कोविड टीका-पंजीकरण
केंद्रीय स्वास्थ्य अउ परिवार कल्याण मंत्रालय ह केहे हे कि कोविड टीका लगवाये बर आॅनलाइन पंजीकरण अउ समय लेना जरूरी नइ हे। मंत्रालय ह कीहिन हे कि अठारा बछर या एखर ले जादा आयु वर्ग के कोनो भी मनखे अपन तीर के टीका केंद्र म सीधा जाके पंजीकरण कराये के बाद टीका लगवा सकत हे। स्वास्थ्य मंत्रालय ह केहे हे कि स्वास्थ्य कार्यकर्ता अउ आशा कार्यकर्ता ग्रामीण क्षेत्र मन म अउ शहरी झुग्गी बस्ती मन म रहइया लाभार्थी मन ल तीर के टीका केंद्र म टीका लगवाये बर प्रोत्साहित करत हे। हेल्पलाइन नंबर एक शून्य सात पांच के माध्यम ले घलो पंजीकरण के सुविधा शुरू कर दे गेहे।
एति छत्तीसगढ़ म अठारा ले चालीस साल के आयु वर्ग के लोगन मनके पंजीयन सीजी टीका पोर्टल ले कराये जात हे। टीका लगाये के बाद ओमन ल सर्टिफिकेट दे जात हे। स्वास्थ्य विभाग के अधिकारी मन बताइन कि पहिला डोज लगाये के बाद लोगन मन ल मिलइया सर्टिफिकेट म यदि कोनो भी प्रकार के गलती ल मुख्य चिकित्सा अउ स्वास्थ्य अधिकारी कार्यालय म जाके सुधरवाये जा सकथे।
एखर अलावा पैंतालिस साल ले जादा आयु वर्ग के टीकाकरण करइया मनखे मन जेखर सर्टिफिकेट म गलती होवत हे त ओमन संबंधित टीकाकरण केंद्र म जाके पंजीयन पर्ची दिखाके ओमा सुधार करा सकत हे।
मुख्यमंत्री लोकार्पण
मुख्यमंत्री भूपेश बघेल ह कीहिन हे कि प्रदेश के जम्मों जिला चिकित्सालय अउ विकासखंड के अस्पताल म चिकित्सीय सुविधा पहुंचाय जाही। ओमन एखर बर कलेक्टर मन ल कार्ययोजना बनाये के निर्देश देहे।
मुख्यमंत्री ह आज वर्चुअल कार्यक्रम म सूरजपुर अउ कोरिया जिला म चार सौ साठ करोड़ रूपिया ले जादा के आने आने काम के लोकार्पण अउ भूमिपूजन करे गीस। एमा सूरजपुर जिला बर दू सौ चंवालिस करोड़ चालीस लाख रूपिया के लागत के एक सौ तेईस विकास काम शामिल हे। उंहें मुख्यमंत्री ह कोरिया जिला म दू सौ पंद्रह करोड़ पचहत्तर लाख रूपिया ले जादा के लागत ले दू सौ पैंतालिस विकास काम के लोकार्पण अउ भूमिपूजन करे गीस।
ए मउका म मुख्यमंत्री ह कीहिन कि गंवई म छोटे छोटे उद्योग ले लोगन मन ल रोजगार उपलब्ध कराय जाही। ओमन कोरिया म जिला अस्पताल भवन अउ चिरमिरी म एडवेंचर पार्क निर्माण काम म तेजी लाय बर कीहिन । संगेसंग सूरजपुर जिला म बांकी नदी म पुलिया निर्माण अउ ओड़गी अ लटोरी म सहकारी बैंक के शाखा खोले के घोषणा करीन।
मुख्यमंत्री ह सूरजपुर जिला के केनापारा पर्यटन केंद्र म सोला लाख इकहत्तर हजार रूपिया के रोजगार मिलइया महिला मनके सराहना करीन। वर्चुअल कार्यक्रम के दउरान मुख्यमंत्री ह महतारी दुलार योजना के तहत लाभ लेवइया परिवार के लईका मनले घलो गोठबात करीन।
मुख्यमंत्री-वृक्षारोपण प्रोत्साहन योजना
वन मंत्री मोहम्मद अकबर ह मुख्यमंत्री वृक्षारोपण प्रोत्साहन योजना के बने ढंग ले लागू करे बर अधिकारी मन ल निर्देश देहे। ओमन कीहिन कि प्रदेश के जम्मों नागरिक, ग्राम पंचायत अउ संयुक्त वन प्रबंधन समिति ए योजना के लाभ लेबर पात्र होही। श्री अकबर काली रायपुर म राखे गे वर्चुअल विभागीय समीक्षा बइठका म कैम्पा के तहत निर्माणाधीन काम ल घलो जल्दी पूरा करे बर कीहिन।
बतादन कि ए योजना के तहत जउन किसान मन खरीफ बछर दू हजार बीस म धान के फसल लीन हे, यदि ओमन धान फसल के बदला अपन खेत म वृक्षारोपण करत हे त ओमन ल अवइया तीन साल तक हर साल दस हजार रूपिया प्रति एकड़ के दर ले प्रोत्साहन राशि दे जाही।
नया शिक्षा सत्र
प्रदेश म आज ले नवा शिक्षा सत्र चालू होगे हे। कोरोना संक्रमण ल देखत फिलहाल लईका मन ल स्कूल आय म प्रतिबंध लगाय गेहे। उंहें शिक्षक अउ स्टाॅफ बर स्कूल मन म उपस्थित होना जरूरी हे। स्कूल शिक्षा विभाग ह लईका मनके आॅनलाईन क्लास शुरू करे बर निर्देश दीन हे। संगेसंग ओमन पाठयपुस्तक अउ यूनिफार्म घर जाके देबर कीहिन।
उंहें राजनांदगंाव जिला के ठाकुर प्यारेलाल उच्चतर माध्यमिक शाला म आज स्कूली लईका मन बर किताब बांटे गीस।
खरीफ फसल बोआई
राज्य म मानसून के सक्रिय होय के संगेसंग खरीफ फसल मनके बोवाइ के काम तेज होगे हे। एखर बर किसान मन ल खाद अउ बीज आपूर्ति सहकारी समिति के माध्यम ले कराये जात हे। कृषि विभाग के अनुसार अब तक लगभग तेरा हजार हेक्टेयर क्षेत्र म धान, तिलहन, अउ आने फसल मनके बोआई के काम पूरा कर ले गेहे। राज्य म ए बछर अड़तालिस लाख बीस हजार हेक्टेयर क्षेत्र म खरीफ फसल मनके बोआई के लक्ष्य राखे गेहे।
उंहें राज्य म जैविक खेती ल बढ़ावा देबर अउ रासायनिक उर्वरक म निर्भरता अउ कृषि लागत ल कम करे खातिर किसान, जैविक खाद के उपयोग करत हे। जेमन ल गौठान के माध्यम ले वर्मी कम्पोस्ट देवाय जात हे।
माओवादी गिरप्तार
बीजापुर जिला म सुरक्षा बल ह अलग अलग थाना क्षेत्र मनले चार माओवादी मन ल गिरप्तार करे हे। मिले जानकारी के मुताबिक जिला पुलिस बल अउ केंद्रीय रिजर्व पुलिस बल – सीआरपीएफ के संयुक्त टीम सर्चिंग बर निकले रीहिन। इही दउरान जिला के नैमेड़ अउ पामेड़ जंगल मनले ए माओवादी मन ल घेराबंदी करके गिरप्तार करे गीस। एमन उपर पुलिस पार्टी उपर हमला करे, आग लगाये अउ कतकोन माओवादी घटना म सामिल रेहे के आरोप हे।
ट्रेन परिचालन
रेलयात्री मनके सुविधा ल देखत नई दिल्ली अउ बिलासपुर के बीच रद्द करे गे दिल्ली स्पेशल ट्रेन ल बाईस जून ले फेर चलाये जाही। अइसने हापा अउ बिलासपुर के बीच साप्ताहिक सुपर फास्ट स्पेशल ट्रेन के परिचालन घलो छब्बीस जून ले चालू होही। ए बेरा यात्री मन ल कोविड नियम के पालन करना जरूरी होही।
ओति पश्चिम मध्य रेलवे के जबलपुर मंडल के कटंगीखुर्द-न्यू कटनी सेक्शन के बीच दोहरीकरण अउ इंटरलाॅकिंग काम के सेती छत्तीसगढ़ ले जवइया कुछु गाड़ी मनके परिचालन प्रभावित रीही।
ई-श्रेणी पंजीयन
प्रदेश के बेरोजगार युवा मन ल निर्माण काम म ठेका देके उद्देश्य ले ई-श्रेणी म पंजीयन शुरू करे गेहे। एखर तहत अब तक दू हजार तेरा नौजवान मन अपन पंजीयन कराय हे। जेमा ले बिलासपुर जिला के तीन युवा मन ल सात ठिन काम बर बंयालिस लाख पैंतालिस हजार रूपिया के कार्यादेश जारी करे हे।
टैªफिक चैपाल
सड़क दुर्घटना म कमी लाये बर रायपुर के यातायात पुलिस डहार ले काली ले ग्रामीण क्षेत्र मन म ट्रैफिक चैपाल के शुरूआत करे गेहे। एखर तहत जिला के खरोरा, फरहदा, पारागांव, गोढ़ी, अभनपुर, धरसींवा, आरंग अउ मंदिरहसौद म ट्रैफिक चैपाल क आयोजन करे गीस। एखर माध्यम ले लोगन मन ल यातायात के नियम बर जागरूक करे गीस, संगेसंग लोगन मन ल कोरोना ले बचाव संबंधी नियम के घलो जानकारी दे गीस।
उंहें रायपुर शहर म पुलिस डहार ले आने आने थाना क्षेत्र मन म अपराधिक गतिविधि म कमी लाये बर विशेष अभियान चलाये जात हे।
मौसम
मौसम विभाग ह अवइया चैबीस घंटा के दउरान प्रदेश म एक दू जगा मन म गरज चमके के संग हल्का ले मध्यम बरया होय के संभावना जताय हे। उंहें कुछ एक जगा मन म गाज गिरे के चेतावनी घलो देहे।
मौसम विभाग के मुताबिक एक ठिन द्रोणिका पंजाब ले उत्तर पश्चिम बंगाल के खाड़ी तक बने हुए हे। एखर प्रभाव ले प्रदेश के कोनो कोनो जगा म बरसा होवत हे।
अउ अब थोरकुन समाचार सार म-
– राज्य सरकार ह मनरेगा काम के जगा म कोरोना संक्रमण ले बचाव बर जरूरी उपाय करे के निर्देश दीन हे ।
– माउंट एवरेस्ट म झंडा फहराये के बाद पर्वतारोही नैना सिंह धाकड़ के जगदलपुर पहुंचे म नागरिक मन अभिनंदन करीन।
– राजनांदगांव जिला म पुलिस अधीक्षक डी. श्रवण ह कोरोना संकट काम म अच्छा काम करइया पुलिस कर्मी मन ल सम्मानित करीन।
अउ
– रायपुर जिला कलेक्टर ह सामाजिक कार्यक्रम मन म धुमाल, ब्राॅस बैंड अउ बैंड बाजा बजाये के सशर्त अनुमति दीन हे।