विस-मानसून सत्र
छत्तीसगढ़ विधानसभा के मानसून सत्र अवइया छब्बीस जुलाई ले सुरू होही, जउन तीस जुलाई तक चलही। ए सत्र म पांच बइठका होही। ए बेरा म वित्तीय कामकाज के संगेसंग आने सासकीय काम करे जाही। विधानसभा सचिवालय ह एखर अधिसूचना जारी कर देहे।
मुख्यमंत्री-अपील/कोरोना टीकाकरण
मुख्यमंत्री भूपेश बघेल ह लोगन ले अपील करीन हे कि ओमन पड़ोसी राज्य, मध्यप्रदेश अउ महाराष्ट्र म कोरोना वायरस के डेल्टा प्लस वैरियंट के बाढ़त संक्रमण ल देखत ऐहतियात बरतय। छत्तीसगढ़ म अभी तक डेल्टा प्लस वैरियंट के कोनों मामला आगू नइ आय हे।
इही बीच, राज्य म कोविड टीकाकरण अभियान जोरदरहा चलाय जात हे। काली राज्य म दू लाख तीन हजार सात सौ बयानवे कोविड टीका लगाय गीस। कोविन पोर्टल के मुताबिक प्रदेस के उन्नीस ठिन जिला म कोरोना वैक्सीन खराब होय के दर एक प्रतिशत ले भी कम हे।
रायगढ़ जिला म जिला कलेक्टर के निरदेस म काली एक विशेष टीकाकरण अभियान चलाय जाही। उहें, टीकाकरण ल बढ़ावा दे बर जांजगीर-चांपा के एसडीएम श्री सुभाष राज ह बम्हनीडीह ब्लाॅक म पन्द्रह ठिन टीकाकरण केन्द्र म सेल्फी जोन बनवाय हे अउ सबले बने सेल्फी ल हर हफ्ता इनाम दे जावत हे।
इही बीच, रईपुर जिला म कोविड टीका लगवाय के बाद कोन्हों भी किसम के परेसानी होय म मदद बर नोडल अधिकारी नियुक्त करे गेहे। जरूरत पड़े म लोगन टोल फ्री नंबर – सात आठ-आठ शून्य एक – शून्य शून्य तीन एक तीन- शून्य शून्य तीन एक चार अउ शून्य शून्य तीन एक पांच म चैबीस घंटा फोन कर सकत हे।
उहें, बलरामपुर जिला म घरों-घर जाके टीका लगाय जात हे।
कोरोना-समाचार
प्रदेस म काली कोरोना संक्रमण के तीन सौ सत्रह नवा मरीज मिलीन। उहें, छह सौ ले जादा मरीज ठीक होईन हे। अभी सात हजार तीन सौ चैदह मामला सक्रिय हवय।
इही बीच, रईपुर जिला प्रशासन ह कोरोना संक्रमण के स्थिति म सरलग सुधार ल देखत तालाबंदी के नियम म छूट देहे। जिला कलेक्टर सौरभ कुमार ह एक आदेस जारी करके दुकान मन ल खोले के समय बढ़ा देहे। इतवार के घलो तालाबंदी के आदेस हटा दे गेहे। फेर, हर दिन रतिहा आठ बजे ले बिहनिया छह बजे तक कफ्र्यू लागू रइही।
भाजपा-काला दिवस
पच्चीस जून उन्नीस सौ पचहत्तर के देस म आपातकाल लगाय गे रिहीस। भारतीय जनता पार्टी कोति ले ए दिन ल आज छत्तीसगढ़ समेत देसभर म काला दिवस के रूप म मनाय जात हे। ए मउका म महासमुंद म राखे गे एक ठिन कारीकरम म भाजपा के राष्ट्रीय महामंत्री अउ राज्यसभा सांसद दुष्यंत कुमार गौतम आज जिला के दउरा म पहुंचीन। ए बेरा म मीडिया ले गोठबात करत श्री गौतम ह बछर उन्नीस सौ पचहत्तर म लगाय गे आपातकाल के फइसला ल लोकतंत्र के खिलाफ बतईन। महासमुंद दौरा के बेरा श्री गौतम ह जिला पदाधिकारी, मंडल प्रभारी अउ मंडल अध्यक्ष के बइठका लीन।
बइठका म ओमन पार्टी पदाधिकारी मन ले किहीन कि लोगन ल कोविड टीका लगवाय खातिर प्रेरित करय। संगेसंग केन्द्र सरकार के योजना के प्रचार-प्रसार करे जाय।
एखर पहिली, श्री गौतम म काली रईपुर म भाजपा अनुसूचित जाति के मोर्चा के प्रदेश पदाधिकारी श्रेणी के बइठका लीन।
इही बीच, राज्यसभा सांसद सरोज पांडेय ह घलो कांग्रेस सरकार कोति ले बछर उन्नीस सौ पचहत्तर म लगाय गे आपातकाल के फइसला के निंदा करीन हे।
वृक्षारोपण
मुख्यमंत्री भूपेश बघेल ह प्रदेश के हरेक जिला म कम से कम दस एकड़ भूईंया म ‘‘प्रदर्शन वन‘‘ बनाय के निरदेस दीन हे। मुख्यमंत्री ह भरोसा जताईन कि ए ‘प्रदर्शन वन‘ ले जादा ले जादा लोगन ‘‘मुख्यमंत्री वृक्षारोपण प्रोत्साहन योजना‘‘ के फायदा ले सकही। चुने गे क्षेत्र म इमारती अउ आने प्रजाति के पौधा लगाय के संगेसंग औषधि पौधा लगाय जाही।
खबर के मुताबिक राज्य सरकार ह प्रदेश म वृक्षारोपण ल बढ़ावा दे अउ किसान मन आमदनी के आने जरिया देवाय खातिर पाछु एक जून ले ए योजना सुरू करे हे। योजना म किसान कहूं अपन खेत म पेड़ लगावत हे, त ओला अवइया तीन बछर तक हर बछर दस हजार रूपिया एकड़ के दर ले प्रोत्साहन राशि दे जाही।
उहें, प्रदेस म वृक्षारोपण ल बढ़ावा दे बर ‘‘पौधा तुहंर द्वार‘‘ योजना काली ले सुरू करे गेहे। योजना म लोगन ल पौधा घर तक अमरा के मुफत म दे जाही। वन मंत्री मोहम्मद अकबर ह पौधा बांटे बर गाड़ी ल काली रईपुर ले हरियर झंडी देखाके रवाना करीन। एसो प्रदेस म करीबन दू करोड़ सत्ताईस लाख पौधा बांटे के लक्ष्य हवय।
अइसने, उद्यानिकी फसल ल बढ़ावा दे बर ‘‘एक जिला-एक उत्पाद‘‘ कारीकरम चलाय जात हे। कारीकरम म पपीता, आम अउ सीताफल समेत आने फसल ल चुने गेहे। उद्यानिकी विभाग कोति ले प्रदेस म चालू खरीफ मौसम म एक लाख ‘‘पोषण बाड़ी‘‘ बनाय के तियारी सुरू करे गेहे। ऐति, दुरूग लोकसभा क्षेत्र म आज पौधा रोपण करे गीस।
एकलव्य विद्यालय-प्रस्ताव
आवासीय अउ आश्रम शैक्षणिक संस्थान समिति संचालक मंडल ह चालू सिक्षण सत्र म कक्षा ग्यारहवीं अउ बारहवीं के पढ़ईया लइका मन ल प्रतियोगी परीक्षा के तियारी खातिर अलग ले कोचिंग देके प्रस्ताव केन्द्र सरकार ल भेजे के अनुमोदन करीन हे। आदिम जाति अउ अनुसूचित जाति विकास मंत्री डाॅक्टर प्रेमसाय सिंह टेकाम के अगुवई म आज राजधानी रईपुर म संचालक मंडल के बइठका राखे गीस। बइठका म बताय गीस कि चालू सिक्षा सत्र म केन्द्र सरकार ह प्रदेस बर चार ठिन नवा एकलव्य आदर्श आवासीय विद्यालय खोले के मंजूरी देहे।
अंबिकापुर-सीआईडी जांच
भारतीय प्रशासनिक सेवा के रिटायर अधिकारी अउ सरगुजा रेंज के पूर्व आईजी के.सी. अग्रवाल के खिलाफ लगाय गे आरोप के सीआईडी जांच शुरू होगे हे। ए संबंध म दू सदस्यीय जांच टीम अंबिकापुर पहुंच गेहे। एखर पहिली, ए टीम ह जशपुर म घलो ए मामला म कुछेक लोगन ले पूछताछ करीन।
खबर के मुताबिक पूर्व आईएएस अधिकारी श्री अग्रवाल के खिलाफ विभागीय अउ गैर विभागीय तौर म कई ठन मामला म गंभीर सिकईत दरज करे गेहे।
गांजा-बरामद
महासमुंद जिला म ढाई करोड़ रूपिया ले जादा कीमत के गांजा बरामद करे गेहे। ए मामला म पुलिस ह दू झिन आरोपी ल गिरफ्तार करे हे, जेमा ले एक झिन उत्तरप्रदेश अउ एक झिन बिहार के रहवइया हरय।
खबर के मुताबिक टेमरी नाका तीर पुलिस ह गाड़ी के जांच के बेरा एक ट्रक ले करीबन तेरह सौ क्विंटल गांजा बरामद करीन। ए गांजा साग-भाजी के नीचे बोरी म भरके रखे गे रिहीस। पूछताछ म आरोपी मन बतईन कि ए गांजा ओड़िसा ले उत्तरप्रदेश ले जाय जात रिहीस।
हवाला-रैकेट
रईपुर म एक बड़े हवाला रैकेट के खुलासा होय हे। बताय जात हे कि ए हवाला कारोबार सौ करोड़ रूपिया ले जादा के हे। आयकर विभाग ह हाल ही म रईपुर म चार ठिन ठिकाना म छापामार कार्रवाई करे रिहीन, जेमा रईपुर के देवेन्द्र नगर म एक हवाला करोबारी के घर ले पांच करोड़ रूपिया अउ उंखर आफिस ले एक करोड़ रूपिया जब्त करे गीस।
मौसम
अवइया चैबीस घंटा म प्रदेस म एक-दू जगह म भारी बरसा होय के संभावना हवय। मुख्य रूप ले रईपुर अउ बस्तर संभाग म झमाझम बरसा हो सकत हे।
रईपुर के मौसम विज्ञान केन्द्र के मुताबिक उत्तरप्रदेश ले उत्तर-पूर्व बंगाल के खाड़ी तक एक द्रोणिका बने हे। उहें, झारखंड अउ ओखर तीर-तखार के क्षेत्र म एक चक्रवाती घेरा सक्रिय हे, जेखर असर ले काली राज्य म कतकोन जगह म छुटपुट बरसा अउ गरज-चमक संग गाज गिरे के संभावना हवय।