खादी इंडिया क्विज प्रतियोगिता
उप राष्ट्रपति एम. वेंकैया नायडू ह आज खादी इंडिया क्विज प्रतियोगिता के शुभारंभ करीन। खादी अउ ग्रामोद्योग आयोग ह आजादी के अमृत महोत्सव के हिस्सा के रूप म ए कार्यक्रम के आयोजन करे हे। श्री नायडू ह नागरिक मनले खादी ल राष्ट्रीय वस्त्र के रूप म स्वीकार करे अउ एखर उपयोग ल बढ़ावा देके अपील करीन।
ओमन आने आने क्षेत्र मनके जाने माने लोगन मनले आगू आय बर अउ खादी उपयोग ल बढ़ावा देके आह्वान करीन। उप राष्ट्रपति ह कीहिन कि खादी इंडिया क्विज प्रतियोगिता हमन ल स्वतंत्रता संग्राम के एतिहासिक पल अउ हमर स्वतंत्रता सेनानी मनके असीमित योगदान के सुरता दिलाथे ।
पोषण माह-महिला और बाल विकास
केंद्रीय महिला अउ बाल विकास मंत्रालय काली ले पूरा देश म पोषण महीना मनाही। पोषण अभियान लईका, किशोरी, गर्भवती महिला, अउ धात्री माइलोगिन मनके स्वास्थ्य ल बेहतर बनाये बर केंद्र सरकार के प्रमुख कार्यक्रम हे।
ए बछर पोषण माह के दउरान आंगनबाड़ी केंद्र, स्कूल परिसर, ग्राम पंचायत, जइसन जगा मन म जम्मों लाभार्थी मन डहार ले पोषण वाटिका बर पौधारोपण अभियान जइसे गतिविधि उपर ध्यान केंद्रित करे जाही। पोषण माह के दउरान छै बछर ले कम आयु वर्ग के लईका मनके लंबाई अउ वजन मापे बर एक विशेष अभियान घलो चलाये जाही।
एखर तहत छत्तीसगढ़ म घलो कुपोषण अउ एनीमिया म कमी लाये के उद्देश्य ले काली ले आने आने आयोजन होही। महिला अउ बाल विकास विभाग डहार ले पोषण संबंधी जन-जागरूकता बर दैनिक गतिविधि मनके कैलेंडर तियार करे गीस। तीस सितंबर तक चलइया ए महीना के दौरान तीजा, गणेश चतुर्थी जइसन तिहार मन ल पोषण अउ स्वास्थ्य गतिविधि ले जुड़े कार्यक्रम राखे जाही।
महिला अउ बाल विकास मंत्री अनिला भेंडिया ह पोषण माह ल सफलता पूर्वक संचालित करे बर जनप्रतिनिधि समेत आम लोगन मनले सहयोग के अपील करीन हे।
आदिवासी समाज आंदोलन
राज्य म सर्व आदिवासी समाज डहार ले सिलगेर गोलीकांड मामला म कड़ा कार्रवाई, पेसा कानून अउ पदोन्नति म आरक्षण जइसे आने आने मांग ल लेके काली जगह-जगह प्रदर्शन करे गीस। समाज के लोगन मन कई ठिन जिला मुख्यालय मन म चक्का जाम अउ रेलवे लाइन उपर बइठ के आर्थिक नाकेबंद करीन। राज्य के पंद्रह ले जादा जिला मन म ए प्रदर्शन करे गीस।
इही कड़ी म कोंडागांव जिला के केशकाल सिथ्त विश्रामपुरी चौक म राष्ट्रीय राजमार्ग क्रमांक तीस उपर चक्का जाम करे गीस।
अइसने राजनांदगांव के चिचोला म घलो छुरिया मोड़ म आर्थिक नाकाबंदी करे गीस।
बतादन कि आदिवासी समुदाय के मनखे मन पाछू उन्नीस जुलाई ले धरना प्रदर्शन करत हे।
भेंडिया-गुजरात दौरा
गुजरात के केवड़िया म केंद्रीय महिला अउ बाल विकास विभाग डहार ले राष्ट्रीय सम्मेलन के आयोजन करे जात हे। एमा छत्तीसगढ़ के महिला अउ बाल विकास मंत्री अनिला भेंडिया शामिल होइन। ए सम्मेलन म आने आने राज्य मनके महिला अउ बाल विकास मंत्री शामिल होवत हे। ए कार्यक्रम म वत्सल अउ सक्षम योजना के शुभारंभ करे जाही।
गुजरात प्रवास के दउरान श्रीमती भेंडिया ह केवड़िया स्थित विश्व के सबले उंचा प्रतिमा स्टैच्यू ऑफ यूनिटी म सरदार वल्लभ भाई पटेल अपन श्रद्धासुमन अर्पित करीन।
भाजपा-चिंतन शिविर
जगदलपुर म आज ले भाजपा के बस्तर चिंतन शिविर शुरू होइस। तीन तक चलइया ए शिविर म पार्टी के राष्ट्रीय अउ प्रदेश स्तर के कई झिन वरिष्ठ नेता मन शामिल होवत हे। प्रदेश भाजपा प्रभारी डी. पुरंदेश्वरी घलो ए शिविर म भाग लेवत हे। ए शिविर म अवइया विधानसभा चुनाव के रणनीति उपर चर्चा होही। शिविर के आखरी दिन पार्टी के वरिष्ठ नेता बस्तर संभाग के भाजपा कार्यकर्ता मन संग बइठका म चर्चा करही।
अमृत महोत्सव क्विज-केंद्र
आजादी के अमृत महोत्सव के तहत म आकाशवाणी समाचार ह स्वाधीनता संग्राम अउ उंखर गौरवशाली इतिहास उपर विशेष अमृत महोत्सव प्रश्नोत्तरी के शुरूआत करत हे। अमृत महोत्सव क्विज आकाशवाी समाचार के संग
आज के प्रश्न हे – कोन स्वतंत्रता सेनानी ह केहे रीहिन कि स्वराज्य मोर जम्नसिद्ध अधिकार हे अउ मैं एला लेके रहूं – ?
श्रोता मन अपन जवाब अमृत महोत्सव क्विज एट द रेट जी मेल डॅाट कॅाम ई-मेल म भेंजय। श्रोता मन अपन जवाब हमर वाट्सअप नंबर- आठ आठ दू छै पांच चार छै दू छै दू – म भेज सकत हे।
एक भाग्यशाली प्रतिभागी ल विजेता के रूप म चुने जाही। अउ काली के समाचार प्रभात म विजेता के नाम के घोषणा करे जाही। विजेता ल ई प्रमाण पत्र अउ एक ठिन सांकेतिक पुरस्कार दे जाही।
बीएसएफ रक्तदान शिविर
सीमा सुरक्षा बल- बीएसएफ के बारहंवा स्थापना दिवस के मउका म आज भिलाई म रक्तदान शिविर राखे गीस। सीमा उपर देश के रक्षा करने वाला जवान मन सामाजिक काम म भागीदारी निभात शिविर म रक्तदान घलो करीन।
शिविर के उद्घाटन बीएसएफ के महानिरीक्षक एस.के. त्यागी ह करीन। ए मउका म ओमन कीहिन कि कोनो भी रक्तदान करके समाज ल महत्वपूर्ण योगदान दे सकत हे। ओमन कीहिन कि रक्तदान ले कोनो नुकसान नइ होवय। बल्कि एखर ले जीवन बचाये जा सकत हे।
राजनांदगांव मलेरिया जांच
राजनांदगांव जिला के ग्रामीण क्षेत्र मन म गांव के मितानिन मन मलेरिया अउ डेंगू ले बचाव खातिर जिला प्र्रशासन के निर्देश म सीटी बजाय के अभियान चलावत हे। एखर तहत चुने गे गांव मन म मितानिन मन रोज संझा सात बजे सीटी बजाके आम लोगन मन ल मच्छरदानी लगाये बर प्रेरित करत हे।
मलेरिया मुक्त छत्तीसगढ़ अभियान के तहत सर्वे दल मन डहार ले जिला के छै विकासखंड मानपुर, मोहला, खैरागढ़, छुईखदान, छुरिया अउ डोंगरगढ़ के एक सौ निन्यानवे संवेदनशील गांव म मलेरिया के जांच करे गीस। उंहें करीबन डेढ़ सौ गांव मन म डी.डी.टी. पाउडर के छिड़काव करे जावत हे।
विश्व आदिवासी दिवस कार्यक्रम
सर्व आदिवासी समाज डहार ले विश्व आदिवासी दिवस के मउका म आज रायपुर जिला के आरंग म एक ठिन कार्यक्रम राखे गीस । एमा नगरीय प्रशासन मंत्री डॅाक्टर शिवकुमार डहरिया ह कीहिन कि राज्य म सरगुजा ल लेके बस्तर तक आदिवासी समाज रहिथे। अउ प्रदेश सरकार डहार ले आदिवासी मनके हित म कई ठन योजना चलाये जात हे।
ओमन कीहिन कि छत्तीसगढ़ के विकास म आदिवासी समाज के विशेष भूमिका हवय। ए मउका म डॅाक्टर डहरिया ह आरंग क्षेत्र म सर्व आदिवासी समाज के भवन निर्माण बर पंद्रह लाख रूपिया के राशि देके घोषणा करीन।
नाचा सम्मान
उत्तरी अमेरिका छत्तीसगढ़ एसोसियेशन-नाचा ल दसवां सालाना ग्लोबल कम्यूनिटी ऑस्कर अवार्ड समारोह म आर्गेनाइजेशन ऑफ द इयर ले सम्मानित करे गेहे। ए सम्मान अमेरिका के हाउस ऑफ रिप्रेंजेटेटिव्स डैनी डेविस डहार ले दे गीस । ए कार्यक्रम पाछू अठाईस के शिकागो म कई झिन वैश्विक समुदाय के नेता अउ यू.एस.ए. राजनेता मनके उपस्थिति म राखे गीस।
मुख्यमंत्री भूपेश बघेल ह ए अवॉर्ड ले सम्मानित करे जाय म नाचा के जम्मों सदस्य मन ल शुभकामना दीन हे। उंहें नाचा के कार्यकारी अध्यक्ष गणेश कर ह कीहिन हे कि ए पुरस्कार मिलना नाचा बर गर्व के बात हे।