मुख्यमंत्री-निर्माण कार्य
मुख्यमंत्री भूपेश बघेल ह आज प्रदेश के 27 जिला बर दू हजार आठ सौ चौंतीस करोड़ ले जादा विकास काम के लोकार्पण अउ भूमिपूजन करीन। एमा सड़क, पुल-पुलिया अउ भवन समेत आने-आने निर्माण काम सामिल हवय।
रईपुर स्थित अपन निवास कार्यालय म आयोजित वर्चुअल कारीकरम म मुख्यमंत्री ह किहीन कि करीबन पौने तीन साल के दउरान कोरोना संक्रमण अउ लॉकडाउन समेत बिक्कट अकन चुनौती आगू आईस। एखर बावजूद घलो छत्तीसगढ़ म विकास अउ निर्माण के काम लगातार होवत रिहीस। ओमन किहीन कि राज्य के माओवाद परभावित क्षेत्र मन म बने ढंग ले अवई-जवई के सुविधा बर तीन सौ बारह सड़क अउ पुल-पुलिया मनके निर्माण काम जोरदरहा ढंग ले कराय जावत हे।
कोविड टीका/उपलब्धि
भारत ह कोविड महामारी ले लड़ई म ऐतिहासिक उपलब्धि हासिल करत 80 करोड़ ले जादा कोविड टीका लगवइया मनखे मनके आंकड़ा ल पार कर लेहे। देस म अभी तक 80 करोड़ 43 लाख ले जादा टीका लगाय गेहे। काली 85 लाख 42 हजार टीका लगाय गीस।
ऐति, छत्तीसगढ़ म कोविड टीकाकरण जोरशोर ले जारी हे। प्रदेस म कोरोना ले बचाव बर अभी तक 01 करोड़ 66 लाख 22 हजार ले जादा टीका लगाय जा चुके हे।
इही बीच, प्रदेस म कोरोना संक्रमण के मामला म कमी आवत हे। औसत पॉजिटीविटी दर कम होके शून्य दशमलव एक-दू प्रतिसत म पहुंच गेहे। काली राज्य के अट्ठाईस म ले पन्द्रह जिला मन म कोरोना संक्रमण के एको नवा मामला आगू नइ आय हे। प्रदेस म काली 28 नवा कोरोना संक्रमित मरीज मिलीस। अभी म 332 मरीज मनके इलाज आने-आने अस्पताल अउ होम आइसोलेशन म चलत हे।
प्रधानमंत्री-सड़क
प्रधानमंत्री ग्राम सड़क योजना के तहत तीसरइया चरण के काम के मंजूरी अउ काम मन ल पूरा करे के मामला म छत्तीसगढ़ ह पूरा देस म पहिली स्थान म हवय। ए जानकारी दुरूग जिला के धमधा ब्लॉक के ग्राम घोटवानी म आजादी के पचहत्तरवां वर्षगांठ म राखे गे आजादी के अमृत महोत्सव के कारीकरम म दे गीस। ए कारीकरम प्रधानमंत्री ग्राम सड़क योजना के तहत करे गे रिहीस। ए मउका म केन्द्रीय ग्रामीण विकास मंत्रालय के सचिव नागेन्द्र सिन्हा ह छत्तीसगढ़ म बने ग्रामीण सड़क के गुणवत्ता के बड़ई करीन।
व्यावसायिक शिक्षा
स्कूल अउ औद्योगिक प्रशिक्षण संस्थान-आई.टी.आई. म रोजगार उन्मुखी कौशल विकास अउ व्यावसायिक शिक्षा दे खातिर प्रदेस म इही सिक्षण सत्र ले एक वर्षीय प्रसिक्षण सुरू करे जाही। ए संबंध म संचालक रोजगार अउ प्रसिक्षण अवनीश कुमार शरण ह जम्मों जिला कलेक्टर मन ल पत्र जारी करे हे। पत्र म केहे गेहे कि कलेक्टर मन डहार ले विकासखंड मुख्यालय स्तर म एक-एक आई.टी.आई अउ स्कूल के चिन्हांकन करके प्रसिक्षण बर तीन-तीन ट्रेड के चयन करे गेहे। एमा एक बछर अउ दू बछर के ट्रेड सामिल हे।
फिट इंडिया फ्रीडम रन
आजादी के अमृत महोत्सव के तहत ए दिन प्रदेस म कतकोन कारीकरम करे जावत हे। इही कड़ी म काली जगदलपुर म फिट इंडिया फ्रीडम रन के आयोजन करे गीस। ए दउड़ म नेहरू युवा केन्द्र संगठन जगदलपुर, एन.एस.एस., एनसीसी के अलावा स्कूली छात्र-छात्रा अउ युवा मन ह बड़ संख्या म भाग लीन। ए दउड़ जगदलपुर के सिटी ग्राउंड ले सुरू होईस, जउन ह आने-आने रद्दा ले होवत वापस सिटी ग्राउंड अमरीस। ए मउका म रीजनल आउटरीच ब्यूरो जगदलपुर के सहयोग ले देशभक्ति म आधारित सांस्कृतिक कारीकरम के आयोजन करे गीस।
दुर्घटना
कोंडागांव जिला म आज एक सड़क दुर्घटना म आठ झिन मनखे मनके मउत होगे। उहें, आठ आने लोगन गंभीर रूप ले घायल होगे हे। ए घटना बोरगांव के तीर ओ बेरा म होईस, जब चारपहिया गाड़ी ह ऑटो ले टकरा गीस। घायल मन ल फरसगांव के अस्पताल म भर्ती कराय गेहे।
मिले जानकारी के अनुसार ए लोगन मन गोदना गांव म एक पारिवारिक शोक कारीकरम म सामिल होय के बाद ए ऑटो म बइठ के अपन गांव पांडयान लहुटत रिहीन। जानकारी मिले हे कि पुलिस अधीक्षक जितेन्द्र शुक्ला ए बेरा उही रद्दा ले जावत रिहीस। ओमन घायल मन ल तुरते अस्पताल पहुंचईन। एमा गंभीर रूप ले घायल मनखे मन ल बने ढंग ले इलाज बर रईपुर लाय जावत हे।
बीएसएफ-वृक्षारोपण
सीमा सुरक्षा बल-बीएसएफ डहार ले देसभर म पर्यावरण संरक्षण बर वृक्षारोपण करे जात हे। इही कड़ी म बीएसएफ के अधिकारी अउ जवान मन ह काली दुरूग जिला के मरोदा स्थित भिलाई पब्लिक स्कूल अउ तीर-तखार के क्षेत्र म बारह सौ ले जादा पौधा लगईन। पौधा रोपण कारीकरम म सिक्षक अउ विद्यार्थी मन ह घलो बढ़-चढ़के हिस्सा लीन।
बीएसएफ के महानिरीक्षक एस.के. त्यागी के निरदेस म पर्यावरण संरक्षण बर छायादार अउ फलदार पौधा लगाय जावत हे। ए बछर छत्तीसगढ़ म एक लाख नौ हजार ले जादा पौधा लगाय के लक्ष्य राखे गेहे।
गणेश-विसर्जन
दस दिन के पूजापाठ के बाद आज अनंत चतुर्दशी ले गणेश मूर्ति के विसर्जन चालू होगे हे। राजधानी रईपुर समेत प्रदेस म आज घर-घर हवन पूजन के आयोजन करे जावत हे। एखर बाद लोगन मन ह ‘‘गणपति बप्पा मोरया, अगले बरस तू जल्दी आ‘‘ के जयकारा के संग भगवान गणेश ल विसर्जन करत हे। नगर निगम डहार ले आने-आने जगह म कुण्ड बनाके नान्हें मूर्ति मन ल विसर्जन करे के बेवस्था करे गेहे। कोरोना संक्रमण ल देखत एसो घलो आधा ले जादा जघा मन म भगवान गणेश के बड़का मूर्ति के स्थापना नइ करे गे रिहीस।
बस्तर-दशहरा
पचहत्तर दिन तक चलइया ऐतिहासिक विश्व प्रसिद्ध बस्तर दशहरा म आज डेरी गड़ाई के नेग होईस। एमा पुजारी डहार ले जनप्रतिनिधि अउ दशहरा समिति के सदस्य मनके मौजूदगी म साल प्रजाति के लकड़ी के परंपरानुसार पूजापाठ करे गीस। एखर बाद ए लकड़ी ल स्थानीय सीरासार भवन म स्थापित करे गीस। डेरी गड़ाई के नेग के बाद बड़का दू मंजिला रथ निर्माण के प्रक्रिया सुरू हो जथे।
खबर के मुताबिक हरेली अमावस्या के दिन पाट जात्रा पूजा विधान के संग बस्तर दशहरा के सुरूवात हो गेहे।
अउ अब पेस हे मौसम के हाल..
मौसम विभाग डहार ले अवइया चौबीस घंटा म राज्य के अधिकांश जगह म हल्का ले मध्यम पानी गिरे अउ गरज-चमक के संग छींटा पड़े के संभावना हवय। एक-दू जगह म गाज गिरे अउ भारी बरसा के घलो चेतावनी दे गेहे।
मौसम विभाग के मुताबिक एक निम्नदाब के केन्द्र वर्तमान म पूर्वी राजस्थान अउ पश्चिमी मध्यप्रदेश के उपर स्थित हवय। एखरे सेती प्रदेस म लगातार पानी गिरे के स्थिति बने हे।
अउ अब थोरकुन समाचार सार म-
– कांग्रेस के वरिष्ठ नेता अउ बिलासपुर ले लोकसभा सांसद रहि चुके गोदिल प्रसाद अनुरागी के आज बिहनिया निधन होगे। ओमन लंबा समय ले बीमार रिहीन।
– राज्य म चलत प्रयास आवासीय विद्यालय म चालू शैक्षणिक सत्र म कक्षा नवमीं म प्रवेस बर आवेदन जमा करे के आखिरी तारीख चार अक्टूबर हवय।
– धमतरी जिला म सुरक्षा बल ह सिहावा थाना क्षेत्र के सांकरा-खल्लारी रद्दा म भीरागहीन गांव के तीर ले माओवादी मन डहार लगाय गे पांच किलो वजनी विस्फोट बरामद करे हे।
अउ
– जांजगीर-चांपा जिला के नैला अउ बारराद्वार क्षेत्र म गाज गिरे ले आने-आने घटना म दू झिन लोगन के मउत होगे।