प्रधानमंत्री-कोविड समीक्षा
प्रधानमंत्री नरेन्द्र मोदी ह कुछेक राज्य मन म कोरोना के बाढ़त मामला म संसो जताईन हे। ओमन किहीन कि जउन राज्य म संक्रमण के मामला बाढ़त हे, ओमन ल कोरोना के तीसरा लहर के संभावना ले निपटे खातिर जरूरी उपाय करे बर पड़ही। प्रधानमंत्री ह किहीन कि पाछु कुछेक दिन म करीबन अस्सी प्रतिसत नवा मामला छह ठिन राज्य – तमिलनाडु, आंध्रप्रदेश, कर्नाटक, ओड़िशा, महाराष्ट्र अउ केरल ले आय हे। ए राज्य के मुख्यमंत्री मन संग आज होय गोठबात म प्रधानमंत्री ह राज्य अउ केन्द्रसासित प्रदेस ल सूक्ष्म नियंत्रण क्षेत्र बनाय म ध्यान दे बर किहीन। कोरोना के जांच, उपचार अउ टीकाकरण म जोर देवत प्रधानमंत्री ह किहीन कि देस ह एक-दूसर के मदद अउ परयास ले कोरोना महामारी के सामना करे हे। संगेसंग ओमन तीसर लहर के रोकथाम बर जरूरी कदम उठाय के संग एक-दूसर के मदद करे के आह्वान करीन।
कोरोना-टीकाकरण
जनजातीय समुदाय ल कोरोना टीकाकरण कोति जागरूक करे बर ‘‘कोविड टीका संग सुरक्षित वन-धन अउ उद्यम अभियान‘‘ के सुरूवात करे गेहे। केन्द्रीय मंत्री जनजातीय कार्यमंत्री अर्जुन मुंडा ह ए अभियान के सुभारंभ करीन। अभियान म ट्राईफेड ले जुड़े पैंतालीस हजार वन-धन विकास केन्द्र म सहभागी कार्यकर्ता मन संग जनजातीय समुदाय म टीकाकरण के संबंध म जागरूकता लाके टीकाकरण के लक्ष्य ल पूरा करे के परयास करे जाही। वीडियो कान्फ्रेंसिंग के माध्यम ले आयोजित ए कारीकरम म इस्पात राज्यमंत्री फग्गन सिंह कुलस्ते, जनजातीय कार्य राज्यमंत्री विश्वेश्वर टुडू अउ रेणुका सिंह मौजूद रिहीन। संगेसंग कारीकरम म बस्तर जिला के बकावंड गांव के माईलोगिन मन वर्चुअल रूप ले जुड़ीन अउ केन्द्रीय मंत्री संग गोठबात करीन।
उहें, विधानसभा अध्यक्ष डॉक्टर चरणदास महंत ह ए निरदेस जारी करे रिहीन कि टीकाकरण नइ करवइया सदस्य मन ल विधानसभा सत्र के बेरा सदन म प्रवेस नइ दे जाही। अइसने, अभी रईपुर नगर निगम म तेईस जुलाई ले होवइया सामान्य सभा के बइठका म टीका नइ लगवइया पार्षद मन सामिल नइ हो सकय। रईपुर महौपार एजाज ढेबर ह ए संबंध म जानकारी दीन हे।
कोरोना समाचार
राजनांदगांव पुलिस प्रशिक्षण केन्द्र म काली पैंतीस झिन जवान कोरोना पॉजिटिव पाय गेहे। ए मामला के आगू आते पुलिस प्रशिक्षण केन्द्र ल कंटेनमेंट क्षेत्र घोषित कर दे गेहे। जिला कलेक्टर तारण प्रकाश सिन्हा ह उच्च स्तरीय आपात बइठका लेके ओ जघा ल तुरते सील करे के निरदेस दीन। ए जवान मनके नवा नियुक्ति होय हे अउ ए सबो झन सुकमा, कोंडागांव अउ कबीरधाम जिला ले आय हे।
इही बीच, दुरूग जिला के उतई म घलो केन्द्रीय औद्योगिक सुरक्षा बल-सीआईएसएफ के चार झिन जवान कोरोना पॉजिटिव पाय गीन। जिला के मुख्य चिकित्सा अउ स्वास्थ्य अधिकारी डॉक्टर गंभीर सिंह ठाकुर ह बतईन कि ए जवान मन छुट्टी के बाद लहुटे रिहीन। सुरक्षा ल देखत जिला के सीमा सील करे गेहे अउ नब्बे घंटा पहली के कोरोना निगेटिव रिपोर्ट दिखाय म ही जिला भीतरी घुसरे के मंजूरी दे जाही।
उहें, प्रदेश म कोरोना संक्रमण के दर कमती होके शून्य दशमलव छह पांच प्रतिसत रहि गेहे। राज्य म काली तीन सौ तैंतीस झिन संक्रमित पाय गीन।
दूसर कोति, कोंडागांव जिला म सब्बो व्यवसायिक कामकाज पहली असन चलाय जाही। जिला कलेक्टर पुष्पेन्द्र मीणा ह आदेश जारी करके रतिहा आठ बजे तक कामकाज बंद करे के आदेस ल खतम कर देहे।
विद्युत मंडल-भर्ती
मुख्यमंत्री भूपेश बघेल ह स्टेट पॉवर डिस्ट्रीब्यूशन कंपनी लिमिटेड म ढाई हजार ले जादा पद म भर्ती करे के निरदेस देहे। जुनियर इंजीनियर ले लेके मैदान स्तर म काम करइया लाइन अटेंडेंट के खाली पद म स्थानीय लोगन ल नौकरी दे जाही।
ऊर्जा विभाग के विशेष सचिव अउ पावर कंपनी के चेयरमैन अंकित आनंद ह बतईन कि स्टेट पॉवर वितरण, पारेषण अउ जनरेशन कंपनी म दू हजार पांच सौ तिरासी पद म भर्ती करे जाही। ए पद म भर्ती खातिर विज्ञापन जारी होही।
प्रधानमंत्री फसल बीमा योजना
प्रधानमंत्री फसल बीमा योजना म किसान अब इकतीस जुलाई तक खरीफ फसल के बीमा करा सकही। मौसम आधारित फसल बीमा कराय के आखिरी तारीख पन्द्रह जुलाई तय करे गे रिहीस, जउन ल बढ़ाके इकतीस जुलाई कर दे गेहे।
आधिकारिक जानकारी के मुताबिक प्रदेस म धान सिंचित अउ असिंचित, मक्का, सोयाबीन, मूंगफली, मूंग, उरीद अउ राहेर ल फसल बीमा बर अधिसूचित करे गेहे। ए योजना म करजा ले अउ बिना करजा वाले भू-भाटक अउ बंटाईदार सामिल हो सकत हे।
किसान न्याय योजना
राजीव गांधी किसान न्याय योजना म पंजीयन बर पहली जारी करे गे गाइडलाइन म थोरिक सुधार करे गेहे। एखर मुताबिक अब संयुक्त खातेदार किसान शपथ पत्र के बदला स्व-घोषणा पत्र ले अपन पंजीयन करा सकही। उहें, खरीफ बछर दू हजार बीस-इक्कीस म समर्थन कीमत म धान बेचइया किसान मन ल राजीव गांधी किसान न्याय योजना के फायदा ले खातिर पंजीयन के जरूरत नइ होही। खरीफ के मुख्य फसल – मक्का, कोदो-कुटकी, सोयाबीन, अउ कुसियार उत्पादक किसान मन ल योजना म पंजीयन कराय बर पड़ही।
उहें, जउन रकबा म किसान मन कोति ले न्यूनतम समर्थन कीमत म धान बेचे रिहीन अउ अब कहूं ओ किसान ओ भूईंया म आने फसल लेवत हे, त ओला योजना म पंजीयन कराय बर पड़ही।
कोरिया-कृषि विज्ञान केन्द्र
कृषि विज्ञान केन्द्र कोरिया ल देस के सबले बने कृषि विज्ञान केन्द्र के रूप म सम्मानित करे गेहे। राज्य सरकार के नरवा, गरूवा, घुरवा, बाड़ी योजना ल बने ढंग ले चलाय खातिर ए इनाम दे गेहे। भारतीय कृषि अनुसंधान संस्थान के स्थापना दिवस के मउका म आज नई दिल्ली के कृषि भवन म राखे गे समारोह म केन्द्रीय कृषि मंत्री नरेन्द्र सिंह तोमर ह कोरिया के संग देसभर म चलाय जात सात सौ ले जादा कृषि विज्ञान केन्द्र ल सम्मानित करीन। कृषि विज्ञान केन्द्र कोरिया के वरिष्ठ वैज्ञानिक अउ प्रमुख डॉक्टर रंजीत सिंह राजपूत ह वर्चुअल माध्यम ले ए इनाम लीन हे।
धरना-प्रदर्शन
प्रदेस म खातू अउ किसान मनके समस्या ल लेके भारतीय जनता पार्टी के किसान मोर्चा ह आज एक दिवसीय प्रदर्शन करीन। महासमुंद म सांसद चुन्नी लाल साहू अउ आने प्रतिनिधि मन संग ए प्रदर्शन करे गीस। उहें, महासमुंद म भारतीय जनता पार्टी ह राज्य सरकार ले पेट्रोल अउ डीजल म टैक्स कमती करे के मांग करत साइकिल रैली निकालीन।
उहें, डीजल-पेट्रोल अउ गैस के बाढ़त कीमत के विरोध म युवा जनता कांग्रेस छत्तीसगढ़ – जे ह घलो आज राजनांदगांव म धरना प्रदर्सन करीन।
माओवादी-मुठभेड़
दंतेवाड़ा जिला म सुरक्षा बल अउ माओवादी मनके बीच होय मुठभेड़ म तीन झिन माओवादी मारे गेहे। एमा दू इनामी माओवादी सामिल हे। फरसापाल थाना क्षेत्र म सुरक्षा बल अउ माओवादी मनके बीच मुठभेड़ होईस। क्षेत्र ले सर्चिंग म हथियार अउ पांच ठिन पिट्ठू बरामद करे गेहे।
उहें, नारायणपुर जिला म एक झिन पन्द्रह बछर के माओवादी ह आत्मसमर्पण करीस हे। ए ह जाटलूर-ओरछा थाना क्षेत्र म सक्रिय रिहीस। नारायणपुर पुलिस ह आत्मसमर्पण करइया ए नोनी के आगू के पढ़ाई पूरा कराय के जिम्मेवारी लेहे।
ओति, बीजापुर जिला के आवापल्ली थाना क्षेत्र म नुकनपाल गांव माओवादी मन ह गांव के एक मनखे के हत्या कर दीन।