कोविड टीका समाचार
प्रदेश म कोरोना ले बचाव बर अब तक एक करोड़ चौहत्तर लाख चालीस हजार ले जादा टीका लगाये जा चुके हे। जेमा ले एक करोड़ उनतीस लाख अठारा हजार ले जादा लोगन मन ल पहला डोज अउ पैंतालिस लाख इक्कीस हजार ले जादा लोगन मन ल दूनो डोज दे जा चुके हे। अठारा ले चौंवालिस उमर के छियांसठ लाख चौंवालिस हजार अउ पैंतालिस साल ले जादा उमर के छप्पन लाख सैंतालिस हजार लोगन मन ह पहिली टीका लगवा चुके हे।
एति प्रदेश म कोरोना संक्रमण के दर म सरलग कमी आवत हे। प्रदेश म काली कोरोना संक्रमण के छब्बीस नवा मामला आगू आय हे। काली राज्य के पंद्रह जिला म कोरोना संक्रमण के एको मामला नइ मिले हे।
उंहें बस्तर, दुर्ग अउ धमतरी जिला म कलेक्टर ह बिहाव म एक सौ पचास अउ मरिया के कार्यक्रम म पचास मनखे मनके शामिल होय के मंजूरी देहे।
अइसने जांजगीर-चांपा जिला कलेक्टर ह कोनो भी कार्यक्रम ल खुला जगा म राखके एक सौ पचास लोगन मनके आय के मंजूरी देहे। ए दउरान कोरोना गाइडलाईन के पालन करना जरूरी होही।
इही बीच कोरबा जिला के कटघोरा म सामुदायिक स्वास्थ्य केंद्र म ऑक्सीजन प्लांट के स्थापना करे गेहे। एखर ले करीबन सौ ठिन गांव के लोगन मन ल इलाज के सुविधा मिल सकही।
आदिवासी समाज मुख्यमंत्री
प्रदेश के आदिवासी जगा ले आये सर्व आदिवासी समाज के प्रतिनिधि मंडल ह रायपुर म मुख्यमंत्री ले मिलिन। ए मउका म मुख्यमंत्री ह कहिन कि बस्तर अंचल म जिहां स्वामी आत्मानंद इंग्लिश मीडियम स्कूल खुले हे। उंहा के लईका मन बर हॉस्टल के बेवस्था करे जाही। समाज के प्रतिनिधि मंडल मन ह दूर दराज के क्षेत्र मन म वन अधिकार पट्टा, लघु वनोपज ल सकेले अउ आने रोजगार वाले काम शुरू करे के मांग करे हे।
पोषण माह
राष्ट्रीय बाल अधिकार संरक्षण आयोग के सदस्य यशंवत जैन ह दुर्ग जिला के सरकारी अस्पताल अउ आंगनबाड़ी केंद्र के निरीक्षण करीन। ए दउरान ओमन माइलोगिन अउ बाल विकास विभाग के अधिकारी मनके बइठका लीन।
श्री जैन ह कोरोना संक्रमण ले प्रभावित लईका मनके पुर्नवास बर चलाये जात बाल स्वराज पोर्टल के बारे म जानबा लीन अउ बेसहारा लइका मनके शिक्ष अउ ओमन ल दे जात मदद के बारे म अधिकारी मन ल निर्देश दीन। ओमन डिजिटल प्लेटफार्म आधारित गतिविधि के माध्यम ले दुर्ग जिला म कुपोषण मुक्ति बर बने प्रयास करे के बात कीहिन ।
फिल्म महोत्सव
केंद्रीय सूचना अउ प्रसारण मंत्री अनुराग ठाकुर ह चौबीस सितंबर के लद्दाख के लेह म पांच दिन तक चलइया हिमालयन फिल्म महोत्सव के शुभारंभ करहीं। फिल्म महोत्सव के शुभारंभ म फिल्म शेरशाह के निर्माता अउ कलाकार मन उपस्थित रीहीं। एखर अलावा कार्यशाला, मास्टर क्लास अउ प्रतिस्पर्धा सत्र घलो राखे गेहे।
एक भारत श्रेष्ठ भारत अभियान
एक भारत श्रेष्ठ भारत अभियान के तहत दुर्ग जिला म सैंतीसवीं सीजी बटालियन के एनसीसी ग्रुप के कैडेट मन ल वचुअर्ल रूप ले आने आने राज्य के भूगोल अउ इतिहास ले जुड़े जानबा दे जात हे। पच्चीस सितंबर तक चलइया ये कार्यक्रम म वीडियो के माध्यम ले एनसीसी हेड क्वार्टर के अधिकारी मन जानबा देवत हे। ग्रुप कमांडर कर्नल विष्णुसिंह सिकरवार ह कैडेट मन ल संबोधित करत कीहिन कि ऑनलाईन वेबिनार के उद्देश्य कैडेट मनके मनोबल ल बढ़ाना हे।
स्वच्छ भारत अभियान
स्वच्छ भारत अभियान के तहत देश अउ प्रदेश म कतकोन पहल करे जात हे। ए बेरा भारतीय रेलवे डहार ले स्वच्छता पखवाड़ा मनाये जात हे।
राज्य के स्वास्थ्य मंत्री टी.एस. सिंहदेव ह पाछू दिन रायपुर ले सत्याग्रह ले स्वच्छाग्रह रथयात्रा ल हरा झण्डी दिखाके रवाना करीन। ये रथयात्रा दू अक्टूबर तक चलाये जाही । एखर उद्देशय गांव गंवतरी मन म साफ सफई के बारे म लोगन मन ल जागरूक करना हे।
ये रथयात्रा ओडीएफ प्लस के अवधारणा उपर आधारित हे। ए अभियान के तहत राज्य के जम्मों अठाइस जिला मन म एक-एक ठिन स्वच्छता रथ निकाले जात हे। जउन ह गांव गांव म घूमके साफ सफई के बारे म बताही। जनप्रतिनिधि, अधिकारी, कर्मचारी मनके संग गांव के लोगन मन डहार ले स्वच्छता ही सेवा अभियान के तहत श्रमदान घलो करे जाही।
जूदेव अंतिम संस्कार
भाजपा के पूर्व विधायक अउ ब्रेवरेज कार्पोरेशन के अध्यक्ष रेहे युद्धवीर सिंह जूदेव के आज पूरा राजकीय सम्मान के संग अंतिम संस्कार करे गीस। जशपुर जिला के बांकीटोली म उंखर भतीजा शौर्य प्रताप सिंह ह मुखाग्नि दीन।
ए मउका म नेता प्रतिपक्ष धरमलाल कौशिक, सांसद गोमती साय, भाजपा अध्यक्ष विष्णुदेव साय, पूर्व मंत्री बृजमोहन अग्रवाल, खाद्यमंत्री अमरजीत भगत, संसदीय सचिव यू.डी. मिंज के संग कतकोन लोगन मन ह शामिल होइन। जानबा के मुताबिक श्री जूदेव के निधन बीस सितंबर के बंगलुरू के एक ठिन अस्पताल म होगे रीहिस।
रामराज्य-परिचर्चा
फिल्म अभिनेता आशुतोष राणा डहार ले लिखे गे किताब रामराज्य उपर संस्कृति विभाग कोति ले रायपुर म राष्ट्र निर्माण और रामराज्य विसय उपर एक ठिन परिचर्चा राखे गीस। ए मउका म संस्कृति मंत्री अमरजीत भगत ह कीहिन कि प्रदेश म राम वनगमन पथ के चिन्हारी करे के बाद एखर विकास करे जात हे।
नवा फिल्म नीति के बारे म ओमन कीहिन कि एखर ले फिल्म उद्योग ले जुड़े लोगन मन ल बने मउका मिलही अउ प्रदेश के कलाकार मन ह घलो बड़ा परदा म अपन कला के प्रदर्शन कर सकही। परिचर्चा म आशुतोष राणा ह कीहिन कि श्रीराम के प्रशासन म जउन आदर्श व्यवस्था कल्पना म हवय, उही रामराज्य हरय।
क्रीडा प्रतियोगिता
इक्कीसवां राज्य स्तरीय शालेय क्रीड़ा के आयोजन ए बेरा बेमेतरा जिला म शुरू होगे हे । पच्चीस सितंबर तक चलइया ए प्रतियोगिता के शुभारंभ विधायक आशीष छाबड़ा ह करीन। ए प्रतियोगिता म प्रदेशभर के करीबन पांच सौ ले जादा छात्र-छात्रा मन भाग लीहीं।
मौसम
प्रदेश के बस्तर संभाग म छब्बीस ले अठाईस सितंबर भारी बरसा होय के संभावना हे। मौसम विभाग ह अवइया चौबीस घंटा के दउरान एक दू जगा म भारी बरसा के संग गाज गिरे के संभावना बताय हे।
ए बेरा एक ठिन निम्न दाब के क्षेत्र दक्षिण पूर्व झारखंड अउ ओखर तीर तखार म स्थित हे । जेखर प्रभाव ले प्रदेश म हल्का ले मध्यम बरसा होवत हे।
एति कोरबा जिला म हंसदेव नदी के तीर तखार म जादा पानी भरे के सेती बांगो बांध के एक ठिन गेट ल खोले गेहे अउ अब तक छै हजार क्यूसेक ले जादा पानी छोड़े जा चुके हे।
अउ अब थोरकुन समाचार सार म-
– सरगुजा जिला कलेक्टर ह किसान मनके भुंइया ले जुड़े काम बर पइसा के मांग करे के मामला म लुण्ड्रा के पटवारी ल निलंबित कर देहे।
– कोरिया जिला के खड़गंवा विकासखंड के बिन्नीडांड अउ बेलकमार म पाछू रतिहा हाथी मनके दल ह तीन ठिन घर ल नुकसान पहुंचाय हे अउ करीबन तेईस झिन किसान मनके फसल ल चौपट कर देहे।
– रायपुर जिला रोजगार अउ स्वरोजगार मार्गदर्शन केंद्र डहार ले नवा रायपुर म चौबीस सितंबर के प्लेसमेंट कैम्प के आयोजन करे जाही।
– जांजगीर-चांपा जिला म सरकारी नौकरी लगाये के नाव म ठगी करइया एक झिन आरोपी ल पुलिस ह गिरप्तार करे हे। उंहें इही जिला के मलदा गांव म टोनही प्रताड़ना के मामला म पुलिस ह एक झिन आरोपी ल गिरप्तार करे हे।
– राज्य सरकार ह संस्कृत भाषा के क्षेत्र म बढ़िया काम करइया मनखे या संस्था मन ले संस्कृत भाषा सम्मान पुरस्कार बर चार अक्टूबर तक अर्जी मंगाय हे।
– अइसने राज्य सरकार ह लोक कला के क्षेत्र म बढ़िया काम करइया मनखे अउ संस्था मनले दाउ मंदराजी लोक कला सम्मान पुरस्कार बर ग्यारा अक्टूबर तक अर्जी मंगाय हे।
– उंहें छत्तीसगढ़ अप्रवासी भारतीय सम्मान बर प्रविष्ठि अउ अनुशंसा ल ग्यारा अक्टूबर तक मंगाय गेहे।
अउ
– जांजगीर-चांपा शहर म खराब हो चुके रद्दा मन ल ठीकठाक करे के मांग ल लेके भाजपा सांसद विधायक अउ प्रदेश पदाधिकारी मन चौबीस सितंबर के धरना-प्रदर्शन करही।