प्रधानमंत्री गरीब कल्याण अन्न योजना
प्रधानमंत्री नरेन्द्र मोदी ह किहीन कि सरकार देस के गरीब मन ल हरसंभव मदद देवाय बर प्रतिबद्ध हे। प्रधानमंत्री गरीब कल्याण अन्न योजना के लाभार्थी मन बर श्री मोदी ह अपन खुसी जताईन कि निःशुल्क अन्न वितरण ले गरीब मनके जीवन म मदद मिले हे। श्री मोदी आज वीडियो कान्फ्रेंसिंग के माध्यम ले गुजरात म प्रधानमंत्री गरीब कल्याण अन्न योजना के लाभार्थी मन ले गोठबात करत रिहीन। ए मउका म ओमन किहीन कि सरकार ह वितरण प्रणाली ल दुरूस्त करे बर कतकोन परयास करे हे।
कोरोना समाचार/
टीका प्रदेस म कोरोना संक्रमण के औसत पॉजिटीविटी दर शून्य दशमलव छह प्रतिशत म आ गे हवय। काली प्रदेसभर म होय छत्तीस हजार ले जादा सैंपल के जांच म दू सौ छत्तीस लोगन ल संक्रमित पाय गीस। एला मिलाके प्रदेस म अभी तक दस लाख दू हजार चार सौ ले जादा कोरोना मरीज मनके पहिचान करे गे हवय। अभी एक हजार नौ सौ ले जादा मरीज मनके इलाज आने-आने अस्पताल या होम आइसोलेशन म चलत हे। इही बीच, प्रदेस म कोरोना टीकाकरण के काम जोरसोर ले चलत हे। राज्य म कोरोना ले बाचे बर एक करोड़ चौबीस लाख उनसठ हजार ले जादा टीका लगाय गे हवय। एमा निन्यानवे लाख अटहत्तर हजार ले जादा लोगन ल पहला डोज अउ तेईस लाख इक्यासी हजार ले जादा लोगन ल टीका के दूसरा डोज लगाय गे हवय।
साय-पत्रकारवार्ता
राज्य विद्युत नियामक आयोग डहार ले बिजली के दर म होय बढ़ोतरी के विरोध करत भारतीय जनता पार्टी के प्रदेस अध्यक्ष विष्णुदेव साय ह राज्य सरकार ले ए बढ़ोतरी ल वापस लेके मांग करीन हे। आज एक ठिन वर्चुअल पत्रकारवार्ता म श्री साय ह किहीन कि कोविड महामारी के दौर म बिजली दर म बढ़ोतरी आम जनता अउ गरीब वर्ग उपर अन्याय करे जइसन हे। ओमन किहीन कि यदि सरकार एला वापस नइ लीस त भाजपा सड़क म उतर के विरोध दर्ज कराही। जनता कांग्रेस छत्तीसगढ़ ह घलो बिजली दर म वृद्धि ल जन विरोधी फैसला बतावत किहीन कि कोरोना के कारण लोगन के आर्थिक स्थिति खराब हे। अइसन म बिजली बिल बढ़ाना जनता उपर कुठाराघात हे। भारतीय कम्युनिस्ट पार्टी माक्सवादी ह घलो एक ठिन बयान जारी करके किहीन हे कि बिजली कंपनी के कुप्रबंधन अउ भ्रष्टाचार के लागत आम जनता ले वसूलना राज्य सरकार के जनविरोधी नीति के प्रतीक हे।
सीबीएसई-परिणाम/
परीक्षा कार्यक्रम केन्द्रीय माध्यमिक सिक्षा बोर्ड-सी.बी.एस.ई. ह आज दसवीं कक्षा के परिणाम के घोसना कर दीस। ए परीक्षा म निन्यानवे दशमलव शून्य चार प्रतिशत विद्यार्थी मन पास होईन। नोनी मन ह ए बखत घलो निन्यानवे दशमलव दू चार प्रतिशत के परिणाम संग लड़का मन ल पाछु छोड़ दे हवय। उहें, अंठानवे दशमवल आठ नौ प्रतिशत लड़का अउ परीक्षा म सामिल सब्बो ट्रांसजेंडर मन सफल होईन। परीक्षा के परिणाम बोर्ड के वेबसाइट म घलोक दे गे हवय। उहें, सीबीएसई ह बारहवीं कक्षा के ओ लइका मन बर परीक्षा कार्यक्रम के घोसना करे हे, जउन मन ह अपन नंबर म सुधार करना चाहत हे। ए परीक्षा सोलह अगस्त ले पन्द्रह सितंबर तक होही। बोर्ड ह बताय हे कि परीक्षा बर पंजीकरण पोर्टल सीबीएसई के वेबसाइट म जल्दीच सुरू करे जाही। इही बीच, केन्द्रीय सिक्षा मंत्री धर्मेन्द्र प्रधान ह किहीन कि केन्द्रीय माध्यमिक सिक्षा बोर्ड ह ए बछर ले स्किल मॉडयूल के रूप म पाठ्यक्रम म कोडिंग अउ डेटा साइंस के सुरूवात करे हे। छठवीं ले आठवीं कक्षा के लइका मन बर कोडिंग के सुरूवात करे गेहे अउ आठवीं कक्षा के लइका मन ल डेटा साइंस के पढ़ई कराय जाही। उहें, नौवीं ले बारहवीं कक्षा के लइका मन बर कौशल विषय वैकल्पिक होही।
अमृत महोत्सव
प्रश्नोत्तरी सुनइया मन ल बतादन कि देस के स्वतंत्रता के पचहत्तर बछर पूरा होय के मौका म आजादी के अमृत महोत्सव के तहत प्रादेशिक समाचार एकांश, आकाशवाणी, रईपुर ह छह अगस्त सुक्रवार ले एक ठिन प्रश्नोत्तरी कारीकरम सुरू करत हे। एखर तहत छत्तीसगढ़ म स्वतंत्रता संग्राम के दउरान होय घटना, राज्य के स्वाधीनता सेनानी अउ समाज सुधारक मन ले जुड़े प्रश्न पूछे जाही। ए प्रश्न मन ल छत्तीसगढ़ी अउ हिन्दी प्रादेशिक समाचार बुलेटिन म पूछे जाही। श्रोता मन ल ई-मेल अउ एस.एम.एस. के माध्यम ले जवाब देना होही। ए जवाब ई-मेल आई.डी. – raipursawal@gmail.com म या फोन नंबर – 9 4 2 4 2 – 0 8 1 8 2 म एस.एम.एस. के माध्यम ले भेजे जा सकत हे। जउन श्रोता के सही जवाब सबले पहली मिलही, ओला विजेता माने जाही अउ ओखर नाव के घोसना अवइया समाचार बुलेटिन म करे जाही। संगेसंग ओला प्रादेशिक समाचार एकांश डहार ले डिजिटल प्रमाण पत्र घलो दे जाही। ए प्रश्नोत्तरी कारीकरम अवइया पचहत्तर हफ्ता तक हर सुक्रवार के होही।
प्रकरण-वापसी
राजनांदगांव जिला म अनुसूचित जनजाति वर्ग के लोगन के खिलाफ दर्ज दू सौ पैंतालीस मामला के वापसी के कार्रवाई करे गे हवय। ए प्रकरण म दू सौ अस्सी लोगन ल राहत मिले हे। खबर के मुताबिक उच्चतम न्यायालय के पूर्व न्यायमूर्ति ए.क.े पटनायक के अगुवई म एक ठिन समिति बनाय गे रिहीस, जउन ह माओवाद परभावित क्षेत्र म अनुसूचित जनजाति वर्ग के लोगन के विरूद्ध दर्ज दू सौ पैंतालीस प्रकरण के वापसी के आदेस दीन हे।
हाथी-आतंक
रायगढ़ जिला के धरमजयगढ़ वनमंडल म पाछु रतिहा हाथी मनके हमला म एक झिन अधेड़ के मउत होगे। मिले जानकारी के अनुसार बोरो वन परिक्षेत्र के बलपेदा गांव के कटेलपारा म पाछु रतिहा हाथी मनके दल ह कतकोन मकान ल तोड़फोड़ दीन। उहें, एक झिन अधेड़ के मउत घलो होगीस। ऐति, महासमुंद जिला के बागबाहरा ब्लॉक के कुरूभाटा गांव म घलो पाछु रतिहा हाथी के हमला म एक झिन सियान के मउत होगे। इही बीच, पटेवा क्षेत्र के कोकड़ी गांव म हाथी मनके दल ल देखे के बाद वन विभाग ह पटेवा, बोड़रा, पताईमाता अउ जोगीडीपा गांव म हाईअलर्ट घोषित करे हे। संगेसंग विभाग ह ग्रामीण मन ल घर ले निकले बर अउ खेतखार अउ जंगल कोति जाय बर मना घलो करे हे।
खेल पुरस्कार-
आवेदन प्रदेस के खेल अउ युवा कल्याण विभाग ह राज्य खेल पुरस्कार बर सात अगस्त तक आवेदन मंगाय हे। खिलाड़ी मन ल आने-आने बछर आने-आने आवेदन देना होही। आवेदन के प्रारूप विज्ञापन संघरा विभाग के वेबसाइट म मौजूद हे। खबर के मुताबिक हर बछर खिलाड़ी, प्रशिक्षक अउ निर्णायक मन ल खेल पुरस्कर देके राज्य अलंकरण ले सम्मानित करे जाथे।
अउ अब थोरकुन समाचार सार म-
– मुख्यमंत्री भूपेश भूपेश बघेल ह राष्ट्रकवि मैथलीशरण गुप्त के जयंती म आम ओमन ल नमन करीन हे। अपन संदेस म मुख्यमंत्री ह किहीन कि गुप्त जी के रचना भरतीय साहित्य के अमूल्य धरोहर हे, जउन ह अवइया पीढ़ी मन ल घलो प्रेरित करत रइही।
– छत्तीसगढ़ ग्रामीण सड़क विकास अभिकरण डहार ले प्रधानमंत्री ग्राम सड़क योजना म स्टेट क्वालिटी मॉनिटर्स के इम्पैनलमेंट बर तेरह अगस्त तक आवेदन मंगाय गे हवय।
– महासमुंद जिला के पटेवा थाना पुलिस ह पुलिस अधिकारी बनके लोगन ल ठगइया दू झिन मनखे ल गिरफ्तार करे हे।
– दुरूग जिला के सुपेला थाना पुलिस ह जमीन के नाव म धोखाधड़ी करे के आरोप म तीन झिन लोगन के खिलाफ अपराध दर्ज करे हे।
– जांजगीर-चांपा जिला के जैजेपुर-बाराद्वार रद्दा म साठ ठन झोपड़ी मन ल तोड़े जाय ले नाराज ग्रामीण मन ह धरना बइठे हवय। प्रदर्सनकारी मन ह झोपड़ी तोड़इया मन उपर कार्रवाई करे के अउ मुआवजा दे जाय के मांग करत हे। अउ
– राजनांदगांव जिला के साल्हेवारा क्षेत्र म एक ठिन पेट्रोल पंप ले तिजोरी संघरा छह लाख रूपिया के चोरी होय के समाचार हे।