कृषि मंत्री-सिंचाई जलाशय
कृषि अउ जल संसाधन मंत्री रविंद्र चौबे ह कीहिन हे कि प्रदेश म कमती बरसा ल देखत खरीफ फसल मन के सिंचाई बर आने आने जलाशय ले पानी छोड़े जाही। ओमन बताइन कि गंगरेल बांध म ए बेरा म उनचालिस प्रतिशत पानी हवय। उंहें दुर्ग अउ बालोद जिला म औसत ले कम बरसा होय हे अउ तांदुला म घलो पानी कमती हे।
मोहला मानपुर चौकी जिला
प्रदेश म ए बेरा राजनांदगांव जिला ले अलग होके बनइया जिला ल मोहला-मानपुर-चौकी के नाव ले जाने जाही। मुख्यमंत्री ह आज राजनांदगांव जिला ले आये एक ठिन प्रतिनिधि मंडल मनले मिले के बाद ए घोषणा करीन। जानबा के मुताबिक मुख्यमंत्री ह स्वतंत्रता दिवस के मउका म प्रदेश म चार ठिन नवा जिला बनाय के घोषणा करे हे।
प्रधानमंत्री-पैरालंपिक
प्रधानमंत्री नरेंद्र मोदी ह काली बीहनिया ग्यारा बजे टोक्यो दू हजार बीस पैरालंपिक खेल बर भारतीय पैरा-एथलीट दल के संग वीडियो कॅान्फ्रेंसिग के माध्यम ले गोठबात करही। नौ ठिन खेल बर चौवन पैरा एथलीट मन ह देश के प्रतिनिधित्व करही। ये पैरा ओलंपिक खेल म भारत के सबले बड़का दल हे।
अमृत महोत्सव-हथकरघा खाद्य प्रदर्शनी
आजादी के अमृत महोत्सव के तहत रायपुर रेलवे स्टेशन म आत्मनिर्भर भारत के प्रतीक के रूप म सरकारी निकाय मनके संग मिलके हथकरघा खादी प्रदर्शनी के संग बिक्री स्टॉल लगाय गेहे। बाईस अगस्त तक चलइया ए स्टॉल ल मंडल रेल प्रबंधक श्याम सुंदर गुप्ता अउ अध्यक्षा सेक्रो राधा गुप्ता ह देखीन। ए दउरान ओमन खादी ले बने कपड़ा मन ल बढ़ावा देबर बुनकर अउ कारीगर मन डहार ले बनाये गे हैण्डलूम अउ मेक इन इंडिया के उत्पाद के खरीदी करीन। उंहें पत्र सूचना कार्यालय अउ प्रादेशिक लोक संपर्क कार्यालय रायपुर डहार ले जिंगल अउ आजादी के अमृत महोत्सव के फोटो वाले बैनर ले सजे रथ ल हरा झण्डी दिखाके रवाना करे गीस। ए जागरूकता रथ ह सात दिन तक शहर के आने आने चौक-चौरहा म जाके आम लोगन मन म राष्ट्र के प्रति गौरव अउ स्वाभिमान के भावना जगाहीं।
स्वतंत्रता दिवस-एम्स, एनटीपीसी
एम्स रायपुर म स्वतंत्रता दिवस के मउका म देशभक्ति के आने आने कार्यक्रम होइस। ए मउका म एम्स रायपुर के निदेशक डॅाक्टर नीतिन एम. नागरकर ह कीहिन कि एम्स ह प्रदेश के लोगन मन ल बढ़िया ईलाज के सुविधा देवत हे। पाछू दू बछर के दउरान कोरोना महामारी अउ ब्लैक फंगस जइसन चुनौती ले घलो बने ढंग ले सामना करे हे। उंहें नवा रायपुर स्थित एनटीपीसी कार्यालय परिसर म घलो स्वतंत्रता दिवस उछाह के संग मनाये गीस। ए मउका म एनटीपीसी पश्चिम क्षेत्र-दो अउ एसआर के क्षेत्रीय कार्यकारी निदेशक ह झण्डा फहराइन। एति भारतीय जनता युवा मोर्चा डहार ले आजादी के पचहत्तरवां बछर म प्रवेश करे के मउका म रायपुर के केनाल रोड स्थ्ति भारत माता चौक म सामूहिक राष्ट्रगान के आयोजन करे गीस।
अमृत महोत्सव क्विज
देस के पचहत्तरवां स्वाधीनता दिवस समारोह के उपलक्ष्य म आजादी के अमृत महोत्सव के तहत केंद्र सरकार ह कतकोन आयोजन करत हे। अइसने जन उत्सव के रूप म आकाशवाणी समाचार ह स्वाधीनता संग्राम अउ उंखर गौरवशाली इतिहास उपर आज ले विशेष प्रश्नोत्तरी के शुरूआत करत हे। ए प्रश्नोत्तरी प्रतियोगिता पंद्रह अगस्त दू हजार बाईस तक हर सोमवार अउ मंगलवार के समाचार प्रभात म शामिल होही। आज के प्रश्न हे – महात्मा गांधी ल पहिली घांव कोन ह राष्ट्रपिता कहिके संबोधित करे रीहिन ? श्रोता मन अपन जवाब अमृत महोत्सव क्विज एट द रेट जी मेल डॅाट कॅाम ई-मेल म भेंजे। आप मन जवाब के संग अपन नाव, पता अउ फोन नंबर घलो भेजव। विजेता के घोषणा काली के समाचार प्रभात म करे जाही।
आरबीआई सतर्क
भारतीय रिजर्व बैंक ह गलत ढंग ले डिजीटल प्लेटफार्म के बाढ़त फर्जीवाड़ा अउ ऑनलाईन धोखाधड़ी मामला के बारे म आम लोगन मन ल सावधान रेहे बर केहे हे। आरबीआई ह सचेत करे हे कि कतकोन मनखे अउ छोटे व्यवसायी मन ह गलत ढंग ले डिजीटल कर्जा देवइया प्लेटफार्म अउ मोबाइल एप के तहत कर्जा देके वायदा के शिकार होवत हे। रिजर्व बैंक ह आम लोगन मन ल ए जम्मों प्रकार के फर्जीवाड़ा ले सतर्क रेहे बर केहे हे।
दुर्ग पुलिस पिंक गश्त
दुर्ग पुलिस डहार ले माइलोगिन मन ल सुरक्षा देवाय के उद्देश्य ले एक ठिन नवा पहल पिंक गश्त के शुरूआत करे गेहे। एमा आपराधिक घटना वाले जगा म गश्त बर महिला पुलिसकर्मी मनके विशेष टीम बनाय गेहे। ए टीम ल माइलोगिन मनके सुरक्षा बर गुलाबी रंग के स्कूटी, पेट्रोलिंग वाहन, अउ अइसने रंग के बैच के संगेसंग रिस्ट बैण्ड दे गेहे। ए टीम मन ह दुर्ग, भिलाई शहर के चिन्हारी वाले जगा म जाके माइलोगिन मनले मिलही अउ उंखर सुरक्षा के बारे म जरूरी जानबा दीहीं अउ संगेसंग पॉम्पलेट के माध्यम ले माइलोगिन मन ल उंखर ले जुड़े अधिकार अउ कानून के बारे म बताय जाही।
वाजपेयी पुण्यतिथि
राष्ट्र आज पूर्व प्रधानमंत्री अटल बिहार वाजपेयी ल उंखर तीसर पुण्यतिथि म श्रद्धांजलि देवत हे। बछर दू हजार अठारा म आजे के दिन उंखर निधन होय रीहिस। राष्ट्रपति रामनाथ कोविंद, उप राष्ट्रपति एम.वेंकैया नायडू अउ प्रधानमंत्री नरेंद्र मोदी के संगेसंग आने बड़का नेता मन ह घलो दिल्ली म वाजपेयी स्मारक के सदैव अटल म जाके ओमन ल पुष्पांजलि दीन। पच्चीस दिसंबर उन्नीस सौ चौबीस म ग्वालियर म जन्मे अटल बिहार वाजपेयी के सामाजिक जीवन अउ देश के विकास बर करे गे योगदान ल जम्मों बखत सुरता करे जाही।
फुटबॉल ग्राउंड-लोकार्पण
बस्तर जिला के प्रभारी मंत्री कवासी लखमा ह स्वतंत्रता दिवस के मउका म जगदलपुर म करीबन पौने पांच करोड़ रूपिया के लागत ले बने फुटबॅाल ग्राउण्ड के लोकार्पण करीन। ए मउका म माता रूखमणी सेवा आश्रम डिमरामारा अउ बस्तर डीएफ महिला फुटबॅाल टीम के बीच मैच खेले गीस। जेमा बस्तर डीएफ के टीम ह तीन-एक ले जीत हासिल करीन।
मोहर्रम अवकाश
प्रदेश म मोहर्रम बर सार्वजनिक अवकाश उन्नीस अगस्त के बजाय बीस अगस्त के रीही। राज्य शासन ह ए बारे म संशोधित आदेश जारी कर देहे। सामान्य प्रशासन विभाग डहार ले पहिली जारी सूची म मोहर्रम बर उन्नीस अगस्त के छुट्टी घोषित करे गे रीहिस। फेर अब ए आदेश म संशोधन करे गेहे।
रेलवे फाटक हादसा
दक्षिण पूर्व मध्य रेलवे के बिलासपुर के तारबहार स्थित रेलवे फाटक के तीर एक ठिन मालगाड़ी ह पटरी ले उतर गे । ए दउरान मालगाड़ी के इंजन ह पटरी ले उतर के बिजली के खंभा ले टकरा गे। ए घटना म कोनो के हताहत होय के समाचार नइ मिले हे। घटना के बाद रेलवे के अधिकारी मन ह मउका म जाके जांच करत हे।
सावन सोमवार
आज सावन महीना के आखरी सोमवार हरय। बीहनियाच ले प्रदेश के जम्मों शिव मंदिर मन म भगवान भोलेनाथ के पूजापाठ बर पूजा करइया मनके भीड़ लगे हे। राजधानी रायपुर के महादेव घाट स्थ्ति हटकेश्वर महादेव, पुरानी बस्ती स्थित बुढ़ेश्वर महादेव, मठपारा के नील कंठेश्वर महादेव के संगेसंग जम्मों मंदिर मन म आज भगवान शिव के विशेष अभिषेक करे जात हे। उंहें गरियाबंद जिला म स्थित भक्कुरा महादेव मंदिर म बोल बम के जयकारा के संग आने आने जगा ले आय कांवड़िया मन ह भगवान शिव के अभिषेक करत हे। एखर अलावा प्रदेश के जम्मों जिला मन म स्थित शिव मंदिर मन म पूजा पाठ करइया मनके भीड़ लगे हे।
मौसम
प्रदेश म अवइया चौबीस घंटा के दउरान कतकोन जगा म हल्का ले मध्यम बरसा हो सकथे। उंहें एक दू जगा म भारी बरसा के चेतावनी घलो दे गेहे। मौसम विभाग के मुताबिक पश्चिम छोर हिमालय के तराई अउ दक्षिण पूर्व कोति मध्य बंगाल के खाड़ी तक एक ठिन मानसूनी द्रोणिका स्थित हे । उंहे उत्तर पश्चिम बंगाल के खाड़ी तक उपरी हवा के चक्रीय चक्रवाती घेरा घलो बने हे। जेखर प्रभाव ले प्रदेश म मौसम बदलही।