प्रधानमंत्री-गुजरात
प्रधानमंत्री नरेन्द्र मोदी ह किहीन हे कि हम मन ल मानवीय मूल्य के रक्षा के परयास जारी रखना चाही। वर्ष दो हजार एक म ग्यारह सितंबर के होय आतंकवादी हमला के उल्लेख करत ओमन ह किहीन कि ए तारीख मानवता उपर हमला बर जाने जाथे। ए दिन ले पूरा विश्व ह बहुत कुछ सीखे हवय। प्रधानमंत्री ह आज वीडियो कान्फ्रेंसिंग के माध्यम ले गुजरात के अहमदाबाद म अत्याधुनिक सरदारधाम भवन के उद्घाटन करत ए बात किहीन।
कोविड टीका/समाचार
छत्तीसगढ़ म कोरोना ले बचाव बर अब तक एक करोड़ चौव्वन लाख तेईस हजार ले जादा टीका लगाय जा चुके हे। एमा एक करोड़ सत्रह लाख अस्सी हजार ले जादा पहला डोज अउ छत्तीस लाख बयालीस हजार ले जादा दूसर डोज सामिल हवय। इही बीच, प्रदेस म कोरोना संक्रमण के दर म सरलग गिरावट कमी आवत हे। औसत पॉजिटीविटी दर सून्य दशमलव एक-दू प्रतिसत म आ गेहे। प्रदेस म काली कोरोना संक्रमण के तेईस नवा मामला सामने आय हे।
लोकवाणी
मुख्यमंत्री भूपेश बघेल के मासिक रेडियो वार्ता ‘‘लोकवाणी‘‘ के 21वां कड़ी के प्रसारण काली बारह सितंबर के होही। मुख्यमंत्री, लोकवाणी म ए बार ‘‘जिला स्तर पर विशेष रणनीति से विकास की नई राह‘‘ विषय उपर प्रदेशवासी मन ले गोठबात करही। लोकवाणी के प्रसारण छत्तीसगढ़ स्थित आकाशवाणी के सबो केन्द्र, एफ.एम. रेडियो अउ क्षेत्रीय समाचार चैनल मन म बिहनिया साढ़े दस बजे ले ग्यारह बजे तक होही।
फिट इंडिया फ्रीडम रन
आजादी के अमृत महोत्सव के तहत आज राजनांदगांव म फिट इंडिया फ्रीडम रन के आयोजन करे गीस। नेहरू युवा केन्द्र अउ राष्ट्रीय सेवा योजना डहार ले आयोजित ए कारीकरम म पूर्व मुख्यमंत्री डॉक्टर रमन सिंह, पद्मश्री पुखराज बाफना, अंतर्राष्ट्रीय हॉकी खिलाड़ी मृणाल चौबे, पूर्व सांसद मधुसूदन यादव अउ स्वतंत्रता संग्राम सेनानी के परिवार के सदस्य समेत बड़ संख्या म युवा मन ह हिस्सा लीन। ए मउका म युवा मन ल फिट इंडिया फ्रीडम रन के सपथ दिलाय गीस।
अमृत महोत्सव-विशेष साक्षात्कार देस के स्वतंत्रता के 75 वर्ष के उपलक्ष्य म मनाय जावत आजादी के अमृत महोत्सव के तहत प्रादेसिक समाचार एकांश, आकाशवाणी, रायपुर डहार ले बिसेस साक्षात्कार के श्रृंखला प्रसारित करे जावत हे। इही श्रृंखला के अवइया कड़ी काली बारह सितंबर के बिहनिया साढ़े नौ बजे प्रसारित करे जाही। एमा छत्तीसगढ़ म बछर उन्नीस सौ बीस ले उन्नीस सौ सैंतालीस के काखखंड के दउरान स्वतंत्रता संग्राम के तहत होय आने-आने आंदोलन के बारे म विस्तार ले बताय जाही। ए बारे म पूर्व राज्य निर्वाचन आयुक्त अउ जाने-माने राजनीतिक अउ सामाजिक विश्लेषक डॉक्टर सुशील त्रिवेदी ले लेगे बिसेस साक्षात्कार आकाशवाणी केन्द्र, रईपुर डहार ले काली साढ़े नौ बजे करे जाही, जेला छत्तीसगढ़ स्थित आकाशवाणी के जम्मों केन्द्र एक साथ रिले करही। इही बीच, आजादी के अमृत महोत्सव के तहत ‘‘राजभाषा हिन्दी की दशा और दिशा‘‘ विसय म कार्यशाला अउ हिन्दी पखवाड़ा पुरस्कार वितरण समारोह के आयोजन चौदह सितंबर के मेडिकल कॉलेज परिसर एम्स रईपुर म करे जाही।
मुख्यमंत्री-कार्यक्रम
धमतरी जिला के कोटेश्वर धाम म औषधीय पौधा के प्रसंस्करण अउ प्रशिक्षण केन्द्र खोले जाही। मुख्यमंत्री भूपेश बघेल ह कोटेश्वर धाम म आयोजित एक ठिन कारीकरम म ए घोसना करीन। ओमन किहीन कि कोटेश्वर धाम म सौर ऊर्जा ले विद्युत अउ पीये के पानी के बेवस्था करे जाही। उहें, दूर-दराज ले अवइया वैद्य मन बर विश्राम गृह घलो बनाय जाही। एखर अलावा कोटेश्वर धाम सातधारा के बंधान बर स्टाप डेम के निर्माण के संगेसंग चार हेक्टेयर क्षेत्र म सामुदायिक वन अधिकार पट्टा दे जाही।
पोषण माह-रैली
देसभर समेत छत्तीसगढ़ म घलो कुपोषण के प्रति जागरूक करने बर पोषण माह के आयोजन करे जावत हे। इही कड़ी म महिला अउ बाल विकास मंत्री अनिला भेंडिया के अगुवई म राजधानी के तेलीबांधी तरिया स्थित मरीन ड्राईव ले साइकिल रैली निकाले गीस। एमा राज्य महिला आयोग के अध्यक्ष डॉक्टर किरणमयी नायक, रायपुर नगर निगम के सभापति प्रमोद दुबे, महिला बाल विकास विभाग के सचिव रीना बाबा साहेब कंगाले सहित विभिन्न स्वयंसेवी संगठन के प्रतिनिधि, सासकीय अधिकारी-करमचारी अउ युवा मन सामिल होईन।
अमृत महोत्सव-क्विज विजेता
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी के पांचवां अंक म छत्तीसगढ़ी बुलेटिन म प्रश्न रिहीस- ‘‘‘‘धमतरी के तीर नगरी म बछर 1922 म कोन से आंदोलन होय रिहीस।‘‘ एखर सही जवाब हे- जंगल सत्याग्रह। सवाल के जवाब म बड़ संख्या म सुनइया मन ह अपन जवाब भेजीन। फेर, सबले पहिली जवाब भेजइया विजेता हवय – जांजगीर-चांपा जिला के ग्राम- बारगांव निवासी हिमांशु दिनकर। आकाशवाणी परिवार डहार ले श्री दिनकर ल हमन हार्दिक बधाई अउ सुभाकामना देवत हन। श्री दिनकर ह आकाशवाणी समाचार के नियमित श्रोता हरय।
पर्वतारोही-
मुख्यमंत्री मुलाकात बालोद जिला के पर्वतारोही चित्रसेन साहू ह मुख्यमंत्री भूपेश बघेल ले भेंट करीन। ए दउरान ओमन मुख्यमंत्री ल तेईस अगस्त के यूरोप महाद्वीप के सबले ऊंचा चोटी माउंट एलबु्रस के अपन कृत्रित पांव ले चढ़ाई करके शिखर म लहराय तिरंगा भेंट करीन। मुख्यमंत्री ह ए उपलब्धि म ओमन ल हार्दिक बधाई दीन। खबर के मुताबिक चित्रसेन साहू, एखर पहिली अफ्रीका महाद्वीप के किलिमंजारो अउ ऑस्ट्रेलिया के माउंट कोजियस्को ल घलो फतह कर चुके हे।
नुआखाई
आज नुआखाई हरय। ए तिहार नवा फसल के आगमन अउ किसान मनके बंधुत्व के प्रतीक के रूप म मनाय जाथे। ए मउका म मुख्यमंत्री भूपेश बघेल ह प्रदेसवासी अउ बिसेस रूप ले उत्कल समाज के लोगन मन ल नुआखाई परब के सुभकामना दीन। अपन संदेस म मुख्यमंत्री ह किहीन कि ऋर्षि पंचमी ल नुआखाई के रूप म मनाय जाथे। ए तिहार नवा फसल के सुवागत, धरती अउ भगवान के वंदन के संगेसंग किसान भाई मनके बंधुत्व अउ एकत्व के प्रतीक हरय।
मौसम
अउ अब सुनव मौसम के हाल..
प्रदेस म मानसून के गतिविधि एक घांव फेर तेज होगे हे। आज मंझनिया बाद राजधानी रईपुर समेत प्रदेस के कतकोन हिस्सा म गरज-चमक के संग तेज बरसा होईस। करीबन दू घंटा तक लगातार होय बरसा के चलत निचला बस्ती अउ सड़क मन म पानी भर गे, जेखर ले लोगन मन ले कतकोन दिक्कत के सामना करना पड़ीस। मौसम विभाग के मुताबिक अवइया चौबीस घंटा के दउरान प्रदेस के अधिकांश जघा मन म हल्का ले मध्यम बरसा होय के संभावना हवय। उहें, दक्षिण अउ मध्य छत्तीसगढ़ म एक-दू जगह म भारी बारिस होय के चेतावनी घलो दे गेहे।
अउ अब थोरकुन समाचार सार म-
– महासमुंद जिला के सिरपुर म दू मोटर साइकिल के बीच होय टक्कर म दू झिन लोगन के मउत होगे। उहें, एक झिन आने मनखे गंभीर रूप ले घायल होगे हे।
– दुरूग जिला म डी.एम.सी. कुम्हारी कटिंग के तीर ट्रक के चपेट म आय ले एक लइका के मतउ होगे।
अउ
– राजनांदगांव के पुलिस प्रसिक्षण विद्यालय म तीस ले जादा जवान बीमार होगे हे। एमा ले ग्यारह झिन जवान डेंगू अउ उन्नीस झिन जवान टाइफाइट ले पीड़ित बताय जात हे।