एकीकृत किसान पोर्टल कृषि ऋण
राज्य म किसान मनके सुविधा बर एकीकृत किसान पोर्टल-यू.एफ.पी. तियार करे जात हे। एखर ले समर्थन मूल्य म धान बेचइया किसान सहित राजीव गांधी किसान न्याय योजना अउ मुख्यमंत्री वृक्षारोपण प्रोत्साहन योजना के फायदा ले खातिर किसान पंजीयन करा सकही। एकीकृत किसान पोर्टल राजस्व विभाग के भुंइया पोर्टल ले लिंक रीही। जेखर ले भू-स्वामी किसान कोति ले धारित भुंइया के खसरा अउ रकबा के मिलान हो सकय। ये पोर्टल के संबंध म गोठबात अउ सुझाव ल लेके आज रायपुर म कृषि विभाग कोति ले प्रशिक्षण सह कार्यशाला राखे गीस।
कृषि उत्पादन आयुक्त डॅाक्टर एम. गीता ह कीहिन कि ये पोर्टल ल तियार करे के उद्देश्य राज्य के जम्मों वर्ग के किसान मन ल शासन के योजना के फायदा देवाय खातिर एक प्लेटफार्म म लाना हे। उंहें कृषि विभाग ह एसो खरीफ मौसम बर पांच हजार तीस सौ करोड़ रूपिया के कर्जा देवाय के लक्ष्य राखे हे। राज्य म जैविक खातु ल बढ़ावा देबर किसान मन ल वर्मी कम्पोस्ट अउ सुपर कम्पोस्ट खातु कृषि ऋण के रूप म देवाय के बेवस्था सहकारी समिति म करे गेहे।
प्रधानमंत्री संवाद
प्रधानमंत्री नरेंद्र मोदी काली साढ़े बारा बजे आत्मनिर्भर नारी शक्ति ले संवाद म शामिल होही। श्री मोदी दीनदयाल अंत्योदय योजना – राष्ट्रीय ग्रामीण आजीविका मिशन के लाभार्थी महिला स्व सहायता समूह के सदस्य मन संग गोठबात करही। ये मिशन के उद्देश्य गरीब परिवार ल स्व सहायता समूह म शामिल करना अउ ओमन ल मदद देवाना हे।
स्वतंत्रता दिवस ध्वजारोहण
राज्य म स्वतंत्रता दिवस समारोह उछाह के संग मनाये जाही। एखर तियारी शुरू होगे हे। मुख्यमंत्री भूपेश बघेल राजधानी रायपुर के पुलिस परेड ग्राउण्ड म राखे गे मुख्य समारोह म झण्डा फहराही। उंहें विधानसभा अध्यक्ष डॅाक्टर चरणदास महंत कोरिया अउ उपाध्यक्ष मनोज सिंह मंडावी कोण्डागांव जिला मुख्यालय म झण्डा फहराही। आने जिला मुख्यालय मन म मंत्री अउ संसदीय सचिव झण्डा फहराही। ए मउका म मुख्यमंत्री के प्रदेश के जनता के नाव संदेश पढ़े जाही।
राजधानी रायपुर म स्वतंत्रता दिवस के मुख्य समारोह म पुलिस अउ अर्धसैनिक बल कोति ले सलामी दे जाही। कार्यक्रम म कोरोना वारियर्स डॅाक्टर, पुलिस कर्मी, स्वास्थ्य कर्मचारी, अउ स्वच्छता कर्मचारी मन ल विशेष रूप ले बलाये जाही। संगेसंग बने काम करइया लोगन ल सम्मानित करे जाही। एसो घलो कोविड कोरोना महामारी ल धियान म राखत स्वतंत्रता दिवस समारोह के बेरा विशेष सावधानी बरते ल पड़ही। ये कार्यक्रम म कोरोना ले बांचे बर जारी दिशा निर्देश के पालन जरूरी हवय।
उंहें जनपद पंचायत अउ तहसील स्तर म सार्वजनिक समारोह नइ होवय। जउन स्कूल खुले हे, उंहा लईका मनके संग ध्वजारोहण करे जाही। फेर रैली, सांस्कृतिक कार्यक्रम नइ होवय।
कोरोना समाचार/टीका
प्रदेश म कोरोना संक्रमण के दर सरलग कमती होवत हे। ये बखत प्रदेश म सक्रिय मरीज के संख्या एक हजार छै सौ ले जादा हवय। काली प्रदेश के चार ठिन जिला राजनांदगांव, बेमेतरा, गौरेला-पेण्ड्रर-मरवाही अउ नारायणपुर जिला म कोनो नवा संक्रमित मनखे नइ मिले हे। इही बीच प्रदेश म कोरोना ले बचाव बर टीकाकरण अभियान घलो सरलग चलत हे। अब तक एक करोड़ तीस लाख बासठ हजार ले जादा झन ल टीका लगाये गेहे।
उंहें काली रायपुर जिला बर पैंतालिस हजार डोज कोविशील्ड के अउ बारा हजार आठ सौ खुराक कोवैक्सीन के मिले हे। स्वास्थ्य विभाग के मुताबिक जिला म पर्याप्त मात्रा म वैक्सीन हवय। दू सौ पच्चीस सरकारी टीकाकरण केंद्र म टीका लगाये जात हे। जिला प्रशासन कोति ले लोगन ले अपील करे गेहे कि सबो झन टीका जरूर लगवावंय।
अमृत महोत्सव-फिट इंडिया फ्रीडम
आजादी के अमृत महोत्सव समारोह म तेरा अगस्त ले दू अक्टूबर तक दूसर फिट इंडिया फ्रीडम रन के आयोजन करे जाही। ये पहल लोगन ल रोजमर्रा के जिंदगी म दउड़, खेल ल अपनाय अउ बीमारी ले आजादी खातिर बढ़ावा देना हे।
केंद्रीय युवा कार्यक्रम अउ खेल मंत्री अनुराग ठाकुर शुक्रवार के राष्ट्रव्यापी फिट इंडिया फ्रीडम रन के दूसर पारी के शुरूआत करही। सीमा सुरक्षा बल, केंद्रीय औद्योगिक बल, केंद्रीय रिजर्व पुलिस बल, नेहरू युवा केंद्र संगठन, भारत तिब्बत सीमा पुलिस, राष्ट्रीय सुरक्षा गार्ड अउ एसएसबी जइसन संगठन देशभर के प्रमुख जगा ले वचुअर्ल माध्यम ले जुड़ही।
इही कड़ी म छत्तीसगढ़ के आने आने जिला मन म घलो इंडिया फ्रीडम रन आयोजित करे जाही। ए संबंध म आज पत्र सूचना कार्यालय रायपुर म एक बइठका राखे गीस, जेमा नेहरू युवा केंद्र संगठन अउ प्रादेशिक लोक संपर्क कार्यालय के अधिकारी सामिल होइन।
अमृत महोत्सव-क्विज प्रतियोगिता
देश के स्वतंत्रता के पचहत्तर बछर पूरा होय के मउका म आजादी के अमृत महोत्सव म प्रादेशिक समाचार एकांश, आकशवाणी रायपुर कोति ले छै अगस्त ले एक प्रश्नोत्तरी कार्यक्रम शुरू करे गेहे। एमा छत्तीसगढ़ म स्वतंत्रता संग्राम के बेरा होय घटना, राज्य के स्वतंत्रता सेनानी, अउ समाज सुधारक मनले जुड़े प्रश्न पूछे जात हे।
प्रश्नोत्तरी कार्यक्रम ल लेके लोगन के उछाह ल देखत प्रादेशिक समाचार एकांश ह ये फैसला लेहे कि ये शुक्रवार तेरा अगस्त ले छत्तीसगढ़ी अउ हिंदी प्रादेशिक समाचार बुलेटिन म आने आने प्रश्न पूछे जाही अउ ये दूनो समाचार बुलेटिन म पूछे गे सवाल के आधार म सबले पहिली सही जवाब देवइया एक-एक विजेता मन ल चुने जाही।
श्रोता मन ल ई-मेल या फिर एसएमएस ले जवाब देना हे। ये जवाब ई-मेल आईडी आर.ए.आई.पी.यू.आर.एस.ए.डब्लू.ए.एल एट द रेट जीमेल डॅाट कॉम- म या फेर फोन नंबर 94242-08182 म एसएमएस ले भेजे जा सकथे।
ये प्रतियोगिता म वाट्सअप म भेजे गे जवाब मान्य नइ होही। जउन श्रोता के सबले पहिली सही जवाब मिलही ओला विजेता माने जाही अउ उंखर नाव के घोषणा अवइया समाचार बुलेटिन म करे जाही। संगेसंग प्रादेशिक समाचार एकांश कोति ले डिजिटल प्रमाण पत्र घलो जारी करे जाही। ये प्रश्नोत्तरी कार्यक्रम म हरएक शुक्रवार के प्रश्न पूछे जाही।
मिनीमाता-पुण्यतिथि
छत्तीसगढ़ के पहिली महिला सांसद मिनीमाता के आज पुण्यतिथि हे। ये बेरा म मुख्यमंत्री भूपेश बघेल ह कीहिन कि मिनीमाता ह माइलोगिन मनके बढ़वार, श्रमिक कल्याण अउ छुआछूत ल दूरिहाय खातिर कतकोन काम करीन हे। श्री बघेल ह आज रायपुर ले वीडियो कॉन्फ्रेसिंग ले मिनीमाता स्मृति दिवस के कार्यक्रम म बोलत कीहिन कि लोकसभा म मिनीमाता कोति ले अस्पृश्यता निवारण कानून ल संसद म पारित कराय म उंखर योगदान ल कभू भुलाय नइ जा सकय।
कार्यक्रम के आयोजन गुरू घासीदास साहित्य अउ सांस्कृतिक अकादमी कोति ले करे गीस।
फर्जी राशनकार्ड
दुर्ग पुलिस ह फर्जी राशनकार्ड बनाये के आरोप म पांच झिन आरोपी ल गिरप्तार करे हे। उंहें दू झन आने आरोपी ल खोजे जात हे।
फर्जी राशनकार्ड बनाये बर बउरे गे मोबाइल सिम अउ लेपटॉप जब्त करे हे। पुलिस के मुताबिक खाद्य विभाग कोति ले ये शिकायत दर्ज कराये गे रीहिस कि फर्जीवाड़ा करके अंत्योदय श्रेणी के कार्ड बनाये गेहे, अउ राशन दुकान ले अनाज ले गेहे। शिकायत के बाद सायबर सेल के मदद ले आरोपी के पता लगाये गीस। मुख्य आरोपी सहित गिरोह के पांच झिन सदस्य ल गिरप्तार करे गेहे।
मौसम
मौसम विभाग ह अवइया चौबीस घंटा म राज्य के एक दू जगा म गरज चमक संग गाज गिरे के चेतावनी देहे। मौसम विभाग के मुताबिक द्रोणिका बने हे जेखर प्रभाव ले बरसा होय के संभावना हे।
आज मंझनिया बाद ले राजधानी रायपुर म जोरदरहा बरसा होवत हे।