प्रधानमंत्री कोविड-टीकाकरण
प्रधानमंत्री नरेन्द्र मोदी ह किहीन हे कि केन्द्र सरकार ह हरेक मनखे मन ल मुफत म कोविड टीका लगवाही। ओमन किहीन कि इक्कीस जून ले टीकाकरण क्षेत्र के विस्तार करे जाही। प्रधानमंत्री ह देस म वायरस के बदलत स्वरूप के सेती अवइया चुनौती ले निपटे बर चिकित्सा ल अउ जादा मजबूत बनाय उपर जोर दीन।
प्रधानमंत्री ह आज कोविड-नाइंटीन के मुकाबला करे म तैनात अग्रिम पंक्ति के कार्यकर्ता मन बर बिसेस प्रसिक्षण कारीकरम के सुरूवात करीन। ए प्रसिक्षण कारीकरम छब्बीस राज्य मनके एक सौ ग्यारह प्रसिक्षण केन्द्र मन म सुरू करे जात हे।
प्रधानमंत्री फसल बीमा योजना
प्रधानमंत्री फसल बीमा योजना के तहत प्रदेस के चार लाख बयालीस हजार किसान मन ल अब तक पांच सौ अट्ठाईस करोड़ इकचालीस लाख रूपिया ले जादा के भुगतान करे जा चुके हे। कृषि विभाग ले मिले जानकारी के मुताबिक ए बीमा दावा रासि किसान मन ल खरीफ सीजन के फसल के एवज म दे गेहे। जानबा के मुताबिक पाछु खरीफ सीजन म राज्य के तेरह लाख पंचानवे हजार ले जादा किसान मन ह अपन फसल के बीमा कराय रिहीन।
मुख्यमंत्री-लोकार्पण/भूमिपूजन
मुख्यमंत्री भूपेश बघेल ह आज वर्चुअल कारीकरम म कोरबा अउ जांजगीर-चांपा जिला म करीबन दू सौ सत्ताईस करोड़ रूपिया के विकास काम के लोकार्पण अउ भूमिपूजन करीन। एमा कोरबा जिला बर एक सौ चार करोड़ रूपिया के लागत के एक सौ इक्कीस ठिन विकास काम सामिल हे। उहें, मुख्यमंत्री ह जांजगीर-चांपा जिला म करीबन एक सौ तेईस करोड़ रूपिया के लागत के एक सौ चवालीस ठिन निर्माण काम के लोकार्पण अउ भूमिपूजन करीन।
औषधीय पौधा-वेबीनार
औषधि वाले पौधा के खेती ल बढ़ावा दे बर प्रदेस म एसो एक करोड़ औषधि पौधा लगाय जाही अउ संगेसंग पंरपरागत पद्धति के माध्यम ले लोगन मनके इलाज करे बर राजधानी राईपुर के पंडरी म जल्दीच ‘‘वैद्य अस्पताल‘‘ खोले जाही।
ए जानबा वन मंत्री मोहम्मद अकबर ह ‘‘औषधि पौधों का कृषिकरण और छत्तीसगढ़ में संभानाएं‘‘ बिसय उपर रईपुर म राखे गे वेबिनार म दीन। वन मंत्री ह राज्य औषधि पादप बोर्ड डहार ले औषधि पौधा के कृषिकरण के दिसा म होवत परयास के प्रसंसा करत एला किसान मनके इनकम बढ़ाय बर जरूरी बतईन।
पशु-टीकाकरण
जानवर मन ल होवइया गलघांेटू अउ एकटंगिया बीमारी ले बचाव बर अब तक राज्य म सत्रह लाख चैदह हजार ले जादा पशु मन ल टीका लगाय जा चुके हे। पशुधन विकास विभाग ले मिले जानबा के मुताबिक बरसात के मौसम म गलघोंटू बीमारी ले पशुधन के हानि ल देखत जम्मों जानवर पोसइया मन ल पशु मन ल टीका लगाय के अपील करे हे। ए टीका ह पशु चिकित्सालय म लगाय जावत हे।
सीबीएसई-परिणाम
केन्द्रीय माध्यमिक शिक्षा बोर्ड-सी.बी.एस.ई. ह कोविड ले आय समस्या के सेती बोर्ड के दसवीं अउ बारहवीं कक्षा के रद्द करे गे परीक्षा के परिणाम बीस अउ इकतीस जुलाई के घोसित करही। सी.बी.एस.ई. के परीक्षा नियंत्रक ह काली एक ठिन समाचार एजेंसी ल बतईन कि जउन छात्र मन ह मिले नंबर ले संतुष्ट नइ होही, त ओमन ल कोविड महामारी के समस्या के कमती होय के बाद एक घांव फेर परीक्षा म बइठे के मउका दे जाही।
अंतर्राष्ट्रीय योग दिवस
अंतर्राष्ट्रीय योग दिवस इक्कीस जून के पूरा विश्व म मनाय जाही। ए बछर योग दिवस के बिसय हे – ‘‘आरोग्य बने रहने के लिए योग‘‘। कोविड महामारी ले विश्व के लोगन मनके जिनगी अउ रोजगार ह प्रभावित होय हे। अइसन बेरा म जम्मों लोगन मनके स्वास्थ्य ह बढ़िया राहय, एखर बर योग ह बड़का भूमिका निभाथे।
साइबर धोखाधड़ी-हेल्पलाइन नंबर
केन्द्रीय गृह मंत्रालय ह साइबर धोखाधड़ी ले होवइया रूपिया-पइसा के नुकसान ल रोके अउ ए बारे म सिकईत दरज कराय बर राष्ट्रीय हेल्पलाइन नंबर – एक पांच-पांच दू छह शून्य जारी करे हे। साइबर धोखाधड़ी के सिकाय होय लोगन मन अपन सिकईत ल ए नंबर म दरज करा सकथे।
ए हेल्पलाइन अउ रिपोर्टिंग प्लेटफार्म ल गृह मंत्रालय कोति ले भारतीय साइबर अपराध समन्वय केन्द्र के मदद ले सुरू करे गेहे, जेमा भारतीय रिजर्व बैंक के संगेसंग देस के जम्मों बड़का बैंक मन घलो मदद करत हे। ए हेल्पलाइन अउ रिपोर्टिंग प्लेटफार्म ल सात राज्य अउ केन्द्रसासित प्रदेस मन म परयोग करे जात हे, जिहां देस के पैंतीस प्रतिशत आबादी ह एखर फायदा उठावत हे।
कांग्रेस-प्रदर्शन
प्रदेस कांग्रेस कमेटी के आह्वान म कांग्रेस पदाधिकारी अउ कार्यकर्ता मन ह आज राजधानी रईपुर के संगेसंग प्रदेश के जम्मों जिला मन म कथित महंगाई के विरोध म चक्काजाम करीन। रईपुर के राजेन्द्र नगर के संगेसंग महासमुंद के कुहरी गांव के तीर संसदीय सचिव के अगुवई म चक्काजाम करे गीस। त उहें, बेमेतरा जिला म कांग्रेस के लोगन मन ह महंगाई ल लेके कांग्रेस भवन ले पुराना बस स्टैंड तक साईकिल रैली निकाल के चक्काजाम करीन।
ओति, दुरूग जिला म सिरसा गेट के तीर कांग्रेस कार्यकर्ता मन डहार ले चक्काजाम करे गीस।
प्रदेस के आने जिला मन ले घलो चक्काजाम करे जाय के खबर मिले हे।
मुख्यमंत्री वृक्षारोपण प्रोत्साहन योजना
मुख्यमंत्री वृक्षारोपण प्रोत्साहन योजना के तहत प्रदेस के स्कूल मन म पेड़-पौधा लगाय के काम ल बने ढंग ले बढ़ाय बर युवा अउ ईको क्लब के गठन करे गेहे। ए बारे म सिक्षा विभाग कोति ले जिला सिक्षा अधिकारी अउ जिला मिशन समन्वयक मन ल निरदेस जारी करे हे। वृक्षारोपण बर कटहल, मुनगा अउ आमा के पौधा लगाय जाही। ए रूख-राई के देखभाल के जिम्मेवारी ईको क्लब के लइका मन ल दे गेहे।
माओवादी-मुठभेड़
सुकमा जिला म आज सुरक्षा बल मनके संग होय मुठभेड़ म एक झिन वर्दीधारी महिला माओवादी मारे गीस।
बस्तर आईजी पी. सुंदरराज ह घटना के पुष्टि करत बतईन कि केन्द्रीय रिजर्व पुलिस बल-सीआरपीएफ अउ डिस्ट्रिक्ट रिजर्व गार्ड-डीआरजी के संयुक्त टीम ह सर्चिंग म निकले रिहीन। इही दउरान दरभा के चांदामेटा जगह म माओवादी मन ह सुरक्षा बल मन उपर गोलीबारी सुरू कर दीन। जवान मन डहार ले करे गे जवाबी कार्रवाई म एक झिन माईलोगिन माओवादी मारे गीस। बाद म घटनास्थल के तलासी के दउरान सुरक्षा बल मन ल एक ठिन एके-सैंतालीस राइफल अउ दू ठिन पिस्टल मिलीस।
मौसम
अवइया चैबीस घंटा के दउरान प्रदेस के कतकोन जगह म गरज-चमक के संग हल्का ले मध्यम बरसा के संभावना हे। उहें, बिलासपुर अउ सरगुजा संभाग के एक-दू जगह म भारी बरसा होय के संगेसंग गाज गिरे के चेतावनी घलो दे गेहे।
मौसम विभाग ले मिले जानबा के मुताबिक एक ठिन द्रोणिका पश्चिम-राजस्थान ले उत्तर-पूर्व बंगाल के खाड़ी तक स्थित हे, जेखर प्रभाव ले प्रदेस म बरसा के स्थिति बने हे।
अउ अब थोरकुन समाचार सार म-
– छत्तीसगढ़ उच्च न्यायालय ह सात ठिन जिला मनके सिविल जज के तबादल आदेस जारी करे हे।
– पंचायत अउ ग्रामीण विकास विभाग ह मनरेगा के तहत सिकायत के निष्पक्ष जांच अउ सुनवाई बर प्रदेस म चैदह ठिन लोकापाल मनके नियुक्ति दू बछर बर करे हे।
– बिलासपुर जिला म रेती के अवैध उत्खनन, परिवहन अउ भंडारण ल रोके बर कलेक्टर ह संयुक्त जांच दल के गठन करे हे।
– कोंडागांव जिला के माकड़ी म सेप्टिक टैंक के सफाई के दौरान होय घटना म दू झिन मजूर करे के मउत होगे।
– बलौदाबाजार जिला म नौकरी देवाय के नाव म दू सौ लोगन मन ले करीबन बीस करोड़ रूपिया के ठगी करइया एक झिन आरोपी ल पुलिस ह प्रयागराज ले गिरफ्तार करे हे।
अउ
– दुरूग जिला के भिलाई स्थित नंदौरी गांव म सहकारी बैंक म तैनात एक झिन गार्ड के हत्या करके लाखों रूपिया के लूट के मामला आगू आय हे।