मन की बात
प्रधानमंत्री नरेन्द्र मोदी ह किहीन कि भारत ह एके दिन म छियासी लाख ले जादा लोगन ल कोविड टीका लगाके एक बड़े उपलब्धि पाय हे। आकाशवाणी ले मन की बात कारीकरम म श्री मोदी ह किहीन कि एक उपलब्धि इक्कीस जून के मिले हे। ओमन किहीन कि हरेक नागरिक तक टीका पहुंचाय के परयास होना चाही। प्रधानमंत्री ह किहीन कि देस के हरेक मनखे ह कोरोना महामारी के लड़ई म महत्ता के भूमिका निभाय हे।
प्रधानमंत्री ह छोटे कस्बा, गांव ले अवइया खिलाड़ी मनके प्रसंसा करत किहीन कि तोक्यो ओलंपिक बर टीम म कतकोन खिलाड़ी सामिल हे, जिखर जीवन प्रेरित करथे। ए खिलाड़ी अपन बर नइ देस बर खेले बर जावत हे।
श्री मोदी ह किहीन कि जल संरक्षण घलो एक किसम के देस सेवा हरय।रोका-छेका अपील
मुख्यमंत्री भूपेश बघेल ह किसान मन ले अपील करीन हे कि छत्तीसगढ़ के परंपरा के मुताबिक अवइया एक जुलाई ले अपन-अपन गांव म रोका-छेका अभियान सुरू करय। संगेसंग पशुपालक अपन मवेशी ल खुल्ला म चराई बर छोड़े के जगह गौठान म भेजे, जिहां चारा-पानी के बेवस्था करे गेहे।
मुख्यमंत्री ह किसान अउ पशुपालन के नाव अपन संदेस म किहीन कि बरसा के दिन म मवेसी मन म घलघोटू अउ एकटंगिया बीमारी होथे, जेखर बचाव बर अपन मवेशी ल टीका लगवावय।मुख्यमंत्री-समीक्षा बैठक
मुख्यमंत्री भूपेश बघेल ह सुराजी गांव योजना म गांव म बनाए गे गौठान म मवेसी मन बर हरियर चारा देवाय बर कार्ययोजना बनाके काम करे के निरदेस दीन हे। ओमन किहीन कि गौठान म चारागाह बर आरक्षित भूईंया म जरूरी रूप ले नेपियर घास लगाय जाय अउ वन विभाग वन म घास लगाय के काम प्राथमिकता ले करे के संगेसंग वन ले हरियर चारा गौठान तक अमरावय। मुख्यमंत्री ह गौठान म चारा के संग मवेसी मन बर पानी के बेवस्था अउ सेड बनाय बर किहीन।
श्री बघेल काली अपन निवास कार्यालय म राखे गे बड़का अधिकारी मनके बइठका म आने-आने योजना के समीक्षा करीन।
उहें, मुख्यमंत्री भूपेश बघेल ह लघु वनोपज के काम करत स्व-सहायता समूह के आमदनी बढ़वार बर लघु वनोपज म आधारित प्रसंस्करण इकाई के जादा ले जादा संख्या म लगाय के निरदेस दीन।प्रधानमंत्री फसल बीमा योजना
प्रधानमंत्री फसल बीमा योजना म एसो फसल बीमा करे के आखिरी तारीख अवइया पन्द्रह जुलाई तय करे गेहे। राज्य म फसल - धान सिंचित, धान असिंचित, मक्का, मूंगफली, सोयाबीन, उरीद अउ राहेर ल फसल बीमा बर अधिसूचित करे गेहे। ऋण लेवइया अउ बिना ऋण वाले किसान जिखर तीर भूईंया हरय या फेर बटाईदार हवय, ए योजना म सामिल हो सकत हे।कोरोना टीकाकरण/समाचार
प्रदेश म कोरोना संक्रमण म नियंत्रण अउ रोकथाम बर अट्ठारह बछर ले जादा आयु वर्ग के लोगन के टीकाकरण के काम जोरदरहा चलत हे। काली छब्बीस जून के तीन लाख पचास हजार ले जादा लोगन ल टीका लगाय गीस। राज्य म अब तक अट्ठारह ले चवालीस बछर के इक्कीस लाख नौ हजार ले जादा लोगन ल पहिली टीका लग गेहे।
इही बीच, प्रदेश म कोरोना संक्रमण के स्थिति म सरलग सुधार होवत हे। राज्य म संक्रमण दर घटके एक प्रतिशत होगे हे। प्रदेस म अभी सक्रिय मामला ेके संख्या छह हजार सात सौ बीस हवय।कोरोना-छात्रवृत्ति
कोरोना संक्रमण ले अपन महतारी, पिता ल खो चुके लइका मन बर राज्य सरकार अभिभावक के भूमिका निभाही। राज्य सरकार ल निरदेस देहे कि कोरोना के सेती मउत होय लोगन अउ उंखर घर के मनखे मनके सूची देवाय जाय, जेखर ले निराश्रित लइका मनके पढई-लिखई अउ देख-रेख के बेवस्था करे जा सकय। स्कूल शिक्षा सचिव कमलप्रीत सिंह ह बतईन कि ए संबंध म राज्य सरकार ह तीन ठिन फइसला लेहे, जेमा स्कूल के फीस, लइका मन ल छात्रवृत्ति दे अउ स्वामी आत्मानंद इंग्लिश मीडियम स्कूल म भर्ती देना सामिल हे।शिक्षक पात्रता प्रमाण पत्र
छत्तीसगढ़ शिक्षक पात्रता परीक्षा प्रमाण पत्र के वैधता अब आजीवन रइही। स्कूल शिक्षा विभाग ह एखर वैधता के सात बछर के बेरा ल खत्म कर देहे।
खबर के मुताबिक छत्तीसगढ़ शिक्षक पात्रता के संबंध म बछर दू हजार ग्यारह के मार्गदर्शिका म एक घांव परीक्षा पास करइया बर प्रमाण पत्र के वैधता सात बछर बर तय रिहीस, जउन ल अब खत्म कर दे गेहे अउ जारी आदेस म केहे गेहे कि बछर दू हजार ग्यारह ले अब तक जम्मों सिक्षक पात्रता परीक्षा प्रमाण पत्र मान्य होही।मोहल्ला क्लास
प्रदेस म एसो घलो आॅनलाइन कक्षा चलाय के संगेसंग मोहल्ला-पारा कक्षा पाछु बछर जइसन चलाय के दिसा-निरदेस आयुक्त लोक सिक्षण कमलप्रीत सिंह ह जारी कर देहे। जारी निरदेस म केहे गेहे कि मोहल्ला कक्षा बर सार्वजनिक जघा ल चिन के मोहल्ला कक्षा म मौजूद रहइया प्राथमिक अउ माध्यमिक कक्षा के पढ़ईया लइका मनके हाजरी रोजे ले जाय। संगेसंग हर महीना टेस्ट लेके नंबर के रिकार्ड स्थानीय स्तर म सुरक्षित रखे जाय।नेता प्रतिपक्ष-भ्रष्टाचार आरोप
नेता प्रतिपक्ष धरमलाल कौशिक ह स्कूल शिक्षा विभाग कोति ले सूखा रासन बांटे म करोड़ों रूपिया के भ्रष्टाचार के आरोप लगाईन हे। श्री कौशिक ह राज्य सरकार ने ए मामला के मुख्य सचिव या हाईकोर्ट के रिटायर जज ले जांच कराय के मांग करीन हे। ओमन ए संबंध म स्कूल शिक्षा मंत्री डाॅक्टर प्रेमसाय सिंह टेकाम ल चिट्ठी घलो लिखे हे। श्री कौशिक ह अपन चिट्ठी म विभागीय अधिकारी मन उपर विधानसभा गलत जानकारी देके आरोप लगाईन हे। ओमन बस्तर, कोंडागांव अउ सूरजपुर जिला म बिना निविदा के करोड़ों रूपिया के खरीदी करे के बात किहीन।माओवादी-मुठभेड़
दंतेवाड़ा जिला म आज सुरक्षा बल संग होय मुठभेड़ एक इनामी माओवादी मारे गेहे, जेखर सव बरामद कर ले गेहे।
जिला के पुलिस अधीक्षक अभिषेक पल्लव ह घटना के पुष्टि करत बतईन कि डीआरजी के जवान तलासी अभियान म निकले रिहीन। इही बेरा पोरडेम के जंगल म घात लगाय बइठे माओवादी मन ह जवान मन उपर फायरिंग सुरू कर दीन। सुरक्षा बल कोति ले करे गे जवाबी कार्रवाई म ए माओवादी मारे गीस। एखर उपर पांच लाख रूपिया के इनाम घोसित रिहीस।लोक अदालत
राष्ट्रीय विधिक प्राधिकरण कोति ले एसो होवइया नेशनल लोक अदालत के तारीख तय कर दे गेहे। अवइया दस जुलाई, ग्यारह सितंबर अउ ग्यारह दिसंबर के लोक अदालत लगाय जाही।
खबर के मुताबिक एसो पहली लोक अदालत दस अप्रैल के होवइया रिहीस, जउन ल कोरोना संक्रमण के सेती नइ लगाय गे रिहीस हे।हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह आज रतिहा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म कोरोना संक्रमण ले बचाव के संगेसंग राज्य सासन के नीति, योजना अउ कारीकरम के संबंध म जानकारी दीही। ए कारीकरम ल मीडियम वेव नौ सौ इक्यासी किलोहर्ट्ज म सुने जा सकथे। एला प्रदेस स्थित आकाशवाणी के जम्मों केन्द्र एक संघरा रिले करही।अउ अब पेश हे मौसम के हाल..
मौसम विभाग ह प्रदेस म आरेंज अलर्ट जारी करत अवइया चैबीस घंटा म सबो जिला गरज-चमक संग झमाझम बरसा होय के संभावना जताय हे। मौसम विभाग के मुताबिक उत्तरी छत्तीसगढ़ के उपरी हवा म एक चक्रवाती घेरा बने हे, जेखर परभाव ले प्रदेस म बादर अउ बरसा के संभावना हवय।