केंद्रीय मंत्रिमंडल निर्णय
केंद्रीय मंत्रिमंडल के आर्थिक कार्य समिति ह बछर दू हजार बाईस तेईस के रबी फसल के न्यूनतम समर्थन मूल्य म बढ़ोत्तरी ल मंजूरी दे देहे। मसूर अउ सरसो के न्यूनतम समर्थन मूल्य म चार सौ रूपिया प्रति कुंटल, चना म एक सौ तीस रूपिया अउ कुसुम के मूल्य म एक सौ चैदा रूपिया प्रति कुंटल के बढ़ोत्तरी करे गेहे। गेंहू के न्यूनतम समर्थन मूल्य चालीस रूपिया बढ़ाके दू हजार पंद्रा रूपिया प्रति कुंटल अउ जौं के पैंतीस रूपिया बढ़ाके एक हजार छै सौ पैंतीस रूपिया प्रति कुंटल कर दे गेहे।
स्वच्छ ग्रामीण सर्वेक्षण
स्वच्छ भारत अभियान के दूसरा चरण म स्वच्छ ग्रामीण सर्वेक्षण आज ले शुरू होवत हे। आजादी के अमृत महोत्सव म स्वच्छ ग्रामीण सर्वेक्षण के उद्देश्य खुला म शौच ले मुक्ति म तेजी लाये बर सहयोग अउ एखर परिणाम अच्छा बनाना हरय। स्वच्छ सर्वेक्षण ग्रामीण के अंतर्गत देशभर के छै सौ अंठानबे जिला म सतरा हजार चार सौ पचहत्तर गांव मन म सर्वेक्षण करे जाही।
राज्यपाल स्काउट गाइड्स
राज्यपाल अनुसूइया उइके ह कीहिन कि स्काउट गाईड ह वसुधैव कुटुम्बकम के भावना बढ़ाय म महत्वपूर्ण भूमिका निभाय हे। राजभवन के दरबार हाल म आयोजित राज्य अलंकरण समारोह म राज्यपाल ह कीहिन कि स्काउट गाइड संस्था लईका मन म अनुशासन अउ राष्ट्रीयता के भावना जगाथे संगेसंग संस्था ले जुड़े विद्यार्थी मन म मानव सेवा के भावना घलो आथे, जउन ह जीवन भर उंखर काम आथे।
ओमन ह कीहिन कि स्काउट गाइड ल कम सुविधा अउ कठिन परिस्थ्तिि म खुद ल ढालके जीये के कला सिखाये जाथे। कार्यक्रम म राज्यपाल ह उत्कृष्ट स्काउट, गाइड, रोवर, रेंजर, स्काउटर, अउ गाइडर ल सम्मानित घलो करीन।
कोविड टीका/समाचार
छत्तीसगढ़ म कोरोना ले बचाव बर अब तक एक करोड़ तिरपन लाख तिरालिस हजार ले जादा टीका लगाये जा चुके हे।
इही बीच प्रदेश म कोरोना संक्रमण के दर म सरलग कमी आवत हे अउ पाॅजीटिव दर शून्य दशमलव एक छै प्रतिशत होगे हे। प्रदेश म जिहंा काली कोरोना संक्रमण के अड़तालिस नवा मामला आगू आय हे। उंहें चैदा जिला म एको झन नवा मरीज नइ मिले हे। प्रदेश म काली तक दस लाख चार हाजार ले जादा कोरोना संक्रमित मरज पाए गए हे। एमा ले नौ लाख नब्बे हजार ले जादा मरीज कोरोना संक्रमण ले ठीक हो चुके हे। वर्तमान बेरा म तीन सौ नब्बे मरीज मनके प्रदेश के आने आने अस्पताल अउ होम आइसोलेशन म इलाज चलत हे।
एति बस्तर जिल कोरोना मुक्त होय के दिशा म आगू बाढ़त हे। काली जिला म कोरोना के एको झिन नवा मरीज नइ मिले हे। उंहें वर्तमान बेरा म छै मरीज मनके अस्पताल अउ होम आइसोलेशन म इलाज चलत हे।
ओति दुर्ग जिला के तालपुरी हाउसिंग बोर्ड काॅलोनी म एके परिवार के छै मनखे मन कोरोना संक्रमित पाय गेहे। एला मिलाके जिला म काली नौ झिन कोरोना संक्रमित मरीज मनके पहिचान करे गेहे।
इही बीच प्रदेश के स्वास्थ्य मंत्री टी.एस. सिंहदेव ह राजधानी के भीमराव अंबेडकर अस्पताल म दू हजार बेड के बेवस्था करे के बात कीहिन। ओमन बताइन कि नवा एम.सी.एक्स भवन बर पच्चीस करोड़ मंजूर करे गेहे। एखर ले दू नवा टाॅवर बनाये जाही, जेखर ले भविष्य म एक हजार बेड के सुविधा मरीज मन ल मिलही।
भाजपा बैठक कौशिक बयान
भारतीय जनता पार्टी के प्रदेश इकाई डहार ले अवइया दस सितंबर के एक ठिन बइठका के आयोजन करे जाही। प्रदेश भाजपा कार्यालय कुशाभाउ ठाकरे परिसर म बीहनिया आयोजित ये बइठका म भाजपा कोर कमेटी के सदस्य प्रदेश पदाधिकारी, संभाग प्रभारी, भाजपा जिला प्रभारी, अउ सहप्रभारी के संग सबो जिला अध्यक्ष शामिल रही।
इही बीच विधानसभा म नेता प्रतिपक्ष धरमलाल कौशिक ह कीहिन कि राज्य सरकार ह सिरिफ दिखावा बर स्व सहायता समूह मनके कर्ज माफी करे के घोषणा करीन हे। श्री कौशिक ह कीहिन कि प्रदेश म एक लाख महिला स्व सहायता समूह काम करत हे। फेर सरकार ह सिरिफ छै हजार महिला स्व सहायता समूह मनके कर्जा माफ करे के घोषणा करे हे। नेता प्रतिपक्ष ह राज्य सरकार ले सबो महिला समूह मनके एक मुश्त कर्जा माफ करे के मंाग करे हे।
पीआईबी वेबिनार
पत्र सूचना कार्यालय रायपुर, प्रादेशिक लोक संपर्क कार्यालय रायपुर अउ क्षेत्रीय लोक संपर्क कार्यालय कंाकेर के संयुक्त तत्वाधान म आज आजादी का अमृत महोत्सव म छत्तीसगढ़ का योगदान विसय म एक ठिन वेबिनार के आयोजन करे गेहे।
कार्यक्रम म शहीद गेंद सिंह शासकीय महाविद्यालय चारामा के सहायक प्रबंधक डॅाक्टर के.के. मरकाम अउ सिंगारभाठा उच्चतर माध्यमिक विद्यालय कंाकेर के प्राचार्य सुरेशचंद्र श्रीवास्तव ह अपन विचार राखीन। ए वेबिनार म सांस्कृतिक दल के लोक कलाकार, गैर सरकारी संगठन के कार्यकर्ता अउ छात्र घलो शामिल होइस।
रेल सुविधा
रेल प्रशासन ह यात्री सुविधा ल देखत दुर्ग-अजमेर-दुर्ग साप्ताहिक एक्सपे्रस स्पेशल ट्रेन के परिचालन शुरू करही। ए ट्रेन तेरा सितंबर ले हरएक सोमवार के दुर्ग ले रवाना होके अजमेर जाही। उंहें चैदा सितंबर ले हरएक मंगलवार के अजमेर ले दुर्ग बर चलाय जाही।
अइसने चैदा सितंबर ले दुर्ग-जम्मूतवी साप्ताहिक सुपर फास्ट स्पेशल ट्रेन के परिचालन घलो शुरू करे जात हे। उंहें सोला सितंबर ले ये गाड़ी जम्मूतवी ले दुर्ग बर रवाना करे जाही।
सरगुजा हत्या
सरगुजा जिला के उदयपुर थाना क्षेत्र म एके परिवार के तीन झिन सदस्य मनके हत्या के मामला आगू आय हे।
खबर के मुताबिक लेंगा गांव म धारदार हथियार ले सियान, उंखर बहू अउ नाती के हत्या कर दे गेहे। घटना देर रतिहा के बताय जात हे। पुलिस ह शव बरामद करके पोस्टमार्टम बर भेज देहे। पुलिस ह मामला के जांच करत हे।
इही बीच मुख्यमंत्री भूपेश बघेल ह ए हत्याकांड ल लेके आज गृह अउ पुलिस अधिकारी मनके संग समीक्षा बइठका लीन। बइठका म ओमन ह पुलिस अधिकारी मनले ए मामला म तुरते कार्रवाई करे के निर्देश दीन।
माओवादी गिरप्तार
बीजापुर जिला म सुरक्षा बल मन ह पांच झिन माओवादी ल गिरप्तार करे म सफलता हासिल करीन हे।
खबर के मुताबिक डीआरजी अउ सीआरपीएफ के संयुक्त दल ह तलाशी अभियान म निकले रीहिन। इही दउरान नेलसनार अउ नैमेड़ थाना क्षेत्र ले पांच झिन माओवादी ल गिरप्तार करे हे। ए जम्मों मन उपर हत्या, लूट अउ आगजनी संग आने आने माओवादी गतिविधि म शामिल रेहे के आरोप हे।
तीज गणेश चतुर्थी
सुहागिन मनके पवित्र तिहार तीजा आज प्रदेशभर म श्रद्धा अउ भक्ति के संग मनाये जात हे। छत्तीसगढ़ म एला तीजा के रूप म मनाये जाथे। ए दिन सुहागिन मन ह निर्जला उपवास राखके अपन पति के लंबा उमर के कामना करथे।
ए दिन घर अउ मंदिर मन म रेती अउ माटी ले शिवलिंग के स्थापना करके फुलेरा बनाये जाथे अउ विधि विधान ले देवी पार्वती के संग महादेव के पूजा करे जाथे।
काली गणेश चतुर्थी हरय। विघ्नहर्ता भगवान श्री गणेश काली विराजमान होही। ग्यारा दिन तक चलइया गणेशोत्सव के तियारी जोर-शोर ले चलत हे। घर के संग चैक-चैराहा मन म पंडाल लगाके भगवान श्री गणेश के मूर्ति स्थापित करे जाही।
फेर कोरोना संक्रमण ले बचाव ल देखत ए बछर घलो गणेश उत्सव तिहार के बेरा सार्वजनिक जगा मन म गणेश प्रतिमा के स्थापना अउ विसर्जन बर जिला प्रशासन ले अनुमति लेना जरूरी होही। रायपुर जिला प्रशासन डहार ले जारी दिशा निर्देश के अनुसार ए बखत पंडाल मन म आठ फीट के मूर्ति स्थापित करे जा सकही। फेर पीओपी ले बने मूर्ति ल बेचे म पूरा तरह ले रोक लगाय गेहे।
राज्यपाल अनुसूइया अउ मुख्यमंत्री भूपेश बघेल ह प्रदेशवासी मन ल तीजा अउ गणेश चतुर्थी के बधाई अउ शुभकामन दीन। ओमन अपन संदेश म कीहिन कि ये उत्सव अब सामाजिक समरसता के सुघ्घर उदाहरण बन गेहे।