प्रधानमंत्री-कोविन ग्लोबल कॉनक्लेव
प्रधानमंत्री नरेन्द्र मोदी ह किहीन हे कि कोविड महामारी ले सफलतापूर्वक निपटे बर टीकाकरण सबले अच्छा उम्मीद हवय। ओमन आज कोविल ग्लोबल कॉनक्लेव ल संबोधित करत किहीन कि भारत ह टीकाकरण के कार्यनीति बनाय के बेरा सुरू ले पूरी-पूरा डिजीटल दृष्टिकोण अपनाय हे। श्री मोदी ह किहीन कि प्रौद्योगिकी कोविड ले निपटे खातिर बहुत महत्वपूर्ण हवय।
प्रधानमंत्री ह किहीन कि भारत ह तकनीकी रूप ले जतका जल्दी हो सकय कोविड ट्रेसिंग अउ ट्रेकिंग ऐप तैयार करीस। ओमन किहीन कि भारत कोविड के खिलाफ लड़ाई म वैश्विक समुदाय के संग अपन जम्मों अनुभव, बिसेसज्ञता अउ संसाधन साझा करे बर प्रतिबद्ध हे।
कोरोना समाचार/टीकाकरण
प्रदेस म कोरोना संक्रमण के स्थिति म लगातार सुधार होवत हे अउ पॉजिटीविटी दर घटके एक प्रतिशत ले नीचे पहुंच गेहे। उहें, को-मॉर्बिडिटी ले मृत्यु होय के दर म घलो कमी आय हे। काली प्रदेस म कोरोना संक्रमण के दू सौ उनतीस नवा मामला सामने आईस। एला मिलाके प्रदेस म कोरोना संक्रमित लोगन मनके संख्या नौ लाख पंचानवे हजार ले जादा होगे हे। अब तक लगभग नौ लाख छिहत्तर हजार मनखे मन संक्रमण ले स्वस्थ हो चुके हे। वर्तमान म पांच हजार तीन सौ पैंतालीस लोगन मनके इलाज आने-आने अस्पताल अउ होम आइसोलेशन म चलत हे।
इही बीच, प्रदेस म कोरोना टीकाकरण के काम घलो सरलग चालू हे। काली तक प्रदेस म एक करोड़ एक लाख छत्तीस हजार ले जादा टीका लगाय जा चुके हे।
केन्द्रीय स्वास्थ्य टीम-दौरा
केन्द्रीय स्वास्थ्य मंत्रालय के टीम आज ले छत्तीसगढ़ के दउरा म हे। ए टीम म क्लीनिकल अउ लोक स्वास्थ्य के दू बिसेसज्ञ चिकित्सक सामिल हे। ए टीम कान्टेक्ट ट्रेसिंग, टेस्टिंग, एक्टिव सर्विलांस, कंटेनमेंट जोन, अस्पताल, बिस्तर, चिकित्सक मनके संख्या अउ टीकाकरण के आधार म जांच करके रिपोर्ट केन्द्र सरकार ल सौंपही। एखर सुरूआत जांजगीर-चांपा अउ बिलासपुर जिला ले करे जाही। टीम सब्बो जिला म जाके जांच करही।
बतादन कि केन्द्र सरकार डहार ले पाछु दिन एक रिपोर्ट जारी करे गे रिहीस, जेमा संक्रमण जादा पाए जाने वाला छह ठिन राज्य म छत्तीसगढ़ के घलो नाव सामिल रिहीस।
प्रधानमंत्री गरीब कल्याण योजना
प्रधानमंत्री गरीब कल्याण योजना के तहत छत्तीसगढ़ म ए बछर मई अउ जून माह के दौरान एक लाख मीटरिक टन चावल आवंटन करे गेहे। एखर ले लाभार्थी मन ल कोविड महामारी के दौरान घलो खाद्यान्न सामग्री निर्बाधा रूप से मिलत हे। आज एक पत्रकारवार्ता म ए जानकारी भारतीय खाद्य निगम के क्षेत्रीय महाप्रबंधक अनुपम दुबे ह दीन।
निशंक-निपुण भारत
केन्द्रीय शिक्षा मंत्री रमेश पोखरियाल निशंक ह पठन-पाठन म दक्षता अउ संख्यात्मक कौशल के समझ बर राष्ट्रीय पहल ‘‘निपुण भारत‘‘ के आज वर्चुअल उद्घाटन करीन। एखर उद्देश्य लइका मन म पठन-पाठन, लेखन अउ संख्यात्मक कौशल के दक्षता विकसित करना हे। एखर सुभारंभ करत श्री पोखरियाल ह किहीन कि ए पहल नवा सिक्षा नीति के मजबूत स्तंभ साबित होही।
रमन सिंह-पत्रकारवार्ता
भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह राज्य सरकार उपर यूरिया खाद के आपूर्ति म किसान मन ले भेदभाव करे के आरोप लगाईन हे।
आज रईपुर म राखे गे एक पत्रकारवार्ता म डॉक्टर सिंह ह किहीन कि किसान खाद के कमी के सामना करत हवय। राज्य सरकार ह पन्द्रह करोड़ किलो कम्पोस्ट खाद तैयार करे हे, त केन्द्र सरकार ले खाद काबर मंगाय जात हे। ओमन किहीन कि किसान मन ल पर्याप्त खाद उपलब्ध कराय बिना सहकारी समिति म कइसे सिरा गे। डॉक्टर सिंह ह नकली खाद बेचे, खाद के कालाबाजारी अउ जमाखोरी करइया लोगन मनके खिलाफ कार्रवाई के मांग घलो करीन। ओमन किहीन कि केन्द्र सरकार किसान मनके आय दोगुना करे बर काम करत हे, लेकिन राज्य सरकार के नीति मनके कारण किसान मन ल उंखर लाभ नइ मिल पात हे।
गोधन न्याय योजना
मुख्यमंत्री भूपेश बघेल ह आज एक ठिन वर्चुअल कारीकरम म गोधन न्याय योजना के तहत हितग्राही मन ल नौ करोड़ तिरासी लाख रूपिया के रासि ल ऑनलाइन बांटीन। एमा ले गोबर विक्रेता मन ल अड़तालीस लाख, गौठान समिति अउ महिला स्व-सहायता समूह मन ल नौ करोड़ पैंतीस लाख रूपिया के रासि प्रदान करे गीस।
कारीकरम म मुख्यमंत्री ह किहीन कि सुराजी गांव अउ गोधन न्याय योजना, ग्रामीण अर्थव्यवस्था बर संजीवनी साबित होय हे। ओमन किहीन कि ए योजना के तहत अब तक लाभांश के रूप म उनतीस करोड़ रूपिया के भुगतान महिला स्व-सहायता समूह मन ल करे जा चुके हे।
राष्ट्रीय ग्रामीण आजीविका मिशन
राष्ट्रीय ग्रामीण आजीविका मिशन योजना के लाभ लेके ग्रामीण क्षेत्र मनके महिला मन आत्मनिर्भर बनत हे। इही कड़ी म कोंडागांव जिला म स्व-सहायता समूह ले जुड़े लगभग सात हजार महिला मन ल गांवचे म रोजगार मिले हे। गौरी स्व-सहायता समूह के महिला मन ग्राम कोंगेर म मिर्ची, टमाटर, केला, मुनगा अउ भाजी के उत्पादन करके आमदनी करत हे।
टोक्यो ओलपिंक-मुख्यमंत्री
भारतीय ओलपिंक संघ के महासचिव राजीव मेहता ह रईपुर म मुख्यमंत्री भूपेश बघेल ले भेंट करके ओमन ल टोक्यो ओलपिंक म सामिल होय बर आमंत्रित करीन। एमा मुख्यमंत्री ह श्री मेहता ल अपन सहमति दीन। ए साल ओलपिंक खेल के आयोजन तेईस जुलाई ले आठ अगस्त तक जापान के टोक्यो सहर म करे जाही। छत्तीसगढ़ ले ओलपिंक के प्रतिनिधित्व संघ के महासचिव गुरूचरण सिंह होरा करही।
तेंदूपत्ता संग्रहण
प्रदेस म तेंदूपत्ता संग्राहक मन ल दू माह के दौरान पांच सौ दो करोड़ रूपिया के भुगतान करे गेहे। ए साल पांच सौ बाईस करोड़ रूपिया के तेरह लाख पांच हजार मानक बोरा तेंदूपत्ता के संग्रहण कर ले गेहे।
वन मंत्री मोहम्मद अकबर ह बतईन कि कोरोना काल के दौरान आदिवासी इलाका म तेंदूपत्ता संग्राहक मन संग्रहण करके रोजगार हासिल करीन। ओमन बतईन कि तेंदूपत्ता संग्रहण के दर चार हजार रूपिया प्रति मानक बोरा निर्धारित करे गेहे।
कोंडागांव-धान जब्त
खाद्य विभाग के जांच दल ह कोंडागांव जिला के एक ठिन राईस मिल म छापा मारके तीन करोड़ चौरानवे लाख रूपिया ले जादा के धान जब्ती करे हे।
खाद्य अधिकारी भूपेन्द्र मिश्रा ह बतईन कि राईस मिल डहार ले अनुबंध के अनुसार कस्टम मीलिंग करके धान जमा नइ कराय गीस अउ चावल उपार्जन आदेस के प्रावधान के उल्लंघन करे गे रिहीस। ए संबंध म राईस मिल संचालक ल कारण बताओ नोटिस घलो जारी करे गेहे।
आयुष मंत्री-सीटीआरआई पोर्टल
केन्द्रीय आयुष मंत्री किरण रिजिजू ह आज भारत म क्लीनिकल परीक्षण के पंजीयन के तहत आयुर्वेद के आंकड़ा के पोर्टल-सी.टी.आर.आई. के सुरूवात करीन। एखर ले आयुर्वेद आधारित क्लीनिकल परीक्षण के जानकारी विश्वभर म मिल सकही।
अउ अब थोरकुन समाचार सार म-
– राष्ट्रीय सांख्यिकी कार्यालय डहार ले असमाविष्ट क्षेत्र के उद्यम के वार्षिक सर्वेक्षण के राज्य स्तरीय प्रशिक्षण सम्मेलन के आयोजन रईपुर म आज ले सात जुलाई तक करे जात हे। एमा प्रदेसभर के सांख्यिकी अधिकारी अउ करमचारी सामिल होवत हे।
– रेल यात्री मनके सुविधा ल देखत रईपुर रेलमंडल के अंतर्गत रईपुर-कोरबा-रईपुर स्पेशल ट्रेन सात जुलाई ले हफ्ता म चार दिन चलही।
अउ
– अंबिकापुर जिला म एक बिहाव कारीकरम म एक हजार ले जादा लोगन मनके सामिल होय के सेती कलेक्टर संजीव कुमार झा ह मैरिज हॉल संचालक समेत वन अउ वधु पक्ष उपर साढ़े नौ लाख रूपिया के जुर्माना लगाय हे।