शिक्षा मंत्रालय-शिक्षक पर्व
केन्द्रीय शिक्षा मंत्रालय ह पांच सितंबर ले सत्रह सितंबर तक वर्चुअल माध्यम ले सिक्षक पर्व मनाही। मंत्रालय के स्कूली सिक्षा अउ साक्षरता विभाग के अपर सचिव संतोष कुमार सारंगी ह काली नई दिल्ली म पत्रकार मन ल बतईन कि सिक्षक मनके योगदान ल सम्मानित करे बर अउ राष्ट्रीय शिक्षा नीति ल आगू बढ़ाय बर मंत्रालय ह ए बछर घलो सिक्षक पर्व मनाय के फइसला ले हवय।
मंत्रालय म संयुक्त सचिव आर.सी. मीणा ह बतईन कि राष्ट्रपति रामनाथ कोविंद ह सिक्षक दिवस के मउका म वर्चुअल माध्यम ले चवालीस झन सिक्षक मन ल पुरस्कार दीहीं। ओमन बतईन कि ए कारीकरम के दउरान हरेक पुरस्कार विजेता उपर एक ठिन वृत्तचित्र घलो देखाय जाही।
उहें, संयुक्त सचिव विपिन कुमार ह किहीन कि प्रधानमंत्री नरेन्द्र मोदी ए महीना के सात तारीख के बिहनिया ग्यारह बजे सिक्षक, छात्र, अभिभावक अउ सिक्षा क्षेत्र के जम्मों मन ल संबोधित करही।
शिक्षक-सम्मान
राज्य स्तरीय शिक्षक सम्मान समारोह के आयोजन सिक्षक दिवस के मउका म पांच सितंबर के करे जाही। ए मउका म राज्यपाल अनुसुईया उइके ह राजभवन के दरबार हॉल म राखे गे समारोह म राज्य के अंठावन झन सिक्षक मन ल सम्मानित करही। एमा ले चौव्वन सिक्षक मन ल राज्य सिक्षक सम्मान अउ चार सिक्षक मन ल प्रदेस के महान साहित्यकार मनके नाव म स्मृति पुरस्कार ले सम्मानित करे जाही। समारोह म राज्य सिक्षक पुरस्कार बर चुने गे सिक्षक मन ल इक्कीस-इक्कीस हजार रूपिया अउ प्रसस्ति पत्र दे जाही। संगेसंग प्रदेस के महान विभूति मनके सुरता म दे जाय वाला पुरस्कार ले सम्मानित होवइया सिक्षक मन ल पचास-पचास हजार रूपिया अउ प्रसस्ति पत्र दे जाही।
समारोह के अगुवई मुख्यमंत्री भूपेश बघेल करही। उहें, स्कूल सिक्षा मंत्री डॉक्टर प्रेमसाय सिंह टेकाम ह विशिष्ट अतिथि होही।
पढ़ई तुंहर दुआर-2.0
प्रदेस म बारहवीं कक्षा तक के सब्बो स्कूल म ‘‘पढ़ई तुंहर दुआर‘‘ के दूसरा चरण सुरू करे जाही। एखर माध्यम ले कोरोना संक्रमण के सेती होय पढ़ई के नुकसान ल कम करे के परयास करे जाही। एमा लइका मन ल प्राथमिक स्तर म पढ़ना-लिखना अउ गणित म घलो होसियार बनाय उपर जोर दे जाही। उहें, मिडिल स्कूल, हाईस्कूल अउ हायर सेकेंडरी म हिन्दी अउ अंग्रेजी म पठन कौशल, सृजनात्मक लेखन कौशल, गणित म दक्षता बढ़ाना, विज्ञान म प्रयोग के प्रदर्सन अउ सामाजिक अध्ययन म आने-आने प्रोजेक्ट कार्य कराय जाही। ए कारीकरम ल सिक्षा अधिकारी मनके माध्यम ले चलाय जाही।
अल्प वर्षा-रिपोर्ट
प्रदेस म अल्प वर्षा अउ खंड वर्षा के सेती सूखा के स्थिति बनत हे। एला देखत आपदा प्रबंधन विभाग ह सब्बो तहसील ले क्षेत्रफल के मुताबिक फसल के बुआई के बारे म इकतीस अगस्त तक के स्थिति के जानकारी देके के निरदेस राजस्व विभाग के अधिकारी मन ल दीन हे। एमा मैनुअल दो हजार सोलह के संकेतक – वर्षा रिमोट सेंसिंग, फसल बोनी, भूमि के नमी अउ हाइड्रोलॉजिकल के आधार म सूखा घोषित करे जाही।
प्रधानमंत्री मातृ वंदना योजना
प्रधानमंत्री मातृ वंदना योजना के तहत छत्तीसगढ़ के कबीरधाम जिला ल उल्लेखनीय उपलब्धि बर पहिली स्थान मिले हे। बछर दू हजार बीस-इक्कीस म जिला ल आने-आने योजना म चार हजार तीन सौ तेईस हितग्राही मन ल लाभान्वित करे के लक्ष्य दे गे रिहीस। जेखर विरूद्ध जिला म पांच हजार दू सौ ले जादा हितग्राही मन ल आने-आने योजना के फायदा देवाय गीस। ए योजना म जिला म उन्नीस हजार आठ सौ ले जादा हितग्राही मनके सॉफ्टवेयर म ऑनलाइन प्रविष्टि करे जा चुके हे। संगेसंग कुल सात करोड़ चौंतीस लाख रूपिया के रासि के भुगतान घलो पोर्टल के माध्यम ले करे जा चुके हे।
ग्लोबल इन्वेस्टर्स मीट
छत्तीसगढ़ म वैश्विक निवेस ल बढ़ावा दे बर नवा रईपुर म ग्लोबल इन्वेस्टर्स मीट-दू हजार बाईस ‘‘इन्वेस्टगढ़ छत्तीसगढ़‘‘ के आयोजन सत्ताईस जनवरी ले एक फरवरी दू हजार बाईस तक करे जाही। मुख्यमंत्री भूपेश बघेल ह रईपुर म एखर उद्घाटन के औपचारिक घोसना करीन। ए इन्वेस्टर्स मीट के मेजबानी अंतर्राष्ट्रीय स्तर के कंसलटेंसी फर्म मेसर्स एडूविजन इंडिया प्रायवेट लिमिटेड ब्रैण्डनेम ‘विएक्सपो इंडिया‘ डहार ले करे जाही। ए मउका म मुख्यमंत्री ह ‘‘इन्वेस्टगढ़ छत्तीसगढ़‘‘ के प्रतीक चिन्ह अउ वेबसाइट ल घलो लॉंच करीन।
कारीकरम म श्री बघेल ह किहीन कि छत्तीसगढ़ म औद्योगिक विकास अउ पूंजी निवेस के अपार संभावना हवय। राज्य सरकार ह उद्योग हितैषी नवा औद्योगिक नीति तैयार करीन हे। ओमन किहीन कि ग्लोबल इन्वेस्टर्स मीट के दउरान राज्य सरकार डहार ले स्थानीय कंपनी अउ उद्योग मन बर ‘गो-ग्लोबल‘ के पहल करे जाही, जेखर ले स्थानीय उद्योगपति मन ह घलो वैश्विक स्तर म अपन व्यवसाय ल फैला सकय। कारीकरम के दउरान राज्य सरकार अउ ‘विएक्सपो इंडिया‘ के बीच एमओयू म हस्ताक्षर करे गीस।
हाईकोर्ट-सुनवाई
छत्तीसगढ़ उच्च न्यायालय म छह सितंबर ले फिजिकल रूप म सुनवाई होही। ए संबंध म रजिस्ट्रार जनरल दीपक तिवारी ह आदेस जारी करीन हे। जेखर मुताबिक अदालत परिसर म अवइया हरेक मनखे ल सोशल डिस्टेंसिंग अउ कोरोना प्रोटोकाल के पालन करना होही। ए नियम पक्षकार अउ अधिवक्ता मन उपर घलो लागू होही। अदालत म उही वकील मन ह आ सकही, जउन मन ह पहिली ले सूचीबद्ध हे अउ दस्तावेज दाखिल करना चाहत हे। पक्षकार के अधिवक्ता मन ह मामला के सुनवाई वीडियो कान्फ्रेंसिंग के माध्यम ले घलो करवा सकही।
राष्ट्रीय पोषण माह
राष्ट्रीय पोषण माह के तहत प्रदेस म कुपोषण अउ एनीमिया के दर म कमी लाय के उद्देश्य ले जागरूकता कारीकरम चलाय जावत हे। इही कड़ी म खाद्य मंत्री अमरजीत भगत ह राजनांदगांव जिला के पानाबरस मोहला ले मुख्यमंत्री सुपोषण अभियान अउ समुदाय आधारित सुपोषण प्रबंध कारीकरम म अतिरिक्त आहार वितरण के वर्चुअल सुरूवात करीन। एमा कुपोषित लइका अउ माईलोगिन मन ल चिन्ह के ओमन ल दवई अउ पौष्टिक भोजन देवाय जावत हे।
उहें, प्रदेस म सहर ले दुरिहा के अंचल तक पोषण रथ भेजे जावत हे। एमा गंभीर कुपोषित लइका अउ गर्भवती माईलोगिन ल सुपोषण किट दे जावत हे। संगेसंग आने-आने जिला म कुपोषण मुक्ति बर आंगनबाड़ी कार्यकर्ता अउ सहायिका मन डहार ले पोषण रैली घलो निकाले जावत हे।
अमृत महोत्सव-क्विज प्रतियोगिता
देश के आजादी के पचहत्तर बछर पूरा होय के मउका म आजादी के अमृत महोत्सव म प्रादेशिक समाचार एकांश, आकाशवाणी रायपुर डहार ले प्रश्नोत्तरी कार्यक्रम शुरू करे गेहे।
एमा छत्तीसगढ़ी बुलेटिन सुनइया मन बर आज के सवाल हे-
‘‘छत्तीसगढ़ अंचल म महात्मा गांधी ह पहली घांव कोन बछर म पधारे रिहीन।‘‘
श्रोता मन ह अपन जवाब ई-मेल आईडी – आर.ए.आई.पी.यू.आर. एस.ए.डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस ले भेज सकत हे। आप अपन जवाब के संग अपन नाव, पता अउ फोन नंबर घलो जरूर भेजव, जेखर ले विजेता बने म आप मन ले संपर्क करे जा सकय।
जउन श्रोता के सही जुवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग जीतइया प्रतिभागी ल प्रादेशिक समाचार एकांश डहार ले ई-प्रमाण पत्र घलो दे जाही।
मुख्यमंत्री-पत्रकार कल्याण
मुख्यमंत्री भूपेश बघेल ह कोरोना संक्रमण ले दिवंगत होय ग्यारह झन पत्रकार मनके परिवार वाला मन ल आज पत्रकार कल्याण कोष ले सहायता रासि के चेक दीन। रईपुर के मुख्यमंत्री निवास कार्यालय म राखे गे कारीकरम म श्री बघेल ह किहीन कि राज्य सरकार मीडिया के साथी मन के हर सुख-दुख म साथ दीहीं। उंखर परेसानी ल कमती करे बर सरलग प्रयास करे जावत हे। मुख्यमंत्री ह किहीन कि छत्तीसगढ़ के पत्रकारिता के इतिहास म कोरोना-काल के पत्रकारिता अवइया पीढ़ी बर हमेसा उदाहरण बनही। ओमन प्रदेस म जल्दीच पत्रकार सुरक्षा कानून लागू करे के बात घलो किहीन।
कारीकरम म पत्रकार कल्याण कोष ले तिरपन मीडियाकर्मी अउ उंखर परिवार मन ल एक करोड़ पन्द्रह लाख रूपिया के रासि जारी करे गीस। एमा कोरोना ले दिवंगत होय अट्ठारह झन पत्रकार सामिल हे।
मौसम
प्रदेस म छह सिंतबर के बाद बने वर्षा होय के संभावना हे। मौसम विभाग ले मिले जानकारी के अनुसार ऊपरी हवा के चक्रीय चक्रवाती घेरा ह तटीय आंध्रप्रदेश अउ ओखर तीर-तखार म मौजूद हे, जेखर परभाव ले अवइया चौबीस घंटा म दक्षिण बस्तर के एक-दू जगह म भारी बरसा होय के संभावना हे। उहें, प्रदेस म कोनों-कोनों जघा म हल्का ले मध्यम बरसा अउ गरज-चमक के संग छींटा पड़े के आसार हे।