कोविड टीका-स्वीकृति
कोविड महामारी के खिलाफ लड़ई म भारत ह एक ठिन महत्वपूर्ण उपलब्धि हासिल करे हे। देस ल बारह साल या ओखर ले जादा उमर के किशोर मन बर कोविड रोधी वैक्सीन मिल गेहे। केन्द्रीय औषध मानक नियंत्रण संगठन – सी.डी.एस.सी.ओ. ह देस म ए लइका मन बर कैडिला हेल्थकेयर के डीएनए आधारित कोविड वैक्सीन – जायकोव-डी के आपात उपयोग के अनुमति दे देहे। सी.डी.एस.सी.ओ. के विसेसज्ञ समिति के परामर्श ले तीसर चरण के प्रसिक्षण के बाद एला मंजूरी दे गेहे। ए वैक्सीन ल तीन डोज म दे जाही। पहिली डोज देके बाद अट्ठाईस दिन म दूसर डोज अउ छप्पन दिन म तीसर डोज दे जाही।
प्रधानमंत्री ह किहीन कि दुनिया के पहिली डीएनए आधारित जायडस कैडिला के जायकोव-डी वैक्सीन देस के वैज्ञानिक मनके बड़का सफलता हरय।
कोरोना समाचार
भारत ह आज कोविड टीकाकरण अभियान म अंठावन करोड़ के आंकड़ा पार करत नवा उपलब्धि हासिल करे हे। केन्द्रीय स्वास्थ्य मंत्रालय ह एला कोविड-नाइंटीन के खिलाफ संघर्ष म नवा सफलता बताय हे।
ऐति, प्रदेस म कोरोना ले बांचे बर अब तक एक करोड़ अड़तीस लाख छियालीस हजार ले जादा टीका लगाय जा चुके हे।
इही बीच, प्रदेस म कोरोना संक्रमण के दर म सरलग सुधार होवत हे। काली प्रदेस म कोरोना संक्रमण के अड़तालीस नवा मामला आगू आय हे। उहें, सोलह जिला म कोरोना के एको मरीज नइ मिलीस। प्रदेस म ए बेरा नौ सौ इकतीस कोरोना संक्रमित मरीज मनके इलाज आने-आने अस्पताल या होम आइसोलेसन म चलत हे।
रायगढ़-कोविड टीका
रायगढ़ ह प्रदेस के अइसन पहिली जिला बन गेहे, जिहां लक्ष्य के मुताबिक अट्ठारह साल ले जादा उमर के जम्मों लोगन मन ल कोविड टीका के पहिली खुराक दे जा चुके हे। मुख्यमंत्री भूपेश बघेल ह जिला के अधिकारी, स्वास्थ्यकर्मी अउ जम्मों लोगन मन ल सुभकामना दे हवय।
कलेक्टर भीमसिंह के अगुवई अउ जिला पंचायत के सीईओ डॉक्टर रवि मित्तल के मार्गदर्सन म कोविड टीकाकरण बर घरो-घर जा के पहल करीन। एखर परिणाम जिला के जम्मों नौ विकासखंड मन म टीकाकरण के लक्ष्य पूरा कर ले गेहे।
अमृत महोत्सव-क्विज विजेता
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी के तीसर अंक म छत्तीसगढ़ी बुलेटिन म प्रश्न रिहीस- ‘‘बस्तर म सन 1878 म कोन रानी ह अंग्रेज मनके खिलाफ विद्रोह के बिगुल फुंके रिहीस।‘‘ एखर सही जवाब हे- जुगराज कुँवर देवी। सवाल के जवाब म बड़ संख्या म सुनइया मन ह जवाब भेजीन। फेर, सबले पहिली जवाब भेजइया विजेता हवय – जांजगीर-चांपा जिला के बारगांव निवासी अमितेश दिनकर। आकाशवाणी परिवार डहार ले अमितेश दिनकर ल हमन हार्दिक बधाई अउ सुभाकामना देवत हन।
श्री दिनकर ह आकाशवाणी समाचार के नियमित श्रोता हरय अउ ओमन बतईन कि अमृत महोत्सव के तहत सुरू करे गे प्रश्नोत्तरी प्रतियोगिता ह ज्ञान ले भरे हवय।
होल्ड बाईट – अमितेश दिनकर ( 20 सेकेंड)
फिट इंडिया फ्रीडम रन
देस के स्वतंत्रता के पचहत्तर साल के मउका म सुरू करे गे आजादी के अमृत महोत्सव के तहत प्रदेस म कतकोन आयोजन करे जात हे। बलौदाबाजार म आज फिट इंडिया फ्रीडम रन के आयोजन करे गीस। नेहरू युवा केन्द्र रईपुर डहार ले राखे गे ए दउड़ कलेक्ट्रेट परिसर ले सुरू होके आने-आने रद्दा ले होवत सरकारी स्कूल म सिराईस। ए दउरान कलेक्ट्रेट परिसर म लोगन मन ल स्वस्थ रेहे के सपथ देवाय गीस।
अमृत महोत्सव-प्रदर्शनी
केन्द्रीय सूचना अउ प्रसारण मंत्रालय डहार ले आजादी के अमृत महोत्सव के तहत ए महीना के आखिरी हफ्ता ल बिसेस सप्ताह के रूप म मनाय जाही। प्रादेशिक लोकसंपर्क कार्यालय रईपुर डहार ले पच्चीस अगस्त ले पांच जिला म प्रचार कारीकरम राखे गेहे। पच्चीस से सत्ताईस अगस्त तक धमतरी जिला के कुरूद म मल्टीमीडिया चित्र प्रदर्सनी लगाय जाही। त उहें, छब्बीस अगस्त के अंबिकापुर, सत्ताईस अगस्त के जगदलपुर अउ अट्ठाईस अगस्त के कांकेर अउ बिलासपुर म प्रचार कारीकरम के आयोजन करे जाही।
हेमचंद यादव-विवि प्रवेश
हेमचंद यादव विश्वविद्यालय के अंतर्गत दुरूग जिला के तीन ठिन नवा सरकारी महाविद्यालय – कुम्हारी, निकुम अउ रानीतराई म पहिली साल प्रवेस बर तेईस अगस्त तक एडमिशन पोर्टल म अरजी करे जा सकथे। उहें, स्नातकोत्तर स्तर के पहिली सेमेस्टर बर प्रवेस बर आखिरी तारीख अट्ठाईस अगस्त राखे गेहे।
रक्षाबंधन
भाई-बहिनी के मया के तिहार रक्षाबंधन काली मनाय जाही। रक्षाबंधन के सेती राजधानी रईपुर के संगेसंग प्रदेस के जम्मों जिला के बाजार मन म लोगन मनके भीड़ बाढ़ गेहे। ऐसो घलो स्व-सहायता समूह के माईलोगिन मन डहार ले बनाय गे बढ़िया-बढ़िया राखी लोगन मनके धियान म हवय।
राज्यपाल अनुसुईया उइके अउ मुख्यमंत्री भूपेश बघेल ह रक्षाबंधन के मउका म प्रदेस के लोगन मन ल बधई अउ सुभकामना दे हवय।
ऐति, कोरोना संक्रमण ल देखत महासमुंद जिला जेल म रक्षाबंधन के मउका म कैदी मन ल उंखर बहिनी मन ह राखी नइ बांध सकय। जम्मों जेल के बाहिर काउंटर बनाय गेहे, जिहां बहिनी मन ह अपन भाई मन बर लिफाफा म राखी, टीका अउ चावल दे सकथे। सहायक जेल अधीक्षक ह बतईन कि बंदी मन ले उंखर बहिनी मन ह वीडियो कॉलिंग के माध्यम ले बात कर सकथे।
रग-रग में गंगा
डीडी नेशनल चैनल म गंगा नदी के बढ़िया ढंग ले सुधार अउ इहां के जल ल बचाय के बारे म यात्रा वृतांत धारावाहिक ‘‘रग-रग में गंगा‘‘ के दूसर चरण आज ले सुरू होवत हे। ए कारीकरम ल सनिचर अउ इतवार के रतिहा साढ़े आठ बजे ले देखे जा सकथे। ए कारीकरम के एक घांव फेर प्रसारण सोमवार अउ मंगलवार के बिहनिया साढ़े आठ बजे होही।
फ्लैगशिप-प्रधानमंत्री आवास योजना
खुदे के पक्का घर राहय अइसन हर मनखे के सपना होथे। प्रधानमंत्री आवास योजना के तहत जशपुर जिला म गरीब परिवार मन ल खुदे के पक्का मकान मिल गेहे। जशपुर नगर पालिका म रहइया कासिम अंसारी ह बतईन कि प्रधानमंत्री आवास योजना के तहत घर मिले हे उंखर परेसानी कम होगे।
अइसने, जशपुर नगरीय क्षेत्र के टंकीटोली म रहइया आसा बाई ह घलो कभू नइ सोचे रिहीन कि ओमन ल ए योजना के तहत पक्का घर मिल जही।
अउ अब थोरकुन समाचार सार म-
– राष्ट्रपति रामनाथ कोविंद, उप राष्ट्रपति एम. वेंकैया नायडू, प्रधानमंत्री नरेन्द्र मोदी के संग प्रदेस के मुख्यमंत्री भूपेश बघेल ह लोगन मन ल ओणम के बधाई दे हवय।
– खेल अउ युवा कल्याण संचालनालय डहार ले आने-आने खेल अकादमी मन म चयन बर चौबीस अउ पच्चीस अगस्त के रईपुर म खिलाड़ी मनके ट्रायल ले जाही।
– दंतेवाड़ा जिला म कटेकल्याण थाना क्षेत्र के चिकपाल के जंगल ले सुरक्षा बल मन ह एक लाख रूपिया के इनामी माओवादी ल गिरफ्तार करे हे।
अउ
– सुकमा जिला म पुलिस ह पाछु एक महीना के दउरान सात ठिन आने-आने जघा ले करीबन एक हजार किलो गांजा जब्त करे हे। ए मामला म चौदह झिन आरोपी मन ल गिरफ्तार करे गेहे।