बारिश-मौसम
प्रदेश म पाछू दू-तीन दिन ले होवत सरलग बरसा के सेती जनजीवन अस्त-व्यस्त होगे हे। नंदिया के जलस्तर बाढ़े ले पुल के उपर ले पानी बोहावत हे। जेखर सेती कई ठन गांव के जिला मुख्यालय ले सड़क संपर्क टूट गेहे।
गरियाबंद जिला म दू दिन ले होवत सरलग बरसा चार सौ ले जादा मकान ल नुकसान होय हे, उंहें आठ सौ एकड़ ले जादा रकबा म फसल ल नुकसान पहुंचे हे।
उंहें रायपुर जिला के अभनपुर विकासखंड के लखना अउ कोलियारी गांव म जिला प्रशासन अउ आपदा राहत दल ह महानदी के बाढ़ म फंसे आठ झिन कृषि मजदूर मन ल सुरक्षित बाहिर निकालिन।
ओति बिलासपुर जिला म अरपा नंदिया के जल स्तर बाढ़त हे। एला देखत शनिचरी रपटा ल प्रशासन कोति ले बंद करा दे गेहे। उंहें गौरेला-पेण्ड्रा-मरवाही जिला म अरपा नंदिया के सेती बाढ़ के आशंका हवय।
जांजगीर चांपा जिला के शिवरीनारायण म महानदी उफान म हवय। एति अमरकंटक क्षेत्र म नर्मदा नंदिया के जलस्तर बाढ़ गेहे, जेखर ले बिलासपुर, अचानकमार, पेण्ड्रा, कोटमी, कोरबा, अउ बगरा समेत आने गांव ले सड़क संपर्क टूट गेहे।
इही बीच रायपुर के जिला कलेक्ट्रोरेट म बाढ़ नियंत्रण कक्ष चौबीस घंटा काम करत हे। एखर फोन नंबर हवय – शून्य सात सात एक दू चार एक तीन दू तीन तीन- मौसम विभाग के मुताबिक एक निम्न दाब के क्षेत्र उत्तरी मध्यप्रदेश के हवय अउ चक्रवाती घेरा घलो बने हे। जेखर प्रभाव ले प्रदेश के आने-आने जगा म गरज चमक संग बौछार पड़ सकत हे, उंहें एक दू जगा म गाज गिरे के चेतावनी दे गेहे।
फसल वर्षा रिपोर्ट
प्रदेश के राजस्व अउ आपदा प्रबंधन विभाग ह जम्मों जिला कलेक्टर मनले जिला म होय बरसा के स्थिति, खरीफ फसल के बोवई अउ अनियमित बरसा ले फसल के प्रभावित होय के जानकारी मांगे हे। राजस्व सचिव रिता शांडिल्य ह जम्मों जिला कलेक्टर म ल तय प्रपत्र म सतरा सितंबर तक रिपोर्ट भेजे बर केहे हे। इही बीच प्रदेश म पाछू जून महीना ले अब तक एक हजार चार मिलीमीटर औसत बरसा दरज करे गेहे।
ट्रेन प्रभावित
पूर्वी तट रेलवे के अंगुल-तालचर रोड सेक्शन म मालगाड़ी पटरी ले उतरे ले कुुुुछएक गाड़ी के अवई जवई प्रभावित रीही। अइसने दक्षिण पूर्व मध्य रेलवे ले होके जवइया कुछ गाड़ी ल रद्द करे गेहे या फेर बदले गे रद्दा ले भेजे जाही। एमा आज पुरी ले दुर्ग ले चलइया स्पेशल ट्रेन ल रद्द करे गेहे। उंहें पुरी-जोधपुर स्पेशल ट्रेन, पुरी-अहमदाबाद स्पेशल अउ इंदौर-पुरी स्पेशल ट्रेन ल आने रद्दा ले रवाना करे जाही।
भाजपा प्रदर्शन
भाजपा के राज्य इकाइ कोति ले प्रदेशभर म किसान मनके हित ल लेके धरना, प्रदर्शन करे जात हे । इही कड़ी म राज्य के कांग्रेस सरकार उपर किसान मन संग वादाखिलाफी के आरोप लगात आज जशपुर जिला के कासाबेल तहसील मुख्यालय म धरना प्रदर्शन करीन।
प्रदर्शन करइया मन ह राज्यपाल के नाव म तहसीलदार ल ज्ञापन सौंपीन। ये प्रदर्शन म भाजपा के प्रदेश अध्यक्ष विष्णुदेव साय संग कतकोन पदाधिकारी मन शामिल होइन।
निवास प्रमाण पत्र शर्त
छत्तीसगढ़ के बाहिर आने राज्य के स्कूल मन म पढ़ई करत आवेदक या जउन मन राज्य के बाहिर शिक्षा लेवत हे। उंखर माता-पिता छत्तीसगढ़ राज्य के स्थानीय निवासी होय के प्रमाण पत्र लेबर पात्र हावय।
त ओ पढ़ईया लईका मन ल घलो छत्तीसगढ़ के स्थानीय निवास प्रमाणपत्र मिले बर पात्र होही। ए संबंध म राज्य सरकार ह स्थानीय निवासी मनके परिभाषा निर्धारण के संबंध म सामान्य प्रशासन विभाग के पाछू निर्देश म फेरबदल करत एक नवा शरत जोड़े हे।
खबर के मुताबिक मुख्यमंत्री भूपेश बघेल के अगवई म आठ सितंबर के राखे गे केबिनेट के बइठका म ए संबंध म फैसला लेगे रीहिस।
अमृत महोत्सव पोषण माह
आजादी के पचहत्तरवां सालगिरह के मउका म मनाये जात आजादी के अमृत महोत्सव म बस्तर जिला म काली ले पोषण माह मनाये जात हे। क्षेत्रीय लोक संपर्क ब्यूरो कोति ले बस्तर विकासखंड के सद्भावना भवन म राखे गे कार्यक्रम म जिला पंचायत अध्यक्ष वेदवती कश्यप मुख्य रूप ले मौजूद रीहिन। ये बेरा म आजादी अउ पोषण ले जुड़े रांगोली, प्रश्नोत्तरी के संगेसंग बस्तर के कलाकार मन कोति ले सांस्कृतिक कार्यक्रम करे गीस।
कार्यक्रम के बेरा प्रधानमंत्री उच्चवला योजना के हितग्राही माइलोगिन मन ल रसोई गैस बांटे गीस। कार्यक्रम म माइलोगिन अउ लईका मन ल कुपोषण ल दूरिहा करे बर स्थानीय बोली म नाटक खेले गीस अउ गीत संगीत ले सुपोषण के जानकारी दे गीस। ए बेरा म कलाकार मन कोति ले केंद्र सरकार के योजना ले जुड़े नुक्कड़ नाटक देखाय गीस। ए बेरा म जीते प्रतिभागी मन ल इनाम दे गेहे।
सत्याग्रह से स्वच्छाग्रह रथ
प्रदेश के स्वास्थ्य मंत्री टी.एस. सिंहदेव ह आज स्वच्छ भारत मिशन ग्रामीण म सत्याग्रह ले स्वच्छाग्रह रथयात्रा ल हरियर झंडी दिखाके रवाना करीन। ये रथ आज ले दू अक्टूबर तक चलाय जाही। ये रथ प्रदेश के अठाईस जिला के जम्मों विकासखंड म जाही। ये रथयात्रा के उद्देश्य स्वच्छता के संदेश ल घर-घर तक अमराय अउ गांव के लोगन ल जागरूक करना हे।
स्वास्थ्य मंत्री सिम्स बैठक
स्वास्थ्य मंत्री टी.एस. सिंहदेव ह अपन निवास कार्यालय म सिम्स बिलासपुर म तृतीय अउ चतुर्थ वर्ग कर्मचारी कोति ले करे जात हड़ताल के संबंध म अधिकारी मन संग बइठका करीन। एमा सिम्स कर्मचारी मनके नियुक्ति अउ मांग ल लेके गोठबात करे गीस।
पुलिस पदोन्नति
गृह विभाग ह चौहत्तर झिन पुलिस अधिकारी मनके पदोन्नति आदेश जारी करे हे। एमा सैंतालिस झिन अधिकारी मनके पदोन्नति उप पुलिस अधीक्षक के पद म उन्नीस झिन अधिकारी मनके सहायक सेनानी, एक झिन अधिकारी के उप पुलिस अधीक्षक रेडियो के पद म करे गेहे। उंहें चार झिन अधिकारी मन ल उप पलिस अधीक्षक मुख्यालय अउ तीन झिन अधिकारी मन उप पुलिस अधीक्षक एम. के पद म पदोन्नत होय हे।
अभियंता दिवस
आज अभियंता दिवस हरय। ये मउका म उप राष्ट्रपति एम. वेंकैया नायडू, प्रधानमंत्री नरेंद्र मोदी अउ छत्तीसगढ़ के मुख्यमंत्री भूपेश बघेल ह इंजीनियर मन ल बधाई दीन हे।
श्री नायडू ह विख्यात अभियंता मोक्षगुण्डम विश्वेश्वरैया के जयंती म श्रद्धांजलि दीन। अउ कीहिन कि इंजीनियर मनके राष्ट्र निर्माण म महत्ता के भूमिका हावय। उंहें प्रधानमंत्री ह राष्ट्र निर्माण अउ ये धरती ल सुघ्घर बनाये बर आभार जताइन।
एति प्रदेश के मुख्यमंत्री ह शुभकामना देवत कीहिन कि राष्ट्र अउ राज्य के निर्माण म इंजीनियर मनके योगदान हवय।
आयुष्मान भारत
आयुष्मान भारत प्रधानमंत्री जन आरोग्य योजना अउ डॅाक्टर खूबचंद बघेल स्वास्थ्य सहायता योजना म आज ले तीस सितंबर तक प्रदेश के जम्मों जिला म आयुष्मान भारत पखवाड़ा मनाये जात हे। एमा तेईस सितंबर के आयुष्मान भारत दिवस मनाये जाही। ये बेरा म आयुष्मान कार्ड बर जादा ले जादा पंजीयन कराय अउ एखर ले मिलइया फायदा के लोगन ल जानकारी दे जाही।
मंत्रिमंडलीय उप समिति गठित
राज्य सरकार ह आदिवासी समाज ले जुड़े समस्या के निपटारा खातिर मंत्रि मंडलीय उप समिति अउ मुख्य सचिव के अगवई म ओखर ले जुड़े विभाग के सचिव मनके उच्च स्तरीय कमेटी बनाय के फैसला लेहे ।
ये संबंध म मुख्यमंत्री भूपेश बघेल ह कीहिन हे कि आदिवासी समाज के समस्या ल सुलझाय खातिर अउ उंखर हित बर कतकोन काम करे गेहे।
ग्राम सभा ल पहिली घांव सामुदायिक वन संसाधन के अधिकार दे गेहे। कोदो, कुटकी अउ रागी के खेती करइया किसान मन बर समर्थन कीमत म बिसाय के बेवस्था होय हे। मुख्यमंत्री श्री बघेल ह प्रदेशवासी मन ल नुआखाई, अउ ठाकुर जोहरनी महापरब के बधाई अउ शुभकामना दीन हे।