नीति आयोग-कोविड
नीति आयोग म सदस्य डॉक्टर वी.के. पॉल ह किहीन हे कि कोविड के खिलाफ लड़ई म अवइया सौ दिन महत्वपूर्ण हे। काली मीडिया ले गोठबात करत ओमन किहीन कि विश्व, कोविड के तीसरा लहर कोति बाढ़त हे अउ ए बात ल हमन ल हल्का म नइ लेना चाही। काबर कि अवइया सौ दिन खतरनाक हो सकत हे। एखर बर हमन ल सतर्क रहना होही।
डॉक्टर पॉल ह किहीन कि अवइया तीन-चार महीना म टीकाकरण अभियान म तेजी आही अउ संभावना हे कि हमन सुरक्षित क्षेत्र म आ जाबो।
कोरोना-बचाव
वैश्विक महामारी कोरोना के संभावित तीसरा लहर ल देखत देसभर म एखर ले बांचे के तैयारी सुरू होगे हवय। छत्तीसगढ़ म घलो राज्य सरकार ह एखर बर तैयारी करत हे।
इही बीच, राज्य सरकार के प्रवक्ता अउ कृषि मंत्री रविन्द्र चौबे ह किहीन हे कि सरकार कोरोना के तीसरा लहर ले निपटे बर पूरा तरीका ले तैयार हे।
ऐति, प्रदेस म काली कोरोना संक्रमण के तीन सौ बारह नवा मामला आगू आय हे, जेला मिलाके प्रदेस म अभी तक नौ लाख निन्यानवे हजार ले जादा कोरोना संक्रमित मरीज मिले हे। एमा ले नौ लाख बयासी हजार ले जादा मरीज मन ठीक होगे हवय। वर्तमान म करीब चार हजार मरीज मनके इलाज आने-आने अस्पताल अउ होम आइसोलेशन म चलत हे।
उहें, कोरोना संक्रमण के स्थिति म सरलग सुधार होवत हे, जेला देखत रईपुर कलेक्टर सौरभ कुमार ह रात के कर्फ्यू ल खतम कर दे हवय। संगेसंग अब सहर के सब्बो दुकान, व्यवसाय अउ प्रतिष्ठान मन ल रतिहा आठ बजे के जगह दस बजे तक चलाय जा सकही।
विवि अनुदान आयोग-शैक्षिक कैलेंडर
विश्वविद्यालय अनुदान आयोग ह शिक्षा सत्र दू हजार बीस-इक्कीस बर परीक्षा संबंधी दिसा-निरदेस अउ शैक्षिक कैलेंडर जारी कर देहे। एखर अनुसार टर्मिनल सेमेस्टर अउ अंतिम बछर के परीक्षा ऑफलाइन, ऑनलाइन या मिलेजुले तरीका ले इकतीस अगस्त तक पूरा करना होही। परीक्षा के दउरान कोविड प्रोटोकॉल के घलो पालन करना होही। पाछु बछर सितंबर म आयोग डहार ले जारी करे गे निरदेस ह ए सिक्षा सत्र बर घलो लागू होही।
दिसा-निरदेस के अनुसार, सिक्षा सत्र दू हजार इक्कीस-बाईस म स्नातक पाठ्यक्रम बर नामांकन के प्रक्रिया सबो सिक्षा बोर्ड के परिणाम घोषित हो जाय के बाद सुरू हो सकही। सभी स्कूल बोर्ड के बारहवीं के परीक्षा परिणाम ए महीना के इकतीस तारीख तक मिले के संभावना हे।
एनटीपीसी-उपलब्धि
राष्ट्रीय ताप विद्युत निगम-एनटीपीसी के कोरबा इकाई ह देस म विद्युत उत्पादन बर पहली स्थान ले हवय। भारतीय केन्द्रीय विद्युत प्राधिकरण-सी.ई.ए. डहार ले प्रकासित रिपोर्ट के अनुसार अप्रैल ले जून दू हजार इक्कीस के प्रथम तिमाही के दउरान पश्चिम क्षेत्र दू म अवइया एनटीपीसी कोरबा ल संतानवे दशमलव छह-एक प्रतिसत संयंत्र लोड फैक्टर के संग देस म पहली स्थान मिले हवय।
गोधन न्याय योजना-अवलोकन
छत्तीसगढ़ सरकार के सुराजी गांव योजना के चर्चा प्रदेसच म नहीं फेर जम्मों देस म होवत हे। राज्य सरकार के गोधन न्याय योजना अउ गांव के गौठान मन म चलत आय मूलक योजना ले प्रदेस म ग्रामीण, किसान अउ माईलोगिन मनके हालत ल सुधारे म मदद मिले हे, जेखर सेती दूसर राज्य के अधिकारी मन घलो ए योजना ल समझे बर छत्तीसगढ़ आवत हे।
इही कड़ी म राजस्थान ले बारह झिन आईएएस अधिकारी मनके दल तीन दिन के छत्तीसगढ़ के दउरा म हवय। ए टीम के रईपुर पहुंचे के बाद नवा रईपुर म राखे गे बिसेस कारीकरम म कृषि उत्पादन आयुक्त डॉक्टर एम. गीता अउ दूसर अधिकारी मन ह सुराजी गांव योजना के बारे म जानकारी दीन। एखर बाद राजस्थान के अधिकारी मनके दल ह धमतरी जिला के भटगांव के गौठान म गीन, जिहां ओमन ल गोबर खरीदी, वर्मी कम्पोस्ट अउ सुपर कम्पोस्ट के बनाय के तरीका ल देखीन। एखर अलावा ओमन ह दुरूग जिला के सिकोला अउ केसरा गांव घलो पहुंचीन, जिहां पशु मनके चारा पानी के बेवस्था अउ उंखर इलाज के बेवस्था ल समझीन।
स्कूल-नया निर्देश
छत्तीसगढ़ माध्यमिक शिक्षा मंडल ह प्रदेस के स्कूल मन म चलत पाठ्यक्रम ल लेके नवा निरदेस जारी करे हे। एखर मुताबिक ए बछर घलो कक्षा दसवीं अउ बारहवीं के पाठ्यक्रम म तीस ले चालीस फीसदी के कटौती करे जाही।
मंडल के सचिव व्ही.के. गोयल के अनुसार पाठ्यक्रम म कटौती के अलावा असाइनमेंट के माध्यम ले शिक्षा अउ मूल्यांकन के बेवस्था ए बछर घलो जारी रइही। ओमन बतईन कि पहिली असाइनमेंट अगस्त महीना के आखिरी हफ्ता म जारी करे जाही।
भवन-कांक्रीट जांच
राज्य के आम नागरिक, शासकीय, अर्द्ध शासकीय अउ अशासकीय संस्था मन ह घलो अब अपन नवा भवन के कांक्रीट के गुणवत्ता के जांच करा सकही। एखर बर इच्छुक व्यक्ति या संस्था ल मुख्य तकनीकी परीक्षक-सतर्कता कार्यालय ल आवेदन करना होही। संगेसंग निर्धारित शुल्क के भुगतान घलो करना होही। ए सुल्क ल ऑनलाइन या कार्यालय म जमा करे जा सकत हे। सुल्क मिले के बाद परीक्षक मनके टीम ह कार्यस्थल म जाके कांक्रीट के गुणवत्ता के परीक्षण एनडीटी उपकरण के माध्यम ले करही।
निगम मंडल-नियुक्ति
छत्तीसगढ़ सरकार ह निगम, मंडल अउ बोर्ड म नियुक्ति बर तीसरा सूची जारी करे हे। एमा राज्य शांकबरी बोर्ड म जांजगीर-चांपा के राजकुमार पटेल ल अध्यक्ष नियुक्त करे गेहे। उहें, दुरूग के दुखवा पटेल, पवन पटेल, कवर्धा के हरी पटेल अउ कोंडागांव के अनुराम पटेल ल सदस्य बनाय गे हवय। अइसने, राज्य बीच अउ कृषि विकास निगम लिमिटेड म महासमुंद के अग्नि चंद्राकर ल अध्यक्ष बनाय गे हवय। उहें, बेमेतरा के जालम सिंह पटेल, रायगढ़ के दिलीप पांडेय अउ दुरूग के शंकर बघेल ल सदस्य नियुक्त करे गेहे।
हादसा
कबीरधाम जिला म होय एक ठिन सड़क हादसा म नायब तहसीलदार संघरा तीन झिन लोगन के मउत होगे। उहें, एक झिन दूसर मनखे घायल होगे हवय।
मिले जानकारी के अनुसार नायब तहसीलदार ह दू झिन दूसर लोगन मनके संग चारपहिया गाड़ी म बइठ के धवाईपानी गे रिहीन। लहुटत खानी टरक अउ उंखर गाड़ी के बीच होय भिडंत म दू झिन के मउकाच म मउत होगे अउ तीसर मनखे के अस्पताल ले जावत खानी मउत होगे। घटना म वाहन चालक घायल होय हे, जेला इलाज बर अस्पताल म भर्ती कराय गेहे।
अउ अब थोरकुन समाचार सार म-
– केन्द्र सरकार ह बछर दू हजार बाईस के पद्म पुरस्कार बर पात्र व्यक्ति मन ले निर्धारित प्रारूप म नामांकन प्रस्ताव आमंत्रित करे हे। ए प्रस्ताव सिरिफ ऑनलाइन पोर्टल म अवइया बीस अगस्त तक मंजूर करे जाही।
– मुख्यमंत्री भूपेश बघेल ह स्वतंत्रता संग्राम सेनानी अउ छत्तीसगढ़ म किसान सत्याग्रह के प्रणेता बाबू छोटेलाल श्रीवास्तव के पुण्यतिथि म ओमन ल नमन करीन।
– छत्तीसगढ़ कर्मचारी-अधिकारी फेडरेशन के आह्वान म महंगाई भत्ता के सेती प्रदेस के जिला मुख्यालय मन म अवइया बीस जुलाई के भोजन अवकाश के दउरान धरना-प्रदर्शन करे जाही।
– रईपुर के जिला रोजगार केन्द्र डहार ले उन्नीस जुलाई के रोजगार दफ्तर म भर्ती सिविर लगाय जाही। एमा निजी बैंक डहार ले दू सौ चालीस पद म स्नातक उम्मीदवार मनके भर्ती करे जाही।
– रायगढ़ जिला पंचायत के मुख्य कार्यपालन अधिकारी डॉक्टर रवि मित्तल ह काम म लापरवाही बरते के आरोप म तीन ग्राम पंचायत के सचिव मन ल निलंबित कर देहे।
– कबीरधाम जिला म पुलिस ह करीब इंक्यानवे लाख इकसठ हजार रूपिया कीमत के नौ कुंटल ले जादा गांजा बरामद करे हे। ए मामला म पुलिस ह एक झिन आरोपी ल गिरफ्तार करे हे।
अउ
– महासमुंद जिला म बसना-पदमपुर मार्ग म पुलिस ह दुपहिया गाड़ी म गांजा तस्करी के मामला म दू झिन आरोपी ल गिरफ्तार करे हे। इंखर मन तीर ले डेढ़ लाख रूपिया कीमत के पन्द्रह किलो गांजा बरामद करे गेहे।