प्रधानमंत्री जन्मदिन-कोविड टीका
प्रधानमंत्री नरेन्द्र मोदी के जनम दिन म काली देस म एके दिन म ढाई करोड़ ले जादा वैक्सीन डोज देके रिकॉर्ड बनाय गीस। केन्द्रीय स्वास्थ्य मंत्री मनसुख मांडविया ह भारत अउ विश्व के इतिहास म एला स्वर्णिम अध्याय बतईन। श्री मांडविया ह किहीन कि ए ऐहिहासिक उपलब्धि स्वास्थ्यकर्मी अउ देसवासी कोति ले प्रधानमंत्री ल जनम दिन के उपहार हरय।
प्रधानमंत्री ह किहीन कि काली होय रिकार्ड टीकाकरण म हरेक भारतीय मन ल गर्व होही। श्री मोदी ह ट्वीट म टीकाकरण अभियान ल सफल बनाय म मेहनत करत डॉक्टर, नर्स अउ अग्रिम पंक्ति के करमचारी मनके आभार व्यक्त करीन। प्रधानमंत्री ह लोगन मन ले अनुरोध करीन कि ओमन कोरोना ल हराय बर टीकाकरण ल बढ़ावा देवय।
इही बीच, केन्द्रीय मंत्री डॉक्टर जितेन्द्र सिंह ह प्रधानमंत्री के जनम दिन के मउका म काली देसभर म निःसुल्क टेलीमेडिसिन परामर्स सह-औषधि सुविधा के सुरूवात करीन। ओमन विज्ञान अउ प्रौद्योगिकी मंत्रालय के छात्र-वैज्ञानिक संपर्क कारीकरम ‘‘जिज्ञासा‘‘ ल एक बछर के भीतर देस के सात सौ ले जादा जिला के स्कूल मन म बढ़ाय जाय के घलो घोसना करीन।
भाजपा-सेवा और संगठन
इही बीच, भारतीय जनता पार्टी के ‘‘सेवा और समर्पण‘‘ कारीकरम के तहत प्रधानमंत्री नरेन्द्र मोदी के जनम दिन के मउका म राजधानी रईपुर के पंडरी के जिला अस्पताल म स्वच्छता अभियान चलाय गीस। ए करीकरम म पार्टी के राष्ट्रीय सह संगठन महामंत्री शिवप्रकाश घलो सामिल होईन। ओमन पार्टी कार्यकर्ता मनके संग जिला अस्पताल परिसर म साफ-सफई करीन। एखर बाद कुष्ठ बस्ती म लोगन मन ल फल अउ मच्छरदानी बांटीन।
एखर पहिली, भारतीय जनता युवा मोर्चा डहार ले प्रधानमंत्री के जनम दिन के मउका म काली ले रईपुर के प्रदेश भाजपा कार्यालय अउ मरीन ड्राईव म युवा मोर्चा डहार ले नवा भारत प्रदर्सनी लगाय के संगेसंग रक्तदान अउ स्वास्थ्य सिविर के आयोजन घलो करे जावत हे। ए मउका म राष्ट्रीय सह संगठन महामंत्री शिवप्रकाश, भाजपा के प्रदेश अध्यक्ष विष्णुदेव साय अउ भाजयुमो के राष्ट्रीय उपाध्यक्ष रात सतपुते अउ नेता प्रतिपक्ष धरमलाल कौशिक मौजूद रिहीन।
पीएससी-परिणाम
छत्तीसगढ़ लोक सेवा आयोग ह लिखित परीक्षा अउ साक्षात्कार के बाद राज्य सेवा परीक्षा – दू हजार उन्नीस के रिजल्ट घोसित कर देहे। राज्य सेवा परीक्षा के समेकित मेरिट सूची आयोग के वेबसाइट म अपलोड कर दे गेहे। ए परीक्षा म लड़की मन ह बाजी मारे हे। टॉप टेन म छह झिन लड़की मन ह सामिल हवय। नीर निधि नंदेहा ह मेरिट सूची म पहिली स्थान पाय हे। उहें, सृष्टि चंद्राकर ह दूसर अउ सोनल डेविड ल तीसरइया स्थान मिले हवय।
मुख्यमंत्री भूपेश बघेल ह राज्य सेवा परीक्षा म सफल होय जम्मों अभ्यर्थी मन ल बधाई देवत उंखर उज्जवल भविष्य के कामना करीन हे।
कोरोना समाचार
छत्तीसगढ़ म कोरोना ले बचाव बर अब तक एक करोड़ तिरसठ लाख पैंतीस हजार ले जादा कोरोना रोधी टीका लगाय गेहे। एमा एक करोड़ तेईस लाख पच्चीस हजार ले जादा लोगन ल पहिली टीका अउ चालीस लाख बीस हजार ले जादा लोगन ल दूसरा टीका लगाय गेहे।
इही बीच, राज्य म कोरोना संक्रमण के दर कम होके सून्य दशमलव एक-दू प्रतिसत म पहुंच गेहे। प्रदेस म काली छब्बीस नवा कोरोना संक्रमित मरीज मिलीस। अभी म तीन सौ छियालीस मरीज मनके इलाज आने-आने अस्पताल या होम आइसोलेशन म चलत हे।
युवा मितान क्लब
मुख्यमंत्री भूपेश बघेल ह आज रईपुर म राखे गे समारोह म राजीव युवा मितान क्लब योजना के सुरूवात करीन। ए योजना के तहत प्रदेस के जम्मों ग्राम पंचायत अउ नगरीय निकाय मन म चरणबद्ध रूप ले तेरह हजार दू सौ उनहत्तर राजीव युवा मितान क्लब बनाय जाही। समारोह म स्वास्थ्य मंत्री टी.एस. सिंहदेव, वन मंत्री मोहम्मद अकबर, कृषि मंत्री रविन्द्र चौबे अउ स्कूल शिक्षा मंत्री डॉक्टर प्रेमसाय सिंह टेकाम मौजूद रिहीन।
पैन/आधार-समय सीमा
केन्द्र सरकार ह पैन कार्ड ल आधार ले जोड़े के समय सीमा ल छह महीना बढ़ा देहे। पहिली ए समय सीमा ए महीना के तीस तारीख तक रिहीस, अब एला बढ़ाके अवइया बछर इकतीस मार्च कर दे गेहे। उहें, आयकर अधिनियम के तहत जुर्माना के कार्रवाई पूरा करे के तारीख घलो तीस सितंबर ले बढ़ाके अवइया बछर मार्च तक कर दे गेहे।
अमृत महोत्सव-क्विज विजेता
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता‘‘ म हमर श्रोता मन ह बड़ उत्साह के संग भाग लेवत हे। काली ए प्रश्नोत्तरी के छठवां अंक म छत्तीसगढ़ी बुलेटिन म प्रश्न रिहीस- ‘‘झंडा सत्याग्रह बिलासपुर म कोन बछर म सुरू होय रिहीस।‘‘ एखर सही जवाब हे- बछर 1923।
सवाल के जवाब म बड़ संख्या म श्रोता मन ह अपन जवाब भेजीन। फेर, सबले पहिली जवाब भेजइया विजेता हवय – बालोद जिला के ग्राम- बम्हनी निवासी जोहित कुमार यादव। आकाशवाणी परिवार कोति ले श्री यादव ल हमन बधाई अउ सुभाकामना देवत हन। श्री यादव ह आकाशवाणी समाचार के नियमित श्रोता हरय।
फिट इंडिया फ्रीडम रन
आजादी के अमृत महोत्सव के तहत प्रदेस म ए बेरा कतकोन कारीकरम करे जावत हे। इही कड़ी म आज दुरूग म फिट इंडिया फ्रीडम रन के आयोजन करे गीस। ए दउड़ सरदार पटेल चउक ले सुरू होईस, जउन ह आने-आने रद्दा ले होवत राजेन्द्र पार्क चउक पहुंचीस। नेहरू युवा केन्द्र डहार ले राष्ट्रीय सेवा योजना के संग मिलके राखे के ए कारीकरम म लोकसभा सांसद विजय बघेल घलो सामिल होईन। ए दउरान ओमन जम्मों प्रतिभागी मन ल फिट इंडिया फ्रीडम रन के सपथ देवईन।
माओवादी-समर्पण
सुकमा अउ दंतेवाड़ा जिला म लोन वर्राटू अभियान के तहत ग्यारह झिन माओवादी मन ह पुलिस के आगू आत्मसमर्पण करे हे।
सुकमा जिला म मरईगुड़ा थाना म दस झिन माओवादी मन ह एस.डी.ओ.पी. अउ सीआरपीएफ के अधिकारी मनके आगू आत्मसमर्पण करे हे। ए जम्मों माओवादी मिलिशिया सदस्य अउ कमांडर बताय जावत हे।
उहें, दंतेवाड़ा जिला के कुआंकोंडा थाना म घलो एक झिन दस हजार रूपिया के इनामी माओवादी ह आत्मसमर्पण करे हे। ए माओवादी उपर पुलिस पार्टी म हमला करे के संगेसंग कतकोन मामला म सामिल रेहे के आरोप हे।
अउ अब थोरकुन समाचार सार म-
– राज्यपाल अनुसुईया उइके ह अमर शहीद गोंड राजा शंकर शाह अउ उंखर बेटा कुंवर रघुनाथ शाह के पुण्यतिथि म ओमन ल नमन करीन।
– मुख्यमंत्री भूपेश बघेल ह स्वतंत्रता संग्राम सेनानी बैरिस्टर ठाकुर छेदीलाल के पुण्यतिथि म उंखर फोटू म फूलमाला चढ़ाके ओमन नमन करीन।
– राष्ट्रपिता महात्मा गांधी के जयंती दू अक्टूबर ले रईपुर शिक्षा संभाग म सिक्षक मन ले जुड़े समस्या के निराकरण बर संवर्धन सिविर के आयोजन करे जाही। ए आयोजन चौबीस विकासखंड मन म होही।
– भारतीय रेलवे डहार ले स्वच्छ रेल-स्वच्छ भारत के तहत चलाय जावत स्वच्छता अभियान के तहत आज स्वच्छ कार्य परिसर थीम म दक्षिण पूर्व मध्य रेलवे के मुख्यालय समेत बिलासपुर अउ रईपुर के जम्मों कार्य परिसर अउ स्टेसन कार्यालय मन म बिसेस स्वच्छता अभियान चलाय गीस।
अउ
– तृतीय लिंग समुदाय के तेरह नव-नियुक्त पुलिस आरक्षक मन ह आज मुख्यमंत्री ले भेंट करीन।