अंतर्राष्ट्रीय योग दिवस -1
आज दिन भर अंतर्राष्ट्रीय योग दिवस मनाये जात हे। बड़ संख्या म लोगन मन ह वीडियो कॅान्फे्रसिंग के माध्यम ले एमा भाग लेथ हे। प्रधानमंत्री नरेंद्र मोदी ह कीहिन कि एक डहार जिहंा संसार ह कोविड महामारी ले लड़त हे, उंहें एखर ले निपटे म योग ह आसा के किरण बने हे। सातवंा अंतर्राष्ट्रीय योग दिवस के मउका म देश वासी मन ल संबोधित करत श्री मोदी ह कीहिन कि महामारी क सेती पाछू दू बछर ले योग दिवस म कोई प्रमुख सार्वजनिक कार्यक्रम के आयोजन नइ होय हे। फेर योग दिवस के बारे म लोगन मन म उत्साह के कमी नइ होय हे।
प्रधानमंत्री ह कीहिन कि स्वस्थ अउ सुखी जीवन शैली के रद्दा योग ह दिखाय हे। ओमन ह विश्वास जताइन कि योग तन अउ मन ल स्वस्थ राखे बर बहुत जरूरी हे। श्री मोदी ह कीहिन कि चिकित्सा विज्ञान म आज चिकित्सा उपचार के अलावा घलो आने उपचार के तरीका उपर जोर दे जात हे। ये योग ह उपचार प्रक्रिया म मदद करथे।
अंतर्राष्ट्रीय योग दिवस -2
एति छत्तीसगढ़ म घलो अंतर्राष्ट्रीय योग दिवस के मउका म करीब दस लाख लोगन वर्चुअल माध्यम ले योगासन करीन। राज्य सरकार के सामाजिक कल्याण मंत्रालय अउ छत्तीसगढ़ योग आयोग ह संयुक्त रूप ले वर्चुअल योग मैराथन के आयोजन करे हे।
ए वर्चुअल योगाभ्यास कार्यक्रम म राज्यपाल अनुसूइया उइके, मुख्यमंत्री भूपेश बघेल सहित राज्य मंत्रिमंडल के सदस्य, जनप्रतिनिधि अउ आम नागरिक मन ह सामिल होइन। एखरे संग आज बीहनिया छत्तीसगढ़ के प्रयाग राजिम नगरी म केंद्र सरकार के संस्कृति मंत्रालय डहार ले अंतर्राष्ट्रीय योग दिवस म कार्यक्रम के आयोजन करे गीस। ए कार्यक्रम म कतको प्रतिभागी मन ह भाग लीन अउ योग के अलग-अलग आसन मनके प्रदर्शन करीन।
इही बीच मुख्यमंत्री भूपेश बघेल ह योग दिवस के मउका म आज अपन रायपुर स्थित निवास कार्यालय म बीहनिया योग अभ्यास करीस। ए अवसर म ओमन ह प्रदेशवासी मन ल बधाई अउ शुभकामना देत योग ल अपन दिनचर्या म सामिल करे के अपील करीन। ओमन कीहिन कि योग हमर बर बहुत महत्ता के हे। रोज योग करइया हमेशा निरोगी रथे अउ ये ह कोरोना काल म स्पष्ट होगे हे।
अंतर्राष्ट्रीय योग दिवस -3
प्रदेश म कतकोन जगा मन म आने आने सामाजिक अउ स्वयंसेवी संस्था मन डहार ले कार्यक्रम के आयोजन करे गीस। राजधानी रायपुर के सुभाष स्टेडियम म मृत्युंजय योग अकादमी डहार ले योगाभ्यास करे गीस। प्रतिभागी मन ह ए बेरा आने-आने आसन मनके प्रदर्शन करीन। संस्था के प्रमुख अउ योग सिखइया मंजू झा ह बताइन कि कोरोना संक्रमण के ए दौर म योग के महत्ता ल सबो लोगन मन जान डरे हे।
उंहें वर्चुअल योग मैराथन म राजधानी के तेलीबांधा तालाब के तीर म नान्हें लइका मन घलो सामिल होइन। एति दुर्ग म हेमचंद यादव विश्वविद्यालय म योग अउ प्रशिक्षण कार्यक्रम के आयोजन करे गीस। ए मउका म आर्यभट्ट सम्मान ले सम्मानित नागभूषण रेड्डी ह योग के सरल विधि ले स्वस्थ रेहे के गुर सिखाइस।
एखर अलावा छत्तीसगढ़ सशस्त्र सीमा बल के जवान मन ह भिलाई म अलग-अलग आसन अउ प्राणायाम के अभ्यास करीन। ए मउका म उप महानिरिक्षक सुधीर कुमार ह कीहिन कि योगासन मनखे के जीवन बर बहुत उपयोगी हे। ओमन ह जवान मनले योग ल अपन जीवन के जरूरी हिस्सा बनाये के अपील करीन।
अंतर्राष्ट्रीय योग दिवस -4
उंहें सीमा सुरक्षा बल-बीएसएफ के जवान मन घलो ल अपन दिनचर्या म सामिल करे के शपथ लीन। ए अवसर म बीएसएफ के कमांडेट अनंत सिंह सहित अधिकारी अउ कर्मचारी मन मौजूद रीहिन।
ओति कोंडागांव जिला म सीआरपीएफ के जवान मन ह योगाभ्यास करीन। एखर अलावा अलग-अलग संगठन अउ संस्था के लोगन मन घलो योग दिवस मनाइन।
एति महासमुंद जिला मुख्यालय म घलो लोगन मन ह योगा अभ्यास करके निरोग रेहे के संदेश दीन।
ओति अंबिकापुर म शासकीय पाॅलिटेक्निक काॅलेज म योग अभ्यास के आयोजन करे गीस। ए मउका म काॅलेज के सबो अधिकारी अउ कर्मचारी मन मौजूद रीहिन।
धमतरी जिला म घलो लोगन मन ह सामूहिक रूप ले योगाभ्यास करीन। प्रजापति ब्रम्हकुमारी ईश्वरी विश्वविद्यालय, रेडक्रास सोसायटी, जेसीआई, के अलावा भाजपा अउ कंाग्रेस के कार्यकर्ता मन ह योग दिवस के मउका म लोगन मन ले योग ल अपनाय के अपील करीन।
प्रदेश के आने जिला मन म घलो योग दिवस के मउका म आने-आने कार्यक्रम आयोजित करे जाय के खबर मिले हे।
कोरोना टीकाकरण
केंद्र सरकार ह अठारा बछर ले जादा उमर के सबो लोगन मन ल कोविड वैक्सीन निशुल्क दे जाय बर आज ले अभियान के शुरूआत करे हे। एखर उद्देश्य कोविड टीकाकरण अभियान ल मजबूत करना अउ आगू बढ़ाना हे। अठारा बछर ले जादा उमर के सबो लोगन मन कोन्हो भी सरकारी टीकाकरण केंद्र म मुफ्त म टीका लगवा सकत हे। केंद्र सरकार, कुल टीका उत्पादन के पचहत्तर प्रतिशत टीका खरीदहीं अउ राज्य मनके संग केंद्र शासित प्रदेश मन ल फोकट म उपलब्ध कराही। कोनो भी राज्य सरकार ल वैक्सीन लेबर पइसा खर्चा नइ करे ल पड़य। सबो सरकारी अउ निजी टीकाकरण केंद्र मन म पंजीकरण के सुविधा होही। अब कोविन एप म पहिली ले पंजीकरण करना जरूरी नइ हे ।
राज्य काॅमन सर्विस सेंटर अउ काॅल सेंटर मनके सहायता ले नागरिक मन बर टीका के स्टाॅल बुक करे म मदद कर सकथे।
एति छत्तीसगढ़ म घलो कोविड टीकाकरण जोर शोर ले चलत हे। कोविड वैक्सीन लगवइया सबो वर्ग के लोगन मन बहुते खुश हे। राज्य म अठारा ले चालीस बछर के आयु वर्ग के आबादी करीब एक करोड़ पैंतालिस लाख हे। जेमा ले करीब बारा लाख लोगन मन ल अब तक कोविड टीका लगाये जा चुके हे। युवा मन ह केंद्र सरकार डहार ले निशुल्क वैक्सीनेशन के स्वागत करे हे।
वन्यजीव बोर्ड-बैठक
मुख्यमंत्री भूपेश बघेल ह आज रायपुर स्थित अपन निवास कार्यालय म छत्तीसगढ़ राज्य वन्य जीव बोर्ड के बैठक के दउरान अचानकमार टाइगर रिजर्व म बाघ मनके संख्या म बढ़ोत्तरी बर करीब छब्बीस करोड़ रूपिया के काम के वर्चुअल शुभारंभ करीन। ए मउका म मुख्यमंत्री ह कीहिन कि छत्तीसगढ़ म बाघ मनके संख्या म बढ़ोत्तरी बर राज्य सरकार ह पहल करे ल जात हे।
बैठक म गुरू घासीदास राष्ट्रीय उद्यान अउ तमोर पिंगला अभ्यारण्य ल टाईगर रिजर्व घोषित करे के प्रस्ताव राखे गीस।
मुख्यमंत्री-लोकार्पण भूमिपूजन
मुख्यमंत्री भूपेश बघेल ह आज वर्चुअल कार्यक्रम बस्तर अउ सुकमा जिला म दू सौ अठारा करोड़ रूपिया ले जादा के लागत के आने-आने विकास काम के लोकार्पण अउ भूमिपूजन करीन। एमा बस्तर जिला म एक सौ अड़सठ करोड़ इक्कीस लाख रूपिया के लागत के सत्तर विकास के काम सामिल हे।
उंहें मुख्यमंत्री ह सुकमा जिला म चैरानबे करोड़ दस लाख रूपिया के लागत के अठ्यासी विकास के काम मनके लोकार्पण अउ भूमिपूजन करीन।
मौसम
प्रदेश म अवइया चैबीस घंटा म एक दू जगा मन म गरज चमक के संग आंधी अउ आकासीय बिजली गिरे के संभावना हे। मौसम विभाग ले मिले जानकारी के अनुसार उत्तर-पश्चिम बिहार अउ ओखर आसपास एक चक्रवाती घेरा बने हे। जेखर असर ले प्रदेश म बदली अउ बरसा के स्थिति बनत हे।
ट्रेन रद्द
रायपुर रेल मंडल ले चलइया विशाखापट्नम-रायपुर-विशाखापट्नम स्पेशल एक्सपे्रस के परिचालन यात्री मनके संख्या म कमती होय के सेती आज ले अवइया एक जुलाई तक रद्द कर दे गेहे।