बांध पानी
राज्य सरकार ह प्रदेश के रायपुर, सरगुजा, कांकेर अउ बस्तर जिला के जउन तहसील मन म पचास परतिशत ले कमती बरसा होय हे, उंहा के जानकारी जिला कलेक्टर मनले मंगाय हे। अइसने राज्य के अठारा जिला के चंवालिस तहसील म पचास से पचहत्तर प्रतिशत के बीच बरसा होय हे अउ पैंसठ तहसील म औसत बरसा छिहत्तर प्रतिशत ले जादा होय हे। राज्य सरकार के राहत आयुक्त रिता शाण्डिल्य ह ये जम्मों जिला के कलेक्टर मनले कमती बरसा के जानकारी अवइया सात सितंबर तक भेजे बर केहे हे।
प्रदेस के आने आने जिला मन म ये बखत औसत ले कम बरसा होय के सेती सिंचाई बर पानी छोड़े जावत हे। पाछू साल के तुलना म गंगरेल बांध म ए बखत दस टीएमसी कमती जल भराव हाये हे। अभी बांध म साढ़े पंद्रह टीएमसी पानी भरे हुए हे जउन ह उंखर क्षमता के आंधे ले घलो कम हे।
उंहे सांढूर, दुधावा अउ माडमसिल्ली बांध म घलो ए बखत जलभराव कमती हे। ए बेरा बांध म एक हजार नौ सौ चालीस क्यूसेक पानी आवत हे। फेर बांध ले चार हजार पांच सौ इक्कीस क्यूसेक पानी छोड़े जावत हे। जिला के माडमसिल्ली बांध म ए बेरा तीन टीएमसी ले थोर जादा जलभराव हे। अउ बांध म एक सौ संतानबे क्यूसेक पानी के आवक बने हुए हे।
ओति महासमुंद जिला के कोडार बांध सहित आने आने छोटे बांध ले घलो खरीफ फसल बर पानी छोड़े जावत हे। जिला के कार्यपालन अभियंता जे.के. चंद्राकर ह बताइन कि कोडार जलाशय ले अब तक छोड़े गे पानी ले इक्कीस गांव मनके करीब सात हजार हेक्टेयर म पहिली सिंचाई पूरा हो चुके हे। ओमन बताइन हे कि तैंतीस गांव मन म करीबन नौ हजार हेक्टेयर रकबा म सिंचाई जारी हे ।
जीपी सिंह सर्वोच्च न्यायालय
प्रदेस के निलंबित आईपीएस अधिकारी जी.पी. सिंह के गिरप्तारी म सर्वोच्च न्यायालय ह रोक लगा देहे। खबर के मुताबिक आय ले जादा संपत्ति रखे अउ राजद्रोह के मामला म छत्तीसगढ़ पुलिस ह जी.पी. सिंह के खिलाफ आने आने धारा म मामला दरज करे हे।
इही बीच पुलिस ह ओला फरार घोषित कराय बर छत्तीसगढ़ उच्च न्यायालय म अरजी करे रीहिस। जिहां जी.पी. सिंह ल राहत नही मिलिस। एखर बाद जी.पी. सिंह ह सुप्रीम कोर्ट म याचिका लगाये रीहिस। जिहां उंखर गिरप्तारी म फिलहाल रोक लगाये के आदेश जारी करे गेहे।
बांध म एक सौ संतानबे क्यूसेक पानी के आवक बने हुए हे।
माओवादी समर्पण
दंतेवाड़ा जिला म पुलिस डहार ले चलाए जावत लोन वर्राटू अभियान के तहत दू झिन इनामी समेत चार माओवादी मन ह आत्मसमर्पण करे हे। पुलिस के मुताबिक एमा ले एक झिन माओवादी कमांडर उपर पांच लाख रूपिया के इनाम घोषित रीहिस हे।
उंहें एक आने माओवादी उपर एक लाख रूपिया के इनाम घोषित करे गे रीहिस। ये माओवादी बारसूर अउ कटेकल्याण इलाका म सक्रिय रीहिस। जिला म अब तक एक सौ दस इनामी समेत चार सौ बारा झिन माओवादी मन समर्पण कर चुके हे।
आयुष्मान कार्ड महासमुंद
महासमुंद जिला म आपके द्वार आयुष्मान अभियान के तहत आयुष्मान कार्ड बनाये बर हितग्राही मनके पंजीयन तारीख ल तीस अप्रैल ले बढ़ाके इकतीस अगस्त कर दे गेहे।
जिला के मुख्य चिकित्सा अधिकारी ह बताइन कि आयुष्मान योजना के तहत अब तक जिला म छै लाख ग्यारा हजार ले जादा हितग्राही मन ह पंजीयन करा लेहे। एमा करीबन दू लाख हितग्राही मन ल आयुष्मान कार्ड बांटे जा चुके हे। ए योजना के शुरूआत ल लेके अब तक जिला के करीबन छत्तीस हजार हितग्राही मन ह आने आने बीमारी के इलाज घलो करवाय हे ।
अमृत महोत्सव-चित्र प्रदर्शनी
आजादी के अमृत महोत्सव के तहत प्रादेशिक लोक संपर्क कार्यालय रायपुर डहार ले आने आने कार्यक्रम के आयोजन करे जात हे। इही कड़ी म काली धमतरी जिला के कुरूद म मल्टीमीडिया चित्र प्रदर्शनी शुरू होगे। कुरूद नगर पंचायत के मंगल भवन म राखे गे ए चित्र प्रदर्शनी के उद्घाटन कुरूद के विधायक अजय चंद्राकर ह करीन। ए मउका म नगर के स्कूली लईका डहार ले बैनर अउ तख्ती लेके जागरूकता रैली निकाले गीस। एखरे संग आजादी के अमृत महोत्सव विसय ल लेके रंगोली सजाओ अउ चित्रकला प्रतियोगिता के संग लोक कलाकार मन डहार ले सांस्कृतिक कार्यक्रम के प्रस्तुति दे गीस।
कार्यक्रम ल संबोधित करत श्री चंद्राकर ह कीहिन हे कि ये महोत्सव केंद्र सरकार काति ले देश के महान सपूत मन ल सुरता करे के एक श्रृंखला हे। महात्मा गांधी के अगवई म धमतरी म होय नहर सत्याग्रह के जिकर करत श्री चंद्राकर ह कीहिन हे कि ए आंदोलन म छत्तीसगढ़ ले घलो कतकोन स्वाधीनता सेनानी मन अपन योगदान दे रीहिन।
एखर पहिली अपन स्वागत भाषण म रायपुर स्थित प्रादेशिक लोक संपर्क कार्यालय के अपर महानिदेशक अभिषेक दयाल ह बताइन हे कि आजादी के अमृत महोत्सव एक देशव्यापी अभियान आय जेमा नागरिक के भागीदारी सुनिश्चित कर एला एक जन आंदोलन म बदले के कोशिश करे जावत हे।
ए मउका म ओति बस्तर जिला म घलो प्रादेशिक लोकसंपर्क कार्यालय डहार ले आने आने सांस्कृतिक कार्यक्रम के आयोजन करे जात हे। एमा काली जिला के बकावंड विकासखंड के बड़े देवड़ा ग्राम पंचायत नगरनार के लोककला मंडली डहार ले सांस्कृतिक कार्यक्रम पेश करे गीस। संगेसंग केंद्र सरकार के आने आने कल्याणकारी योजना ले जुड़े नुक्कड़ घलो करे गीस।
अमृत महोत्सव वेबिनार
आजादी के अमृत महोत्सव के तहत आज रायपुर म प्रादेशिक लोकसंपर्क कार्यालय अउ पत्र सूचना कार्यालय डहार ले वेबिनार के आयोजन करे गीस।
स्वाधीनता आंदोलन म छत्तीसगढ़ का योगदान विसय उपर राखे गे ए वेबिनार ल संबोधित करत छत्तीसगढ़ हिंदी ग्रंथ अकादमी के पूर्व संचालक शशांक शर्मा ह कीहिन कि ये महोत्सव स्वाधीनता आंदोलन म छत्तीसगढ़ के योगदान ल सुरता करे के पर्व हे।
ओति आजादी के अमृत महोत्सव के तहत क्षेत्रीय लोकसंपर्क ब्यूरो डहार ले आज कांकेर जिला के माकड़ीखुना म मिनी आइकॅाप के आयोजन करे गीस कार्यक्रम म आय पहुना मन ह आजादी के आंदोलन म छत्तीसगढ़ के बारे म बताइन।
एति सरगुजा जिला के करजी म घलो अइसने कार्यक्रम करे गीस। संगेसंग कांकेर अउ सरगुजा जिला के कार्यक्रम म स्कूली लईका मन बर निबंध, रंगोली, चित्रकला समेत आने आने प्रतियोगिता राखे गीस।
नेत्रदान पखवाड़ा
प्रदेस म छत्तीसवां राष्ट्रीय नेत्रदान पखवाड़ा काली ले शुरू हो गेहे। एखर तहत प्रदेश के जम्मों जिला म लोगन मनके आंखी के बीमारी के बचाव के संग नेत्रदान बर जागरूकर करे बर अभियान चलाये जावत हे।
इही कड़ी म दुर्ग जिला के मुख्य चिकित्सा अधिकारी डॅाक्टर गंभीर सिंह ठाकुर ह नेत्रदान के महत्ता उपर केंद्रित प्रचार रथ ल हरियर झण्डी दिखाके रवाना करीन। पखवाड़ा के दउरान जिला अउ विकासखंड स्तर म नेत्र सहायक अउ स्वास्थ्य विभाग के टीम डहार ले लोगन मनके निःशुल्क नेत्र परीक्षण करवाए जाही।