प्रधानमंत्री/नीति आयोग-कोविड
प्रधानमंत्री नरेन्द्र मोदी ह किहीन हे कि कोरोना महामारी ह राजनीति के विषय नो हे। ए पूरा लोगन मन बर संसो के बात हरय। ओमन केन्द्र अउ राज्य मन मिलके काम करे के बात किहीन। प्रधानमंत्री ह काली संझा संसद के दूनों सदन के जम्मों दल के नेता मन संग गोठबात करत रिहीन। ओमन बतईन कि देस के हरेक जिला म ऑक्सीजन संयंत्र के बेवस्था करे जाही।
उहें, नीति आयोग के सदस्य डॉक्टर वी.के. पॉल ह बतईन कि कोविड महामारी खत्म नइ होय हे अउ नवा वायरस के फइले के खतरा हवय।
गोधन न्याय योजना
मुख्यमंत्री भूपेश बघेल ह प्रदेश म गोधन न्याय योजना के एक बछर पूरा होय के मउका म राखे गे कारीकरम ल संबोधित करत किहीन कि अवइया बछर म छत्तीसगढ़ ह जैविक राज्य के रूप म स्थापित होही। ओमन किहीन कि गोधन न्याय योजना ले गाय-गरू पोसइया अउ किसान मनके संगेसंग गोबर बेचइया लोगन मन ल ए योजना ले बने फायदा मिले हे। उहें, ए योजना के माध्यम ले महिला स्व-सहायता समूह के करीबन अस्सी हजार माईलोगिन मन ल घलो आगू बढ़े म मदद मिले हे।
जानबा के मुताबिक प्रदेस म पाछु बछर हरेली तिहार के मउका म बीस जुलाई के गोधन न्याय योजना के सुरूवात होय रिहीस।
मुख्यमंत्री-बातचीत
मुख्यमंत्री ह किहीन हे कि लालच देके काखरो धर्म ल बदलइया लोगन मनके खिलाफ सरकार ह कड़ा कार्रवाई करही। ओमन ह किहीन कि अविभाजित मध्यप्रदेश के बेरा ले राज्य म कानून बने हवय।
मुख्यमंत्री ह आज बेमेतरा जाय के पहिली पत्रकार मन ले गोठबात म किहीन कि सरकार ह आदिवासी मनके संस्कृति ल बचाय बर संकलप लेहे। बस्तर म देवगुड़ी अउ घोटुल के निर्माण कार्य ल घलो मंजूरी दे गेहे। मुख्यमंत्री ह सर्व आदिवासी समाज के मांग उपर किहीन कि उंखर मांग उपर विस्तार ले गोठबात होय हे। सरकार ह जल, जंगल अउ जमीन ल बचाय के काम करत हे।
शिक्षक सम्मान-समारोह
काली राजधानी रईपुर म राज्य स्तरीय सिक्षक सम्मान समारोह के वुर्चअल आयोजन करे जाही। ए मउका म राज्यपाल अनुसुईया उइके अउ मुख्यमंत्री भूपेश बघेल डहार ले राज्य सिक्षक सम्मान स्मृति पुरस्कार दू हजार बीस बर चुने गे तीन झिन सिक्षक अउ राज्य सिक्षक पुरस्कार दू हजार उन्नीस बर चुने गे सैंतालीस सिक्षक मनके सम्मान करे जाही। ए मउका म स्कूल सिक्षा मंत्री डॉक्टर प्रेमसाय सिंह टेकाम ह बछर दू हजार बीस म राज्य सिक्षक सम्मान पुरस्कार बर चुने गे पचपन झिन सिक्षक मनके नाव के घोसना करही।
कोरोना समाचार
प्रदेस म कोरोना संक्रमण के स्थिति म सरलग सुधार होवत हे। काली प्रदेस म कोरोना संक्रमण के एक सौ नवासी नवा मामला आगू आईस। ए बेरा तीन हजार तीन सौ ले जादा मरीज मनके इलाज आने-आने अस्पताल अउ होम आइसोलेशन म चलत हे।
ऐति, केन्द्र सरकार ह कोरोना संक्रमण ले बचाव बर गर्भवर्ती माईलोगिन मन ल घलो कोविड वैक्सीन लगाय के मंजूरी दे देहे। रईपुर के मुख्य चिकित्सा अउ स्वास्थ्य अधिकारी डॉक्टर मीरा बघेल ह बतईन कि पाछु दिन ऑनलाइन उन्मूखीकरण कार्यसाला राखे गीस, जेमा बताय गीस कि गर्भवती माईलोगिन मन ल कोविड ले जुड़े दिसा-निरदेस के मुताबिक कोनों भी बेरा म कोरोना टीका लगाय जा सकथे। गर्भवती माईलोगिन मन ल लगइया टी.डी. वैक्सीन के संगेसंग या टी.डी. लगे के पन्द्रह दिन के बाद घलो कोरोना टीका ल लगाय जा सकथे।
नवोदय विद्यालय-प्रवेश परीक्षा
जवाहर नवोदय विद्यालय के एसो के चयन परीक्षा कोविड नियम के पालन के संग ग्यारह अगस्त के होही। केन्द्रीय सिक्षा मंत्रालय ह ट्वीट म केहे हे कि सैंतालीस हजार ले जादा छात्र मनके चयन बर करीबन ग्यारह हजार ले जादा केन्द्र मन म ए परीक्षा होही। परीक्षा बर चौबीस लाख ले जादा उम्मीदवार मन ह पंजीयन कराय हे।
मन की बात
प्रधानमंत्री नरेन्द्र मोदी ह आकाशवाणी ले ए महीना के पच्चीस तारीख के प्रसारित होवइया ‘‘मन की बात‘‘ कारीकरम म देस-बिदेस के लोगन मनके संग अपन विचार राखही। रेडियो कारीकरम के ए ह उनयासवां (79) कड़ी होही। प्रधानमंत्री ह ए कारीकरम के अवइया कड़ी म सामिल करे जाय बिसय उपर घलो लोगन मन ले सुझाव मांगे हे।
लोगन मन अपन विचार नमो ऐप अउ माई जी.ओ.वी. ओपन फॉर्म म भेज सकथे। संगेसंग टोल फ्री नंबर – एक आठ शून्य-शून्य एक-एक सात आठ शून्य-शून्य म अपन संदेस हिन्दी अउ अंग्रेजी म रिकार्ड करा सकथे। फोन लाइन काली तक खुल्ला रइही। प्रधानमंत्री ल सोझे अपन सुझाव दे बर एक नौ दू-दू म मिस्ड कॉल देके अउ एस.एम.एस. के माध्यम ले मिले लिंक ले भेज सकथे।
ईद-उल-अजहा
ईद-उल-अजहा के तिहार आज प्रदेस के संग पूरा देस म धार्मिक श्रद्धा के संग मनाय जात हे। कोरोना संक्रमण के सेती एसो ईदगाह अउ बड़का मस्जिद मन म कम संख्या म जाके नमाज अदा करे गीस। राजधानी रईपुर के संगेसंग प्रदेस के आने जिला मन म मुस्लिम समाज के लोगन मन ह कोरोना ले बचाव के नियम के पालन करत घर म ही रहि के ईद के नमाज पढ़ीन।
राष्ट्रपति, उपराष्ट्रपति अउ प्रधानमंत्री ह देस के लोगन मन ल ईद-उल-अजहा के सुभकामना दे हवय।
उहें, छत्तीसगढ़ के राज्यपाल अउ मुख्यमंत्री ह घलो मुस्लिम समुदाय के लोगन मन ल मुबारकबाद दे हवय।
विश्व कोया गोंडी भाषा दिवस
आज विश्व कोया गोंडी भाषा दिवय हरय। ए मउका म नारायणपुर जिला के गोंड समुदाय के लोगन मन ह जिला मुख्यालय म प्राचीन भासा गोंडी ल बचाय बर एला संविधान के आठवां अनुसूची म सामिल करे के मांग ल लेके राज्यपाल के नाव अनुविभागीय अधिकारी ल ज्ञापन सौंपीन। ए दउरान समाज के लोगन मन ह किहीन कि प्राथमिक स्तर तक लइका मन ल स्थानीय भासा गोंडी म पढ़ाय जाना चाही।
खरीफ फसल-बोनी
राज्य म खरीफ फसल के बोआई ए बेरा चलत हे। कृषि विभाग ले मिले जानबा के मुताबिक अब तक धान अउ आने फसल के संगेसंग दलहन-तिलहन अउ साग-भाजी के बुआई करीबन तीस लाख हेक्टेयर क्षेत्र म हो चुके हे। जउन चालू खरीफ सीजन बर राखे गे बुआई के लक्ष्य के इकसठ प्रतिसत हवय।
मौसम
प्रदेस म अवइया चौबीस घंटा के दउरान कतकोन जघा म हल्का ले मध्यम बरसा होय के संगेसंग कोनों-कोनों जघा म गाज गिरे के चेतावनी दे गेहे।
रईपुर स्थित मौसम विज्ञान केन्द्र के मौसम विज्ञानी एच.पी. चन्द्रा ह बतईन कि उत्तर पूर्व बंगाल के खाड़ी म एक ठिन द्रोणिका बने हे अउ संगेसंग उत्तर-पश्चिम बंगाल के खाड़ी के उपर एक ठिन चक्रीय चक्रवाती घेरा बने हे, जेखर सेती प्रदेस म बरसा होवत हे।
अउ अब थोरकुन समाचार सार म-
– केन्द्रीय प्रत्यक्ष कर बोर्ड सी.बी.डी.टी. ह आयकर फॉर्म पन्द्रह-सी.ए. अउ पन्द्रह सीबी के ई-फायलिंग बर आखिरी तारीख ल बढ़ाके पन्द्रह अगस्त तक कर देहे।
– राज्य सरकार डहार ले हरेक साल खिलाड़ी, प्रसिक्षक अउ निर्णायक मन ल देवइया राज्य खेल अलंकरण बर सात अगस्त तक अरजी मंगाय गेहे।
– राजनांदगांव जिला म राष्ट्रीय राजमार्ग जनकपुर के तीर दू ठिन फटफटी के बीय होय टक्कर म एक झिन मनखे के मउत होगे। त उहें, दू झिन मनखे घायल होगे।
अउ
– महासमुंद जिला के पिथौरा चौक बागबाहरा म गाड़ी मनके जांच के दउरान पुलिस ह दू झिन आरोपी मन ल गिरफ्तार करके एक करोड़ चालीस लाख रूपिया के गांजा जब्त करे हे।