग अपन नाम अउ पता भेजना जरूरी हवय। जउन प्रतिभागी के जवाब बिना नाव अउ पता के मिलही, उंखर जवाब ल स्वीकार नइ करे जाही। त छत्तीसगढ़ी बुलेटिन सुनइया मन बर आज के सवाल हे-
‘‘बछर 1857 म सरगुजा क्षेत्र के उदयपुर रियासत म अंग्रेज मनके खिलाफ विद्रोह के नेतृत्व कोन राजा ह करे रिहीन।‘‘
श्रोता मन ह अपन जवाब ई-मेल आईडी – आर.ए.आई.पी.यू.आर.एस.ए.डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस ले भेज सकत हे।
जउन श्रोता के सही जुवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग जीतइया प्रतिभागी ल प्रादेशिक समाचार एकांश डहार ले ई-प्रमाण पत्र दे जाही।
हाईकोर्ट-शिक्षक भर्ती
छत्तीसगढ़ उच्च न्यायालय ह सहायक शिक्षक के भर्ती प्रक्रिया उपर लगे रोक ल हटा देहे। ए फइसला ले अब जल्दी प्रदेस म तेईस सौ सिक्षक मनके नियुक्ति करे जा सकही। बतादन कि छत्तीसगढ़ व्यावसायिक परीक्षा मंडल डहार ले नौ मार्च दू हजार उन्नीस के तृतीय अउ चतुर्थ श्रेणी के पद बर सिक्षक मनके भर्ती के विज्ञापन जारी करे गे रिहीस। एमा उही जिला के उम्मीदवार मन ल पात्रता देके बात केहे गे रिहीस, लेकिन ए परीक्षा म उक्त निरदेस के पालन नइ करे गीस, जेखर बर ओ जिला के स्थानीय उम्मीदवार मन उच्च न्यायालय म याचिका दायर करके उक्त नियम अनुसार लाभ देके मांग करे रिहीन।
माओवादी-समाचार
सुकमा जिला म आज तीन महिला समेत आठ झिन माओवादी मन आत्मसमर्पण करीन। जिला के पुलिस अध्यक्ष सुनील शर्मा ह बतईन कि ए माओवादी मन सीआरपीएफ, कोबरा बटालियन अउ जिला पुलिस बल के अधिकारी मनके सामने आत्मसमर्पण करीन। ए मन उपर मिनपा समेत कई ठिन बड़का माओवादी घटना मन म सामिल रेहे के आरोप हे। पुलिस डहार ले क्षेत्र म चलाय जावत पुना नर्कोम अभियान के तहत ए माओवादी मन आत्मसमर्पण करीन।
उहें, नारायणपुर जिला म छोटेडोंगर थाना क्षेत्र के मढ़ोनार गांव म माओवादी मन पुलिया निर्माण काम म लगे मुंशी के हत्या कर दीन। उहें, निर्माण काम म लगे वाहन मन ल घलो आगी लगा दीन।
राष्ट्रपति-एनएसएस पुरस्कार
राष्ट्रपति रामनाथ कोविंद ह आज वर्चुअल माध्यम ले बछर दू हजार उन्नीस-बीस बर राष्ट्रीय सेवा योजना-एन.एस.एस. पुरस्कार प्रदान करीन। नई दिल्ली के सुषमा स्वराज भवन म आयोजित पुरस्कार वितरण समारोह म केन्द्रीय खेल मंत्री अनुराग ठाकुर अउ राज्य मंत्री निसिथ प्रमाणिक घलो मौजूद रिहीन।
ए मकउा म श्री ठाकुर ह किहीन कि युवा देस के भविष्य हरय। ओमन किहीन कि राष्ट्रीय सेवा योजना के स्वयंसेवक मन कोविड-19 महामारी के दउरान सामुदायिक सेवा बर पूरा लगन ले काम करे हे।
मुख्यमंत्री-घोषणा
मुख्यमंत्री भूपेश बघेल ह कबीरधाम जिला म पिपरिया अउ कुकदुर ल तहसील अउ इंदौरी अउ कुण्डा ल नगर पंचायत के दर्जा देके घोसना करीन हे। श्री बघेल ह काली अपन निवास कार्यालय म कबीरधाम जिला ले आय प्रतिनिधिमंडल ले चर्चा करत ए बात किहीन। ए मउका म ओमन किहीन कि आम जनता के सहुलियत बर प्रशासनिक इकाई ल छोटा इकाई मन म पुनर्गठित करे जात हे।
चर्चा के दौरान मुख्यमंत्री ह कवर्धा म मेडिकल कॉलेज सुरू करे के संबंध म किहीन कि केन्द्र ले यदि नवा मेडिकल कॉलेज के स्वीकृति मिलही त कवर्धा म घलो मेडिकल कॉलेज सुरू करे जाही। ओमन बतईन कि ए बछर केन्द्र ले प्रदेस म कांकेर, महासमुंद अउ कोरबा म तीन ठन मेडिकल कॉलेज सुरू करे बर मंजूरी मिले हे।
बिलासपुर-अपहरण मामला
बिलासपुर म एक निजी अस्पताल के संचालक के अपहरण करे के मामला म पुलिस ह पांच झिन आरोपी मन ल गिरफ्तार कर लेहे।
मिले जानकारी अनुसार बिलासपुर पुलिस ह उत्तरप्रदेश के मुरादाबाद ले ए आरोपी मन ल पकड़ीस। गिरफ्तार करे गे आरोपी मन म अस्पताल म पहिली काम करइया दू डॉक्टर, एक टेक्नीशियन अउ दू झिन दूसर लोगन मन सामिल हवय। बतादन कि पाछु उन्नीस सितंबर के संझा बिलासपुर स्थित एक निजी अस्पताल के संचालक प्रदीप अग्रवाल ल मोपका स्थित एक सैलून ले अपहरण कर ले गे रिहीस।
शैलेष पांडे-कार्रवाई
बिलासपुर विधायक शैलेष पांडे ल कथित रूप ले पार्टी लीग ले हटके बयानबाजी करे के मामला म पार्टी ले छह साल बर निलंबित करे के अनुसंसा करे गेहे।
बतादन कि दू दिन पहिली बिलासपुर के जिला अस्पताल म कांग्रेस नेता पंकज सिंह डहार ले एक झिन स्वास्थ्यकर्मी के संग कथित रूप ले मारपीट करे गे रिहीस। एखर बाद विधायक शैलेष पांडे समेत कांग्रेस नेता मन सिटी कोतवाली के घेराव करे के बात करे रिहीन। ए मामला ल लेके आज बिलासपुर म कांग्रेस के बइठका होईस। एखर बाद पत्रकार मन ल सहर जिला कांग्रेस कमेटी के अध्यक्ष प्रमोद नायक ह बतईन कि शैलेष पांडे ल पार्टी ले छह साल बर निलंबित करे के प्रस्ताव प्रदेश कांग्रेस कमेटी समेत प्रदेस प्रभारी पी.एल. पुनिया ल घलो भेज दे गेहे।
पोषण के महत्व-वेबीनार
पत्र सूचना कार्यालय अउ प्रादेशिक लोकसंपर्क कार्यालय रायपुर डहार ले संयुक्त रूप ले आज अंबिकापुर म ‘‘हमारे जीवन में पोषण के महत्व‘‘ बिसय उपर वेनीनार राखे गीस। ए मउका म सरगुजा के महिला अउ बाल विकास अधिकारी रजनी कुजूर ह बतईन कि लइका अउ किशोरी बालिका मन म कुपोषण अउ महिला मन म एनीमिया ल दूर करे बर अउ आम जनता म जागरूकता लाय के उद्देश्य ले भारत सरकार डहार ले सितंबर माह ल पोषण माह के रूप म मनाय जात हे। ए दउरान पौधारोपण, योग, क्षेत्रीय पोषण किट के वितरण अउ कुपोषित लइका मन ल पहिचान के पौष्टिक भोजन के वितरण करे जात हे।
स्कूल छत-हादसा
बेमेतरा जिला म एक स्कूल के छत के प्लास्टर गिरे ले छह झिन लइका मनके घायल होय के मामला म प्रसासन ह स्कूल के प्रधान पाठक ल निलंबित कर देहे। उहें, नवागढ़ के खंड शिक्षा अधिकारी अउ सहायक खंड शिक्षा अधिकारी ल कारण बताओ नोटिस जारी करे गेहे। जिला कलेक्टर ह ए घटना के जांच बर अनुविभागीय अधिकारी, जिला शिक्षा अधिकारी अउ जनपद पंचायत सीईओ के संयुक्त टीम गठित कर जांच रिपोर्ट प्रस्तुत करे के निरदेस दीन हे।
बतादन कि दू दिन पहिली जिला के नवागढ़ विकासखंड के रनबोड़ गांव स्थित शासकीय प्राथमिक साला के छत के प्लास्टर गिर गे रिहीस। जतका बेरा ए घटना होईस, ओ दउरान स्कूल म कक्षा चलत रिहीस। घायल चार झिन लइका मन ल नवागढ़ के स्वास्थ्य केन्द्र म भर्ती कराय गे रिहीस।
मौसम
अवइया चौबीस घंटा के दउरान प्रदेस के आने-आने जगह मन म हल्का ले मध्यम बरसा होय के या छींटा पड़े के संभावना हे।
मौसम विभाग अनुसार एक निम्न दाब के क्षेत्र पूर्व मध्य बंगाल के खाड़ी अउ ओखर आसपास स्थित हे। एखरे संग उपरी हवा के चक्रीय चक्रवाती घेरा घलो बने हवय। एखर अवइया बारह घंटा म अउ प्रबल होय के संभावना हवय। एखर असर ले प्रदेस म एक-दू जगह मन म गरज-चमक के संग बिजली गिरे के संभावना हवय।