विस- पावस सत्र
छत्तीसगढ़ विधानसभा के मानसून सत्र अवइया 26 जुलाई ले शुरू होही। विधानसभा अध्यक्ष डॅाक्टर चरणदास महंत ह केहे हे कि ए सत्र के बेरा वैक्सीन लगवा चुके विधायक मन ल ही सदन म प्रवेश के अनुमति दे जाही। ओमन कीहिन कि कोरोना संक्रमण ल देखत सबो विधायक मन ल वैक्सीन लगवाना जरूरी हे। संगेसंग सदन म कोरोना ले बचाव ले जुड़े दिशा-निर्देश मनके पालन करना जरूरी रीही।
राज्यपाल नियुक्ति
राष्ट्रपति रामनाथ कोविंद ह आठ राज्य मन म राज्यपाल नियुक्ति करे हे। त्रिपुरा के राज्यपाल रमेश बैस झारखंड के राज्यपाल बनाय गेहे। ओमन द्रौपदी मुर्मू के जगा लीही। उंहें हरियाणा के राज्यपाल सत्यदेव नारायण आर्य त्रिपुरा के राज्यपाल होही। अइसने केंद्रीय मंत्री थावरचंद गहलोत ल कर्नाटक के नवा राज्यपाल नियुक्त करे गेहे। जबकि मंगुभाई छगनभाई पटेल मध्यप्रदेश के डॅाक्टर हरिबाबू कंभपति मिजोरम के अउ राजेंद्र विश्वनाथ आर्लेकर ल हिमाचल प्रदेश के राज्यपाल बनाय गेहे।
राष्ट्रपति भवन के प्रेस विज्ञप्ति के अनुसार मिजोरम के राज्यपाल पी.एस. श्रीधरन पिल्लई ल गोवा के नवा राज्यपाल नियुक्त करे गेहे। हिमाचल प्रदेश के राज्यपाल बंडारू दत्तात्रेय ल तबादला के बाद हरियाणा के राज्यपाल बनाय गेहे।
सीबीएसई शैक्षणिक सत्र
केंद्रीय माध्यमिक शिक्षा बोर्ड – सीबीएसई ह चालू शैक्षिक सत्र ल दो अवधि म बांटे के फैसला करे हे। हर अवधि म लगभग 50 प्रतिशत पाठ्यक्रम शामिल होही।
बोर्ड ह एक बयान म केहे हे कि शैक्षिक सत्र 2021-22 के विभाजन विषय विशेषज्ञ मनके विचार अउ विषय के आपसी संबंध ल धियान म राखत प्रणालीबद्ध दृष्टिकोण के आधार म करे जाही। सीबीएसई ह कीहिन कि बोर्ड विभाजित पाठ्यक्रम के आधार म हर एक अवधि के अंत म परीक्षा आयोजित करही। पहिली अवधि के आखिर म बोर्ड टर्म-वन के परीक्षा नवंबर-दिसंबर के बीच होही। दूसर अवधि के आखिर म बोर्ड टर्म-टू के संशोधित पाठ्यक्रम के आधार म बछर के आखिर म परीक्षा आयोजित करही।
ए पाठ्यक्रम म कुल पाठ्यक्रम के लगभग पचास प्रतिशत हिस्सा शामिल होही। ये परीक्षा बोर्ड डहार ले निर्धारित परीक्षा केंद्र मन म मार्च-अप्रैल 2022 के आसपास कराये जाही।
निपुण भारत अभियान
निपुण भारत अभियान के अंतर्गत पहिली ले तीसरी कक्षा तक के लईका मन ल अवइया पांच साल म आधारभूत शिक्षा देके लक्ष्य राखे गेहे। ए कार्यक्रम के वर्चुअल उद्घाटन केंद्रीय शिक्षा मंत्री डॅाक्टर रमेश पोखरियाल निशंक ह करीन।
कार्यक्रम म छत्तीसगढ़ के शिक्षा सचिव डॅाक्टर कमलप्रीत सिंह अउ वरिष्ठ अधिकारी घलो शामिल होइन।
एति छत्तीसगढ़ म लईका मन ल ‘सीख कार्यक्रम‘ के अंतर्गत परिजन अउ समुदाय के सहयोग ले सीखे के अवसर मिलही। प्रदेश के 37 विकासखंड मन म 06 हजार संस्थान मन म सीख कार्यक्रम ल स्वयंसेवी सीख मित्र मन के माध्यम ले चलाये जात हे। ये शिक्षक मन, लईका मन ल आने-आने गतिविधि सीखात हे। जेमा परिजन मन घलो शामिल हे।
स्वास्थ्य मंत्रालय कोविड गुरूकुल
केंद्रीय स्वास्थ्य मंत्रालय ह अपन सोशल मीडिया प्लेटफार्म म वीडियो श्रृंखला कोविड गुरूकुल शुरू करे हे। एखर उद्देश्य कोविड महामारी अउ टीकाकरण म प्रमाणित जानकारी देना हे।
ए श्रृंखला म प्रमुख जन स्वास्थ्य विशेषज्ञ, नीति निर्माता, डॅाक्टर, वैज्ञानिक अउ स्वास्थ्य ले जुडे़ लोगन मन भाग लीहीं अउ लोगन मन ल कोविड ले बचाव के व्यवहार के प्रति जागरूक बनाही अउ टीका के बारे म फैले भ्रम ल दूरिहा करे म सहयोग करही।
जनजातीय समुदाय वन-अधिकार
पर्यावरण, वन, अउ जलवायु परिवर्तन मंत्रालय अउ जनजातीय कार्य मंत्रालय ह आज वन संसाधन मन के प्रबंधन म जनजातीय समुदाय मन ल जादा अधिकार देके संयुक्त घोषणा उपर हस्ताक्षर करीन। ए संयुक्त घोषणा वन अधिकार अधिनियम ले जुड़े हे। जउन जनजातीय समूह मनके वन अधिकार ल मान्यता देथे अउ अइसे अधिकार उपलब्ध कराथे।
केंद्रीय पर्यावरण मंत्री प्रकाश जावडेकर अउ जनजातीय कार्य मंत्री अर्जुन मुंडा के उपस्थिति म ए संयुक्त घोषणा म हस्ताक्षर करे गीस। ए अवसर म श्री जावडेकर ह कीहिन कि केंद्र सरकार जनजातीय समुदाय अउ वनवासी मनके कल्याण बर प्रतिबद्ध हे।
रेलवे भर्ती परीक्षा
रेल मंत्रालय ह केहे हे कि अलग-अलग गैर तकनीकी श्रेणी मन म एन.टी.पी.सी. के ग्रेजुएट अउ अंडर ग्रेजुएट पद बर रेलवे भर्ती परीक्षा के सातवां अउ आखरी चरण 23 जुलाई ले शुरू होही। मंत्रालय ह कीहिन कि बांचे 2 लाख 78 हजार उम्मीदवार मन बर कम्पयूटर आधारित परीक्षा सी.बी.टी. अब 23, 24 अउ 31 जुलाई के आयोजित करे जाही।
कोविड महामारी के दूसर लहर के सेती ए परीक्षा मन ल टाल देगे रीहिस। कम्पयूटर आधारित पहिली स्तर के परीक्षा 6 चरण म 28 दिसंबर 2020 ले 8 अप्रैल 2021 तक कराये गे रीहिस। मंत्रालय ह कीहिन कि ये परीक्षा देश भर के 76 शहर मन म लगभग 260 केंद्र मन म कोविड नियम के अंतर्गत करे जात हे।
रामाधार कश्यप निधन
पूर्व राज्यसभा सांसद अउ अकलतरा क्षेत्र ले कांग्रेस के पूर्व विधायक रामाधार कश्यप के बीते रात बिलासपुर म निधन होगे। ओमन 84 बछर के रीहिन । आज मंझनियां बिलासपुर के सरकंडा मुक्तिधाम म श्री कश्यप के अंतिम संस्कार करे गीस। ए बेरा कांग्रेस के वरिष्ठ पदाधिकारी, जनप्रतिनिधि अउ गणमान्य नागरिक मन उपस्थित रीहिन।
श्री कश्यप बछर 2002 म राज्यसभा सांसद बने रीहिन। संगेसंग बछर 2003 म अकलतरा क्षेत्र के सांसद राहत ओमन विधायक चुने गे। छत्तीसगढ़ राज्य निर्माण म स्वर्गीय रामाधार कश्यप के बड़का भूमिका रीहिस। मुख्यमंत्री भूपेश बघेल अउ विधानसभा अध्यक्ष डॅाक्टर चरणदास महंत ह सांसद रामाधार कश्यप के निधन म दुख जताइन अउ ओखर परिवार ले संवेदना जताइन।
श्यामाप्रसाद मुखर्जी जयंती
भारतीय जनता पार्टी के प्रणेता अउ भारतीय जनसंघ के संस्थापक डॅाक्टर श्यामाप्रसाद मुखर्जी के जयंती आज मनाये जात हे। ए अवसर म छत्तीसगढ़ म कतकोन कार्यक्रम के आयोजन करे जात हे। छत्तीसगढ़ विधानसभा के सेंट्रल हॉल म डॅाक्टर मुखर्जी के फोटो म विधानसभा अध्यक्ष डॅाक्टर चरणदास महंत ह पुष्पांजलि अर्पित करीन।
ए मउका म प्रमुख सचिव चंद्रशेखर गंगराड़े घलो मौजूद रीहिन। उंहें राजधानी रायपुर के शारदा चौक के तीर म डॅाक्टर मुखर्जी के मूर्ति म महापौर एजाज ढेबर अउ पार्षद मन ह फूल-माला चढ़ाके श्रद्धांजलि दीन।
पौधारोपण
प्रदेश म ए बछर आने-आने योजना मनके अंतर्गत 99 लाख 45 हजार पौधा के रोपई करीब 14 हजार हेक्टेयर क्षेत्र म करे जात हे। वन मंत्री मोहम्मद अकबर ह बताइन कि वन विभाग ह आरडीएफ योजना के अंतर्गत करीब साढ़े चार हेक्टेयर पौधा रकबा म 44 लाख 74 हजार पौधा अउ आर.डी.बी.एफ योजना के अंतर्गत 460 हेक्टेयर रकबा म 1 लाख 84 हजार पौधा के रोपई करे जात हे।
ओमन ह पौधा रोपई के काम ल प्राथमिकता ले पूरा करे के निर्देश अधिकारी मन ल देहे।