कोरोना टीकाकरण
विधानसभा अध्यक्ष डॅाक्टर चरणदास महंत ह मानसून सत्र शुरू होय के पहिली सबो विधायक मनले जरूरी रूप म कोविड के टीका लगाये के आग्रह करीन हे। ए संबंध म डॅाक्टर महंत ह विधायक मन ल एक ठन चिट्ठी भेजीन हे। जेमा लिखे गेहे कि विधानसभा के पाछू सत्र जइसे ए बखत घलो कोरोना महामारी ले बांचे के सबो बेवस्था करे गे हावय।
खबर के मुताबिक राज्य विधानसभा के मानसून सत्र छब्बीस जुलाई ले शुरू होके तीस जुलाई तक चलही। ए सत्र म कुल पांच बइठका होही।
इही बीच मुख्यमंत्री भूपेश बघेल ह प्रधानमंत्री नरेंद्र मोदी ल चिट्ठी लिखके छत्तीसगढ़ ल जुलाई महीना म कोरोना टीका के कमती ले कमती एक करोड़ डोज देवाय के आग्रह करीन हे। ओमन ह प्रधानमंत्री ल यहू बताइन कि प्रदेश म अभी कोरोना वैक्सीन के करीबन नौ लाख अंठावन हजार डोज बंाचे हावय, जउन ह सिरिफ तीन दिन चलही।
उंहे प्रदेश म काली दू लाख बहत्तर हजार छै सौ बीस लोगन ल कोविड वैक्सीन के डोज लगाये गीस। अइसने राज्य म अभी तक तिरानबे लाख सैंतीस हजार ले जादा डोज लगाये गे हावय।
ओति राजनांदगंाव जिला कलेक्टर ह टीकाकरण के जागरूकता बर सर्व समाज प्रमुख मनके एक बइठका लीन अउ अपील करीन कि लोगन ल टीका लगवाये बर जागरूक करयं। जिला म अभी तक पांच लाख तेईस हजार ले जादा लोगन के टीकाकरण होगे हावय।
उंहें जांजगीर चंापा के जिला कलेक्टर वैक्सीनेशन कार्ड के गलत प्रकाशन के सेती सक्ती के खंड चिकित्सा अधिकारी ल कारण बताओ नोटिस जारी करे गेहे।
कोरोना समाचार
इही बीच बेमेतरा जिला प्रशासन ह घलो कोरोन संक्रमण के स्थिति म सरलग सुधार ल देखत लाॅकडाउन के नियम म थोरकुन अउ छूट दे हवय। जिला कलेक्टर भोसकर विलास संदिपान ह एक ठन आदेश जारी करके दुकान मन ल खोले के बेरा ल बढ़ा देगे हवय। अब सबो प्रकार के दुकान, शॅापिंग माॅल, सुपर मार्केट रतिहा आठ बजे तक खोले जा सकही। रविवार के घलो अब लाॅकडाउन नइ रीही अउ ए दिन घलो दुकान मन ह रतिहा आठ बजे तक खोले जा सकही।
उंहें धमतरी जिला म घलो जिला कलेक्टर पी.एस. एल्मा ह सार्वजनिक गतिविधि उपर रोक म छूट दे हवय। ओमन ह जिला के सबो पार्क, पर्यटन स्थल अउ कोचिंग संस्थान मन ल सामाजिक दूरी के पालन करत खोले के मंजूरी दीन हे। संगेसंग जिला के सबो सिनेमा हाॅल अउ थियेटर घलो खोले जाही।
एति कोरोना के नवा वेरिएंट ल देखत दुर्ग जिला के सीमा म प्रवेश करे के पहिली लोगन ल आरटीपीसीआर जांच रिपोर्ट या कोविड टीका के दुनो खुराक पूरा होय के प्रमाण पत्र देना होही। ए संबंध म दुर्ग जिला कलेक्टर सर्वेश्वर नरेंद्र भुरे ह आदेश जारी करीन हे कि अवइया आदेश तक स्कल काॅलेज मन बंद रीही। उंहें जिला म कोचिंग संस्था अउ ट्यूशन सेंटर ल पचास प्रतिशत क्षमता के संग चलाय के अनुमति देगे हवय।
इही बीच प्रदेश म कोरोना संक्रमण के स्थिति म सुधार देखे जावत हे। राज्य म कोरोना ले ठीक होय के दर ह करीबन अंठानबे प्रतिशत तक पहुंच गे हवय। काली राज्य म कोरोना के चार सौ पांच नवा मामला आगू आय हे। प्रदेश म अभी तक कोरोना के सक्रिय मामला के संख्या छह हजार दू सौ आठ हवय।
राज्य मंत्री दर्जा
राज्य सरकार ह प्रदेश के आने आने निगम, मंडल, अभिकरण, बोर्ड अउ प्राधिकरण म मनोनीत अध्यक्ष अउ उपाध्यक्ष मन ल केबिनेट मंत्री अउ राज्यमंत्री के दर्जा दे हवय। एमा ले तेरा झन ल केबिनेट मंत्री अउ तीन झन ल राज्यमंत्री के दर्जा देगे हवय।
एखर बर सामान्य प्रशासन विभाग डहार ले आज एक ठन आदेश जारी करे गेहे । एखर अनुसार राज्य नागरिक आपूर्ति निगम के अध्यक्ष रामगोपाल अग्रवाल, खनिज विकास निगम के अध्यक्ष गिरिश देवांगन गृह निर्माण मंडल के अध्यक्ष कुलदीप जुनेजा, राज्य वन विकास के अध्यक्ष देवेन्द्र बहादुर सिंह, अक्षय उर्जा विकास अभिकरण के अध्यक्ष मिथिलेश स्वर्णकार अउ श्रम कल्याण मंडल के अध्यक्ष शफी अहमद ल केबिनेट मंत्री के दर्जा देगे हवय।
अइसने पाठ्यपुस्तक निगम के अध्यक्ष शैलेष नीतिन त्रिवेदी, भंडार गृह निगम के अध्यक्ष अरूण वोरा, खादी अउ ग्रामोद्योग बोर्ड के अध्यक्ष राजेंद्र तिवारी, रायपुर विकास निगम के अध्यक्ष सुभाष धुप्पड़ अउ मछुआ बोर्ड के अध्यक्ष एम.आर. निषाद ल घलो केबिनेट मंत्री के दर्जा देगे हवय।
सीएम-खाद आपूर्ति
मुख्यमंत्री भूपेश बघेल ह प्रदेश के किसान मन ल रासायनिक उर्वरक खासतौर म यूरिया अउ डीएपी के मंाग के आपूर्ति कराय के निर्देश दीन हे। ए संबंध म ओमन ह कृषि मंत्री रविंद्र चैबे, मुख्य सचिव अमिताभ जैन, अउ कृषि उत्पादन आयुक्त डॅाक्टर एम.गीता संग गोठबात करीन। मुख्यमंत्री ह अधिकारी मनले कीहिन कि थोक अउ चिल्हर विके्रता मनके तीर खाद के भंडारण के जांच नियमित रूप से कराय जाय अउ एखर जमाखोरी करइया मनके खिलाफ कार्रवाई करे जाय।
सिंहदेव बैठक
महात्मा गांधी राष्ट्रीय ग्रामीण रोजगार गारंटी योजना-मनरेगा म छत्तीसगढ़ म चालू वित्त बछर म अभी तक छै करोड़ तेईस लाख मानव दिवस रोजगार के सृजन करे गेहे। भारत सरकार के योजना म ए बछर छत्तीसगढ़ बर तेरा करोड़ पचास लाख मानव दिवस रोजगार सृजन के लक्ष्य राखे गे हावय।
ये जानकारी पंचायत अउ गा्रमीण विकास विभाग डहार ले चलत विभागीय योजना के समीक्षा बइठका म दे गीस। विभागीय मंत्री टी.एस. सिंहदेव ह वीडियो कॅान्फे्रसिंग के माध्यम ले ए बारे म जानकारी लीन अउ जरूरी निर्देश घलो दीन।
दुर्घटना
रायगढ़ जिला के धरमजयगढ़ क्षेत्र म काली होय सड़क हादसा म छै झिन के मउत म मुख्यमंत्री भूपेश बघेल ह दुख जताइन हे। मुख्यमंत्री ह ये दुर्घटना म घायल होय लोगन के बने इलाज कराय जाय के निर्देश दीन हे। उंहें राज्य सरकार डहार ले मृतक मनके परिवार वाला मन ल पच्चीस-पच्चीस हजार रूपिया के आर्थिक मदद दे जावत हे।
खबर के मुताबिक काली सिसरिंगा घाटी के तीर एक ठन मोटर अउ टरक के बीच टक्कर होगे जेखर ले मोटर म बइठे छै झिन लोगन के मउत होगे अउ घायल लोगन के इलाज रायगढ़ अउ धरमजयगढ़ के अस्पताल मन म चलत हे।
ट्रेन परिचालन
रेल प्रशासन ह यात्री मनके सुविधा ल देखत दुर्ग ले नौतनवा के बीच एक ठन साप्ताहिक स्पेशल ट्रेन चलावत हे। ये गाड़ी आठ जुलाई ले दुर्ग ले अउ दस जुलाई ले नौतनवा ले रवाना करे जाही। ए गाड़ी पूरा आरक्षित हवय अउ एमा सिरिफ आरक्षित टिकट वाले यात्री मन ल ही यात्रा के अनुमति दे जाही।
उंहें पर्याप्त संख्या म यात्री नइ होय के सेती रायपुर रेल मंडल ले होके जाने वाला विशाखापट्नम-रायपुर स्पेशल एक्सपे्रस ट्रेन ल एक जुलाई ले पंद्रा जुलाई तक रद्द कर दे गेहे।
अउ अब थोरकुन समाचार सार म-
- संस्कृति मंत्री अमरजीत भगत ह कीहिन हे कि प्रदेश म जल्दीच संस्कृति विभाग म कला परिषद बनाय जाही। संगेसंग हरएक बछर राज्य स्थापना दिवस के मउका म आदिवासी नृत्य महोत्सव कराय जाही।
- महासमुंद म रेहटीखोल के तीर सिंघोड़ा पुलिस डहार ले जांच के दउरान एक ठन गाड़ी ले दू सौ पैंतीस किलो चांदी के ईंट अउ आठ किलो चंादी के गहना के संग करीबन छै लाख रूपिया के नगद राशि बरामद करे गेहे।
- राज्य पुलिस सेवा के उप पुलिस अधीक्षक वर्ग के छब्बीस झन अधिकारी मन ल अतिरिक्त पुलिस अधीक्षक के पद म पदोन्नति देगे हवय।
अउ
- राष्ट्रीय मधुमक्खी पालन अउ शहद मिशन म छत्तीसगढ़ म मधुमक्खी पालन ल बढ़ावा देबर उनतालिस करोड़ रूपिया के प्रस्ताव पारित करे गे हावय।