प्रधानमंत्री-ओलंपिक खिलाड़ी-आग्रह
प्रधानमंत्री नरेन्द्र मोदी ह टोक्यो ओलंपिक के भारतीय दल ले पन्द्रह अगस्त दो हजार तेईस तक पचहत्तर विद्यालय मन म जाय के आग्रह करीन हे। श्री मोदी ह ओमन ले विद्यार्थी मनके संग एक घंटा बिताय बर अउ संगेसंग कुपोषण के बारे म जागरूक करे बर अउ खेल बर प्रेरित करे के आग्रह करीन हे। प्रधानमंत्री ह ओलंपिक ले लहुटे भारतीय एथलीट मन संग ओखर गोठबात के एक वीडियो साझा करीन। प्रधानमंत्री के संग संवाद के दउरान महिला हॉकी टीम ह ओलंपिक म मैच हारे के बाद फोन करके टीम के हौसला बढ़ाय बर ओखर धन्यवाद करीस।
जिला-मुख्यालय
प्रदेस के नवगठित जिला मोहला-मानपुर-चौकी के मुख्यालय मोहला म अउ सारंगढ़-बिलाईगढ़ के मुख्यालय सारंगढ़ म होही। ए जानकारी मुख्यमंत्री भूपेश बघेल ह रईपुर स्थित अपन निवास कार्यालय म नवगठित जिला मन ले आय प्रतिनिधिमंडल के संग चरचा करत दीन। ओमन बतईन कि नवा जिला के मुख्यालय म कलेक्टर अउ पुलिस अधीक्षक के कार्यालय होही। एखर संगेसंग मानपुर-चौकी अउ बिलाईगढ़ म घलो कुछ विभाग मनके कार्यालय सुरू होही। ओमन प्रतिनिधिमंडल ल भरोसा दिलाईन कि नवा जिला जल्दी अस्तित्व म आही, जेखर ले लोगन मन ल अउ बेहतर ढंग ले सासन के योजना मनके लाभ मिल सकही।
माओवादी समाचार
सुकमा जिला म दू इनामी समेत तीन झिन माओवादी मन आत्मसमर्पण कर दीन। सीआरपीएफ के डीआईजी योज्ञान सिंह अउ जिला के पुलिस अधीक्षक सुनील शर्मा करा ए माओवादी मन आत्मसमर्पण करीन। एमा ले दू झिन माओवादी उपर एक-एक लाख रूपिया के इनाम घोषित रिहीस। ए मन उपर अलग-अलग क्षेत्र म आने-आने गतिविधि मन म सामिल रेहे के आरोप हे। आत्मसमर्पण करने वाला माओवादी मन ल राज्य सरकार के पुनर्वास नीति के तहत प्रोत्साहन रासि दे गीस।
अमृत महोत्सव-श्री शक्ति चुनौती
केन्द्रीय इलेक्ट्रॉनिक्स अउ सूचना प्रौद्योगिकी मंत्री अश्विनी वैष्णव ह काली अमृत महोत्सव श्री शक्ति चुनौती प्रतियोगिता के शुभारंभ करीन। एखर उद्देश्य महिला मनके सुरक्षा अउ सशक्तिकरण बर महिला उद्यमी मन डहार ले विकसित प्रौद्योगिकी सामान ल बढ़ावा देना हे। ए प्रतियोगिता महिला मनके सशक्तिकरण बर आयोजित करे जात हे। स्टार्टअप महिला उद्यमी पुरस्कार समारोह ल वर्चुअली संबोधित करत केन्द्रीय मंत्री ह आसा प्रकट करीन कि श्री शक्ति प्रतियोगिता म उद्यमी मन बढ़-चढ़के हिस्सा लीहीं।
ऐति, आजादी के अमृत महोत्सव के श्रृंखला म भिलाई इस्पात संयंत्र डहार ले मानव संसाधन विकास केन्द्र म युवा प्रबंधक मन बर प्रश्नोत्तरी प्रतियोगिता राखे गीस। कारीकरम के मुख्य अतिथि संयंत्र के कार्यपालक निदेशक, कार्मिक अउ प्रसासन एस.के. दुबे रिहीन। ए प्रश्नोत्तरी म अक्षय खेमराज दिवाकर अउ गिरीश रविन्द्र ठाकुर ह संयुक्त रूप ले पहिली स्थान प्राप्त करीन।
स्थानीय भाषा/बोली-शिक्षा
राज्य के स्कूली लइका मन अब अपन इलाका के स्थानीय भाखा अउ बोली म पढ़ाई कर सकही। प्राथमिक स्कूल मन म पढ़ाई ल रूचिकर, सरल अउ सहज बनाय के उद्देश्य ले स्कूल शिक्षा विभाग डहार ले स्थानीय बोली मन म पाठ्य-पुस्तक तियार कर ले गेहे। सादरी, भतरी दंतेवाड़ा गोंडी, कांकेर गोंडी, हल्बी, कुडुख उड़िया बोली-भासा के जानकार लोगन मन ले लइका मन बर पुस्तक तियार कर स्कूल म भिजवा दे गेहे। अब पहली ले पांचवीं कक्षा तक के लइका मन ल ओमन इलाका के बोली-भाखा म ही पढ़ाई कराय जाही। एखर अलावा छत्तीसगढ़ी, अंग्रेजी अउ हिन्दी म घलो लइका मन बर पठन सामग्री स्कूल मन ल उपलब्ध कराय जा चुके हे।
कांकेर-जाति प्रमाण पत्र अभियान
कांकेर जिला म स्कूली लइका मन ल ओखरे मनके स्कूल म जाति, आय, अउ निवास प्रमाण पत्र बांटे के बिसेस अभियान आज ले सुरू होगे हे। आज जिला कलेक्टर चंदन कुमार ह भानुप्रतापपुर के भानुबेड़ा ग्राम पंचायत के स्कूल ले ए अभियान के सुरूवात करीन। मीडिया ले चर्चा करत ओमन बतईन कि आज जिला म करीबन दस हजार लइका मन ल जाति प्रमाण पत्र बांटे गीस।
राजीव गांधी न्याय-योजना
राजीव गांधी ग्रामीण भूमिहीन कृषि मजदूर न्याय योजना ले प्रदेस म दस लाख ले जादा भूमिहीन कृषि मजदूर मन ल लाभान्वित करे के लक्ष्य राखे गेहे। एखर क्रियान्वयन बर राजस्व अउ आपदा प्रबंधन विभाग डहार ले जम्मों कलेक्टर मन ल जरूरी दिसा-निरदेस जारी करे गेहे। योजना के तहत हरेक परिवार ल सलाना छह हजार रूपिया के आर्थिक सहायता देके प्रावधान हवय। ए योजना भूमिहीन कृषि मजदूर मन ल पहचाने के अउ ओमन ल वार्षिक आधार म अनुदान उपलब्ध कराय के उद्देश्य ले सुरू करे गेहे।
योजना के तहत अनुदान सहायता रासि ले बर आवेदन पत्र के संग ‘‘राजीव गांधी ग्रामीण भूमिहीन कृषि मजदूर न्याय योजना‘‘ पोर्टल म पंजीयन कराना अनिवार्य होही। पंजीयन के काम अवइया एक सितंबर ले सुरू होही, जउन ह तीस नवंबर तक चलही।
कोरोना समाचार/टीका
प्रदेस म कोरोना संक्रमण के स्थिति म सरलग सुधार होवत हे। औसत पॉजिटिविटी दर गिरके सून्य दशमलव एक-चार प्रतिशत म आ गेहे। काली प्रदेस म कोरोना संक्रमण के छप्पन नवा मामला आगू आइस। उहें, प्रदेस के नौ जिला बालोद, बेमेतरा, कबीरधाम, धमतरी, गरियाबंद, गौरेला-पेंड्रा-मरवाही, सरगुजा, कोरिया अउ दंतेवाड़ा म कोरोना संक्रमण के कोनों भी नवा मामला नइ आइस। उहें, रईपुर समेत नौ ठिन जिला मन म कोरोना के एक-एक नवा मरीज मिले हे। वर्तमान म एक हजार ले जादा मरीज मनके आने-आने अस्पताल अउ होम आइसोलशेन म इलाज चलत हे।
इही बीच, प्रदेस म कोरोना ले बचाव खातिर अब तक एक करोड़ छत्तीस लाख चौदह हजार ले जादा टीका लगाय जा चुके हे। एमा ले एक करोड़ सात लाख ग्यारह हजार ले जादा मनखे मन ल पहिली टीका उनतीस लाख दू हजार ले जादा लोगन मन ल दूनों टीका लगाय जा चुके हे।
रासायनिक खाद/प्रमाणिक बीज
राज्य क कृषि विभाग डहार ले रासायनिक उर्वरक, बीज अउ कीटनाशक औषधि मनके गुणवत्ता उपर बिसेस निगरानी रखे जात हे। कृषि विभाग के जिला स्तरीय अधिकारी अपन-अपन इलाका म लगातार छापामार कार्रवाई करके बीज, खाद अउ कीटनाशक औषधि के नमूना मन ल जांच बर इकट्ठा करत हे। काली तक गुणवत्ता जांच म प्रदेस म बीजा के अड़तीस अउ रासायनिक उर्वरक के इक्यासी नमूना अमानक पाय गीस, जेखर बिक्री उपर तुरते रोक लगाय के आदेस जारी करके संबंधित फर्म ल नोटिस भेजे गेहे।
इही बीच, केन्द्र सरकार ह राज्य म अब तक आठ लाख सात हजार मीटरिक टन ले जादा रासायनिक उर्वरक के आपूर्ति करे जा चुके हे, जउन ह लक्ष्य के उनहत्तर प्रतिसत हवय।
उहें, प्रदेस म जैविक खेती ल बढ़ावा दे बर अउ रासायनिक उर्वरक उपर निर्भरता के संगेसंग कृषि लागत ल कम करे के उद्देश्य ले किसान जैविक खाद बउरे म रूचि लेवत हे। ऐति, प्रदेस म किसान मन ल सहकारी समिति अउ निजी क्षेत्र के माध्यम ले प्रमाणिक बीज उपलब्ध कराय जात हे।
कवर्धा-एथेनॉल प्लांट
प्रदेस के सबले बड़का अउ पहला एथेनॉल प्लांट कबीराधाम जिला म स्थापित करे जाही। सहकारिता मंत्री डॉक्टर प्रेमसाय सिंह टेकाम ह ए संयंत्र बर चुने गे स्थल के निरीक्षण करीन। एथेनॉल प्लांट के स्थापना बर भोरमदेव सहकारी शक्कर कारखाना के खाली भू-खंड के पैंतीस एकड़ भूमि के चिन्हांकन करे गेहे। राज्य सरकार ल ए उम्मीद हे कि एखर स्थापना ले कवर्धा क्षेत्र म प्रत्यक्ष अउ अप्रत्यक्ष रोजगार के मउका उपलब्ध होही। संगेसंग किसान मन ल गन्ना के कीमत के समय म भुगतान सुनिश्चित हो सकही।