खेल रत्न पुरस्कार-मेजर ध्यानचंद
खेल रत्न पुरस्कार के नाव मेजर ध्यानचंद खेलरत्न पुरस्कार कर दे गेहे। प्रधानमंत्री नरेंद्र मोदी ह कीहिन कि नाव बदले बर देशभर ले कतकोन नागरिक मन अनुरोध करे रीहिन, जेला देखत ये फैसला लेगे हवय।
ट्वीट संदेश म श्री मोदी ह कीहिन कि मेजर ध्यानचंद देश के अइसे खिलाड़ी रीहिन जउन ह भारत के गौरव बढ़ाइन । ओमन कीहिन कि ये सही हे कि देश के सर्वोच्च खेल सम्मान मेजर ध्यानचंद के नाव म राखे जाय। टोक्यो ओलंपिक के बारे म बतावत प्रधानमंत्री ह कीहिन कि पुरूष अउ महिला हॉकी टीम ह शानदार प्रदर्शन करे हे। जेखर ले देश म हॉकी बर नवा रूची उभरे हे। ए ह अवइया समय बर सकारात्मक संकेत हे।
चिटफंड कंपनी आवेदन तिथि
राज्य सरकार ह प्रदेश म चिटफंड कंपनी मनके निवेशक मनले धन वापसी बर आवेदन मंगाए के तारीख ल छै ले बढ़ाके तेरा अगस्त कर दे हवय। निवेशक मन ह निर्धारित प्रपत्र म सबो जरूरी जानकारी संग आवेदन कर सकत हे।
रायपुर कलेक्टर सौरभ कुमार ह बताइन कि आवेदन बर रायपुर जिला के तीनो अनुभाग स्तर म अधिकारी मन ल अधिकृत करे गेहे। रायपुर अनुभाग बर अनुविभागीय अधिकारी प्रणव सिंह, आरंग अनुभाग बर विनायक शर्मा अउ अभनपुर अनुविभाग बर निर्भय साहू ल अनुविभागीय अधिकारी बनाये गे हवय।
ओपन स्कूल परिणाम
छत्तीसगढ़ राज्य ओपन स्कूल डहार ले राखे गे हाइस्कूल सर्टिफिकेट मुख्य परीक्षा के परिणाम आज घोषित कर दे गीस। परीक्षा परिणाम बयानबे दशमलव छै सात प्रतिशत रीहिस। एमा पास होए नोनी मनके प्रतिशत तिरानबे दशमलव चार नौ अउ लड़का मनके बयानबे दशमलव एक-एक प्रतिशत हे। ओपन स्कूल के दसवीं के मुख्य परीक्षा म चौवन हजार ले जादा परीक्षार्थी मन शामिल होय रीहिन। एमा ले पचास हजार ले जादा विद्यार्थी मन पास होय हे ।
मुख्यमंत्री भूपेश बघेल अउ स्कूल शिक्षा मंत्री डॅाक्टर प्रेमसाय सिंह टेकाम ह सफल विद्यार्थी मन ल बधाई अउ शुभकामना दीन हे।
अमृत महोत्सव-वीरता पुरस्कार पोर्टल
आजादी के पचहत्तर बछर पूरा होय के मउका म वीरता पुरस्कार पोर्टल देश बर बलिदान देवइया शहीद मन ल श्रद्धांजलि देबर देश के पचहत्तर ठन शहर मन म सशस्त्र बल, सीमा सड़क संगठन अउ राष्ट्रीय कैडेट कोर के सहयोग ले एक ठन कार्यक्रम करावत हे।
ये शहर मन म देश के नागरिक, विशेष रूप ले युवा मन म समर्पण अउ देश भक्ति के भावना जगाए बर शहीद अउ उंखर परिवार वाला मनके साहस, आचरण अउ वचनबद्धता ल सम्मान देबर ये कार्यक्रम कराये जाही। ए ह आजादी के बाद सशस्त्र बल मनके बहादुरी के एक ठन जश्न घलो होही।
स्वतंत्रता दिवस के मउका म आज ले चौदा अगस्त तक देश के आने आने जगा म ए कार्यक्रम कराये जावत हे। वीरता पुरस्कार पोर्टल डब्लू डब्लू डब्लू डॅाट गैलेन्ट्री अवार्ड डॅाट जीओवी डॅाट इन ले ए कार्यक्रम मनके सीधा वेब प्रसारण होही। जेखर रिकार्डिंग ए पोर्टल के यू-ट्यूब चैनल म घलो रीही।
अमृत महोत्सव-क्विज प्रतियोगिता
देश के आजादी के पचहत्तर बछर पूरा होय के मउका म आजादी के अमृत महोत्सव के तहत प्रादेशिक समाचार एकांश, आकाशवाणी रायपुर डहार ले आज एक ठन प्रश्नोत्तरी कार्यक्रम शुरू करे जावत हे। एमा हर हफ्ता शुक्रवार के प्रादेशिक बुलेटिन म श्रोता मनले सवाल पूछे जाही।
ये प्रश्नोत्तरी कार्यक्रम के पहिला कड़ी म आज के सवाल हे- छत्तीसगढ़ के सामाजिक अउ स्वतंत्रता आंदोलन के अग्रणी नेता पंडित सुंदरलाल शर्मा जी के जनम कहां होय रीहिस-
श्रोता मन ह अपन जवाब ई-मेल आईडी – आर.ए.आई.पी.यू.आर.एस.ए. डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस के माध्यम ले भेज सकत हे। जउन श्रोता के सही जवाब सबले पहिली मिलही ओला विजेता माने जाही अउ ओखर नाव के घोषणा अवइया समाचार बुलेटिन म करे जाही। संगेसंग ओला प्रादेशिक समाचार एकांश डहार ले प्रमाण पत्र घलो जारी करे जाही।
महिला आयोग सुनवाई
राज्य महिला आयोग ह एक बछर म बांसठ जनसुनवाई म चार सौ दस मामला के निपटारा करे हे। ए दउरान आयोग डहार ले एक हजार चार सौ एक मामला सुनवाई बर राखे गे रीहिस जेमा जगदलपुर म एके दिन म अंठानबे मामला के सुनवाई करे गीस।
छत्तीसगढ़ राज्य महिला आयोग के अध्यक्ष डॅाक्टर किरणमयी नायक ह रायपुर म राखे गे प्रेसवार्ता म बताइन कि राज्य म माइलोगिन मनके सुरक्षा बर आयोग डहार ले हरसंभव मदद करे जावत हे। पीड़ित माइलोगिन मन ल राहत दे जाय बर आयोग डहार ले प्रदेश के दूरिहा के इलाका मन म घलो सुनवाई करके मामला के निपटारा करे गे हावय। ओमन बताइन कि कतकोन क्षेत्र म पीड़ित मन ल तुरते राहत देवाय बर टेलिफोनिक माध्यम ले घलो समस्या के निपटारा करे गे हावय।
राज्यपाल विशेष साक्षात्कार
देश के आजादी के पचहत्तर बछर पूरा होय के उपलक्ष्य म अमृत महोत्सव के तहत प्रादेशिक समाचार एकांश, आकाशवाणी रायपुर डहार ले छत्तीसगढ़ म स्वतंत्रता संग्राम ले संबंधित प्रमुख घटना अउ इंहा के स्वतंत्रता सेनानी ले संबंधित विशेष कार्यक्रम के श्रृंखला प्रसारित करे जाही।
एखर पहला कड़ी के रूप म छत्तीसगढ़ के राज्यपाल अनुसूइया उइके ले करे गे विशेष साक्षात्कार के प्रसारण आकाशवाणी केंद्र रायपुर डहार ले रविवार आठ अगस्त के बीहनिया नौ बजके तीस मिनट ले करे जाही। एला छत्तीसगढ़ के सबो आकाशवाणी केंद्र मन ह एके संगरा रिले करही।
शिक्षक भर्ती
प्रदेश म शिक्षक संवर्ग के चौदा हजार पांच सौ अस्सी पद म सीधा भर्ती करे जाही। ये संबंध म लोक शिक्षण संचालनालय ह शिक्षा विभाग के सबो संभागीय संयुक्त संचालक अउ जिला शिक्षा अधिकारी मन ल पदस्थापना ले जुड़े सबो जरूरी काम पच्चीस अगस्त तक पूरा करे के निर्देश दीन हे।
जारी आदेश म केहे गे हावय कि सबले पहिली बिना शिक्षक वाले अउ एक शिक्षक वाले स्कूल मन म उम्मीदवार मनके पदस्थापना करे जाही। एखरे संग दिव्यांग अउ माइलोगिन मन ल रिक्त पद के आधार म सुविधाजनक जगा के स्कूल म पदस्थ करे के निर्देश घलो देगे हावय। पदस्थापना बर गंवई क्षेत्र के स्कून मन ल प्राथमिकता दे जाही। संचालनालय डहार ले जारी आदेश म यहू केहे गे हावय कि उच्च न्यायालय डहार ले जउन प्रकरण म नियुक्ति रोके बर केहे गे हावय ओखर कड़ाई ले पालन करे जाही।
लोकवाणी
मुख्यमंत्री के मासिक रेडियो वार्ता लोकवाणी के बीसवां कड़ी के प्रसारण आठ अगस्त रविवार के होही। मुख्यमंत्री ह लोकवाणी म ए बखत आदिवासी अंचल की अपेक्षाएं और विकास – विषय म लोगन ले गोठबात करही। एखर प्रसारण छत्तीसगढ़ के आकाशवाणी के सबो केंद्र एफ.एम. रेडियो अउ क्षेत्रीय समाचार चैनल मनले बीहनिया साढ़े दस बजे ले ग्यारा बजे तक करे जाही।
कोरोना टीका/समाचार
प्रदेश म कोरोना संक्रमण के स्थिति म सरलग सुधार होवत हे अउ औसत पॉजीटिवीटि दर ह गिरके शून्य दशमलव दू छै प्रतिशत म आगे हवय। प्रदेश के सबो जिल म संक्रमण के दर एक प्रतिशत ले नीचे पहुंच गे हवय। राज्य म काली कोरोना संक्रमण के एक सौ चौदा नवा मामला आगू आय हे। उंहें काली बेमेतरा, कवर्धा अउ मुंगेली जिला म कोरोना के एको मरीज नइ मिलिस।
इही बीच प्रदेश म कोरोना टीकाकरण के काम जोर शोर ले चलत हे। प्रदेश म कोरोना ले बांचे बर अभी तक एक करोड़ छब्बीस लाख अठारा हजार ले जादा टीका लगाये गे हावय।
अउ अब थोरकुन समाचार सार म-
– डॅाक्टर पदुमलाल पुन्नालाल बख्शी, गजानन माधव मुक्तिबोध, डॅाक्टर मुकुटधर पाण्डेय अउ बलदेव प्रसाद मिश्रा के सुरता म राज्य शिक्षक सम्मान स्मृति पुरस्कार बर शिक्षा के क्षेत्र म बढ़िया काम करइया शिक्षक मनले दस अगस्त तक आवेदन मंगाय गे हवय।
– मतस्य विकास के क्षेत्र म बने काम करइया मत्सय पालक, मत्सय कृषक, सहकारी संस्था अउ अशासकीय संगठन ले बिलासा बाई केंवटीन मत्सय विकास पुरस्कार बर इकतीस अगस्त तक आवेदन मंगाय गे हावय।
– खाद के कमी के सेती महासमुंद जिला के चारो विधानसभा क्षेत्र म कांग्रेस कार्यकर्ता मन ह आज धरना प्रदर्शन करीन।
अउ
– कबीरधाम जिला के चिल्फी पुलिस ह एक ठन अंतर्राज्यीय चोर गिरोह के पांच झन सदस्य मन ल गिरफ्तार करके उंखर मन तीर ले चोरी के करीबन ग्यारा लाख रूपिया के गाड़ी अउ दूसर सामान जब्त करे हे।