मुख्यमंत्री-घोषणा
राज्य सरकार डहार ले राजीव गांधी किसान न्याय योजना के तहत सूखा प्रभावित किसान मन ल घलो गिरदावरी सर्वें के आधार म प्रति एकड़ नौ हजार रूपिया के मदद दे जाही।
मुख्यमंत्री ह एखर घोसना करत किहीन कि प्रदेस के कतकोन जगह म ए बेरा कमती बरसा के सेती सूखा के स्थिति बन गेहे। जउन किसान मन अभी खरीफ सीजन म धान, कोदो-कुटकी अउ राहेर के बुआई करे हे अउ कमती बरसा के सेती उंखर फसल ह खराब हो जही, त ओमन ल राज्य सरकार कोति ले प्रति एकड़ नौ हजार रूपिया के मदद दे जाही। मुख्यमंत्री ह यहू किहीन कि राज्य सरकार डहार ले राजीव गांधी ग्रामीण भूमिहीन कृषि मजदूर न्याय योजना सुरू करे गेहे। एखर फायदा ले बर पात्र लोगन मन ल एक सितंबर ले पंजीयन करा सकथे।
बस किराया-बढ़ोत्तरी
प्रदेस के यात्री बस किराया म पच्चीस प्रतिसत के बढ़ोतरी करे जाही। मुख्यमंत्री ह काली बस संचालक मनके संग होय गोठबात के बाद किराया बढ़ाय उपर मंजूरी दे दीन।
जानबा के मुताबिक राज्य सासन डहार ले जुलाई दू हजार अट्ठारह म यात्री बस किराया म बढ़ोतरी करे गे रिहीस।
केन्द्र-स्थानीय निकाय/अनुदान
केन्द्र सरकार ह ग्रामीण स्थानीय निकाय अउ पंचायती राज संस्थान मन बर ए बेरा के वित्त बछर ले दू हजार पच्चीस-छब्बीस तक के बेरा म पन्द्रहवां वित्त आयोग के सिफारिश के मुताबिक अनुदान दे अउ उंखर उपयोग करे के निरदेस जारी करे हे। वित्त आयोग ह ए बेरा म पानी अउ साफ-सफई बर पंचायत मन ल एक लाख बयालीस हजार करोड़ रूपिया ले जादा के अनुदान देके सिफारिश करे हे।
भाजपा-चिंतन शिविर
भारतीय जनता पार्टी के तीन दिन के चिंतन सिविर काली ले दू सितंबर तक बस्तर म राखे गेहे। सिविर के आखरी दिन दू सितंबर के संभागीय सम्मेलन होही। चिंतन सिविर म प्रदेस म होवइया अवइया चुनाव अउ संगठन के मुद्दा ल लेके गोठबात करे जाही। सिविर म भाजपा के प्रदेस सह संगठन महामंत्री, प्रदेश प्रभारी, सह-प्रभारी अउ संघ के बड़का पदाधिकारी मन सामिल होही।
बीएसपी-प्लेट
भिलाई इस्पात संयंत्र डहार ले बनाय गे प्लेट मनके परयोग अब भारत के प्रथम मानवयुक्त उपग्रह मिशन कारीकरम ‘‘गगनयान‘‘ के प्रक्षेपण म करे जाही। रोलिंग करे गे मिधानी स्लैब्स के ए लॉट के परयोग भारत के पहिली मानवयुक्त उपग्रह मिशन कारीकरम ‘‘गगनयान‘ के प्रक्षेपण बर करे जाही। अब तक सेल-बीएसपी ह कुल पांच सौ टन के रोलिंग करके आपूर्ति करे हे।
टोक्यो-पैराओलपिंक पदक
टोक्यो म चलत पैरा ओलपिंक खेल म आज के दिन भारत बर बढ़िया रिहीस। भारत ल आज दू ठिन स्वर्ण, दू रजत अउ एक ठिन कांस्य पदक मिलीस। महिला मनके दस मीटर एयर राइफल निशानेबाजी म अवनी लेखरा ह स्पर्ण पदक जीतीन त उहें, भाला फेंक प्रतियोगिता म सुमित अंतिल ह अड़सठ दशमलव पांच-पांच मीटर के भाला फेंक के स्वर्ण पदक जीतीन। ओति, पुरूष मनके डिस्कस थ्रो म योगेश कथुनिया ह रजत पदक जीतीन। अइसने, भाला फेंक प्रतियोगिता म देवेन्द्र झाझरिया ह रजत पदक म अपन नाम लिखईन। एखर अलावा सुंदर सिंह गुर्जर ह भाला फेंक म कास्य पदक पाईन।
राष्ट्रपति, उप राष्ट्रपति अउ प्रधानमंत्री के संगेसंग प्रदेस के मुख्यमंत्री ह घलो पदक जीतइया खिलाड़ी मन ल बधाई अउ सुभाकामना दे हवय।
माओवादी-समाचार
सुकमा जिला के चिंतलनार थाना क्षेत्र म कोबरा बटालियन अउ जिला पुलिस बल के संयुक्त टीम ह दू झिन माओवादी मन ल गिरफ्तार करके उंखर तीर ले विस्फोटक जिनीस बरामद करे हे।
त उहें, बीजापुर जिला म घलो चेरपाल के जंगल ले सीआरपीएफ के टीम ह दू झिन माओवादी मन ल गिरफ्तार करे हे। ए माओवादी मनके तीर ले विस्फोटक अउ डेटोनेटर के संगेसंग आने-आने जिनीस बरामद करे गेहे।
अमृत महोत्सव-क्विज
देस के स्वाधीनता के पचहत्तर साल के समारोह ‘‘आजादी के अमृत महोत्सव‘‘ के मउका म केन्द्र सरकार ह कतकोन कारीकरम करत हे। ए मउका ल जन-उत्सव के रूप म मनावत आकाशवाणी समाचार ह स्वाधीनता संग्राम अउ उंखर गौरवसाली इतिहास उपर बिसेस अमृत महोत्सव क्विज सुरू करे हे। इंडिया पोस्ट ह ए कारीकरम के प्रसारण म आकाशवाणी समाचार के साझेदार हे। अमृत महोत्सव प्रश्नोत्तरी के आज के प्रश्न हे –
‘‘ब्रिटिश सरकार डहार ले साल उन्नीस सौ उन्नीस म बनाय गे कोन से अधिनियम ल काला कानून के नाव ले जाने जाथे।‘‘
सुनइया मन अपन उत्तर अमृत महोत्सव क्विज एट द रेट जीमेल डॉट कॉम म भेज सकथे। अपन जवाब के संग नाव, पता अउ फोन नंबर घलो भेजव। वाट्सऐप नंबर आठ आठ दो छह पांच चार छह दो छह दो म घलो अपन जवाब भेज सकथव। भाग्यसाली विजेता के नाव के घोसना काली के समाचार प्रभात म बताय जाही।
अमृत महोत्सव-कार्यक्रम
आजादी के अमृत महोत्सव के तहत ए बेरा प्रदेस म कतकोन कारीकरम चलत हे। कोंडागांव जिला के जनपद पंचायत फरसगांव के हाईस्कूल बोरगांव म मनरेगा अउ उंखर अधिकार के जादा प्रचार-प्रसार बर पेंटिंग प्रतियोगिता राखे गीस। ए प्रतियोगिता म हाईस्कूल बोरगांव के चौबीस अउ डी.ए.वी. बड़ेडोंगर के छह झिन छात्र मन ह भाग लीन।
श्रीकृष्ण जन्माष्टमी
भगवान श्रीकृष्ण के जनम के परब जन्माष्टमी आज प्रदेस म भक्तिभाव अउ उछाह के संग मनाय जात हे। ए मउका म प्रदेस के जम्मों कृष्ण मंदिर मन म जन्मोत्सव बर बिसेस तैयारी करे गेहे।
राजधानी रईपुर के कृष्ण मंदिर मन ल बढ़िया ढंग ले सजाय गेहे। टाटीबंध्के इस्कॉन मंदिर अउ समता कॉलोनी राधा-कृष्ण मंदिर म बिहनियाच ले पूजापाठ करइया मनके भीड़ बाढ़ गेहे। प्रदेस के अउ आने सहर मन म घलो जन्माष्टमी परब मनाय जाय के समाचार मिले हे। कोरोना संक्रमण के सेती एसो घलो मंदिर मन म भीड़ कम दिखत हे।
राज्यपाल अनुसुईया उइके ह प्रदेस के लोगन मन ल श्रीकृष्ण जन्माष्टमी के सुभाकामना दे हवय।
उहें, मुख्यमंत्री निवास म आज श्रीकृष्ण जन्माष्टमी के परब ल उछाह के संग मनाय गीस। मुख्यमंत्री ह मंत्रोचार के बीच विधि-विधान ले पूजा करके प्रदेस के लोगन मनके खुसहाली के कामना करीन। संस्कृति विभाग डहार ले राखे गे कारीकरम म कोपलवाणी विद्यालय के मूक-बधिर लइका मन ह श्रीकृष्ण अउ राधा के वेशभूषा म सामिल होईन।
वन-धन केन्द्र महुआ लड्डू
राजनांदगांव जिला के कौरीनभाठा म वन विभाग डहार ले चलाय जात वन-धन केन्द्र म तियार महुआ के लड्डू जल्दीच आंगनबाड़ी केन्द्र के लइका मन ल बांटे जाही।
केन्द्रीय जनजातीय कार्यमंत्री अर्जुन मुंडा ले सम्मान अउ प्रसंसा मिले के बाद जिला प्रसासन ह ए फइसला लेहे। पाछु दिन केन्द्रीय मंत्री ह सेमरा स्थित फूडपार्क म राखे गे ट्राईफेड के वन-धन सम्मेलन म कौरीनभाठा ल लघु वनोपज के वैल्यू एडेड श्रेणी म बढ़िया उत्पादन बर सम्मानित करे रिहीन।
मौसम
प्रदेस म अवइया चौबीस घंटा के दउरान कतकोन जघा म हल्का ले मध्यम बरसा हो सकथे। मौसम विभाग के मुताबिक दक्षिण छत्तीसगढ़ अउ ओखर तीर-तखार म एक ठिन निम्नदाब के क्षेत्र अउ चक्रीय चक्रवाती घेरा स्थित हे अउ संगेसंग मानसून द्रोणिका बीकानेर ले पश्चिम मध्य बंगाल के खाड़ी तक हवय। एखर परभाव ले प्रदेस म हल्का ले मध्यम बरसा होय के संभावना बताय गेहे।
अउ अब थोरकुन समाचार सार म-
– राज्य सासन ह परिवहन विभाग के कतकोन अधिकारी-करमचारी मनके नवा पदस्थापना के आदेस जारी कर दे हे।
– राष्ट्रीय खेल दिवस के मउका म सूरजपुर जिला म दू दिन के खेल प्रतियोगिता अउ प्रतिभा सम्मान समारोह के आयोजन करे गीस।
– छत्तीसगढ़ सर्व आदिवासी समाज के लोगन मन ह अपन पन्द्रह सूत्रीय मांग ल लेके बालोद जिला के आने-आने जघा म धरना-प्रदर्शन करीन।
अउ
– कोंडागांव पुलिस ह विदेश घुमाय के नाव म करीबन एक लाख बत्तीस हजार रूपिया के धोखाधड़ी करे के मामला म एक झिन आरोपी ल गिरफ्तार करे हे।