आज दिनभर के खबर ल अपन गुरतुर छत्तीसगढी भाखा म पढ़व

महालेखाकार-रिपोर्ट
महालेखाकार कार्यालय डहार ले जारी रिपोर्ट के मुताबिक वित्तीय बछर दू हजार उन्नीस-बीस के दउरान राज्य सरकार ह करीबन ग्यारह हजार करोड़ रूपिया के अनुपूरक बजट पाय रिहीस, फेर एमा ले करीबन छह हजार करोड़ रूपिया ह कामेच म नइ आ पाईस, काबर कि सरकार ए रासि ल खरचा नइ कर सकीस। ए वित्तीय बछर म कुल बजट एक लाख चार हजार करोड़ रूपिया ले जादा के रिहीस, जेमा ले करीबन नब्बे हजार आठ सौ करोड़ रूपिया ही खरचा हो पाईस। एखर ले कुल बजट के करीबन अट्ठारह प्रतिसत रासि खरचा नइ हो पाईस। जिहां तक कर राजस्व के बात हवय त राज्य के अपन कर राजस्व म बछर दू हजार उन्नीस-बीस म एखर पहिली वाले वित्तीय बछर के तुलना म छह सौ नब्बे करोड़ रूपिया के बढ़ोतरी होईस। फेर, राज्य के कुल कर राजस्व केन्द्रीय कर अउ सुल्क के अंस के आवंटन म कमी के सेती दो हजार पांच सौ बैसठ करोड़ रूपिया कम रिहीस।
प्रधानमंत्री-सुझाव
प्रधानमंत्री नरेन्द्र मोदी ह स्वतंत्रता दिवस के भासन बर लोगन मन ले अपन सुझाव देके अनुरोध करे हे। प्रधानमंत्री ह मिले बढ़िया सुझाव ल पन्द्रह अगस्त के अपन भासन म सामिल करही। पाछु कुछ बछर ले प्रधानमंत्री ह स्वतंत्रता दिवस भासन बर लोगन मन ले सुझाव मंगवाथे। लोगन मन अपन विचार अउ सुझाव माई जीओवी म साझा कर सकथे।
चिकित्सा महाविद्यालय अधिग्रहण
छत्तीसगढ़ विधानसभा म चंदूलाल चंद्राकर स्मृति चिकित्सा महाविद्यालय के अधिग्रहण ले जुड़े विधेयक ल ध्वनिमत ले पारित कर दे गीस। स्वास्थ्य मंत्री टी.एस. सिंहदेव ह काली सदन म विधेयक उपर होय चरचा के जवाब देवत किहीन कि राज्य सरकार ह लोगन मनके हित म ए चिकित्सा महाविद्यालय के अधिग्रहण करे के फइसला लेहे।स्वास्थ्य मंत्री ह किहीन कि दू साल पहिली केन्द्र सरकार डहार ले पूरा देस म पचहत्तर मेडिकल कॉलेज खोले के प्रावधान बजट म करे गे रिहीस अउ राज्य सरकार ले एखर प्रस्ताव मांगे गे रिहीस। प्रदेस म तीन ठिन मेडिकल कॉलेज के प्रस्ताव हवय, जेखर उपर राज्य सरकार ह कांकेर, कोरबा अउ महासमुंद म मेडिकल कॉलेज खोले के प्रस्ताव भेजे रिहीन। दुरूग म मेडिकल कॉलेज खोले के प्रस्ताव एखर सेती नइ भेजे जा सकीस, काबर कि केन्द्र सरकार ह सर्त राखे रिहीस कि जिहां पहिली ले सरकारी या प्राईवेट मेडिकल कॉलेज खोले गेहे, उहां बर प्रस्ताव झन भेजय। स्वास्थ्य मंत्री ह किहीन कि दुरूग म सरकारी मेडिकल कॉलेज खोलना राज्य सरकार के प्राथमिकता म हवय।
राज्यपाल अलंकरण समारोह
राज्यपाल अनसुईया उइके ह आज विधानसभा परिसर म राखे गे ‘‘उत्कृष्टता अलंकरण समारोह‘‘ म सामिल होईन। ए मउका म विधानसभा अध्यक्ष, मुख्यमंत्री अउ आने विधायक मन घलो आय रिहीन। समारोह म बछर दू हजार उन्नीस बर सुघ्घर विधायक के रूप म अरूण वोरा अउ सौरभ सिंह ल, त उहें बछर दू हजार बीस बर कुलदीप जूनेजा अउ नारायण चंदेल ल सम्मानित करे गीस। एखर अलावा चुने गे संसदीय पत्रकार अउ इलेक्ट्रॉनिक मीडिया रिपोर्टर मन ल घलो उत्कृष्टता अलंकरण ले सम्मानित करे गीस।
कोरोना-टीका/समाचार
केन्द्र सरकार ह अब तक राज्य अउ केन्द्रसासित प्रदेस मन ल अड़तालीस करोड़ तीन लाख ले जादा कोविड टीका देहे। केन्द्रीय स्वास्थ्य मंत्रालय ह केहे हे कि दू करोड़ बयानवे लाख ले जादा कोविड टीका अभी घलो राज्य अउ केन्द्रसासित प्रदेस मनके तीर हे।उहें, राष्ट्रीय टीकाकरण अभियान म अब तक पैंतालीस करोड़ साठ लाख ले जादा टीका लगाय जा चुके हे। केन्द्रीय स्वास्थ्य मंत्रालय ह केहे हे कि काली इंक्यावन लाख तिरासी हजार ले जादा लोगन मन ल टीका लगाय गीस।ऐति, छत्तीसगढ़ म कोरोना संक्रमण म सरलग सुधार होवत हे। काली प्रदेस म कोरोना संक्रमण के एक सौ तीस नवा मामला आगू आईस। ए बेरा दू हजार ले जादा मरीज मनके इलाज आने-आने अस्पताल या होम आइसोलेशन म चलत हे।
सीबीएसई-परिणाम
केन्द्रीय माध्यमिक सिक्षा बोर्ड-सीबीएसई के बारहवीं कक्षा के परीक्षा परिणाम घोषित कर दे गेहे। परिणाम ल बोर्ड के सरकारी वेबसाइट म देखे जा सकथे। कोविड महामारी के सेती एसो बोर्ड के परीक्षा ल रद्द कर दे गे रिहीस। ए परिणाम बोर्ड के नीति डहार ले वैकल्पिक मूल्यांकन के आधार म घोसित करे गेहे।
स्कूल-संचालन
प्रदेस म दू अगस्त ले स्कूल मन म नियम-कायदा के संग ऑफलाइन पढ़ई सुरू हो जही। स्कूल शिक्षा विभाग ह अभी दसवीं-बारहवीं के संगेसंग पहली ले पांचवीं अउ आठवीं के कक्षा ल सुरू करे के फइसला लेहे। राज्य सासन ह ए जम्मों कक्षा मन ल अइसन जिला म सुरू करे के फइसला लेहे, जिहां कोरोना पॉजिटीविटी दर ह पाछु सात दिन म एक प्रतिशत तक हे।राज्य सासन के फइसला के मुताबिक गांव-गतौरी के प्राईवेट स्कूल मन म कक्षा पहली ले लेके पांचवीं तक अउ मीडिल स्कूल म आठवीं के कक्षा सुरू करे के पहिली उहां के जुड़े ग्राम पंचायत अउ स्कूल के पालन समिति के मंजूरी ले बर पड़ही। त उहें, सहरी क्षेत्र मन बर जुड़े वार्ड पार्षद अउ स्कूल के पालन समिति के मंजूरी लेके कक्षा सुरू करे जा सकही। हाई स्कूल अउ हायर सेकेंडरी स्कूल के दसवीं अउ बारहवीं के कक्षा ल चलाय बर ए जम्मो सर्त ल लागू नइ करे जाय। त उहें, बांचे कक्षा छठवीं, सातवीं नौवीं अउ ग्यारहवीं के पढ़ई ऑनलाइन होही।
एकलव्य आवासीय विद्यालय
केन्द्रीय जनजाति कार्यमंत्री अर्जुन मुंडा ह किहीन हे कि अवइया बछर तक देस म सात सौ चालीस एकलव्य मॉडल आवासीय स्कूल खोले के लक्ष्य हे। राज्यसभा म काली लिखित उत्तर म ओमन किहीन कि एखर उद्देश्य जनजातीय छात्र मन ल बढ़िया सिक्षा देवाना हे।इही बीच, प्रदेस म एकलव्य आदर्श आवासीय विद्यालय मन म ऑनलाइन पढ़ई बर सिक्षा विभाग डहार ले योजना तैयार करे गेहे। ए बारे म जम्मों जिला कलेक्टर मन ल ए स्कूल म ऑनलाइन पढ़ई के बेवस्था ल ठीक-ठाक ढंग ले करे के निरदेस देहे।
विश्व स्तनपान सप्ताह
हर साल जइसन एसो घलो अगस्त महीना के पहिली हफ्ता म विश्व स्तनपान सप्ताह के रूप म मनाय जाही। ए दउरान प्रदेस म महतारी मन ल स्तनपान के बारे म जानबा, सिसु मन ल होवइया बीमारी अउ कुपोसन ले बांचे के संगेसंग सिसु मृत्यु दर म कमी लाय के उद्देश्य ले स्वास्थ्य अउ महिला बाल विकास विभाग डहार ले एक ले सात अगस्त तक जन-जागरूकता उपर आधारित कतकोन कारीकरम राखे जाही।
ट्रेन परिचालन-प्रभावित
दक्षिण पूर्व मध्य रेलवे के हावड़ा यार्ड अउ टिकियापारा यार्ड म पानी भरे के सेती कतकोन गाड़ी मनके अवई-जवई परभावित होय हे। एमा छत्तीसगढ़ ले होके जवइया रेलगाड़ी घलो सामिल हे। एखरे सेती हावड़ा ले चलइया साप्ताहिक रेलगाड़ी अउ दुरंतो स्पेशल ट्रेन ह आज रद्द रइही।
अउ अब थोरकुन समाचार सार म-
– विधानसभा अध्यक्ष अउ मुख्यमंत्री ह आज रईपुर म डॉक्टर सुरेश देशमुख डहार ले ‘‘चंदैनी गोंदा एक सांस्कृतिक यात्रा‘‘ पुस्तक के विमोचन करीन।
– छत्तीसगढ़ राज्य ओपन स्कूल रईपुर डहार ले हायर सेकण्डरी मुख्य अवसर परीक्षा के रिजल्ट काली इकतीस जुलाई के जारी करे जाही।
– स्वामी आत्मानंद आंग्रेजी माध्यमिक विद्यालय कोंडागांव म रिक्त शिक्षकीय संवर्ग के पद बर अस्थाई रूप ले संविदा नियुक्ति बर दस अगस्त तक अरजी मंगाय गेहे।
– महासमुंद जिला के सरायपाली पुलिस ह गांजा तस्करी के आरोप म दू झिन मनखे ल गिरफ्तार करे हे।
अउ
– सरगुजा जिला के गांधीनगर पुलिस ह कपड़ा देके नाव म कतकोन लोगन मन ले ठगी करे के आरोप म फर्जी कंपनी के दू झिन संचालक मन ल झारसुगुड़ा ले गिरफ्तार करे हे।