प्रधानमंत्री एमएसएमई
प्रधानमंत्री नरेंद्र मोदी ह कीहिन हे कि सरकार ह खुदरा अउ थोक व्यापार ल सूक्ष्म, लघु अउ मध्यम उद्यम एमएसएमई म शामिल करके एक ठन एतिहासिक फैसला करे हे। एक ठन ट्वीट म श्री मोदी ह कीहिन कि एखर ले हमर करोड़ो व्यापारी मन ल आसान शर्त म धन जुटाय के संगरा कतकोन प्रकार के दूसर फायदा मिलही अउ एखर ले व्यापार बढ़ाये म ओमन ल मदद मिलही। प्रधानमंत्री ह कीहिन कि सरकार व्यापारी मन ल आगू बढ़ाय बर वचनबद्ध हे।
एखर पहिली काली केंद्रीय मंत्री नीतिन गडकरी ह सूक्ष्म, लघु अउ मध्यम उद्यम बर संशोधित दिशा निर्देश जारी करे रीहिन। एमा खुदरा अउ थोक व्यापार ल एमएसएमई म शामिल करे के व्यवस्था हे। श्री गडकरी ह कीहिन कि एखर ले करीबन ढाई करोड़ व्यापारी मन ल फायदा होही।
मुख्यमंत्री चिटफंड
मुख्यमंत्री भूपेश बघेल ह चिटफंड कंपनी मन ले निवेशक मनके जमा राशि वापिस दिलाये बर जल्दी कार्रवाई करे के निर्देश दीन हे।
मुख्यमंत्री ह अपन निवास कार्यालय म राखे गे गृह विभाग के समीक्षा बइठका म कीहिन कि जिला स्तर म कलेक्टर अउ पुलिस अधीक्षक के समिति बनाय जाय जउन ह चिटफंड कंपनी मनके खिलाफ करे जावत कार्रवाई के समीक्षा हर हप्ता करय। ओमन कीहिन कि जिला स्तर म निवेशक अउ स्थानीय लोगन ले चिटफंड कंपनी मनके संपत्ति के जानकारी लेके वसूली बर नियम के अनुसार कार्रवाई करे जाय। ओमन कीहिन कि एखर बर पोर्टल घलो बनाये जा सकत हे।
श्री बघेल ह कीहिन कि सट्टा, जुंआ, अवैध शराब के कारोबार म अंकुश लगाय बर सख्त कार्रवाई करे जाय। ओमन कीहिन कि थाना स्तर के मैदानी अमला अपन कत्र्तव्य के निर्वहन मुस्तैदी ले करय।
मुख्यमंत्री ह बइठका म जेल म बंद आदिवासी मनके रिहाई के प्रकरण ल घलो तेजी लाये के निर्देश दीन। ओमन कीहिन कि उप निरीक्षक मनके भर्ती अउ बस्तर फाईटर मनके भर्ती प्रक्रिया म घलो तेजी लाये जाय। मुख्यमंत्री ह सुकमा अउ बीजापुर जिला के माओवाद प्रभावित क्षेत्र म विकास काम ल जल्दी पूरा करे बर कीहिन । ओमन ह दोरनापाल-चिंतलनार-जगरगुंडा रद्दा के काम ल घलो जल्दी पूरा करे के निर्देश दीन।
कोवैक्सीन परीक्षण
भारतीय टीका कोवैक्सीन तीसर चरण के परीक्षण म लक्षण वाले मरीज मन उपर सतहत्तर प्रतिशत ले जादा कारगर सिद्ध होय हे। भारत बायोटेक ह आज तीसर चरण के परीक्षण के ब्यौरा जारी करीस। कंपनी ह भारतीय आयुर्विज्ञान अनुसंधान परिषद अउ राष्ट्रीय विषाणु विज्ञान संस्थान के संग मिलके ए टीका ल तियार करे हे।
ये परीक्षण अठारा ले अंठानबे बछर आयु वर्ग के पच्चीस हजार आठ सौ मनखे मन उपर देशभर म पच्चीस जगा म करे गीस। कोवैक्सीन कोविड के गंभीर मरीज उपर तिरपन प्रतिशत अउ एखर डेल्टा स्वरूप ले प्रभावित लोगन उपर पैंसठ प्रतिशत प्रभावी साबित होय हे।
इही बीच अब गर्भवती माइलोगिन मन घलो कोविड ले बांचे के टीका लगवा सकथे। केंद्रीय स्वास्थ्य मंत्रालय ह काली एखर मंजूरी दीन।
मंत्रालय ह यहू फैसला टीकाकरण बर राष्ट्रीय तकनीकी सलाहकार समूह के सिफारिश म ले हवय।
कोरोना टीकाकरण
कोरोना महामारी ले बंाचे बर प्रदेश म अब तक अंठानबे लाख बीस हजार ले जादा लोगन ल कोरोना के टीका लग गे हवय। प्रदेश के करीबन बंयासी लाख लोगन ल वैक्सीन के पहला डोज अउ सोला लाख बीस हजार ले जादा लोगन ल दूनो डोज लग गे हवय।
राज्य म इंक्यानबे प्रतिशत स्वास्थ्यकर्मी, शत प्रतिशत फ्रंटलाईन वर्कस, पैंतालिस बछर ले जादा के इक्यासी प्रतिशत नागरिक मन ले अउ अठारा ले चैंवालिस आयु समूह के इक्कीस प्रतिशत युवा मन ल वैक्सीन के पहला डोज लग गे हावय। उंहें सत्तर प्रतिशत स्वास्थ्यकर्मी, बहत्तर प्रतिशत फ्रंटलाईन वर्कस अउ पैंतालिस बछर ले जादा के उन्नीस प्रतिशत लोगन ल वैक्सीन के दूनो डोज लग गे हवय।
इही बीच प्रदेश म कोरोना संक्रमण के दर एक दशमलव दू प्रतिशत होगे हवय। राज्य म काली तीन सौ पांच नवा कोरोना संक्रमित मरीज पाये गीस। एला मिलाके प्रदेश म अभी तक नौ लाख पंच्यानबे हजार ले जादा कोरोना पाॅजीटिव मरीज मिले हे। एमा ले नौ लाख छिहत्तर हजार एक सौ पच्चीस मरीज मन बने होगे हवय।
वर्तमान म पांच हजार छै सौ ले जादा कोरोना संक्रमित मरीज मनके आने आने अस्पताल अउ होम आइसोलेशन म इलाज चलत हे। उंहें प्रदेश म काली कोरोना संक्रमण ले पांच झिन लोगन के मउत घलो होय हे।
भाजपा धान खरीदी
भारतीय जनता पार्टी के प्रदेश अध्यक्ष विष्णुदेव साय ह चालू खरीफ सत्र म धान खरीदी बर राज्य सरकार ले अभी ले तियारी चालू करे के मांग करीन हे। श्री साय ह कीहिन कि राज्य सरकार बारदाना खरीदी बर अभीच केंद्र सरकार अउ जूट आयुक्त ल अपन जरूरत बता देवंय, जेखर ले धान खरीदी के बेरा बारदाना के कमी ले बांचे जा सकय।
मुख्यमंत्री पंचायत विभाग समीक्षा
मुख्यमंत्री भूपेश बघेल ह मनरेगा म खेत के नीचे कुंआ अउ डबरी बनाय के निर्देश दीन हे। ओमन ह कीहिन हे कि एखर ले बारिश के पानी ल सकेल के रखे जा सकही। मुख्यमंत्री ह किसान मन ल उंखर जरूरत के अनुसार पंप देवाय के निर्देश घलो दीन। जेखर ले ओमन ह सिंचाई के जरूरत ल पूरा कर सकय।
सड़क बनाय के काम म स्थानीय युवा मन ल ले जाय के संगेसंग आंगनबाड़ी केंद्र मन ल लईका मन बर खेल सुविधा देवाय के निर्देश घलो दीन।
गृह मंडल आवास
छत्तीसगढ़ गृह निर्माण मंडल ह खाली पड़े मकान अउ दुकान के आबंटन भाड़ा क्रय पद्धति ले करे के फैसला लीन हे।
बोर्ड के अध्यक्ष कुलदीप जुनेजा ह बताइन कि हितग्राही मन ल सिरिफ पैंतीस प्रतिशत राशि जमा करे के बाद मकान या दुकान दे जाही। बाकी पैंसठ प्रतिशत राशि ल पांच दस अउ बारा बछर बर किश्त म दे जा सकही। संगेसंग यदि हितग्राही भवन आबंटन के तीन महीना के भीतर भवन के पूरा राशि जमा करथे, त ओला दस प्रतिशत के अउ यादि छै माह के भीतर जमा करथे, त ओला पांच प्रतिशत के विशेष छूट दे जाही।
ओमन बताइन कि खाली पड़े भवन के मूल्य निर्धारण म दस प्रतिशत राशि जोड़े के जरूरत ल खतम करे के फैसला लेगे हवय। उंहें कोरोना महामारी ल देखत अप्रैल अउ मई महीना के देय किश्त ल घलो शून्य घोषित करे के फैसला लेगे हवय।
कांग्रेस/भाजपा बैठक
अखिल भारतीय कंाग्रेस कमेटी के सचिव अउ प्रदेश प्रभारी अउ सांसद सप्तगिरी शंकर उल्का अउ प्रदेश कंाग्रेस कमेटी के अध्यक्ष मोहन मरकाम ह काली कंाकेर म राखे गे जिला स्तरीय कार्यकर्ता सम्मेलन म भाग लीहीं। ए कार्यक्रम म राज्यसभा सांसद फूलोदेवी नेताम संगरा जिला के विधायक अउ पूर्व विधायक मनके अलावा दूसर पदाधिकारी मन घलो शामिल होही।
एति भाजपा जिला कार्य समिति के घलो काली कमल सदन म बइठका राखे गे हवय। बइठका म पूर्व प्रदेश अध्यक्ष विक्रम उसेण्डी अउ सांसद मोहन मंडावी के अलावा जिला पदाधिकारी अउ कार्य समिति के सदस्य संगरा मोर्चा अउ प्रकोष्ठ के पदाधिकारी मन घलो शामिल होही।
माओवादी मुठभेड़
नारायणपुर जिला ले सुरक्षा बल ह दू झन माओवादी मन ल गिरप्तार करे हे। मिले जानकारी के अनुसार थाना ओरछा ले जिला पुलिस बल अउ डीआरजी के संयुक्त टीम तलाशी अभियान म निकले रीहिस। इही दउरान पुलगुडुम गांव के जंगल म घेराबंदी करके माओवादी संतुराम मंडावी अउ बुधराम उर्फ जागेश अटामी ल गिरप्तार करे गीस।