अमृत महोत्सव विशेष सप्ताह
केंद्रीय सूचना अउ प्रसारण मंत्रालय ह आजादी के अमृत महोत्सव के हिस्सा के रूप म आज ले उनतीस अगस्त तक विशेष सप्ताह के आयोजन करत हे। सूचना अउ प्रसारण मंत्री अनुराग ठाकुर ह आज एखर उद्घाटन करीन।
एमा जन भागीदारी अउ जन आंदोलन के भावना के रूप म देशभर ले लोगन मन ह भाग लीहीं। आकाशवाणी समाचार अउ एखर क्षेत्रीय इकाई मन ह धरोहर, निशान, अउ अपराजिता जइसन विशेष साप्ताहिक कार्यक्रम पेश करही।
एति, प्रशासन विभाग ह स्वतंत्रता संग्राम क्रांतिकारी मन उपर ऑनलाईन क्विज प्रतियोगिता राखहीं। राष्ट्रीय फिल्म संग्रहालय ह अपन वेबसाईट उपर आभासी फिल्म पोस्टर प्रदर्शनी आयोजित करही।
त उंहे पत्र सूचना कार्यालय पीआइबी ह आजादी के अमृत महोत्सव माइक्रो साईट शुरू करही।
अमृत महोत्सव छत्तीसगढ़
एति प्रदेस म आजादी के अमृत महोत्सव के तहत प्रदेश के जम्मों ग्राम पंचायत मन म आज ले उनतीस अगस्त तक विशेष अभियान शुरू करे गेहे। ए सप्ताह ल मनरेगा अधिनियम पात्रता जागरूकता सप्ताह के रूप म मनाये जात हे।
जांजगीर-चांपा के जिला पंचायत मुख्य कार्यपालन अधिकारी गजेंद्र सिंह ठाकुर ह बताइन कि जिला म जागरूकता सप्ताह के दउरान मनाये जाय कार्यक्रम म मनरेगा, श्रमिक, माइलोगिन, दिव्यांगजन, स्व सहायता समूह के माइलोगिन, पंचायत अधिकारी अउ गांव के लोगन मन शामिल होही।
उंहें प्रदेश म प्रादेशिक लोक संपर्क कार्यालय-आरओबी रायपुर डहार ले पच्चीस अगस्त ले पांच जिला मन म प्रचार कार्यक्रम राखे जाही। पच्चीस ले सत्ताईस अगस्त तक धमतरी जिला के कुरूद म, छब्बीस अगस्त के अंबिकापुर, सत्ताईस अगस्त जगदलपुर अउ अठाईस अगस्त के कांकेर के संग बिलासपुर म प्रचार कार्यक्रम के आयोजन करे जाही।
अमृत महोत्सव-क्विज प्रतियोगिता
देश के स्वतंत्रता के पचहत्तर बछर पूरा होय के मउका म मनाये जात आजादी के अमृत महोत्सव म सरकार ह कतकोन कार्यक्रम करत हे। ये मउका म आकाशवाणी समाचार ह स्वतंत्रता संग्राम अउ ओखर गौरवशाली इतिहास उपर सोला अगस्त ले विशेष प्रश्नोत्तरी कार्यक्रम शुरू करे हे।
अमृत महोत्सव प्रश्नोत्तरी के तीसर प्रश्न हे- साईमन वापस जाओ के नारा ल कोन ह दे रीहिस।
सुनइया मन अपन उत्तर अमृत महोत्सव क्विज एट द रेट जी मेल डॅाट कॅाम म भेज सकथे। विजेता के नाव के घोषण काली के समाचार प्रभात म करे जाही।
एति, नवीन अउ नवीकरणीय उर्जा मंत्रालय ह आज ले शुरू होय आजादी के अमृत महोत्सव सप्ताह के दउरान आने आने गतिविधि के योजना बनाय हे। ए दउरान किसान मन बर प्रधानमंत्री कुसुम योजना अउ छत म लगाय जाय सौर उर्जा संयंत्र के जानबा उपभोक्ता मन तक पहुंचाय बर विशेष प्रयास करे जाही।
कोरोना समाचार
प्रदेस म कोरोना संक्रमण के दर म सरलग सुधार होवत हे। काली प्रदेश म कोरोना संक्रमण के सत्ताईस ठिन नवा मामला आगू आय हे। उंहें चौदा ठिन जिला म कोरोना के एको मरीज नइ मिले हे। प्रदेश म ए बेरा करीबन आठ सौ तिरसठ मरीज मनके इलाज आने-आने अस्पताल या होम आइसोलेशन म चलत हे।
नवीन महाविद्यालय शुभारंभ
दुर्ग जिला के कुम्हारी म नवीन महाविद्यालय के आज मुख्यमंत्री ह वर्चुअल शुभारंभ करीन। ए मउका म ओमन कीहिन कि नवा महाविद्यालय के शुरू होय ले कुम्हारी के छात्र मन ल अब उच्च शिक्षा बर भिलाई या रायपुर जाय के जरूरत नइ पड़य। ओमन कीहिन कि कॉलेज म आर्टस, साइंस, अउ कामर्स के पढ़ई के सुविधा होय ले उच्च शिक्षा के बढ़िया व्यवस्था कुम्हारी म तियार होगे हे।
मन की बात
प्रधानमंत्री नरेन्द्र मोदी ह उनतीस अगस्त के आकाशवाणी ले प्रसारित होवइया ‘‘मन की बात‘‘ कार्यक्रम म देश विदेश के लोगन मनके संग अपर विचार साझा करही। प्रधानमंत्री ह ए कार्यक्रम के अगला कड़ी म शामिल होवइया विसय उपर घलो लोगन मन ले सुझाव मांगे हे। लोगन मन अपन विचार नमो ऐप या माई जीओवी ओपन फोरम म दे सकथे।
एक ठिन टोल फ्री नंबर एक आठ शून्य शून्य एक एक सात आठ शून्य शून्य नंबर म अपन संदेश हिंदी या फेर अंग्रेजी म रिकार्ड करा सकथे। फोन लाईन सत्ताईस अगस्त तक खुला रीही। प्रधानमंत्री ल सोझे अपन सुझाव देबर एक नौ दो दो म मिस्ड कॉल देके एस एम एस के माध्यम ले मिले लिंक के बाद सुझाव दे सकथे।
लोक कलाकार पंजीयन
बस्तर अकादमी ऑफ डांस आर्ट लिटरेचर एण्ड लैंग्वेज-बादल डळार ले बस्तर जिला के लोककला ल तेजी लाये बर जिला के जम्मों लोक कलाकार मनके पंजीयन तीस सितंबर तक करे जाही। एमा बस्तर जिला के लोक गीत, चइत परब, लेजा गीत, गेड़ी नृत्य, कहनी गीत अउ बस्तर हस्तशिल्प के जनइया कलाकार मनके मुफत म पंजीयन करे जाही। भाग लेबर इच्छुक कलाकार मन आधार नंबर के संग अपन पंजीयन करा सकथे।
माओवादी समाचार
दंतेवाड़ा जिला के कुंआकोण्डा थाना क्षेत्र म आज डिस्ट्रिक्ट रिजर्व गॉर्ड- डीआरजी के संग होय मुठभेड़ म एक झिन माओवादी मारे गीस।
उंहें इही जिला के भांसी थाना क्षेत्र म नक्सली संगठन भैरमगढ़ एरिया कमेटी के चार झिन सदस्य मन ह पुलिस के आगू आत्मसमर्पण करे हे। ये जम्मों कामालूर-भांसी क्षेत्र म सक्रिय रीहिन।
दुर्घटना
प्रदेश के बेमेतरा अउ गरियाबंद जिला म होय दू ठिन आने आने सड़क दुर्घटना म तीन झिन लोगन के मउत होगे अउ सोला झिन लोगन मन घायल होगे।
बेमेतरा जिला के देवकर क्षेत्र म फटफटी ल टक्कर मारे के बाद एक ठिन बस ह अंते-तंते होके पलट गे । ए घटना म फटफटी म बइठे दू झिन लोगन के मउकाच म प्राण छूट गे त उंहें बस म बइठे चौदा झिन यात्री घायल होगे हे। घटना के बाद बस के ड्रायवर अउ कंडक्टर भाग गेहे।
त उंहें गरियाबंद जिला के छुरा-फिंगेश्वर रद्दा के नवाडीह के तीर एक ठिन फटफटी ह खड़े बैलागाड़ी ले टकरा गीस। ए घटना म फटफटी म बइठे एक झिन मनखे के मउत होगे त उंहें माइलोगिन अउ एक झिन लईका ह घायल होगे हे।
मौसम
प्रदेस म काली ले पश्चिमी हवा चले के संभावना बताय गेहे। मौसम विभाग के मुताबिक एखर असर ले प्रदेश के कोनो कोनो जगा म चौबीस घंटा के दउरान हल्का ले मध्यम बरसा के संगेसंग गरज-चमक के संभावना बताय गेहे। उंहें प्रदेश म अधिकतम तापमान म कोनो प्रकार के परिवर्तन नइ होवय।
अउ अब थोरकुन समाचार सार म-
– ओडिशा के पुरी म विश्व प्रसिद्ध श्री जगन्नाथ मंदिर आज ले श्रद्धालु मन बर खोल दे गेहे। मंदिर ह हप्ता के आखरी दिन अउ प्रमुख तिहार के मउका म बंद रीही।
– दुर्ग के एनसीसी कैडेट्स रक्षाबंधन के तिहार ल अनोखा तरीका ले मनाइन ओमन अपन घर के तीर रूखराई मन ल राखी बांधके उंखर रक्षा के संकल्प लेके जलवायु परिवर्तन ले बचाये बर लोगन मन ल जागरूक करीन।
– उंहे रक्षाबंधन के मउका म राजनांदगांव म भाजपा महिला मोर्चा ह पुलिस जवान मन ल राखी बांधीन।
– सूरजपुर जिला के एसडीएम कार्यालय म पदस्थ एक झिन सहायक ग्रेड -दो के कर्मचारी ल पचास हजार रूपिया के रिश्वत लेवत गिरफ्तार करे हे।
– गरियाबंद जिला म नागाबुडा के किसान मन ह यूरिया अउ डीएपी खातु के कमी के शिकायत ल लेके अपर कलेक्टर ले मिलिन।
अउ
– जेवर मनके जरूरी हॉलमार्किंग आईडी नियम के विरोध म आज प्रदेश म सोना चांदी के व्यापार करइया व्यापारी मन ह दुकान बंद रखीस।