विस समाचार
राज्य विधानसभा के मानसून सत्र के दूसर दिन घलो आज अंबिकापुर म विधायक बृहस्पत सिंह के काफिला उपर होय हमला अउ ए घटना के बाद विधायक डहार ले स्वास्थ्य मंत्री टी.एस. िंसंहदेव उपर लगाय गे आरोप के मामला उठीस।
सदन म विपक्ष डहार ले शून्यकाल म ये मुद्दा ल उठाय जाय के बीच स्वास्थ्य मंत्री ह घोषणा करीन कि जब तक ए मामला म ओखर बारे म शासन कोति ले स्पष्ट जवान नइ आही तब तक ओमन सदन के कार्यवाही म शामिल नइ होवय। एखर बाद श्री सिंहदेव ह सदन ले उठके चले गे।
एखर पहिली पाछू शनिवार के अंबिकापुर म होय घटना के बारे म गृहमंत्री ताम्रध्वज साहू ह शासन कोति ले सदन म बात राखीन। फेर विपक्षी सदस्य मन ह शासन के बात ले संतुष्ट नइ होइन। नेता प्रतिपक्ष धरमलाल कौशिक के कहना रीहिस कि विधायक बृहस्पत सिंह के डहार ले लगाये गे आरोप गंभीर हवय। विपक्ष के बाकी सदस्य मन ह घलो कीहिन कि विधायक य मंत्री म जेखर गलती हवय वो ह स्पष्ट होना चाही अउ ओखर खिलाफ कार्रवाई होना चाही।
स्वास्थ्य मंत्री डहार ले सदन के कार्यवाही म शामिल नइ होय के घोषणा के बाद विपक्षी सदस्य मन ह एक घांव फेर ए पूरा मामला ल सदन के समिति ले जांच कराये के मांग करीन। विधानसभा अध्यक्ष ह जब सदन के कार्यवाही ल आगू बढ़ाइन त विपक्षी सदस्य मन ह विरोध करत गर्भगृह म पहुंच गे जेखर बाद विधानसभा अध्यक्ष ह सदन के कार्यवाही ल कल तक बर स्थगित कर दीन। बाद म विधानसभा परिसर म मुख्यमंत्री अउ स्वास्थ्य मंत्री के बीच करीबन डेढ़ घंटा तक गोठबात होइस।
प्रधानमंत्री अमृत महोत्सव
प्रधानमंत्री ह आज भाजपा सांसद मनले कीहिन कि हरएक मनखे मन आजादी के अमृत महोत्सव के हिस्सा बनय। अमृत महोत्सव ल देश के पचहत्तरवां स्वतंत्रता दिवस के मउका म मनाये जात हे।
प्रधानमंत्री ह कहिन कि पार्टी के दू झिन चुने गे कार्यकर्ता मन ल पंद्रह अगस्त दू हजार बाईस ले पंद्रह अगस्त दू हजार तेईस के बीच हरएक विधानसभा क्षेत्र के पचहत्तर गांव के दउरा करे बर पड़ही। ओमन हरएक गांव म पचहत्तर घंटा रहिके उंहाके पूरा जानबा सकेलही। जउन ह आगू देश के विकास म काम आही।
निर्वाचक नामावली
छत्तीसगढ़ राज्य निर्वाचन आयोग ह त्रि-स्तरीय पंचायत मन म आम अउ उप निर्वाचन बर फोटो वाले निर्वाचक नामावली तियार करे जइसन कार्यक्रम जारी कर देहे। एमा हरएक ग्राम पंचायत के प्रारंभिक निर्वाचक नामावली म शामिल वार्ड मनके मउकाच म मिलान अउ सत्यापन करके सूची म जरूरी संशोधन के काम ल सात अगस्त तक करे जाही। उंहें अठारा अगस्त तक गलती के निपटारा करे जाही।
जारी कार्यक्रम के मुताबिक निर्वाचक नामावली के संबंध म सार्वजनिक सूचना के प्रकाशन करके दावा अउ आपत्ति के शुरूआत अठाईस अगस्त ले करे जाही, जउन सोला सितंबर तक चलही। त उंहें बारा अक्टूबर के निर्वाचक नामावली के अंतिम प्रकाशन करे जाही।
स्कूल दिशा निर्देश
प्रदेश के स्कूल मन म ऑफलाईन कक्षा शर्त के आधार म शुरू करे के अनुमति स्कूल शिक्षा विभाग ह दे हवय। एमा कक्षा दसवीं अउ बारहवीं के कक्षा दू अगस्त ले शुरू हो जाही।
संगेसंग गांव मनके सरकारी अउ प्रायवेट स्कूल मन म पहिली ले आठवीं तक के कक्षा ल पालक के सहमति के बाद शुरू करे जाही। त उंहें शहरी क्षेत्र मन म वार्ड पार्षद अउ स्कूल के पालक समिति के मंजूरी लेना जरूरी होही। अइसन इलाका जिहां कोरोना के दर ह सात दिन तक एक प्रतिशत ले कम रीही ओ जगा म छात्र मन ल एक दिन छोड़के स्कूल बुलाय जाही।
एति जांजगीर-चांपा जिला कलेक्टर ह बइठका लेके जम्मों प्राचार्य मन ल निर्देश दे हवय कि ओमन दू अगस्त के पहिली ग्राम पंचायत, वार्ड पार्षद, अउ पालक मनके मंजूरी लेके स्कूल खोले के तियारी करय।
महिला हेल्पलाइन नंबर
केंद्रीय महिला अउ बाल विकास मंत्री स्मृति ईरानी ह आज हिंसा ले प्रभावित माइलोगिन मन बर चौबीस घंटा खुल्ला रहइया हेल्पलाइन नंबर शुरू करे हे। नंबर हवय – सात आठ दू सात एक सात शून्य एक सात शून्य – ए मउका म ओमन राष्ट्रीय महिला आयोग ल बधाई दे हवय।
राष्ट्रीय महिला आयोग नई दिल्ली के परिसर ले चलइया ए हेल्पलाइन नंबर म अठारा साल ले जादा उमर के कोनो भी माइलोगिन मन फोन करके मदद ले सकथें।
खरीफ फसल
प्रधानमंत्री फसल बीमा योजना के खरीफ फसल म जउन किसान मन ह अभी तक फसल बीमा नइ कराय हे। ओमन इकतीस जुलाई तक फसल बीमा करा सकथे।
उप संचालक कृषि ह बताइन कि राज्य म धान, सोयाबीन, मक्का, मुंगफली, मूंग, उड़द अउ राहर के फसल बर फसल बीमा कराये जाथे। योजना के बारे म अउ जादा जानकारी कृषि कार्यालय बैंक वित्तीय संस्थान या फेर बीमा कंपनी ले मिल सकथे।
सीआरपीएफ स्थापना दिवस
प्रधानमंत्री नरेन्द्र मोदी ह केंद्रीय रिजर्व पुलिस बल के तिरासिवां स्थापना दिवस के मउका म बल के कर्मी अउ उंखर परिवार वाले मन ल शुभकामना दे हवय।
एति प्रदेश के मुख्यमंत्री भूपेश बघेल ह घलो देश के सबले बड़का केंद्रीय रिजर्व पुलिस बल सीआरपीएफ के स्थापना दिवस के मउका म जम्मों वीर जवान मन ल बधाई दे हवय।
पीआईबी टीकाकरण रथ
कोरोना बचाव ले जुड़े टीका लगाये बर लोगन मन ल आगू लाये के उद्देश्य ले पत्र सूचना कार्यालय अउ प्रादेशिक लोक संपर्क कार्यालय रायपुर डहार ले एक ठिन कोविड टीकाकरण जागरूकता रथ चलाये जात हे।
ए रथ ल आज रायपुर म पत्र सूचना कार्यालय के अपर महानिदेशक अभिषेक दयाल अउ राज्य टीकाकरण अधिकारी डॅाक्टर वी.आर. भगत ह हरा झण्डी दिखाके रवाना करीन। समारोह के दउरान संदेश लिखे वाले टोपी अउ मास्क घलो बांटे गीस।
लोकवाणी
मुख्यमंत्री भूपेश बघेल ह लोकवाणी म ए दारी आदिवासी अंचलों की अपेक्षाएं और विकास विसय उपर गोठबात करही। ए संबंध म कोनो भी मनखे आकाशवाणी रायपुर के दूरभाष नंबर शून्य सात सात एक दू चार तीन शून्य पांच शून्य एक, पांच शून्य दू अउ पांच शून्य तीन म काली अठाईस, ले तीस जुलाई तक मंझनियां तीन ले चार बजे के बीच फोन करके अपन सवाल रिकार्ड करा सकत हे।
मुख्यमंत्री के मासिक रेडियो वार्ता लोकवाणी के बीसवां कड़ी के प्रसारण आठ अगस्त के होही। ए प्रसारण ल छत्तीसगढ़ स्थित आकाशवाणी के सबो केंद्र एफ.एम. रेडियो अउ क्षेत्रीय समाचार चैनल मनले बीहनिया साढ़े दस बजे ले ग्यारा बजे तक करे जाही।
मौसम
प्रदेश म अवइया चौबीस घंटा के दौरान कतकोन जगा म हल्का ले मध्यम बरसा हो सकथे। उंहें एक दू जगा म गरज-चमक के संग भारी बरसा के चेतावनी घलो दे गेहे।
मौसम विभाग के मुताबिक एक ठिन निम्न दाब के क्षेत्र उत्तर बंगाल के खाड़ी अउ ओखर तीर स्थित हे, जेखर अउ जादा बाढ़े के संभावना हे। जेखर प्रभाव ले एक अगस्त तक प्रदेश म सरलग बरसा होय के संभावना हे।