बारिश-मौसम-01
प्रदेस म पाछु दू-तीन दिन ले सरलग बरसात के चलत सामान्य जनजीवन अस्त-व्यस्त होगे हे। जलस्तर बाढ़े ले कतकोन नदी-नाला उफान म हे। उहें, कतको गांव मनके संपर्क मुख्यालय ले टूट गेहे।
गरियाबंद जिला म सरलग होवत बरसात के सेती महानदी, पैरी के संग कतकोन नदी-नाला के जलस्तर बाढ़ गेहे। एखर सेती पुल अउ सड़क के उपर ले पानी बोहात हे। उहें, जिला के बारूका नाला अउ पंडोरा के तीर हाईवे म पानी भर गेहे, जेखर चलत रायपुर-गरियाबंद राष्ट्रीय राजमार्ग सहित दर्जनों गांव के सड़क संपर्क मुख्यालय ले टूट गेहे। जिला प्रशासन ह लगातार होवत बरसात के सेती हाईअलर्ट घोषित करे हे।
उहें, जिलाभर म बरसात के सेती सिकासेर बांध के 17 गेट खोल दे गेहे। ए बांध ले करीब 20 हजार क्यूसेक पानी छोडे़ जात हे। प्रशासन ह बांध ले पानी छोड़ जाय के सेती नदी-नाला के जलस्तर बाढ़े के संभावना जतात आसपास के ग्रामीण मन ल सतर्क रेहे बर केहे हे। अचानक जलस्तर बाढ़े ले करीब 10 लोगन के अलग-अलग जगह मन म फंसे के खबर घलो मिले हे। एमा ले दू लोगन मन ल एस.डी.आर.एफ. के टीम ह रेस्क्यू करके सुरक्षित स्थान म पहुंचईस। जिला के पंडोरा, सम्बलपुर अउ मैनपुर म बाढ़ म फंसे लोगन मन ल बाहिर निकाले के प्रयास करत हे। जिला कलेक्टर नीलेश झीरसागर ह किहीन कि जरूरत पड़े म हेलीकॉप्टर के मदद ले बाढ़ म फंसे लोगन मनके रेस्क्यू करे जाही।
बारिश-मौसम-02
ऐति, धमतरी म पाछु कुछ दिन ले होवत बरसात के सेती जिला के 4 जलाशय – रविशंकर जलाशय, मुरूम सिल्ली, दुधावा अउ सोंढूर म पानी के आवक बाढ़ गेहे। जल संसाधन विभाग के कार्यपालन अभियंता ए.के. पालड़िया ह बतईन कि कैचमेंट एरिया म सरलग होवत बरसात ले जलाशय मन म तेजी ले जलभराव होवत हे।
इही बीच, मौसम विभाग ह अवइया चौबीस घंटा म कबीरधाम, बेमेतरा, राजनांदगांव, दुर्ग, बालोद, बिलासपुर सहित प्रदेस के 15 जिला मन म भारी बरसात होय के चेतावनी देहे। उहें, प्रदेस के अधिकांश जगह मन म हल्का ले मध्यम बरसात होय के या गरज-चमक के संग छींटा पड़े के संभावना हे।
मुख्यमंत्री-बारिश
इही बीच, मुख्यमंत्री भूपेश बघेल ह किहीस कि प्रदेश म अच्छा बरसात होत हे। एखर ले किसान मन ल राहत मिलही। मुख्यमंत्री ह किहीस कि प्रदेश म कुछु जगह मन बाढ़ के स्थिति बने के सूचना मिले हे। एखर बर अधिकारी मन ल बाढ़ प्रभावित जगह मन म हरसंभव सहायता पहुंचाय के निर्देश दे गेहे। ओमन किहीन कि प्रभावित इलाका मन म बचाव बर रेस्क्यू टीम भेजे जाय। उहें, राजधानी रायपुर म बरसात के सेती होवत जलभराव ल देखत मुख्यमंत्री ह किहीन कि स्थिति सामान्य होवत तक लोगन मन ल यात्रा नइ करना चाही। यात्रा जरूरी हे त सुरक्षित सड़क के उपयोग करना चाही। ओमन ह नगर निगम के अधिकारी अउ कर्मचारी मन ल जलभराव के स्थिति के जायजा लेके पानी के निकासी के व्यवस्था करे के निर्देश देहे।
बैंडमिंटन अकादमी-शुभारंभ
मुख्यमंत्री भूपेश बघेल ह आज नवा रायपुर म विश्व स्तरीय बैंडमिंटन अकादमी के सुभारंभ करीन। ‘‘द रायपुर सेंटर ऑफ एक्सीलेंस इन बैंडमिंटन‘‘ नाव ले बने ए अकादमी नवा रायपुर स्थित आई.टी.एम. यूनिवसिर्टी के परिसर म टाटा ट्रस्ट के सहयोग ले स्थापित करे गेहे। श्री बघेल ह आज रायपुर स्थित अपन निवास कार्यालय म वर्चुअल कार्यक्रम ल संबोधित करत रिहीन। ए मउका म ओमन किहीन कि छत्तीसगढ़ म खेल प्रतिभा मनके कमी नइ हे। अच्छा खेल सुविधा अउ प्रसिक्षण के सुविधा मिले ले प्रदेश म घलो अंतर्राष्ट्रीय स्तर के खिलाड़ी तैयार होही।
विमान हादसा-टला
रायपुर ले नई दिल्ली बर उड़ान भरे के बेरा एयर इंडिया के विमान ले एक पक्षी टकरा गे। पक्षी के टकराय ले पॉयलट ह विमान के इमरजेंसी लैंडिंग रायपुर एयरपोर्ट म करीस, जेखर ले एक ठिन बड़े हादसा टल गे। एयर इंडिया के विमान म केन्द्रीय मंत्री रेणुका सिंह सहित 174 यात्री सवार रिहीस।
अमृत महोत्सव-क्विज
आजादी के अमृत महोत्सव म आकाशवाणी समाचार स्वाधीनता संग्राम अउ ओखर गौरवसाली इतिहास उपर विशेष अमृत महोत्सव क्विज आयोजित करत हे। सुनइया मन ल बतादन कि ए प्रश्न राष्ट्रीय स्तर म आयोजित क्विज के तहत पूछे जाही। एखर सेती एखर जवाब प्रादेशिक बुलेटिन के क्विज बर निर्धारित ई-मेल या मोबाइल नंबर के बजाय आज के प्रश्न के बाद बताय जाने वाला वाट्एऐप नंबर अउ ई-मेल म भेजना हे। ‘‘अमृत महोत्सव क्विज आकाशवाणी समाचार के संग‘‘ के आज के प्रश्न हे-
‘‘तमिलनाडु के वेदारण्यम म नमक सत्याग्रह के नेतृत्स कोन करे रिहीस?‘‘
श्रोता मन अपन उत्तर वाट्एऐप नंबर – 8 8 2 6 5 4 6 2 6 2 म या ई-मेल ‘‘अमृत महोत्सव क्विज एट द रेट ई-मेल डॉट कॉम‘‘ म भेजय। एक झिन भाग्यसाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोसना करे जाही। विजेता ल ई-प्रमाण पत्र अउ एक ठिन प्रतीक पुरस्कार दे जाही।
कोविड-टीका
भारत ह कोविड रोधी टीकाकरण अभियान के अंतर्गत 75 करोड़ टीका लगा के एक ठिन अउ उपलब्धि हासिल करे हे। केन्द्रीय स्वास्थ्य मंत्री मनसुख मांडविया ह किहीन कि ‘‘सबका साथ-सबका प्रयास‘‘ के मंत्र के संग दुनिया के सबले बड़े टीकाकरण अभियान लगातार नवा कीर्तिमान बनात हे।
उहें, केन्द्रीय सूचना अउ प्रसारण मंत्री अनुराग ठाकुर ह देस के लोगन मन ल बधाई दीन अउ किहीन कि देस के स्वतंत्रता के 75वां साल म 75 करोड़ कोविड रोधी टीका लगाना असाधारण उपलब्धि हरय।
ऐति, छत्तीसगढ़ म कोरोना ले बचाव बर अब तक 01 करोड़ 57 लाख 51 हजार ले जादा टीका लगाय जा चुके हे।
हिन्दी दिवस
आज हिन्दी दिवस हरय। बछर 1949 म आजे के दिन संविधान सभा ह देवनागरी लिपि म हिन्दी ल राष्ट्र के राजभाषा के रूप म स्वीकार करे रिहीस। हिन्दी विश्व म सबले ज्यादा बोले जाने वाला भाषा म ले एक हे।
उप राष्ट्रपति एम. वैंकेया नायडू, प्रधानमंत्री नरेन्द्र मोदी, सूचना अउ प्रसारण मंत्री अनुराग सिंह ठाकुर ह हिन्दी दिवस म लोगन मन ल बधाई दीन। प्रधानमंत्री ह एक ट्वीट म किहीन कि हिन्दी ल सक्षम अउ सशक्त भाषा बनाय म अलग-अलग क्षेत्र के लोगन मनके महत्वपूर्ण भूमिका हे। उहें, केन्द्रीय गृहमंत्री अमित शाह ह नई दिल्ली म हिन्दी दिवस समारोह म किहीन कि सरकार, देस म सबो भाषा मनके संरक्षण बर प्रतिबद्ध हे।
माओवादी गिरफ्तार
बीजापुर जिला म सुरक्षा बल मन ह 8 लाख रूपिया के इनामी माओवादी ल गिरफ्तार करे हे। मिले जानकारी के अनुसार एस.टी.एफ. अउ सी.आर.पी.एफ के संयुक्त टीम सर्चिंग म निकले रिहीस। इही बेरा तर्रेम थाना क्षेत्र के अंतर्गत ए माओवादी ल गिरफ्तार करे गीस। गिरफ्तार माओवादी उपर बीजापुर-सुकमा के ताड़मेटला, कसालपाड़ अउ बुर्कापाल जइसे बड़े माओवादी घटना म सामिल होय के आरोप हे।
हाथी विचरण
कोरिया जिला म आजकल करीब 39 (उनचालीस) हाथी के दल विचरण करत हे। मिले जानकारी के अनुसार हाथी मनके ए दल ह कटघोरा वनमंडल के सीमा क्षेत्र म स्थित बुंदेलीपारा अउ डोंगरा पहाड़ी ललमटिया के जंगल म विचरण करत देखे गेहे। वन विभाग के अधिकारी मन ह बतईन कि बीते रतिहा हाथी मनके ए दल खड़गवां वन परिक्षेत्र के सकड़ाबिट म विचरण करत रिहीस। वन विभाग के टीम लगातार हाथी मनके दल उपर निगरानी बनाय राखे हे। उहें, ग्रामीण मन ल हाथी मन ल दुरिहा रेहे बर अउ जंगल डहार नइ जाय के समझाईश दे जात हे।